POUR bann Ebre ki ti viv dan Later Promiz, en nouvo lannen ti konmans ler later ti ganny laboure e zot ti senm lagrenn. Zot ti fer sa pandan bann mwan ki nou apel Septanm/Oktob.

Dimoun ti kalkil lakantite zour ki i annan dan en mwan par get bann kartye lalin. I ti kapab annan apepre 29 oubyen 30 zour dan en mwan. Zot ti kalkil grander en lannen dapre soley. Par kont en lannen ki ganny kalkile dapre bann kartye lalin i pli kourt ki en lannen ki ganny kalkile dapre soley. Alor zot ti bezwen rod en fason pour fer sa de kalkilasyon koresponn avek kanmarad. Zot ti fer sa par azout detrwa zour ouswa par tanzantan azout en mwan petet avan konmansman lannen. Sa ti pou fer ki kalandriye ti pou mars avek bann sezon kot zot ti plante e anmas rekolt.

Dan letan Moiz, Bondye ti dir Son pep ki mwan Abib ouswa Nizan i premye mwan dan zot lannen. Ozordi, sa i tonm Mars/Avril. (Egz. 12:2; 13:4) I ti annan en lafet ki ti ganny fer dan sa mwan e sa lafet ti enkli anmas rekolt lorz.​—Egz. 23:15, 16.

Dan son liv The History of the Jewish People in the Age of Jesus Christ, (175 B.C.–A.D. 135), en spesyalis Labib ki apel Emil Schürer ti dir ki i ti fasil pour konnen kan pou azout en mwan dan kalandriye. I ti osi dir: “Lapak ki devret ganny selebre zour i plennlin dan mwan Nizan (14 Nizan), i devret toultan ganny fer apre lekinok prentan . . . Alor, si ver lafen lannen, bann Zwif ti remarke ki Lapak ti pou tonm avan lekinok prentan, zot ti azout en mwan avan Nizan.”

Temwen Zeova i servi sa metod pour zot konn dat ki Repa Senyer i devret ganny fer. Repa Senyer i ganny fer pandan prentan e i tonm le 14 Nizan dapre kalandriye Ebre. Bann kongregasyon partou dan lemonn i ganny enformen byen davans kan sa pou tonbe. a

Me ki mannyer bann Ebre ti konnen kan ki en mwan i fini e en lot i konmanse? Ozordi ou kapab get lo en kalandriye ki’n ganny enprimen ouswa ki lo ou lekipman elektronik. Me dan letan Labib, keksoz pa ti sitan senp.

Pour bann dimoun ki ti viv ver letan Deliz, i ti annan 30 zour dan en mwan. (Zen. 7:11, 24; 8:3, 4) Pli tar sa ti sanze. Pour bann Ebre, pa toultan ki i ti annan 30 zour dan en mwan. Dapre kalandriye Ebre, en mwan ti konmans ler zot ti vwar premye kartye lalin. Sa ti 29 ouswa 30 zour apre ki sa mwan avan ti’n konmanse.

En fwa ler David ek Zonatan ti koz konsernan en nouvo mwan, zot ti dir: “Demen i lafet nouvellin.” (1 Sam. 20:5, 18) Alor i paret ki ver onzyenm syek avan Kris, bann Zwif ti’n konmans kalkil bann mwan davans. Ki mannyer bann Izraelit ti konnen kan ki en mwan ti’n konmanse? Mishnah, ki en koleksyon lalwa oral ek tradisyon Zwif, i donn nou serten lenformasyon. I dir ki apre ki bann Zwif ti retournen sorti legzil an Babilonn, Sannedren (lakour siprenm Zwif) ki ti dir kan ki en mwan i konmanse. Pandan sa set mwan ki i ti annan bann lafet, Sannedren ti zwenn trantyenm zour sak sa bann mwan. Sa bann zonm ki ti dir kan ki sa lot mwan ti pou konmanse. Ki mannyer zot ti pou konnen?

I ti annan bann zonm ki ti’n ganny mete lo bann montanny partou Zerizalenm pour zot get lesyel aswar pour zot konnen ler ki i nouvellin. Sa bann zonm ti pou fer Sannedren konnen ler i nouvellin. Ler Sannedren ti annan ase laprev konmkwa vre i ti nouvellin, zot ti  anonse ki en nouvo mwan ti’n konmanse. Me ki i ti pou arive si i ti annan nyaz ouswa lafoumbal e sa ti anpes sa bann zonm vwar lalin? Sannedren ti dir ki sa mwan ti annan 30 zour e son lannmen en nouvo mwan ti konmanse.

Pour fer dimoun konnen ki en nouvo mwan in konmanse, en dife ti ganny alimen lo Montanny Pye Zoliv pros avek Zerizalenm. Pour fer lezot dimoun konnen dan Izrael, dife ti ganny alimen lo bann montanny. Bann lannen pli tar, bann mesaze ti ganny anvoye pour fer tou bann Zwif dan Zerizalenm ek lezot landrwa konnen ki en nouvo mwan in konmanse. Dan sa fason, zot tou zot ti kapab selebre bann lafet an menm tan.

Sa latab ki swiv i kapab ed ou konpran ki mannyer bann mwan, lafet ek sezon ti ete dan letan bann Izraelit.