Dan sa lartik avan, nou ti diskit lo sa siny ki Zezi ti donnen. Sa siny i klerman montre ki Rwayonm Bondye in ganny etablir dan lesyel e Zezi Kri i Lerwa.

Labib i dir ki ler Zezi ti pou vin Lerwa dan sa Rwayonm, i ti pou pous Satan ek son bann demon dan lesyel. Alor, vi ki zot in ganny zete lo later, sa i en rezon akoz keksoz in vin pli move depi 1914.​—Revelasyon 12:7, 9.

Menm si kondisyon sa lemonn pe deteryore, Zezi konman Lerwa dan Rwayonm Bondye pe ed dimoun partou lo later. Gras a sa travay mondyal pour ansenny dimoun lo Labib, bokou pe aprann e aplik bann prensip Labib dan zot lavi. (Izai 2:2-4) Plizyer milyon dimoun in aprann pour annan en bon pwennvi lo travay, pour amelyor zot lavi fanmir e pour byen servi bann keksoz materyel san vin zot lesklav. Sa bann dimoun pe ganny ansennyen lo ki mannyer pour viv en pli bon lavi depi la konmela menm e prepar zot pour viv anpe anba dominasyon Rwayonm Bondye.

Menm si Zezi pe deza dirize dan lesyel, bann gouvernman imen i ankor pe dirize lo later. Me Bondye in donn Zezi sa lord: “Domin lo ou bann lennmi.” (Psonm 110:2) Byento, Zezi pou detri tou bann ki opoz li e i pou anmenn en soulazman pour bann ki volonterman obei Bondye.

Pandan sa letan, Rwayonm Bondye pou:

• Met en lafen avek fo larelizyon. Bann larelizyon ki’n ansenny mansonz lo Bondye e fer lavi dimoun difisil pou disparet. Labib i dekri fo larelizyon konman en prostitye. Bokou dimoun pou soke ler i pou ganny detrir.​—Revelasyon 17:15, 16.

• Met en lafen avek dominasyon imen. Rwayonm Bondye pou pran aksyon e met en lafen avek tou gouvernman imen.​—Revelasyon 19:15, 17, 18.

• Retir bann move dimoun. Ki pou arive avek bann ki determinen pour fer sa ki mal e pa oule obei Bondye? “Me bann malfeter pou ganny sase” lo later.​—Proverb 2:22.

• Detri Satan ek bann demon. Satan ek bann demon pa pou kapab “anbet bann nasyon ankor.”​—Revelasyon 20:3, 10.

Ki byenfe bann ki aksepte Rwayonm Bondye pou gannyen?

Konman Lerwa dan lesyel, Zezi pou fer bokou plis ki okenn dirizan imen in deza fer. I annan 144,000 dimoun ki’n ganny swazir lo later ki pou dirize ansanm avek li. (Revelasyon 5:9, 10; 14:1, 3) I pou fer sir ki lavolonte Bondye i ganny fer lo later. Ki Rwayonm Bondye pou fer pour bann dimoun ki pou reste lo later?

• I pou elimin maladi ek lanmor. “Personn pa pou dir: ‘Mon malad!’” e “i pou nepli annan ni lanmor.”​—Izai 33:24; Revelasyon 21:4.

• I pou anmenn vre lape ek sekirite. “Ou bann zanfan . . . pou viv dan lape” e “sakenn pou viv anba son prop tonnel rezen. Zot pou viv anpe anba zot pye fig, san ki personn i fer zot per.”​—Izai 54:13; Mika 4:4.

• I pou donn travay ki satisfezan. “Sa bann ki mon’n swazir, pou profit travay ki zot in fer par zot lanmen. Zot pou nepli fatig zot pour nanryen.”​—Izai 65:22, 23.

• I pou rezourd bann problenm lanvironnman. “Dezer ek later desese pou dan lazwa! Dezer pou kontan e pou fleri avek zoli fler.”​—Izai 35:1.

• I pou ansenny dimoun sa ki zot bezwen fer pour ki zot viv pour touzour. “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.”​—Zan 17:3.

Bondye i oule ki ou ganny sa bann benediksyon. (Izai 48:18) Sa lot lartik pou ed ou konnen ki ou devret fer la konmela pour ganny sa bann zoli benediksyon a lavenir.