1. Akoz i saz pour prepare pour dezas?

 SI NOU’N prepar nou pour en keksoz, sa i kapab sov nou lavi. Par egzanp, ler i annan en dezas, i tre probab ki dimoun ki’n prepare pour sa dezas pou sirviv e zot pou kapab ed lezot. En lorganizasyon ki baze Lerop ki esey ed dimoun, i dir: “Ler dimoun i prepar byen, sa i kapab sov zot lavi.”

2. Akoz nou devret met pare pour gran ladetres? (Matye 24:44)

² “Gran ladetres” pou konmans en sel kou. (Mat. 24:21) Me gran ladetres pou diferan avek serten dezas parski nou konnen ki i pe vini. Apepre 2,000 an pase, Zezi ti dir son bann disip ki zot bezwen met pare pour sa zour. (Lir Matye 24:44.) Si nou’n met pare, i pou pli fasil pour nou andire pandan sa moman difisil e pour ed lezot fer parey.​—Lik 21:36.

3. Ki mannyer landirans, konpasyon ek lanmour pou ed nou met pare pour gran ladetres?

³ Nou bezwen devlop trwa kalite ki pou ed nou pour met pare pour gran ladetres. Ki nou pou fer si nou ganny demande pour anons mesaz zizman e lezot i opoz nou? (Rev. 16:21) Nou pou bezwen annan landirans pour nou kapab obei Zeova e annan konfyans ki i pou protez nou. Ki nou pou fer si nou bann frer ek ser i perdi serten oubyen tou zot bann keksoz materyel? (Aba. 3:17, 18) Nou pou bezwen annan konpasyon parski sa pou motiv nou pour ed zot. Ki mannyer nou pou reazir si apre ki nou’n ganny atake avek en group nasyon ki’n ralye ansanm, nou bezwen viv ansanm avek nou bann frer ek ser pour en pe letan? (Ezek. 38:10-12) Nou pou bezwen annan en gran lanmour pour nou bann frer ek ser parski sa pou ed nou pour nou andire pandan sa letan difisil.

4. Ki mannyer Labib i montre ki nou bezwen kontinyen devlop landirans, konpasyon ek lanmour?

⁴ Parol Bondye i ankouraz nou pour kontinyen devlop landirans, konpasyon ek lanmour. Lik 21:19 i dir: “Si zot andire, zot pou sov zot lavi.” Kolosyen 3:12 i dir: “Demontre . . . konpasyon.” 1 Tesalonisyen 4:9, 10 i dir: “Bondye in ansenny zot  pour kontan kanmarad. . . . Me nou sipliy zot mon bann frer, pour kontinyen fer li plis ankor.” Tou sa bann verse ti ganny ekrir pour bann disip ki ti pe deza demontre landirans, konpasyon ek lanmour. Kantmenm sa, zot ti bezwen kontinyen demontre sa bann kalite. Nou osi nou devret fer parey. Pour ed nou fer sa, nou pou vwar ki mannyer bann Kretyen dan premye syek ti demontre sak sa bann kalite. Apre sa, nou pou vwar ki mannyer nou kapab swiv legzanp sa bann disip e montre ki nou pare pour gran ladetres.

5. Ki mannyer bann Kretyen dan premye syek ti demontre landirans ler zot ti fer fas avek difikilte?

⁵ Bann Kretyen dan premye syek ti bezwen landirans. (Ebr. 10:36) Zot ti fer fas avek menm problenm ki laplipar dimoun ki ti pe viv sa letan ti pe fer fas avek. Me zot ti osi fer fas avek lezot problenm parski zot ti bann Kretyen. En kantite parmi zot ti ganny persekite avek bann sef larelizyon Zwif, bann lotorite Romen e osi avek zot prop fanmir. (Mat. 10:21) Zot ti osi bezwen fer sir ki zot pa ganny enfliyanse avek fo lansennyman bann aposta ki ti pe esey diviz kongregasyon. (Akt 20:29, 30) Kantmenm sa, sa bann Kretyen ti andir sa bann difikilte fidelman. (Rev. 2:3) Ki mannyer zot ti fer sa? Zot ti medit lo legzanp bann serviter Zeova dan Labib ki ti annan landirans, parey legzanp Zob. (Zak 5:10, 11) Zot ti priye pour ganny lafors. (Akt 4:29-31) Zot ti kontinyen rapel ki Zeova pou rekonpans zot si zot demontre landirans.​—Akt 5:41.

6. Ki ou aprann avek lafason ki Merita ti fer fas avek lopozisyon?

⁶ Nou osi nou kapab andire si regilyerman nou etidye e medit lo legzanp landirans bann serviter Zeova ki dan Labib e dan nou bann piblikasyon. Sanmenm ki Merita, en ser ki reste Lalbani ti fer e sa ti ed li pour andire ler son fanmir ti opoz li. I dir: “Ler mon ti etidye zistwar Zob dan Labib, sa ti ankouraz mwan en kantite. Zob ti soufer en kantite e menm si i pa ti konnen lekel ki ti pe fer li ganny sa bann problenm, i ti dir: ‘Ziska mon lanmor, mon pou reste fidel!’ (Zob 27:5) Mon ti mazinen ki bann problenm ki Zob ti fer fas avek ti pli difisil ki sa ki pour mwan. Zob pa ti konnen lekel ki pe fer li ganny sa bann problenm me mwan mon ti konnen lekel ki pe fer mwan ganny sa bann problenm.”

7. Menm si nou napa bann gro problenm la konmela, ki nou devret aprann pour fer depi la konmela?

⁷ Nou osi, nou kapab devlop plis landirans par koz avek Zeova dan lapriyer e dir li konsernan tou sa ki pe fatig nou. (Fili. 4:6; 1 Tesa. 5:17) Petet ansemoman ou pa pe fer fas avek en problenm grav. Kantmenm sa, eski ou rod gidans Zeova ler ou ankoler, ou konfize oubyen ou pa konnen ki ou pou fer? Si depi la konmela, ou demann Zeova led pour fer fas avek bann pti problenm, ou pa pou ezite pour demann li led ler ou fer fas avek bann pli gro problenm dan lavenir. Ou pa pou ezite parski ou pou asire ki Zeova i konn egzakteman kan ki i pou ed ou e ki mannyer i pou fer li.​—Ps. 27:1, 3.

8. Ki mannyer leksperyans Mira i montre nou ki ler nou andire la konmela, sa i kapab ed nou pour andire dan lavenir? (Zak 1:2-4) (Vwar portre.)

⁸ Si depi ozordi nou reste fidel avek Zeova ler nou annan problenm, i tre probab ki pandan gran ladetres nou pou reste fidel avek Zeova. (Rom. 5:3) Akoz nou dir sa? En kantite frer ek ser in vwar ki sak fwa zot in reisi fer fas avek en problenm, sa in ed zot pour fer fas avek en lot problenm ki swiv. Avek led Zeova, zot in andire e sa in fer zot annan plis lafwa ki Zeova i anvi ed zot. Sa lafwa ki zot annan dan Zeova i ed zot pour andir sa  lot problenm ki vini. (Lir Zak 1:2-4.) En pionye ki apel Mira ki reste Lalbani in vwar ki lefet ki in andire dan lepase, sa in ed li pour kontinyen andire. I dir ki parfwa i santi ki zis li ki annan en kantite problenm. Me apre i rapel ki kantite Zeova in ed li pandan sa dernyen 20 an e i dir dan li menm: ‘Reste fidel. Apre tou sa ki Zeova in fer pour ed ou andire dan bann sityasyon difisil, pa aret servi Zeova la.’ Ou osi ou kapab reflesir lo lafason ki Zeova in ed ou pour andire. Ou kapab asire ki Zeova i vwar sak fwa ki ou pe andire e i pou rekonpans ou. (Mat. 5:10-12) Koumsa ler gran ladetres i konmanse, ou pou’n aprann ki mannyer pour andire e ou pou determinen pour kontinyen andire.

9. Ki mannyer bann Kretyen dan kongregasyon Antyos Siri ti demontre konpasyon?

⁹ Annou vwar ki ti arive ler i ti annan en gran lafamin Zide. Ler bann frer ek ser dan kongregasyon Antyos Siri, ti tann konsernan sa lafamin, san dout zot ti pran pitye pour zot bann frer ek ser Zide. Alor zot ti fer keksoz pour ed zot bann frer ek ser. Zot “ti deside, sakenn dapre sa ki zot ti kapab donnen, pour anvoy led pour zot bann frer ki ti pe reste Zide.” (Akt 11:27-30) Menm si sa bann frer ek ser ti reste lwen, bann Kretyen Antyos ti vreman anvi ed zot.​—1 Zan 3:17, 18.

10. Ki mannyer nou kapab demontre konpasyon ler bann frer ek ser i ganny afekte avek en dezas? (Vwar portre.)

¹⁰ Nou osi nou kapab demontre konpasyon pour nou bann frer ek ser ler nou tande ki nou bann frer ek ser pe soufer akoz bann dezas natirel oubyen lezot problenm. Nou kontan pour ede, petet par demann bann ansyen si nou kapab ede lo en proze, fer donasyon pour sa travay mondyal oubyen par priy pour bann ki’n ganny afekte avek sa dezas. b (Prov. 17:17) Par egzanp, an 2020, i ti annan plis ki 950 Komite sekour ki ti ganny formen partou dan lemonn, pour ed bann frer ek ser pandan sa pandemi COVID-19. Nou vreman rekonesan pour bann frer ek ser ki partisip dan travay led sekour. Zot demontre konpasyon pour zot bann frer ek ser par distribye bann keksoz materyel, par donn zot led spirityel e dan serten ka, zot repar oubyen rekonstri bann lakaz ek bann landrwa ladorasyon.​—Konpar 2 Korentyen 8:1-4.

11. Ki mannyer ler nou demontre konpasyon anver lezot, sa i onor nou Papa ki dan lesyel?

¹¹ Ler nou demontre konpasyon anver nou bann frer ek ser apre en dezas, lezot i vwar bann sakrifis ki nou fer. Par egzanp, an 2019, Hurricane Dorian ti detri en Lasal Rwayonm dan Bahamas. Ler bann frer ti pe rekonstri Lasal, zot ti demann en kontrakter ki pa Temwen Zeova pour donn zot kotasyon pour serten travay ki ti bezwen ganny fer. Sa kontrakter ti dir zot: “Mon anvi donn zot . . . sa lekipman ki zot bezwen, bann travayer ek bann materyo . . . . Mon anvi fer sa pour zot lorganizasyon. Mon enpresyonnen avek lafason ki zot santi anver zot bann zanmi.” Laplipar dimoun dan lemonn pa konn Zeova me en kantite parmi zot i vwar sa ki Temwen Zeova i fer pour ed lezot. Nou vreman kontan pour konnen ki ler nou demontre konpasyon pour lezot, sa i kapab fer dimoun anvi konn plis lo Zeova, sa Enn ki annan “en kantite konpasyon.”​—Efe. 2:4.

12. Ki mannyer ler nou demontre konpasyon ozordi, sa i prepar nou pour gran ladetres? (Revelasyon 13:16, 17)

¹² Akoz nou pou bezwen demontre konpasyon pandan gran ladetres? Labib i  montre ki bann ki pa donn zot sipor bann gouvernman sa lemonn pou fer fas avek en kantite problenm la konmela e pandan gran ladetres. (Lir Revelasyon 13:16, 17.) I kapab ki nou bann frer ek ser pou bezwen led pour zot ganny bann keksoz de baz. Ler nou Lerwa Zezi Kri i vin ziz dimoun, nou anvi ki i vwar ki nou pe demontre konpasyon e i envit nou pour viv anba dominasyon “sa Rwayonm.”​—Mat. 25:34-40.

13. Dapre Romen 15:7, ki mannyer bann Kretyen dan premye syek ti devlop plis lanmour pour kanmarad?

¹³ Dan premye syek, bann dimoun ti kapab vwar ki bann Kretyen ti kontan kanmarad. Eski i ti fasil pour sa bann Kretyen demontre lanmour anver kanmarad? Mazin tou sa kalite dimoun ki ti dan kongregasyon Ronm. Serten ti Zwif, ki ti’n ganny ansennyen pour obei Lalwa Moiz. Me i ti annan lezot dimoun ki ti sorti dan lezot nasyon e zot ti annan lezot koutim. I tre probab ki serten Kretyen ti bann lesklav tandis ki lezot ti bann dimoun lib e petet serten parmi zot ti menm annan bann lesklav. Ki mannyer sa bann Kretyen ti kapab kontinyen demontre lanmour pour kanmarad menm si zot ti diferan? Zapot Pol ti ankouraz zot pour “byen resevwar kanmarad.” (Lir Romen 15:7.) Ki Pol ti pe dir? Sa mo ki’n ganny tradwir “byen resevwar” i vedir byen akeyir en dimoun, par egzanp dan ou lakour oubyen konman ou zanmi. Par egzanp, Pol ti dir Filemon ki mannyer pour resevwar Onezim ki ti en lesklav ki ti’n sove. Pol ti dir Filemon: “Byen resevwar li.” (Filem. 17) Prisil ek Akila ti resevwar Apolos ki ti konn mwens keksoz konsernan larelizyon bann Kretyen ki Prisil ek Akila. Zot ti fer sa par “anmenn li avek zot.” (Akt 18:26) Sa bann Kretyen pa ti les bann diferans ki ti annan antre zot kree divizyon antre zot. O kontrer, zot ti byen resevwar kanmarad.

14. Ki mannyer Anna ek son msye ti demontre lanmour?

¹⁴ Nou osi nou kapab demontre lanmour anver bann frer ek ser par vin zanmi avek zot e pas letan avek zot. An retour, sa pou motiv zot pour zot osi demontre plis lanmour anver nou. (2 Kor. 6:11-13) Annou vwar leksperyans Anna ek son msye. Pa bokou letan apre ki zot ti’n konmans zot servis konman misyonner West Africa, pandemi COVID-19 ti konmanse. Sa ti fer ki zot pa ti kapab zwenn avek zot kongregasyon an personn e i pa ti fasil pour zot aprann konn bann frer ek ser. Ki mannyer sa koup ti pou kapab demontre lanmour anver bann frer ek ser? Zot ti pran kontak avek bann frer ek ser atraver video konferans e zot ti dir bann frer ek ser ki mannyer zot ti vreman anvi aprann konn zot. Sa ti sitan tous sa bann fanmir ki zot ti konmans telefonn sa bann misyonner pli souvan e osi anvoy plis mesaz pour zot. Akoz sa koup misyonner ti esey aprann konn zot bann frer ek ser dan zot nouvo kongregasyon? Anna i dir: “Mon pa pou zanmen oubliy sa bann frer ek ser ki ti demontre lanmour anver mwan ek mon fanmir dan bann bon moman e dan bann moman difisil. Zot legzanp in motiv mwan pour demontre lanmour anver lezot.”

15. Ki ou aprann avek leksperyans Vanessa konsernan kontan tou bann frer ek ser? (Vwar portre.)

¹⁵ En kantite parmi nou i dan bann kongregasyon kot i annan bann frer ek ser ki diferan avek nou e ki annan diferan personnalite. Nou kapab devlop plis lanmour pour zot par konsantre lo zot bann bon kalite. En ser ki apel Vanessa ki servi Nouvel Zelann ti vwar li difisil pour annan en bon lanmitye avek serten dan kongregasyon. Me apre i ti deside ki dan plas evit sa bann frer ek ser ki  irit li, i ti pou pas plis letan avek zot. Ler i ti fer sa, sa ti ed li pour vwar sa ki Zeova i apresye dan sa bann frer ek ser. I dir: “Depi ler mon msye in vin sirveyan rezyonal, nou pas letan avek bokou plis frer ek ser ki annan diferan personnalite e mon vwar li pli fasil pour koz avek zot. Aprezan mon kontan lafason ki bann frer ek ser i diferan. I kler ki Zeova osi i kontan sa parski in atir diferan kalite dimoun pour vin ador li.” Ler nou aprann pour vwar lezot parey Zeova i vwar zot, nou montre ki nou kontan zot.​—2 Kor. 8:24.

16. Akoz i pou enportan pour nou annan lanmour pour nou bann frer ek ser pandan gran ladetres? (Vwar portre.)

¹⁶ Pandan gran ladetres, i pou enportan ki nou annan lanmour pour nou bann frer ek ser. Ler gran ladetres i konmanse, ki mannyer Zeova pou protez nou? Annou vwar sa ki Zeova ti dir son pep pour fer ler lavil Babilonn ti ganny atake. I ti dir: “Ale, mon pep, antre dan ou bann lasanm anndan e ferm laport deryer ou. Kasyet ou pour en pti moman ziska ki mon lakoler in pase.” (Iza. 26:20) I paret ki nou osi, nou pou bezwen aplik sa bann lenstriksyon pandan gran ladetres. I kapab ki bann “lasanm anndan” pe refer avek bann kongregasyon. Pandan gran ladetres, Zeova i promet ki i pou protez nou si nou reste ini avek nou bann frer ek ser. Alor, depi la konmela, nou bezwen fer zefor pour pa zis toler nou bann frer ek ser me pour vreman kontan zot parski i kapab ki pandan gran ladetres, sanmenm sa ki pou sov nou.

17. Si nou prepare depi la konmela, ki nou pou kapab fer pandan gran ladetres?

¹⁷ “Gran zour Zeova” pou en moman difisil pour bann imen. (Zef. 1:14, 15) Pep Zeova osi pou soufer. Me si nou prepar nou la konmela, nou pou kapab reste kalm e ed lezot. Nou pou kapab andire e fer fas avek okenn problenm ki kapab arive. Ler nou bann frer ek ser i soufer, nou pou fer nou mye pour ed zot par demontre konpasyon e donn zot sa ki zot bezwen. Osi, si nou aprann pour kontan nou bann frer ek ser depi la konmela, nou pou demontre lanmour pour zot dan lavenir. Zeova pou rekonpans nou e nou pou kapab viv pour touzour dan en lemonn kot nou pou nepli mazin bann dezas ek problenm ki ti annan oparavan.​—Iza. 65:17.