Paradi, sa nouvo lemonn, i pros!
Bondye ti kree later pour bann dimoun ki obei li i viv lo la pour touzour. (Psonm 37:29) I ti met sa premye koup imen, Adan ek Ev, dan sa zoli zarden, Edenn, e i ti donn zot ek zot desandans sa responsabilite pour kiltiv e pran swen avek later.—Zenez 1:28; 2:15.
Lemonn ozordi i pa en paradi parey Bondye ti anvi. Par kont, Bondye pa’n sanz son lespri. Ki mannyer Bondye pou fer later vin en paradi? Parey nou’n vwar dan bann lartik avan, Bondye pa pou detri later. Plito, i pou permet bann dimoun fidel pour viv lo la. Ki mannyer later pou ete ler Bondye i akonpli son bann promes?
En gouvernman ki pou diriz lo later antye
Byento, ler gouvernman Bondye dan lesyel pou diriz bann imen, later pou vin en landrwa kot dimoun pou ere, zot pou viv ansanm dan larmoni e zot pou fer bann bon travay ki satisfezan. Bondye in apwent Zezi Kri pour diriz lo later. Ozordi, bokou dirizan pa enterese avek zot pep. Zezi i diferan akoz i pou toultan fer sa ki meyer pour son pep. Lafason ki i pou dirize pou baze lo lanmour. I pou en bon lerwa ki annan pitye e i pou zis.—Izai 11:4.
Dimoun partou lo later pou ini
Bann dimoun lo later pa pou ganny divize par nasyonalite oubyen ras. Imen pou ini konman en sel pep. (Revelasyon 7:9, 10) Tou imen pou kontan Bondye e kontan zot prosen. Zot pou travay ansanm dan lape pour akonpli plan ki Bondye ti annan o konmansman pour pran swen avek later.—Psonm 115:16.
Dimoun pou viv an armoni avek lanvironnman
Ler Rwayonm Bondye pou diriz lo later, Bondye pou kontrol letan. (Psonm 24:1, 2) Ler Zezi ti lo later, i ti kalme en tanpet e i ti montre ki i kapab fer avek sa pouvwar ki Bondye i donn li. (Mark 4:39, 41) Ler Kris pou dirize, i pou napa rezon pour okenn dimoun per bann dezas natirel. Nou pou anpe avek bann zannimo e nou pou nepli detri lanvironnman.—Osea 2:18.
Lasante parfe ek manze annabondans
Tou dimoun pou annan en lasante parfe. Personn pa pou malad, vin vye oubyen mor. (Izai 35:5, 6) Dimoun pou profit en zoli lanvironnman prop parey i ti ete dan zarden Edenn pour sa premye koup imen. Dan Paradi, zis parey dan zarden Edenn, later pou prodwi manze annabondans e tou zabitan pou annan ase manze. (Zenez 2:9) Dan Paradi, tou dimoun pou “manz dipen vant plen,” zis parey pep Bondye dan ansyen Izrael.—Levitik 26:5.
Vre lape ek sekirite
Anba gouvernman Bondye, tou dimoun pou anpe, zot pou bon e tret kanmarad avek lazistis. I pou napa lager, labi pouvwar e tou dimoun pou annan sa ki zot bezwen. Labib i promet: “Sakenn pou asiz anba son pye rezen e anba son pye fig e personn pa pou fer zot per.”—Mika 4:4.
En lakaz ek en travay satisfezan
Tou fanmir pou annan en lakaz e zot pa pou bezwen enkyet ki zot pou perdi zot lakaz. Tou travay ki zot pou fer, zot pou ganny satisfaksyon. Parey Labib in dir, bann ki pou viv dan nouvo lemonn, “zot pa pou rente pour nanryen” oubyen zot travay pa pou anven.—Izai 65:21-23.
Sa pli bon ledikasyon
Labib i promet: “Later pou vreman ranpli avek konnesans Zeova.” (Izai 11:9) Bann imen ki pou viv dan Rwayonm Bondye pou aprann lo lasazes zot Kreater, Zeova, e lo bann zoli keksoz ki i’n fer. Zot pa pou servi zot lentelizans pou fer zarm oubyen fer ditor lezot dimoun. (Izai 2:4) Plito, zot pou aprann ki mannyer pour viv anpe avek kanmarad e ki mannyer pour pran swen avek later.—Psonm 37:11.
Lavi eternel
Bondye ti pran son letan pour prepar later pou ki nou kapab profit byen lavi toultan. I anvi ki imen i viv lo later pour touzour. (Psonm 37:29; Izai 45:18) Pour akonpli son plan, Bondye pou “anval lanmor pour touzour.” (Izai 25:8) Labib i promet: “I pou nepli annan ni lanmor, ni dey, ni leokri, ni douler ankor.” (Revelasyon 21:4) Bondye pou donn tou dimoun, ki swa sa bann ki i pou sove ler i detri sa move lemonn ouswa sa bann ki i pou resisite dan nouvo lemonn, sa loportinite pour viv pour touzour.—Zan 5:28, 29; Akt 24:15.
Plizyer milyon dimoun pe deza prepare pour viv anba Rwayonm Bondye ki pa lwen. Menm si zot enparfe, zot pe esey vin sa kalite dimoun ki Bondye i anvi pour viv dan son nouvo lemonn. Ki mannyer? Par aprann lo Zeova ek sa enn ki i’n anvoye, Zezi Kri.—Zan 17:3.
Rod plis lenformasyon lo ki mannyer ou kapab sirviv lafen sa lemonn e lo konman pour viv dan en lemonn meyer ki pou arive byento. Aksepte en letid Labib enteraktif gratwit avek en Temwen Zeova avek led sa liv Viv ere pour touzour!
Ou pou kapab kontan sa osi
LATOUR VEYER
Ki Rwayonm Bondye pou fer?
Zezi ti konnen ki Rwayonm Bondye i sa sel gouvernman ki pou kapab rezourd bann problenm lo later. Ki sa Rwayonm in fer pour ki nou annan plis konfyans dan sa ki i pou fer a lavenir?
