Pour plizyer milye lannen, personn pa ti konn larepons sa kestyon. Antretan, bokou dimoun ti pe mor akoz bann maladi ek lepidemi. Avek letan, bann syantis in konn laverite. Zot ti dekouver ki souvan nou malad akoz bann mikrob, tel ki bakteri oubyen viris. Apre ki zot ti’n dekouver sa, sa in ede pour protez dimoun kont maladi e menm tret sa bann maladi. Sa i fer ki plizyer bilyon dimoun pe viv pli lontan e pli an bonn sante.

Me ki nou pou dir lo lezot kestyon enportan? Dapre ou, ki lefe larepons sa bann kestyon swivan i kapab annan lo ou?

• Lekel Bondye?

• Lekel Zezi Kri?

• Kisisa Rwayonm Bondye?

• Ki pou arive dan lavenir?

Plizyer milyon dimoun in trouv larepons sa bann kestyon e sa in ed zot annan en pli bon lavi. Ou osi ou kapab benefisye avek sa bann larepons.

Petet ou kapab demann ou lekor, ‘Ki mannyer i posib pour vreman konn laverite?’ Apre tou, i pe vin deplizanpli difisil pour konn laverite lo bokou keksoz. Akoz sa?

Bokou dimoun napa konfyans ki bann gouvernman, biznes ouswa medya pour dir laverite. I pa fasil pour dimoun konnen si en lenformasyon i vre oubyen i zis en lopinyon personnel, si serten keksoz pe ganny kasyet oubyen i konpletman fo. Vi ki konmela i annan en mank konfyans e bokou lenformasyon i fo, dimoun pa tonm dakor lo kwa ki vreman laverite oubyen menm lo kisisa laverite.

Malgre tou sa bann defi, i posib pour konn larepons bann kestyon enportan dan lavi. Ki mannyer? Zis parey nou rod larepons bann kestyon dan lavi toulezour nou kapab fer parey.

Dan en fason ou en lot, toulezour ou rod laverite. Annou vwar legzanp Jessica. I dir, “Mon fiy i alerzik avek pistas. Son alerzi i sitan for ki menm en pti latras protein dan pistas i kapab touy li.” Jessica i bezwen fer sir ki nenport manze ki i aste pour son fiy i pa en danze pour li. “Premye keksoz ki mon fer se tyek byen bann zengredyen dan sa manze. Apre mon fer plis resers, mon menm kontakte sa ki’n fer sa prodwi pour konfirmen ki napa okenn risk ki pistas in kapab ganny kontak avek sa prodwi. Mon osi verifye avek lezot sours ki diny konfyans ki asir mwan ki sa lakonpannyen i swiv byen bann lalwa pour prepar manze.”

Petet larepons pour ou bann kestyon dan lavi toulezour i kapab pa sitan enportan parey pour Jessica, me parey li, ou kapab trouv larepons ou bann kestyon par:

• Rod lenformasyon egzakt.

• Fer plis resers.

• Fer sir ou sours lenformasyon i diny konfyans.

Si ou fer sa, ou kapab trouv larepons bann kestyon enportan dan lavi. Ki mannyer sa i posib?

Pour konn laverite dan Labib, Jessica ti servi menm teknik parey i fer pour rod manze ki son fiy pa alerzik avek. I dir, “Lir Labib e fer bokou resers in ed mwan trouv laverite.” Parey Jessica, plizyer milyon dimoun in konn sa ki Labib i dir lo sa bann kestyon swivan:

• Akoz nou lo later?

• Ki arive avek en dimoun ler i mor?

• Akoz dimoun i soufer?

• Ki Bondye pe fer pour met en lafen avek tou soufrans?

• Ki mannyer nou lavi fanmir i kapab ere?

Ou kapab trouv larepons sa bann kestyon ek lezot kestyon par lir Labib e fer lezot resers lo www.dan124.com.