Zeova i anvi ki de dimoun ki marye i ere e ki zot annan en relasyon pros avek kanmarad ki pou dire. (Mat. 19:4-6) Si ou anvi marye, ki mannyer ou kapab trouv en bon konzwen? Vi ki Zeova i nou Kreater, i konnen kwa ki nou bezwen fer pour ki nou annan en maryaz ki ere. Alor, si ou aplik bann prensip ki i’n donn nou, ou pou vreman ere. Annou vwar serten sa bann prensip.

Premyerman, nou bezwen konpran en keksoz: “Leker i pli tret ki okenn keksoz e i tre move.” (Zer. 17:9, NWT) Ler de dimoun ki anvi marye i rankontre kanmarad e zot konmans pwente, zot kapab devlop bann santiman for vitman e sa i kapab fer li difisil pour zot fer bann desizyon saz. Si zot deside pour marye zis akoz zot annan sa bann santiman for pour kanmarad, i kapab ki pli tar zot pou malere. (Prov. 28:26) I pour sa rezon ki i pa saz pour de dimoun eksprim zot bann santiman profon oubyen fer bann promes avan ki zot vreman konn kanmarad.

Proverb 22:3 i dir: “Ler maler i vini, en zonm pridan i war e i al kasyet; sa enn ki san leksperyans, i fonse e pey son konsekans.” Kwa ki kapab danzere avek bann sit Enternet kot dimoun i ale pour rod en konzwen? Serten dimoun in zwenn dimoun lo Enternet, zot in konmans pwente e apre zot in realize ki sa dimoun in anbet zot. Osi, bann dimoun ki pa onnet in kree bann fo lidantite pour anbet dimoun e vol zot larzan. Parfwa, sa bann dimoun ki pa onnet ti menm dir ki zot Temwen Zeova.

Annou vwar en lot danze. Serten sa bann sit Enternet kot dimoun i ale pour rod en konzwen i servi bann progranm konpiter pour konnen lekel dimoun ki pou ale avek kanmarad. Me i napa okenn levidans ki montre ki sa metod i vreman marse. Maryaz i en keksoz vreman enportan. Alor, eski i ti pou saz pour annan konfyans dan en progranm konpiter ki zonm in fer pour deside avek lekel ou pou marye? Eski nou kapab konpar bann prensip Labib avek bann progranm konpiter?​—Prov. 1:7; 3:5-7.

Dan Proverb 14:15 i annan en prensip ki dir: “En dimoun bet i krwar tou sa ki i tande;  me en dimoun pridan i gete kote i met son lipye.” Avan ki ou deside si en dimoun pou vin en bon konzwen, ou bezwen konn li byen. Me i kapab difisil pour fer sa, si ou zwenn li lo Enternet. Menm si zot kapab vwar lenformasyon kanmarad e zot kapab pas en kantite letan pe koze avek kanmarad, eski ou kapab dir ki ou konn sa dimoun? Serten ki ti krwar ki zot ti’n zwenn sa pli bon dimoun pour zot, ti soke ler zot ti finalman zwenn sa dimoun an personn.

En psalmis ti dir: “Mon pa frekant bann ki anbet lezot e mon reste lwen avek bann ki kasyet sa ki zot ete.” (Ps. 26:4, NWT) En kantite dimoun i krwar ki i normal pour donn bann fo lenformasyon lo bann sit Enternet, pour fer zot paret pli atiran. Zot kapab kasyet sa ki zot vreman ete oubyen ou kapab pa vwar zot bann move kalite ler zot pe anvoy mesaz pour lezot. I enportan pour reflesir lo sa bann kestyon swivan: Menm si en dimoun i kapab dir ki i en Temwen Zeova, eski i’n batize konman en Temwen Zeova? Eski i en Kretyen matir? Eski i annan en bon lanmitye avek Zeova? Eski i annan en bon repitasyon dan kongregasyon? Eski i en bon legzanp dan kongregasyon oubyen eski i en “move frekantasyon”? (1 Kor. 15:33; 2 Tim. 2:20, 21) Dapre bann prensip Labib, eski i lib pour marye? Ou bezwen konn larepons sa bann kestyon. Me i kapab difisil pour konn sa bann larepons si ou pa koz avek lezot Temwen Zeova ki konn sa dimoun byen. (Prov. 15:22) Byensir, en serviter fidel Zeova pa pou anvi marye avek en dimoun ki pa en Temwen Zeova.​—2 Kor. 6:14; 1 Kor. 7:39.

Vi ki i danzere pour servi sa bann sit Enternet, i annan bann pli bon fason pour rod e aprann konn en dimoun ki kapab vin ou konzwen. Me kote ou kapab zwenn en dimoun ki kapab vin en bon konzwen pour ou? Normalman, Temwen Zeova i aprann konn kanmarad ler zot asiste renyon, lasanble e dan bann lezot rankont.

Ler Temwen Zeova pa kapab zwenn parey i leka dan letan pandemi COVID-19, nou servi bann lekipman elektronik pour asiste renyon e sa i en fason pour rankontre lezot Temwen Zeova ki selibater. Dan renyon, ou kapab vwar zot pe partisipe e pe fer komanter. (1 Tim. 6:11, 12) Ou kapab osi koz avek zot dan bann pti group ki ganny fer apre renyon. Dan bann rankont ki ganny fer atraver Enternet, ou kapab vwar ki mannyer sa dimoun ki ou enterese avek, i tret lezot. Sa pou ed ou konn son personnalite. (1 Pyer 3:4) Anmezir ki ou konn sa dimoun pli byen, ou pou kapab konnen si zot annan menm lobzektif ek standar moral e si zot pou vin en bon konzwen pour kanmarad.

Ler bann selibater i servi bann prensip Labib pour ed zot trouv en konzwen, i tre probab ki zot pou annan en maryaz ki ere. I parey sa ki sa proverb i dir: “Sa enn ki’n trouv en bon madanm [oubyen msye] in trouv en bon keksoz e i ganny faver Zeova.”​—Prov. 18:22, NWT.