I annan en kantite konsey lo sa size me pa tou ki bon. Par egzanp, serten pou dir ou pa plere oubyen pa montre ou santiman tandis ki lezot pou dir ou lekontrer. Labib i donn en pwennvi balanse ki ganny siporte par resers modern.

Dan serten kiltir i pa normal pour en zonm plere. Me eski nou bezwen kanmi pour plere, menm an piblik? Bann eksper dan lasante mantal i admet ki i normal pour plere ler ou sagren e ki avek letan sagrinasyon i kapab ed ou pour kontinyen viv malgre sa gran pert. Si nou kasyet nou sagrinasyon, i kapab fer nou plis ditor ki dibyen. Labib pa siport sa nide ki i pa normal pour en zonm plere ler i sagren. Par egzanp, mazin Zezi. Menm si i ti annan pouvwar pour resisit son bon zanmi Lazar, i ti plere.​—Zan 11:33-35.

Bann moman lakoler i souvan form parti sagrinasyon espesyalman kan lanmor i arive san ki nou ekspekte. I annan bokou rezon akoz en dimoun ki dan dey i kapab santi li ankoler, tel parey ler en dimoun ki ou byen respekte i dir en keksoz san ki i reflesir oubyen bann komanter ki pa fer sans. En zonm Sid Afriken ki apel Mike i eksplike: “Mon ti annan zis 14 an ler mon papa ti mor. Kot lanterman, sa pret Anglikan ti dir ki Bondye i bezwen bann bon dimoun e i pran zot boner. * Sa ti fer mwan ankoler akoz nou ti vreman bezwen nou papa. Sa douler i ankor la, menm 63 an apre.”

Ki nou kapab dir ler nou santi nou koupab, espesyalman dan ka en lanmor san ekspekte? En dimoun ki dan dey i kapab pe toultan mazinen ki, ‘Sa pa ti pou’n arive si selman mon ti’n fer en keksoz.’ Ou kapab osi pe mazinen ki dan zot dernyen moman ansanm zot ti dispit. Sa i kapab fer ou santi pli koupab.

Si ou santi ou koupab e ankoler, i enportan ki ou pa kit sa bann santiman anndan. Plito, koz avek en zanmi ki pare pour ekoute e reasir ou ki sa bann santiman i ariv souvan avek bokou dimoun ki dan dey. Labib i rapel nou: “En vre zanmi i demontre ki i kontan ou toultan e i en frer ki’n ne pour letan ladetres.”​—Proverb 17:17.

Sa pli bon Zanmi ki en dimoun dan dey i kapab annan i nou Kreater Zeova. Devid ou leker avek li dan lapriyer parski li menm ki “pran swen avek [ou].” (1 Pyer 5:7) An plis, i’n promet tou bann ki fer sa, ki zot santiman ek panse pou ganny soulaze par “lape Bondye ki depas tou konpreansyon.” (Filipyen 4:6, 7) Deplis, les Bondye ed ou geri par mwayen son Parol ki konsolan, Labib. Fer en lalis sa bann verse ki kapab konsol ou. (Vwar  bwat.) Ou menm kapab aprann serten sa bann verse par ker. Kan ou annan sa bann panse pour mazin lo la, i kapab ed ou espesyalman aswar ler ou  tousel e vwar li difisil pour ganny sonmey.​—Izai 57:15.

Zak, en zonm 40 an ti resaman perdi son madanm ki i ti byen kontan avek kanser. I dir ki par ler i santi li vreman tousel me i’n trouv led dan lapriyer. I eksplike, “Ler mon priy avek Zeova, mon pa zanmen santi mwan tousel. Souvan aswar mon leve e mon pa kapab reganny sonmey. Apre ki mon’n lir e medit lo bann verse rekonfortan dan Labib, mon devid mon leker dan lapriyer. Mon santi mwan trankil akoz mon annan sa lape lespri ki permet mwan reganny sonmey.”

En zenn madanm ki apel Vanessa ti perdi son manman akoz en maladi. Li osi in eksperyans pouvwar ki lapriyer i annan. I dir, “Dan mon bann moman pli difisil, mon ti zis kriy lo non Bondye e konmans plere. Zeova ti ekout mon lapriyer e i’n toultan donn mwan sa lafors ki mon bezwen.”

Bann dimoun ki dan dey i souvan ganny konseye pour ed lezot oubyen pour partisip dan bann travay kominoter. Par fer sa, zot kapab ganny lazwa ek soulazman pour zot sagrinasyon. (Akt 20:35) Bokou Kretyen ki dan dey, zot in vwar ki par ed lezot sa in anmenn bokou rekonfor.​—2 Korentyen 1:3, 4.