1. Kwa ki konvenk ou ki Parol Bondye i pwisan? (Vwar portre o konmansman sa lartik.)

 PEP Zeova i konvenki ki parol Bondye, setadir son mesaz pour bann imen, “i vivan e pwisan.” (Ebre 4:12) Nou’n vwar pwisans Labib dan nou prop lavi e dan lavi lezot dimoun. Avan serten ti vin Temwen, zot ti bann voler, adikt avek drog oubyen komet imoralite seksyel. Lezot ti bann dimoun renonmen oubyen ris, me kantmenm sa, zot ti santi ki i annan en keksoz ki manke dan zot lavi. (Eklezyast 2:3-11) Erezman, en kantite dimoun ki ti napa lespwar ek en bi dan lavi in ganny gidans e zot annan en lespwar aprezan. Dan Latour Veyer, nou’n kontan pour lir bann leksperyans, parey bann ki ganny trouve dan sa seri lartik “Labib i sanz lavi.” Menm apre ki bann dimoun in vin Kretyen, zot bezwen servi Labib pour kontinyen ranforsi zot relasyon avek Zeova.

2. Ki lefe pwisans Parol Bondye ti annan lo dimoun dan premye syek?

² Nou pa sirprann ki bokou dimoun i fer bann gro sanzman ler zot aprann laverite. Nou bann frer ek ser dan  premye syek ki ti annan sa lespwar pour al dan lesyel ti fer sa bann sanzman. (Lir 1 Korentyen 6:9-11.) Ler Pol ti koz lo bann ki pa ti pou antre dan Rwayonm Bondye, i ti azoute: “Sanmenm ki serten parmi zot ti ete.” Parol Bondye ek son lespri sen ti ed sa bann dimoun pour sanze. Me menm apre ki zot ti’n vin Kretyen, serten parmi zot ti fer bann fot grav ki ti afekte zot relasyon avek Zeova. Par egzanp, Labib i mansyonn en frer swazir ki ti bezwen ganny ekskli dan kongregasyon. Pli tar, i ti fer bann sanzman pour li kapab form parti kongregasyon Kretyen ankor enn fwa. (1 Korentyen 5:1-5; 2 Korentyen 2:5-8) I ankourazan ki nou bann frer ek ser in kapab fer sa kantite sanzman gras a pwisans Parol Bondye.

3. Ki nou pou diskite dan sa lartik?

³ Parol Bondye i vreman pwisan. Vi ki Zeova ki’n donn nou Labib, nou anvi fer sir ki nou servi li byen. (2 Timote 2:15) Sa lartik pou diskit lo ki mannyer nou kapab servi pwisans Labib (1) dan nou lavi, (2) dan nou minister e (3) ler nou pe ansenny kongregasyon. Sa ki nou aprann pou ed nou demontre nou lanmour ek rekonesans pour nou Papa dan lesyel, ki ansenny nou pour nou prop dibyen.​—Izai 48:17.

4. (a) Ki nou kapab fer pour permet Parol Bondye annan en lefe lo nou? (b) Ki mannyer ou ou fer letan pour lir Labib?

⁴ Pour permet Parol Bondye annan en lefe lo nou, nou bezwen lir li regilyerman. Nou devret esey lir li toulezour. (Zozye 1:8) Menm si laplipar nou i vreman bizi, nou pa devret les nanryen, enkli nou bann responsabilite, anpes nou lir Labib. (Lir Efezyen 5:15, 16.) Petet nou kapab trouv letan granmaten, en serten moman dan lazournen oubyen pli tar aswar. Nou dakor avek sa psalmis ki ti ekri: “Pa mon kontan ou komannman! Mon medit lo la tou le zour.”​—Psonm 119:97.

5, 6. (a) Akoz nou bezwen medite? (b) Ki mannyer nou kapab byen medite? (c) Ler ou’n lir Labib e medit lo la, ki mannyer sa in ed ou?

⁵ Par kont, i pa ase pour zis lir Labib. Nou bezwen medit, setadir reflesir byen e o profon lo sa ki nou’n lir. (Psonm 1:1-3) Sa i sa sel fason ki nou pou kapab aplik lasazes ki dan Labib dan nou lavi. Alor ki swa nou lir direkteman dan en Labib ki’n ganny enprimen oubyen lo en lekipman elektronik, nou anvi permet Parol Bondye pour sanz e motiv nou.

⁶ Ki mannyer nou kapab byen medite? Ler nou lir Labib, nou devret arete e demann nou lekor: ‘Ki sa i dir mwan lo Zeova? Ki mannyer mon deza pe aplik sa ki mon pe lir dan mon lavi? Ki  sanzman mon ankor bezwen fer?’ Ler nou medit lo Parol Bondye e priy lo sa ki nou’n lir, nou pou anvi aplik li. Apre nou pou kapab santi pwisans Labib dan nou lavi.​—2 Korentyen 10:4, 5.

7. Ki mannyer nou kapab byen servi Parol Bondye dan predikasyon?

⁷ Ler nou pe prese e ansennyen, i enportan ki nou servi Parol Bondye souvan. En frer ti dir, “Si ou ti pe pres kazankaz avek Zeova li menm, eski ou ti pou fer tou koze ou menm oubyen ou ti pou les li koze?” Ler nou lir Labib avek en dimoun, nou pe les Zeova koz avek li. En verse Labib ki’n ganny byen swazir i pli pwisan ki okenn keksoz ki nou kapab dir. (1 Tesalonisyen 2:13) Ler ou dan predikasyon, eski ou esey servi Labib o tan posib?

8. Akoz nou bezwen fer plis ki zis lir Labib ler nou pe prese?

⁸ Par kont, i pa ase pour zis lir en verse Labib avek bann dimoun ki nou pres avek. Laplipar dimoun pa konpran sa ki Labib i dir. Sa ti leka dan premye syek e i ankor parey ozordi. (Romen 10:2) Nou pa devret prezimen ki sa met lakour i konpran sa verse ki nou’n lir. Nou kapab ed li par repet bann mo oubyen nide prensipal dan sa verse e apre eksplik li ki sa i vedir. Dan sa fason, Parol Bondye i kapab antre dan lespri ek leker bann dimoun.​—Lir Lik 24:32.

9. Ki mannyer nou kapab ed dimoun pour annan respe pour Labib par sa ki nou dir avan nou lir en verse? Donn en legzanp.

⁹ Sa ki nou dir avan nou lir en verse i osi kapab ed en met lakour pour annan respe pour Labib. Par egzanp, nou kapab dir, “Annou vwar sa ki nou Kreater i dir lo sa size.” Oubyen si nou pe koz avek en dimoun ki pa Kretyen, nou kapab dir, “Annou vwar sa ki Lekritir Sen i dir nou.” Si nou zwenn en dimoun ki pa enterese avek larelizyon, nou kapab demann li, “Eski ou’n deza tann dimoun dir sa parol?” Si nou rapel ki tou dimoun in ganny elve dan en serten fason e ki zot annan zot prop krwayans, nou pou fer tou sa ki nou kapab pour fer en bon lentrodiksyon.​—1 Korentyen 9:22, 23.

10. (a) Ki ti arive avek en frer? (b) Ki mannyer ou’n vwar pwisans Parol Bondye dan ou minister?

¹⁰ En kantite frer ek ser in vwar ki ler zot servi Parol Bondye, sa i kapab fer en gran lefe lo bann dimoun ki zot pres avek. Par egzanp, en frer ti vizit en msye aze ki ti’n lir nou bann magazin pour plizyer lannen. En zour, olye zis donn li sa dernyen nimero Latour Veyer, sa frer ti deside pour lir en verse. I ti lir 2 Korentyen 1:3, 4 ki dir: “Bondye . . . i en Papa ki pran lapenn e ki donn rekonfor dan tou sityasyon. I rekonfort nou dan tou nou  bann leprev.” Sa bann parol ti telman tous sa msye ki i ti demann sa frer pour relir sa bann verse. Apre sa, sa msye ti dir ki li ek son madanm ti vreman bezwen rekonfor. Gras a sa de verse, i ti anvi konn plis lo Labib. Ler nou servi Parol Bondye dan nou minister, sa i annan en lefe pwisan!​—Akt 19:20.

11. Ki responsabilite bann frer ki ansennyen i annan?

¹¹ Nou kontan asiste nou bann renyon ek lasanble. Rezon prensipal ki nou asiste se pour ador Zeova. Nou osi benefisye avek sa ki nou aprann. I pour sa rezon ki bann frer ki ansenny dan kongregasyon ek lasanble i annan en gran privilez ek en gro responsabilite. (Zak 3:1) Zot bezwen fer sir ki zot lansennyman i baze lo Parol Bondye. Si ou annan sa privilez, ki mannyer ou kapab servi pwisans Labib pour tous leker ou lodyans?

12. Ki mannyer en orater i kapab fer sir ki son diskour i baze lo Labib?

¹² Bann verse i bezwen sa parti pli enportan dan tou diskour. (Zan 7:16) Alor fer byen atansyon ki ou pa met  plis lanfaz lo lafason ki ou fer ou diskour oubyen lo bann leksperyans ek legzanp ki ou servi. Deplis, rapel ki lir Labib pa menm keksoz avek servi Labib pour ansennyen. Anfet, si ou lir tro bokou verse, laplipar dimoun pa pou rapel zot. Alor, swazir byen bann verse ki ou anvi servi. Apre pran letan pour lir, eksplike, servi legzanp e aplik zot byen. (Neemya 8:8) Ler en diskour i baze lo en plan, fer sir ki ou etidye sa plan ek bann verse ki dan sa plan. Esey konpran ki mannyer sa plan i relye avek bann verse. Apre servi serten sa bann verse pour ansenny bann pwen dan sa plan. (Ou kapab trouv bann bon sizesyon dan leson 21 a 23 dan sa liv Benefisye atraver Ledikasyon Lekol Minister Teokratik.) Me sa ki pli enportan, se ki ou demann Zeova pour ed ou partaz son bann zoli panse ki dan Labib.​—Lir Ezra 7:10; a Proverb 3:13, 14. (Vwar not.)

13. (a) Ki lefe en verse ki ti ganny servi dan renyon ti annan lo en ser? (b) Ki lefe lafason ki Labib i ganny servi pandan nou bann renyon in annan lo ou?

¹³ Ler en ser Lostrali ti ankor ptipti, i ti pas atraver en kantite move keksoz  e menm si pli tar i ti aprann konn Zeova, i pa ti vreman kapab krwar ki Zeova i kontan li. Dan en renyon, sa ser ti tann en verse ki ti fer en gro lefe lo li. I ti medit lo sa verse e fer resers. Sa ti fer li lir lezot verse dan Labib. Tousala ti konvenk li ki Zeova i vreman kontan li. b (Vwar not.) Eski ou’n deza tann en verse pandan en renyon oubyen lasanble ki ti annan menm lefe lo ou?​—Neemya 8:12.

14. Ki mannyer nou kapab montre ki nou apresye e kontan Parol Zeova?

¹⁴ Pa nou rekonesan anver Zeova pour son Parol an ekri! I ti promet ki son Parol ti pou dire e i’n gard sa promes. (1 Pyer 1:24, 25) Alor nou anvi fer sir ki nou lir Labib regilyerman, aplik li dan nou lavi e servi li pour ed lezot. Ler nou fer sa, nou montre ki nou vreman kontan e apresye sa trezor e pli enportan ki tou, son Loter, Zeova nou Bondye.