Si ou ti dan en problenm, san dout ou ti pou ekspekte en bon zanmi i fer en keksoz pour ed ou. Pareyman, serten i dir ki Bondye pa en zanmi akoz zot santi ki i pa pe fer nanryen pour ed zot. An realite, Bondye pa’n zis fer bokou keksoz pour ed nou me i pou osi fer keksoz pour rezourd tou problenm ek soufrans ki nou pe pas ladan ozordi. Ki Bondye pou fer?

Bondye pou tir tou bann move keksoz par detri sa enn ki ti konmans sa bann move keksoz. Labib i ed nou konpran lekel ki ti konmans tou bann move keksoz ler i dir: “Lemonn antye i anba kontrol Satan.” (1 Zan 5:19) Satan ki osi ganny apele Dyab, i “sef sa lemonn.” (Zan 12:31) Imen pe soufer akoz lenfliyans ki Satan i annan lo later. Ki Bondye pou fer?

Bondye pou byento servi son Garson, Zezi Kri pour “detri sa enn ki kapab koz lanmor, setadir Dyab.” (Ebre 2:14; 1 Zan 3:8) Anfet, Labib i montre ki Satan i konnen ki “i reste li zis en ptigin letan.” (Revelasyon 12:12) Bondye pou osi tir tou move keksoz e detri tou bann ki pe fer dimoun ditor.​—Psonm 37:9; Proverb 2:22.

Apre ki i pou’n fini tir tou move keksoz lo later, nou Kreater pou fer sa ki neseser pour akonpli son plan pour fer ki imen i vin parfe e viv pour touzour dan en paradi lo later. Ki pou annan dan paradi?

Vre lape ek sekirite. “Bann dimoun ki annan limilite pou ganny donnen later e zot pou trouv bokou plezir dan labondans lape.”​—Psonm 37:11, NWT.

Bokou manze ki bon pour lasante. “Legren pou annabondans lo later. Anler lo latet bann montanny i pou annabondans.”​—Psonm 72:16, NWT.

Bon lakaz ek travay. “Zot pou konstri bann lakaz e zot pou reste ladan. Zot pou plant bann pye rezen e manz son bann fri. . . . Sa bann ki mon’n swazir, pou profit travay ki zot in fer par zot lanmen.”​—Izai 65:21, 22.

Eski ou anvi vwar sa bann keksoz? Byento sa pou vin vre.

Ozordi, tou dimoun i tonm malad e finalman zot mor me tre byento sa pa pou ariv ankor. Bondye pou fer “nenport ki ki demontre lafwa dan li [setadir Zezi] pa ganny detrir me i ganny lavi eternel” atraver sakrifis Zezi. (Zan 3:16) Ki pou arive apre?

Pou nepli annan maladi. “Personn pa pou dir: Mon malad! Bann zabitan . . . pou ganny pardonnen zot pese.”​—Izai 33:24.

Lanmor pou nepli fer dimoun per. “La sa ki [Zeova] i promet: Lanmor pou disparet pour touzour. Senyer [Zeova] pou eswiy tou larm lo tou bann figir.”​—Izai 25:8.

Dimoun pou viv pour touzour. “Kado ki Bondye i donnen se lavi eternel gras a Kris Zezi nou Senyer.”​—Romen 6:23.

Bann ki’n mor pou resisite. “Dimoun bon konman move pou resisite.” (Akt 24:15) Gras a sakrifis Zezi bann ki’n mor pou resisite.

Ki mannyer Bondye pou fer sa?

Bondye pou akonpli son plan pour bann imen e osi pour later. I pou fer sa atraver en gouvernman ki dan lesyel e I’n swazir Kris Zezi pour dirize. (Psonm 110:1, 2) Zezi ti ansenny son bann disip pour priye konsernan sa gouvernman oubyen rwayonm ler i ti dir: “Nou Papa ki dan lesyel, . . . ki ou Rwayonm i vini.”​—Matye 6:9, 10.

Rwayonm Bondye pou diriz lo later e tir tou douler ek soufrans. Sa Rwayonm pou sa pli bon gouvernman ki imen in deza annan. I pour sa rezon Zezi ti travay dir pour anons “sa bon nouvel Rwayonm” pandan son minister lo later e i ti dir son bann disip fer parey.​—Matye 4:23; 24:14.

Vi ki Zeova i kontan bann imen, i’n promet pour fer tou sa bann keksoz merveye pour zot. Eski sa pa i fer ou anvi konn li e vin pros avek li? Ki mannyer sa pou ed ou si ou fer sa? Sa lot lartik pou koz lo la.