1. Dapre 3 Zan 3, 4, kwa ki fer nou kontan?

 ESKI ou kapab imazinen ki kantite zapot Zan ti kontan ler i ti tande ki bann ki i ti’n ede pour aprann laverite ti pe kontinyen servi Zeova fidelman? Zot ti fer fas avek en kantite problenm e Zan ti pe travay dir pour ranforsi lafwa sa bann Kretyen fidel, ki ti parey son bann zanfan. Pareyman, nou kontan ler nou zanfan oubyen bann ki nou ede pour aprann laverite, i dedye zot lavi avek Zeova e zot kontinyen servi Zeova.​—Lir 3 Zan 3, 4.

2. Akoz zapot Zan ti ekri sa trwa let?

² Ver lannen 98, i tre probab ki Zan ti pe reste Efez oubyen dan zanmirant Efez. I kapab ki i ti’n al reste laba apre ki i ti’n ganny large prizon lo zil Patmos. Ver sa menm letan, Zeova ti enspir li pour ekri trwa let. Sa bann let ti ganny ekrir pour ankouraz bann Kretyen fidel pour kontinyen annan lafwa dan Zezi e pour kontinyen viv an armoni avek laverite.

3. Ki kestyon nou pou reponn?

³ Zan ti sa sel zapot ki ti ankor vivan sa letan e i ti enkyet konsernan move lenfliyans ki bann fo ansenyan ti annan lo kongregasyon. b (1 Zan 2:18, 19, 26) Sa bann aposta ti dir ki zot konn Bondye me zot pa ti obei Son bann komannman. Dan sa lartik, nou pou diskit lo bann konsey ki Zan ti donnen e nou pou reponn trwa kestyon: Ki savedir viv an armoni avek laverite? Kwa ki kapab anpes nou viv an armoni avek laverite? Osi, ki mannyer nou kapab ed kanmarad pour reste dan laverite?

4. Dapre 1 Zan 2:3-6 ek 2 Zan 4, 6, ki nou bezwen fer pour viv an armoni avek laverite?

⁴ Pour nou viv an armoni avek laverite, nou bezwen konn laverite ki dan Parol Bondye, Labib. Osi, nou devret ‘obei bann komannman’ Zeova. (Lir 1 Zan 2:3-6; 2 Zan 4, 6.) Zezi in kit en legzanp parfe lo ki mannyer pour obei Zeova. Alor, en fason enportan ki nou obei Zeova, i ler nou swiv legzanp Zezi fidelman.​—Zan 8:29; 1 Pyer 2:21.

5. Lo kwa ki nou devret konvenki?

⁵ Pour nou kapab kontinyen viv an armoni avek laverite, nou devret konvenki ki Zeova i toultan dir laverite e ki tou sa ki I’n dir dan Labib i vre. Nou devret osi konvenki ki Zezi i sa Mesi ki’n ganny promet. Plizyer dimoun ozordi pa krwar ki Zezi in ganny swazir pour vin Lerwa dan Rwayonm Bondye. Zan ti averti bann Kretyen ki i ti annan “en kantite anbeter” ki ti kapab anbet bann ki pa ti vreman krwar dan laverite konsernan Zeova ek Zezi. (2 Zan 7-11) Zan ti ekri: “Lekel sa manter si i pa sa enn ki dir ki Zezi pa Kris?” (1 Zan 2:22) Sa sel fason ki nou kapab evite ganny anbete i par etidye Parol Bondye. Si nou fer sa, nou pou kapab aprann konn Zeova ek Zezi. (Zan 17:3) Koumsa, nou pou konvenki ki nou dan laverite.

6. Kwa ki kapab anpes bann zenn Kretyen viv an armoni avek laverite?

⁶ Tou Kretyen i devret fer atansyon pour li pa ganny anbete par bann lansennyman imen. (1 Zan 2:26) Bann zenn Kretyen i sirtou bezwen fer atansyon. En ser Franse ki apel Alexia c e ki annan 25 an, i dir: “Ler mon ti ankor lekol, mon ti aprann konsernan evolisyon ek lezot lansennyman imen e sa ti konfiz mwan. Parfwa, sa bann lansennyman ti fer sans. Mon ti krwar ki i ti pou mal pour inyor sa ki Labib i dir e krwar tou sa ki mon ansenyan i dir.” Alexia ti etidye sa liv Life​—How Did It Get Here? By Evolution or by Creation? Apre detrwa semenn, i ti  napa okenn dout. Alexia i dir: “Lo mwan menm mon ti fer sir ki sa ki Labib i dir, i vre. Mon ti realize ki ler mon viv dapre standar Labib, sa ti pou fer mwan ere e anpe.”

7. Ki nou bezwen fer atansyon e akoz?

⁷ Tou Kretyen, ki swa i zenn oubyen vye, i bezwen fer atansyon ki i pa fer krwar i servi Zeova e an menm tan i pe fer sa ki mal. Zan ti dir ki nou pa kapab viv en lavi imoral e an menm tan viv an armoni avek laverite. (1 Zan 1:6) Si nou anvi fer plezir Zeova, nou bezwen toultan gard antet ki Zeova i vwar tou sa ki nou fer. Menm si lezot dimoun pa vwar sa ki nou pe fer an sekre, Zeova i vwar tou sa ki nou fer.​—Ebr. 4:13.

8. Ki nou pa devret aksepte?

⁸ Nou pa devret aksepte pwennvi lemonn lo pese. Zapot Zan ti ekri: “Si nou dir, ‘Nou pa fer pese,’ nou pe anbet nou lekor.” (1 Zan 1:8) Dan letan zapot Zan, bann aposta ti esey fer dimoun krwar ki zot kapab volonterman fer keksoz ki mal e an menm tan kontinyen reste zanmi Bondye. Ozordi, nou pe viv parmi bann dimoun ki annan sa menm pwennvi. En kantite dimoun i dir ki zot krwar dan Bondye me zot pa aksepte pwennvi Zeova lo pese, sirtou ler i annan pour fer avek sèks. I annan serten konportman seksyel ki Zeova i vwar konman pese me sa bann dimoun i dir ki en dimoun i annan drwa fer sa bann keksoz si li i anvi.

9. Akoz i bon ler bann zenn i fer sa ki Labib i dir i byen?

⁹ I kapab vreman difisil pour bann zenn Kretyen annan sa bon pwennvi lo sèks ler dimoun otour zot, ki swa kot lekol oubyen kot travay, pa aksepte sa ki Labib i dir lo sèks. Sanmenm ki ti arive avek Aleksandar. I dir: “Serten fiy kot  lekol ti esey met presyon lo mwan pour fer sèks avek zot. Zot ti dir ki vi ki mon pa ti avek okenn fiy, i bezwen ki mon ti en omoseksyel.” En keksoz parey i kapab arive avek ou me si ou fer sa ki Labib i dir i byen, ou pou annan respe pour ou lekor, ou pou an bonn sante, ou pou pli byen emosyonnelman e ou pou gard ou lanmitye avek Zeova. Sak fwa ou reziste tantasyon, i pou pli fasil pour ou fer sa ki byen. Osi, gard antet ki sa move pwennvi ki lemonn i annan lo sèks i sorti kot Satan. Alor, ler ou refize pour mazin parey bann dimoun dan lemonn, ou “ranport laviktwar lo sa enn move.”​—1 Zan 2:14.

10. Ki mannyer 1 Zan 1:9 i ed nou servi Zeova avek en konsyans kler?

¹⁰ Nou aksepte ki Zeova i annan drwa dir nou kwa ki en pese. Alor, nou fer nou mye pour pa fer pese. Me ler nou fer pese, nou konfes nou pese avek Zeova dan lapriyer. (Lir 1 Zan 1:9.) Si nou fer en pese grav, nou rod led bann ansyen ki Zeova in apwente pour pran swen avek nou. (Zak 5:14-16) Par kont, nou pa devret kontinyen mazin bann move keksoz ki nou’n fer dan lepase. Akoz non? Parski nou Papa ki kontan nou, in donn son Garson konman ranson pour nou pese kapab ganny pardonnen. Ler Zeova i dir ki i pou pardonn nou si nou vreman regrete pour sa ki nou’n fer, i pou vreman fer li. Zeova in fer li posib pour nou kontinyen servi li avek en konsyans kler.​—1 Zan 2:1, 2, 12; 3:19, 20.

11. Ki mannyer nou kapab protez nou lekor kont bann lansennyman ki kapab afebli nou lafwa?

¹¹ Nou pa devret aksepte lansennyman bann aposta. Depi ki kongregasyon Kretyen in ganny etabli, Dyab in toultan esey afebli lafwa bann Kretyen. Alor, nou bezwen konn fer diferans ant  laverite ek mansonz. d Bann ki pa kontan nou i kapab koz mansonz lo nou atraver Enternet oubyen rezo sosyal, pour zot esey afebli nou lafwa dan Zeova e nou lanmour pour nou bann frer ek ser. Pa krwar dan sa bann mansonz parski zot sorti kot Satan!​—1 Zan 4:1, 6; Rev. 12:9.

12. Akoz nou devret ranforsi nou lafwa dan bann laverite ki nou’n aprann?

¹² Pour nou kapab reziste bann latak Satan, nou bezwen ranforsi nou lafwa dan Zezi e dan lafason ki Zeova pe servi Zezi pour fer Son lavolonte. Nou osi bezwen annan konfyans dan sa bann ki Zeova pe servi ozordi pour diriz son lorganizasyon. (Mat. 24:45-47) Nou ranforsi nou lafwa ler nou etidye Parol Bondye regilyerman. Koumsa, nou lafwa pou parey en pye dibwa ki son rasin i byen anrasinen dan later. Pol ti dir en keksoz parey ler i ti ekri kongregasyon Kolos. I ti dir: “Zis parey zot in aksepte Kris Zezi nou Senyer, kontinyen viv dan linite avek li. Kontinyen batir zot dan Kris e anrasinen dan li. Kontinyen fer zot lafwa vin pli stab.” (Kol. 2:6, 7) Si nou fer bokou zefor pour ranforsi nou lafwa, napa nanryen ki Satan ek bann ki siport li pou kapab fer pour anpes nou viv an armoni avek laverite.​—2 Zan 8, 9.

13. Ki nou devret ekspekte e akoz?

¹³ Nou ekspekte ki lemonn i ay nou. (1 Zan 3:13) Zan i fer nou rapel ki “lemonn antye i anba kontrol Satan.” (1 Zan 5:19) Anmezir ki lafen sa lemonn i vin pli pros, Satan i vin deplizanpli pli ankoler. (Rev. 12:12) I servi bann latak anba anba, tel parey imoralite seksyel oubyen mansonz bann aposta. I osi servi bann latak direk, parey persekisyon. Satan i konnen ki i reste li zis en ptigin letan pour esey aret sa travay predikasyon oubyen afebli nou lafwa. Alor, nou pa sirprann ki sa travay predikasyon in ganny enterdi oubyen restrikte dan serten pei. Me kantmenm sa, nou bann frer ek ser dan sa bann pei pe andire. Zot pe prouve ki malgre nenport kwa ki Satan i fer avek pep Bondye, nou kapab reste fidel!

14. Ki en fason nou kapab ed nou bann frer ek ser pour reste dan laverite?

¹⁴ Pour nou kapab ed nou bann frer ek ser pour reste dan laverite, nou bezwen demontre konpasyon. (1 Zan 3:10, 11, 16-18) Nou bezwen kontan kanmarad pa zis ler keksoz pe al byen me ler i annan problenm osi. Par egzanp, eski ou konn en dimoun ki’n perdi en dimoun ki i kontan dan lanmor e ki bezwen ganny rekonforte oubyen ki bezwen led pratik? Ouswa eski ou’n tande ki en frer oubyen en ser in perdi sa ki zot ti annan dan en dezas natirel e zot bezwen led pour rekonstri zot Lasal Rwayonm oubyen zot lakour? Nou demontre nou lanmour ek konpasyon pour nou bann frer ek ser pa zis par sa ki nou dir me pli enportan, par sa ki nou fer.

15. Dapre 1 Zan 4:7, 8, ki nou bezwen fer?

¹⁵ Nou swiv legzanp nou Papa ki dan lesyel ler nou demontre lanmour pour kanmarad. (Lir 1 Zan 4:7, 8.) En fason enportan ki nou demontre lanmour i ler nou pardonn kanmarad. Par egzanp, i kapab ki en dimoun i ofans nou me apre i  demann leskiz. Nou demontre lanmour ler nou pardonn li e oubliy sa ki i’n fer nou. (Kol. 3:13) En frer ki apel Aldo ti ofanse ler en frer ki i ti respekte ti dir en keksoz blesan konsernan bann dimoun ki annan menm kiltir avek li. Aldo i dir: “Mon ti toultan pe priy Zeova pour ed mwan pour mon pa ganny bann santiman negatif anver sa frer.” Me Aldo ti fer en lot keksoz. I ti demann sa frer pour al predikasyon avek li. Dan predikasyon, Aldo ti eksplik sa frer ki sa remark ti’n bles li. Aldo i dir: “Ler sa frer ti tande ki kantite sa remark ti’n bles mwan, i ti demann leskiz. Lafason ki i ti koze ti fer mwan remarke ki i ti vreman regrete. Apre sa nou ti revin de bon zanmi.”

16-17. Ki nou devret determinen pour fer?

¹⁶ Zapot Zan ti kontan son bann frer ek ser en kantite e i ti anvi ki zot annan en lafwa for. Nou kapab vwar sa atraver bann konsey ki i ti donn zot dan sa trwa let ki i ti ekri. I vreman ankourazan pour konnen ki sa bann zonm ek madanm, ki pou dirize ansanm avek Zezi dan lesyel i kontan lezot zis parey zapot Zan.​—1 Zan 2:27.

¹⁷ Annou pran aker sa bann konsey ki nou’n diskite dan sa lartik. Annou determinen pour viv an armoni avek laverite, setadir obei Zeova dan tou sa ki nou fer. Etidye son Parol e met konfyans ladan. Batir en lafwa for dan Zezi. Pa les nou ganny anbete par bann lansennyman imen ek lansennyman bann aposta. Pa zanmen fer krwar ki ou pe servi Zeova me an menm tan ou pe fer sa ki mal e pa ekout bann ki anvi ou fer sa ki mal. Viv dapre bann standar moral Zeova. Annou ed nou bann frer ek ser pour reste for par pardonn bann ki’n bles nou e ed bann ki dan bezwen. Si nou fer sa bann keksoz, nou pou kontinyen viv an armoni avek laverite menm si nou fer fas avek difikilte.