Ki mannyer pour demontre lanmour anver lezot?
Konman desandans sa premye zonm, Adan, nou tou nou en sel fanmir. Menm si bann manm fanmir i ekspekte ki zot demontre lanmour ek respe pour kanmarad, i difisil pou vwar sa kalite lanmour konmela. Me pa sa ki Bondye i anvi.
SA KI LABIB I DIR LO LANMOUR
“Ou devre kontan ou prosen parey ou menm.”—LEVITIK 19:18.
“Kontinyen kontan zot lennmi.”—MATYE 5:44.
KI I VEDIR KONTAN OU PROSEN?
Remarke ki mannyer Bondye i dekri lanmour dan 1 Korentyen 13:4-7:
“Lanmour i pasyan e i bon.”
Reflesir: Ki mannyer ou santi ler lezot i annan pasyans, zot bon anver ou e zot pa ankoler vitman ler ou fer fot?
“Lanmour pa zalou.”
Reflesir: Ki mannyer ou santi ler lezot i mefye ou oubyen zalou ou?
Lanmour “pa rod son prop lentere.”
Reflesir: Ki mannyer ou santi ler lezot i pare pou respekte ou pwennvi e pa toultan ensiste lo zot prop lopinyon?
Lanmour “pa gard rankin.”
Reflesir: Bondye i pare pour pardonn bann ki’n fer pese e ki repantir. “I pa touzour akiz nou; i pa gard rankin.” (Psonm 103:9) Nou apresye ler en dimoun ki nou’n ofanse i pardonn nou. Alor nou devret pare pour pardonn lezot ler zot ofans nou.—Psonm 86:5.
Lanmour “pa pran plezir dan lemal.”
Reflesir: Ler en keksoz mal i arive avek nou, nou pa kontan si lezot i pran plezir dan nou maler. Alor nou pa pour pran plezir dan maler lezot, menm si zot in tret nou dan en move fason.
Pour Bondye beni nou, nou bezwen kontan lezot dan sa bann fason, nenport ki laz, nasyonalite oubyen larelizyon ki zot ete. En fason nou kapab montre ki nou kontan lezot, i ler nou ed bann ki dan bezwen.
