IMEN

Sa ki Labib i dir: Bondye “pa’n kree [later] pour nanryen ditou, [i’n] fer li pour dimoun reste lo la.”​—IZAI 45:18.

PLANNET LATER

Sa ki Labib i dir: “En zenerasyon i ale, en lot zenerasyon i vini, me later i reste pour touzour.”​—EKLEZYAST 1:4.

KI SA I VEDIR: Dapre Labib, later pa pou zanmen ganny detri, i pou toultan annan dimoun lo la. Alor ki lafen lemonn i vedir?

ANNOU VWAR: Labib i konpar lafen sa lemonn avek sa ki ti arive dan letan Noe. Pandan sa letan, later ti “ranpli avek bann dimoun vyolan.” (Zenez 6:13) Par kont, Noe ti en zonm drwat. Alor Bondye ti protez Noe ek son fanmir me I ti detri bann move dimoun atraver deliz. Ler Labib i refer avek sa ki ti arive, i dir: “Lemonn sa letan ti ganny detrir ler later ti ganny kouver avek delo.” (2 Pyer 3:6) Sa ti lafen sa lemonn ki ti egziste sa letan. Me kwa ki ti ganny detrir? Pa later, me bann move dimoun ki ti viv lo later. Alor, ler Labib i koz lo lafen lemonn i pa pe refer avek destriksyon sa plannet. O kontrer, I pe refer avek lafen bann move dimoun ek bann move keksoz ki zot in met an plas lo later.

PROBLENM EK TOU SA KI MOVE

Sa ki Labib i dir: “Dan ankor en pti pe letan, bann move dimoun pou nepli la, ou pou al get kot zot ti ete e zot pa pou la. Me bann ki annan limilite pou ganny donnen later e zot pou trouv bokou plezir dan labondans lape.”​—PSONM 37:10, 11.

KI SA I VEDIR: Deliz dan letan Noe pa ti detri tou move dimoun konpletman. Apre deliz, bann move dimoun ti rekonmans fer move keksoz ki ti fer lavi lezot dimoun malere. Me byento, Bondye pou met en lafen avek tou sa ki move. Parey sa psalmis ti dir: “Bann move dimoun pou nepli la.” Bondye pou servi son Rwayonm, en gouvernman dan lesyel ki pou diriz lo bann dimoun lo later ki obei Li, pour met en lafen avek tou sa ki move.

ANNOU VWAR: Eski bann gouvernman lo later pou pare pour siport Rwayonm Bondye? Labib i dir ki zot pa pou siporte. Dan en fason bet, zot pou opoz Rwayonm Bondye. (Psonm 2:2) Ki pou arive? Rwayonm Bondye pou ranplas tou gouvernman imen e “li menm i pou dire pour touzour.” (Danyel 2:44) Me akoz Bondye i bezwen met en lafen avek bann gouvernman imen?

Sa ki Labib i dir: “En dimoun ki pe marse pa kapab diriz son prop lepa.”​—ZEREMI 10:23.

KI SA I VEDIR: Imen pa ti ganny kree pour diriz zot lekor. Zot pa kapab diriz lezot dimoun oubyen rezourd zot problenm.

ANNOU VWAR: Ansiklopedi Britannica Academic i dir ki bann gouvernman pa kapab “rezourd bann problenm tel parey lapovrete, mankman manze, maladi, dezas natirel ek lager oubyen lezot vyolans.” I osi dir: “Serten . . . i krwar ki si zis en gouvernman ki diriz lo later antye, i pou kapab anmenn solisyon pour sa bann problenm.” Me menm si tou gouvernman imen i zwenn ansanm, lemonn pou kontinyen ganny dirize par imen enparfe ki pa kapab rezourd sa bann problenm ki’n ganny mansyonnen. Rwayonm Bondye i sa sel gouvernman ki kapab rezourd tou problenm dan sa lemonn pour touzour.

Alor, dapre Labib, lafen sa lemonn pa en keksoz ki bann bon dimoun i devret per. O kontrer, i en keksoz ki nou enpasyan pour vwar akoz sa move lemonn pou ganny ranplase par sa nouvo lemonn Bondye ki pou merveye!

Kan ki sa pou arive? Sa lot lartik pou donn larepons ki sorti dan Labib.