DIMOUN i annan diferan lopinyon lo ki i arive avek nou ler nou mor. Serten dimoun i krwar ki zot pou al viv dan lesyel apre ki zot mor. Lezot i krwar ki zot pou ne ankor konman en lot dimoun oubyen zannimo. I annan osi lezot ki krwar ki tou i fini apre lanmor.

Ou kapab annan ou prop krwayans lo sa size depandan lo ou kiltir ek landrwa kot ou’n grandi. Vi ki i annan diferan lopinyon lo ki i arive apre lanmor, eski i annan en dimoun oubyen en landrwa kot nou kapab ale pour ganny vre larepons pour sa kestyon?

Pour plizyer syek, bann sef relizye in ansennyen ki nou nanm i kontinyen viv apre ki nou’n mor. Bann dimoun ki swiv bann gran larelizyon parey Kretyen, Endou, Zwif, Mouslim ek lezot, i krwar ki i annan en nanm ki kontinyen viv dan en lot landrwa apre lanmor. Par kont, bann Boudis i krwar ki en dimoun i kapab ne plizyer fwa dan diferan lekor fizik e ki finalman lafors oubyen lespri sa dimoun i kapab al dan Nirvana, en kondisyon ki parey Paradi.

Baze lo sa lansennyman, lamazorite dimoun dan lemonn i krwar ki i annan en lot lavi apre lanmor dan en lot landrwa. Alor, pour bokou dimoun i paret ki i ti dan plan Bondye pour dimoun mor e ki sa i form parti lavi. Me ki Labib i dir lo sa size? Silvouple, lir sa lot lartik ki swiv. Larepons ki Labib i donnen i kapab sirprann ou.