1. Ki Zeova in fer pour ou?

 KI MANNYER ou ti vin en Temwen Zeova? I kapab ki premyerman ou ti tann “sa bon nouvel” avek ou paran, en koleg travay, en kanmarad lekol oubyen ler en Temwen Zeova ti pas kot ou dan predikasyon. (Mark 13:10) Apre sa, en dimoun ti pran en kantite letan ek zefor pour etidye Labib avek ou. Pandan ou letid ou ti aprann pour kontan Zeova e ou ti osi aprann ki Zeova i kontan ou. Zeova in atir ou ver laverite e aprezan konman en disip Zezi Kri ou annan sa lespwar pour viv pour touzour. (Zan 6:44) San dout, ou vreman rekonesan ki Zeova in motiv sa dimoun pour ansenny ou laverite e ki I’n aksepte ou konman enn son serviter.

2. Ki nou pou diskite dan sa lartik?

² Vi ki nou konn laverite, nou annan sa privilez pour ed lezot pour zwenn ansanm avek nou lo sa semen ki anmenn ver lavi. Petet i fasil pour nou anons sa bon nouvel kazankaz me i kapab difisil pour demann en dimoun si i ti pou kontan pour etidye Labib oubyen pour kondwir en letid Labib avek en dimoun. Eski ou santi koumsa? Si wi, petet ou pou trouv bann sizesyon dan sa lartik ki kapab ed ou. Nou pou vwar kwa ki motiv nou pour ede fer disip. Nou pou osi vwar ki mannyer nou kapab sirmont bann difikilte ki kapab fer nou ezite pour kondwir en letid Labib. Premyerman, annou vwar akoz nou bezwen anons sa bon nouvel e ansenny lezot.

3. Akoz nou anons sa bon nouvel?

³ Ler Zezi ti lo later i ti donn son bann disip lord pour fer de keksoz. Premyerman, i ti dir zot ki zot bezwen  anons sa bon nouvel konsernan Rwayonm Bondye e i ti montre zot ki mannyer zot pou fer sa. (Mat. 10:7; Lik 8:1) Par egzanp, i ti dir son bann disip ki zot pou fer ler dimoun i aksepte sa mesaz Rwayonm e ki zot pou fer ler dimoun pa aksepte sa mesaz. (Lik 9:2-5) I ti osi eksplike ki son bann disip ti pou anons sa bon nouvel avek bokou plis dimoun e dan bokou plis landrwa “pour donn en temwannyaz avek tou nasyon.” (Mat. 24:14; Akt 1:8) Ki swa bann dimoun ti pou ekoute oubyen non, bann disip Zezi ti pou bezwen koz avek dimoun konsernan Rwayonm Bondye e ki sa Rwayonm ti pou fer.

4. Dapre Matye 28:18-20, ki sa dezyenm keksoz ki Zezi ti donn lord son bann disip pour fer?

⁴ Ki sa dezyenm keksoz ki Zezi ti donn lord son bann disip pour fer? I ti dir son bann disip pour ansenny bann dimoun pour obei tou sa ki in donn lord pour fer. Serten dimoun i kapab dir ki sa lord ki Zezi ti donnen pour al anons sa bon nouvel e ansenny dimoun, ti zis pour bann Kretyen dan premye syek. Me eski sa i vre? Non. Zezi ti montre ki sa travay vreman enportan ti pou kontinyen ganny fer ziska nou letan setadir “ziska lafen sa lemonn.” (Lir Matye 28:18-20.) I tre probab ki Zezi ti donn sa lord ler i ti aparet avek plis ki 500 son bann disip. (1 Kor. 15:6) Dan en vizyon ki Zezi ti donn zapot Zan, i ti montre klerman ki i ekspekte ki tou son bann disip i ed lezot aprann konn Zeova.​—Rev. 22:17.

5. Ki legzanp zapot Pol ti servi dan 1 Korentyen 3:6-9, pour montre sa konneksyon ki i annan ant anons sa bon nouvel e ansennyen?

⁵ Zapot Pol ti konpar sa travay pour fer disip avek travay ki ganny fer dan en plantasyon e sa i montre ki nou bezwen fer plis ki zis senm lagrenn. I ti rapel bann Kretyen Korent: “Mwan mon’n plante, Apolos in aroze . . . Zot zot sa plantasyon ki Bondye pe kiltive.” (Lir 1 Korentyen 3:6-9.) Nou bann travayer dan plantasyon Bondye. Alor, ler nou anons sa bon nouvel i konmsi nou pe plante e ler nou ansenny dimoun i konmsi nou pe aroze. (Zan 4:35) Me nou rekonnet ki Bondye ki fer pouse, setadir ki atir dimoun ver li.

6. Ler nou ansenny dimoun, ki nou devret ed zot pour fer?

⁶ Nou pe rod bann ki “annan sa bon kondisyon leker pour ganny lavi eternel.” (Akt 13:48) Pour ed sa bann dimoun vin disip, nou bezwen ed zot pour (1) konpran, (2) pour aksepte e (3) aplik sa ki zot pe aprann dan Labib. (Zan 17:3; Kol. 2:6, 7; 1 Tesa. 2:13) Tou dimoun dan kongregasyon i kapab ed en etidyan Labib par demontre lanmour anver li e akeyir li ler i vin renyon. (Zan 13:35) I kapab ki sa enn ki pe kondwir sa letid pou bezwen pran bokou son letan ek lenerzi pour ed sa etidyan abandonn bann krwayans oubyen pratik “ki’n byen anrasinen.” (2 Kor. 10:4, 5) I kapab pran plizyer mwan pour ed en dimoun fer sa bann sanzman dan son lavi pour li kalifye pour batize. Me i vo lapenn pour fer sa bann zefor.

7. Kwa ki motiv nou pour anons sa bon nouvel e fer disip?

⁷ Akoz nou anons sa bon nouvel avek dimoun e nou ansenny zot pour vin bann disip? Premyerman i akoz nou kontan Zeova. Ler ou fer ou mye pour obei sa lord pour anons sa bon nouvel e fer disip, ou pe montre ki ou kontan Bondye. (1 Zan 5:3) Mazin lo sa: Ou lanmour pour Zeova i motiv  ou pour anons sa bon nouvel avek dimoun. Eski i ti fasil pour ou obei sa lord? Petet non. Eski ou ti per ler ou ti al predikasyon pour premye fwa? Wi. Me ou ti konnen ki sa i sa travay ki Zezi i anvi ou fer e ou ti obei son lord. I tre probab ki apre en serten letan i ti vin pli fasil pour ou partisip dan predikasyon. Me ki mannyer ou santi konsernan kondwir en letid Labib? Eski ou per ler ou mazin lo la? Petet. Me si ou demann Zeova pour ed ou annan kouraz pour ofer en letid Labib, Zeova i kapab donn ou sa dezir pour fer disip.

8. Dapre Mark 6:34, kwa ankor ki kapab motiv nou pour ansenny lezot?

⁸ Dezyenmman, lanmour pour nou prosen i motiv nou pour anons sa bon nouvel. En zour, Zezi ek son bann disip ti fatige apre ki zot ti’n anons sa bon nouvel. Zot ti bezwen en landrwa kot zot ti kapab repoze me en gran lafoul dimoun ti vin rod zot. Zezi ti pran pitye pour sa bann dimoun e i ti konmans ansenny zot “en kantite keksoz.” (Lir Mark 6:34.) I ti fer sa menm si i ti vreman fatige. Akoz? Zezi ti met li dan plas sa bann dimoun. I ti anvi ed zot parski i ti vwar ki zot ti pe soufer e zot ti bezwen lespwar. Dan nou letan keksoz i i ankor parey. Menm si i paret ki zot deza ere, dimoun i annan problenm e zot bezwen lespwar. Zot parey bann mouton ki’n perdi e ki napa en berze pour gid zot. Zapot Pol ti dir ki bann dimoun koumsa pa konn Bondye e zot napa lespwar. (Efe. 2:12) Zot lo sa semen ki “anmenn ver destriksyon.” (Mat. 7:13) Ler nou mazin lo ki kantite dimoun dan nou teritwar i bezwen aprann konn Bondye, lanmour ek konpasyon i motiv nou pour ed zot. Pli bon fason ki nou kapab ed zot i par ofer zot en letid Labib.

9. Dapre Filipyen 2:13, ki mannyer Zeova i kapab ed ou?

⁹ Petet ou ezite pour ofer en dimoun en letid Labib parski ou konnen ki ou pou bezwen pas en kantite letan pe prepare e kondwir sa letid. Si i koumsa ki ou santi, koz avek Zeova. Demann li pour ed ou pour trouv en dimoun ki ou pou kapab fer en letid Labib avek. (Lir Filipyen 2:13.) Zapot Zan ti dir nou ki Bondye pour reponn nou lapriyer si i an armoni avek Son lavolonte. (1 Zan 5:14, 15) Alor ou kapab asire ki Zeova pou ed ou pour annan sa dezir pour fer disip.

10-11. Akoz nou kapab ezite pour kondwir en letid Labib?

¹⁰ Nou konnen ki i vreman enportan pour ansenny lezot. Me i kapab difisil pour nou fer sa parey nou ti ava kontan fer. Annou vwar serten sa bann difikilte e ki mannyer nou kapab sirmont zot.

¹¹ I kapab ki nou pa reisi fer sa kantite ki nou ti ava kontan. Par egzanp, serten proklanmater i aze oubyen zot annan en problenm lasante. Eski ou dan sa menm sityasyon? Si wi, annou vwar enn parmi bann leson ki nou’n aprann avek pandemi COVID-19. Nou’n aprann ki nou kapab kondwir bann letid Labib par servi nou telefonn oubyen lezot lekipman elektronik. Alor ou kapab kondwir en letid Labib san ki ou bezwen kit ou lakour e sa i kapab pli fasil pour ou. I annan ankor en lot lavantaz. Serten dimoun i anvi etidye Labib me zot pa disponib pandan sa letan ki bann frer ek ser i dan predikasyon. Me i kapab ki zot disponib byen bomaten oubyen tar aswar. Eski ou kapab fer ou disponib pandan sa bann ler? Zezi ti  ansenny Nikodenm aswar parski sa i letan ki Nikodenm ti disponib.​—Zan 3:1, 2.

12. Kwa ki konvenk nou ki nou kapab kondwir en letid Labib?

¹² Petet nou krwar ki nou pa kapab kondwir en letid Labib. I kapab ki nou santi ki nou devret annan plis konnesans ek abilite konman en ansenyan avan ki nou konmans etidye Labib avek en dimoun. Si i koumsa ki ou santi, annou vwar trwa keksoz ki pou konvenk ou ki ou kapab kondwir en letid Labib. Premyerman, Zeova i konsider ou kalifye pour ansenny lezot. (2 Kor. 3:5) Dezyenmman, Zezi ki annan “tou lotorite dan lesyel e lo later,” in donn ou lord pour ansennyen. (Mat. 28:18) Trwazyenmman, ou kapab depan lo lezot pour ed ou. Zezi ti depan lo sa ki son Papa ti ansenny li pour dir, alor ou osi ou kapab fer parey. (Zan 8:28; 12:49) An plis ou kapab demann ou sirveyan group predikasyon, en pionye eksperyanse oubyen en lot proklanmater eksperyanse pour ed ou konmans en letid Labib. En fason ki ou kapab aprann pour vin en pli bon ansennyen i ler ou asiste en letid Labib ki enn sa bann proklanmater pe fer.

13. Akoz nou bezwen pare pour adapte avek diferan fason ansennyen?

¹³ I kapab difisil pour konmans servi bann nouvo metod ek nouvo zouti pour predikasyon. Lafason ki nou kondwir bann letid Labib in sanze. Aprezan nou servi sa liv Viv ere pour touzour! Sa liv i fer ki lafason ki nou prepar e kondwir en letid Labib i pa parey avan. I annan mwens paragraf pour lir e letid i deroul parey en konversasyon avek sa etidyan. Ler nou ansennyen, nou servi plis video e plis piblikasyon lo nou sit Enternet e dan JW Library^®. Si ou pa konnen ki mannyer pour servi sa bann zouti, demann en dimoun pour ed ou pour aprann servi zot. Nou kontan fer keksoz ki nou abitye fer. Alor i pa fasil pour nou adapte avek bann nouvo fason fer keksoz. Me avek led Zeova e avek led lezot ou pou vwar li pli fasil pour adapte e menm pli gou pour kondwir en letid Labib. En pionye ti dir: “Sa metod pour kondwir en letid Labib i agreab pour sa ansenyan ek sa etidyan.”

14. Ki nou devret rapel ler nou fer predikasyon dan en landrwa kot dimoun pa ekout nou mesaz e ki mannyer 1 Korentyen 3:6, 7 i ankouraz nou?

¹⁴ I kapab ki nou reste dan en landrwa kot i difisil pour konmans letid Labib. Serten dimoun pa enterese avek nou mesaz oubyen zot opoz nou mesaz. Kwa ki kapab ed nou reste pozitif dan en landrwa koumsa? Rapel ki dan sa lemonn ki nou pe viv ladan sirkonstans dimoun i kapab sanz vitman. Bann dimoun ki avan pa ti enterese i kapab realize ki zot bezwen gidans Bondye. (Mat. 5:3) Serten ki avan ti refize pour aksepte nou bann piblikasyon pli tar zot in aksepte en letid Labib. Nou osi konnen ki Zeova i Met rekolt. (Mat. 9:38) I anvi ki nou kontinyen plante e aroze me li ki responsab pour fer pouse. (1 Kor. 3:6, 7) I vreman ankourazan pour rapel ki menm si nou pa pe kondwir en letid Labib pour lemoman, Zeova pa rekonpans nou pour lakantite dimoun ki nou donn piblikasyon avek oubyen ki nou konmans fer letid avek me i rekonpans nou dapre zefor ki nou fer pour ed dimoun. b

15. Ki mannyer Zeova i santi ler en dimoun i aksepte en letid Labib e aplik sa ki i pe aprann?

¹⁵ Zeova i kontan ler en dimoun i aksepte laverite dan Labib e i partaz sa laverite avek lezot dimoun. (Prov. 23:15, 16) Zeova i vreman kontan ler i vwar son pep pe anons sa bon nouvel e ansenny dimoun avek devouman. Par egzanp, menm si pandan lannen servis 2020, i ti annan en pandemi ki ti afekte lemonn antye, bann proklanmater partou dan lemonn ti kondwir 7,705,765 letid Labib e sa ti fer ki 241,994 dimoun ti dedye zot lavi avek Zeova e batize. Sa bann nouvo disip pou kondwir bann letid Labib e fer nouvo disip. (Lik 6:40) Nou kapab asire ki Zeova i kontan ler i vwar nou pe ansenny lezot pour vin disip.

16. Ki en bon lobzektif nou kapab annan?

¹⁶ Sa travay pour fer disip i pa enn fasil me avek led Zeova nou kapab partisip dan sa travay pour ansenny lezot pour kontan nou Papa ki dan lesyel. Eski nou kapab met en lobzektif pour kondwir omwen en letid Labib? Nou kapab sirprann avek sa ki pou arive si nou servi sak loportinite ki nou gannyen pour demann en dimoun si i ti ava kontan etidye Labib. Nou kapab asire ki Zeova pou beni nou zefor.

17. Ki mannyer nou pou santi ler nou kondwir en letid Labib?

¹⁷ I en gran privilez pour anons sa bon nouvel e ansenny laverite avek lezot. Sa travay i fer nou vreman ere. Zapot Pol ki ti ed en kantite dimoun Tesalonik pour vin disip i eksplike ki mannyer i ti santi e i dir: “Alor, kwa ki nou lespwar, nou lazwa ouswa nou rekonpans devan nou Senyer Zezi ler i la? Pa i zot menm? Wi vreman, zot menm ki nou laglwar ek nou lazwa.” (1 Tesa. 2:19, 20; Akt 17:1-4) En kantite frer ek ser ozordi in santi parey. En ser ki apel Stéphanie ki ansanm avek son msye in ed en kantite dimoun pour batize, i dir: “Napa pli gran lazwa ki ler ou ed en dimoun dedye zot lavi avek Zeova.”