“Alor, kontinyen veye akoz zot pa konn ni zour ni ler.”​—MATYE 25:13.

“Kontinyen veye, reste eveye, parski zot pa konnen kan ki sa letan fikse pou arive.”​—MARK 13:33.

Alor personn pa konnen kan ki lafen sa move lemonn pou arive. Par kont, Bondye in met en “letan fikse,” savedir “sa zour ek sa ler” ki I pou met en lafen avek sa move lemonn. (Matye 24:36) Eski sa i vedir ki napa okenn fason pour nou konnen kan lafen i pros pour arive? Pa ditou. Zezi ti demann son bann disip pour vey serten levennman ki pou fer zot konnen ki lafen i pros.

Sa bann levennman ti pou sa siny ki montre ki “lafen sa lemonn i pros pour arive.” Zezi ti dir: “Nasyon pou lager kont nasyon e rwayonm kont rwayonm, i pou annan mankman manze ek tranblemandter dan en landrwa apre lot.” (Matye 24:3, 7) I ti osi dir ki ti pou annan “lepidemi.” (Lik 21:11) Eski ou pe vwar sa bann levennman ki Zezi ti dir pou arive?

Ozordi dimoun pe soufer akoz lager, lafanmin, tranblemandter ek tou sort kalite maladi. Par egzanp an 2004, i ti annan en gro tranblemandter dan losean Endyen ki ti fer en tsounami ki ti touy anviron 225,000 dimoun. Dan lespas trwa-z-an, pandemi COVID-19 in okazyonn lanmor plis ki 6.9 milyon dimoun dan lemonn. Zezi ti dir ki sa bann levennman koumsa pou montre ki lafen sa lemonn i pros.

Labib i apel sa letan zis avan lafen “bann dernyen zour.” (2 Pyer 3:3, 4) Dezyenm Timote 3:1-5 i dir ki dan bann dernyen zour dimoun pou rezet bann bon standar moral. (Vwar sa bwat “ Zis avan lafen sa lemonn.”) Eski ou vwar dimoun ki egois, voras, kriyel e ki napa lanmour pour kanmarad ozordi? Sa osi i montre ki lafen sa lemonn i pros.

Konbyen letan bann dernyen zour pou dire? Dapre Labib, i pour “zis en ptigin letan.” Apre, Bondye pou “detri bann ki pe detri later.”​—Revelasyon 11:15-18; 12:12.

Bondye in fini met sa zour ek sa ler ki i pou met en lafen avek sa move lemonn. (Matye 24:36) Me i annan plis bon nouvel ankor, Bondye “pa oule ki personn i ganny detrir.” (2 Pyer 3:9) I pe donn nou sa loportinite pour aprann konsernan son lavolonte e pour obei li. Akoz? Parski I anvi nou sirviv lafen sa move lemonn e viv dan son nouvo lemonn ler later pou vin en paradi.

Bondye pe fer sir ki tou dimoun i kapab aprann ki mannyer pour form parti sa nouvo lemonn anba son Rwayonm. Zezi ti dir ki sa bon nouvel konsernan Rwayonm Bondye pou ganny anonse “partou lo later.” (Matye 24:14) Partou dan lemonn, Temwen Zeova i pas plizyer bilyon er-d-tan pour anons e ansenny dimoun sa mesaz Labib ki donn lespwar. Zezi ti dir ki sa kanpanny pour anons sa bon nouvel ti pou ganny fer partou dan lemonn avan ki lafen i arive.

Sa letan kot imen pe dirize i pros pour fini. Me sa bon nouvel, i ki ou kapab sirviv lafen sa lemonn e form parti bann ki pou viv dan Paradi lo later ki Bondye in promet. Sa lartik swivan pou diskit lo ki mannyer ou kapab viv dan sa nouvo lemonn.