1. Ki nou asire e akoz?

 LER ou get tou sa problenm dan lemonn ozordi, eski ou vwar li difisil pour krwar ki keksoz pou amelyore? Bann manm fanmir nepli kontan kanmarad parey avan. Dimoun pe vin pli move e egois. En kantite dimoun i vwar li difisil pour met konfyans dan bann ki annan lotorite. Me sa bann problenm i kapab konvenk ou ki keksoz pou amelyore. Akoz? Parski dimoun pe azir egzakteman parey Labib ti predir dan sa profesi konsernan “bann dernyen zour.” (2 Tim. 3:1-5) Napa en dimoun senser ki kapab dir ki sa profesi pa pe ganny akonplir. Lakonplisman sa profesi i montre ki Zezi Kri in vin Lerwa dan Rwayonm Bondye. Me sa i zis enn parmi plizyer profesi konsernan Rwayonm. Ler nou etidye lezot profesi ki’n ganny akonplir pandan sa bann lannen ki’n pase, sa pou ranforsi nou lafwa.

2. Ki nou pou vwar dan sa lartik e akoz? (Fer en komanter lo portre lo kouvertir.)

² Dan sa lartik, nou pou vwar (1) en profesi ki ed nou konpran kan ki Rwayonm ti ganny etablir, (2) bann profesi ki ed nou konpran ler Zezi ti vin Lerwa dan Rwayonm Bondye dan lesyel e (3) bann profesi ki montre ki mannyer bann lennmi Rwayonm Bondye pou ganny detrir. Nou pou vwar ki sa bann profesi i konekte ansanm parey bann bout en puzzle pou ed nou konnen dan ki letan dan plan Zeova ki nou ladan.

3. Ki sa profesi dan Danyel 7:13, 14 i asir nou?

³ Sa profesi ki dan Danyel 7:13, 14 i asir nou ki Zezi Kri pou sa pli bon Dirizan pour Rwayonm Bondye. Dimoun sorti dan tou nasyon pou kontan pour “servi li” e i pou napa en lot Dirizan apre li. En lot profesi dan liv Danyel ti predir ki Zezi ti pou vin Lerwa dan sa Rwayonm a lafen en peryod letan ki Labib i apel set letan. Eski i posib pour konnen kan ki Zezi ti vin Lerwa?

4. Ki mannyer Danyel 4:10-17 i ed nou konnen kan ki Kris ti pou vin Lerwa? (Vwar not.)

⁴ Lir Danyel 4:10-17. Sa “set letan” i reprezant 2,520 lannen. Sa ti konmans an 607 avan Kris ler bann Babilonnyen ti tir dernyen lerwa lo tronn Zeova ki ti Zerizalenm. I ti fini an 1914 ler Zeova ti fer Zezi, “sa enn ki annan drwa legal” vin Lerwa dan Rwayonm Bondye. b​—Ezek. 21:25-27.

5. Ki en byenfe nou gannyen ler nou konpran sa profesi konsernan sa “set letan”?

⁵ Ki byenfe nou gannyen? Ler nou konpran sa profesi konsernan sa “set letan,” sa i asir nou ki Zeova i akonpli son bann promes dan sa bon moman. Zis parey Zeova ti fer Zezi vin Lerwa dan sa moman ki i’n deside, Zeova pou osi fer sir ki bann lezot profesi i ganny akonplir dan sa moman ki i’n deside. Alor nou kapab asire ki zour Zeova “pa pou an retar!”​—Aba. 2:3.

6. (a) Kwa ki montre ki Kris pe dirize dan lesyel? (b) Ki mannyer Revelasyon 6:2-8 i montre sa?

⁶ Ler Zezi ti pros pour mor, i ti predir serten levennman ki ti pou ed son bann disip konnen ki i’n konmans dirize dan lesyel. Serten parmi bann keksoz ki i ti mansyonnen i lager, lafamin ek tranblemandter. I ti osi predir ki i ti pou annan bann lepidemi ouswa maladi “dan en landrwa apre lot.” Enn parmi sa bann maladi i sa pandemi COVID-19. Sa bann levennman i form parti sa ki Labib i apel “siny” ki Zezi pe dirize konman Lerwa. (Mat. 24:3, 7; Lik 21:7, 10, 11) Plis ki 60 an apre ki Zezi ti’n mor e retourn dan lesyel, Zezi ti donn zapot Zan plis lenformasyon pour montre ki sa bann levennman pou vreman arive. (Lir Revelasyon 6:2-8.) Tou sa bann levennman in arive depi ki Zezi in vin Lerwa an 1914.

7. Akoz keksoz lo later ti vin pli pir ler Zezi ti vin Lerwa?

⁷ Akoz keksoz lo later ti vin pli pir ler Zezi ti vin Lerwa? Revelasyon 6:2 i donn en detay enportan. I dir ki ler Zezi ti vin Lerwa, sa premye keksoz ki i ti fer i pou al lager avek Dyab ek son bann demon. Dapre Revelasyon sapit 12, Satan ti perdi sa lager e li avek son bann demon ti ganny zete lo later. Sa in anmenn “maler pour later” parski Satan i vreman ankoler e i pe tir son lakoler lo bann imen.​—Rev. 12:7-12.

8. Ki byenfe nou gannyen ler nou vwar bann profesi konsernan Rwayonm pe ganny akonplir?

⁸ Ki byenfe nou gannyen? Sa ki pe arive dan lemonn ek sanzman dan latitid  dimoun i ed nou konpran ki Zezi in vin Lerwa dan Rwayonm Bondye. Alor olye ankoler ler nou vwar dimoun pe azir dan en fason egois e kriyel, nou gard antet ki sa ki zot pe fer pe akonpli profesi Labib. I montre ki Rwayonm Bondye pe dirize! (Ps. 37:1) Anmezir ki Armagedon i vin pli pros, nou pou vwar plis problenm dan lemonn. (Mark 13:8; 2 Tim. 3:13) Pa nou vreman rekonesan anver nou Papa ki dan lesyel parski in ed nou konpran akoz i annan sitan bokou problenm dan lemonn!

9. Ki Danyel 2:28, 31-35 i dir konsernan sa dernyen pouvwar mondyal e kan ki i ti konmans dirize?

⁹ Lir Danyel 2:28, 31-35. Sa profesi pe ganny akonplir ozordi. Sa rev ki Neboukadnezar ti gannyen ti montre ki ti pou arive “dan bann dernyen zour” apre ki Kris ti konmans dirize. Zezi ti pou annan bann lennmi lo later e Labib ti predir ki enn parmi bann lennmi ti pou sa dernyen pouvwar mondyal ki ganny reprezante par sa “lipye ki ti an feray ek larzil.” Sa pouvwar mondyal i deza pe dirize. I ti konmans dirize pandan Premye Lager Mondyal ler Langleter ek Lanmerik ti konmans travay ansanm e vin Pouvwar Mondyal Angle e Ameriken. Sa stati dan rev Neboukadnezar ti osi montre ki i ti pou annan de keksoz ki ti pou fer sa pouvwar mondyal diferan avek bann pouvwar mondyal ki ti’n dirize avan li.

10. (a) Ki Danyel ti predir konsernan Pouvwar Mondyal Angle e Ameriken? (b) Ki nou bezwen fer atansyon? (Vwar sa bwat “ Vey byen sa larzil!”)

 ¹⁰ Premyerman, Pouvwar Mondyal Angle e Ameriken pa parey bann pouvwar mondyal ki ti dirize avan li parski i ganny reprezante par en melanz feray ek larzil e pa en metal ki pli for parey lor oubyen larzan. Sa larzil i reprezant bann dimoun ordiner. (Dan. 2:43) Parey nou vwar ozordi, bann dimoun i partisip dan bann eleksyon, kanpanny pour drwa imen, fer bann protestasyon e organiz bann linyon travayer e sa i fer li difisil pour sa pouvwar mondyal fer sa ki i oule.

11. Lefet ki Pouvwar Mondyal Angle e Ameriken pe dirize, ki mannyer sa i fer nou asire ki nou pe viv dan bann dernyen zour?

¹¹ Dezyenmman, Pouvwar Mondyal Angle e Ameriken i ganny reprezante par lipye sa gran stati. I sa dernyen pouvwar mondyal ki Labib i koz lo la. Apre li i pou napa en lot pouvwar mondyal ki pou ganny dirize par bann imen. O kontrer pandan lager Armagedon, Rwayonm Bondye pou detri li ek tou lezot gouvernman imen. c​—Rev. 16:13, 14, 16; 19:19, 20.

12. Ki lezot levidans profesi Danyel i donnen ki rekonfort nou e donn nou lespwar?

¹² Ki byenfe nou gannyen? Sa profesi Danyel i donn plis levidans ki nou pe viv dan bann dernyen zour? Plis ki 2,500 an pase, Danyel ti predir ki apre Pouvwar Mondyal Babilonn, i ti pou annan kat lezot ki ti pou diriz dan bann landrwa kot en kantite parmi pep Bondye ti reste e zot ti pou persekit pep Bondye. I ti osi dir ki Pouvwar Mondyal Angle e Ameriken ti pou sa dernyen pouvwar mondyal. Sa i rekonfort nou e i donn nou lespwar ki byento Rwayonm Bondye pou detri tou gouvernman imen e i pou diriz lo later antye.​—Dan. 2:44.

13. Ki sa “wityenm lerwa” ek sa “dis lerwa” ki ganny mansyonnen dan Revelasyon 17:9-12 i reprezante e ki mannyer sa profesi in ganny akonplir?

¹³ Lir Revelasyon 17:9-12. Premye Lager Mondyal ti fer en kantite destriksyon. Sa i fer ki en lot profesi konsernan bann dernyen zour ti ganny akonplir. Bann dirizan lemonn ti anvi anmenn lape lo later. Alor an Zanvye 1920, zot ti etabli Lasosyete bann Nasyon ki pli tar an Oktob 1945 ti ganny ranplase par Nasyon-z-ini. Sa lorganizasyon i ganny apel “en wityenm lerwa.” Me i pa en pouvwar mondyal parski i depan lo bann pouvwar politik ki siport li pour li ganny pouvwar ek lotorite. Labib i refer avek sa bann pouvwar politik konman “dis lerwa.”

14-15. (a) Ki Revelasyon 17:3-5 i dir konsernan “Gran Babilonn”? (b) Ki pe arive avek fo larelizyon?

¹⁴ Lir Revelasyon 17:3-5. Dan en vizyon ki Bondye ti fer zapot Zan gannyen, Zan ti vwar en prostitye. Sa ti “Gran Babilonn” ki reprezant tou fo larelizyon. Ki sa vizyon i vedir? Pour en kantite letan, fo larelizyon in travay pros avek bann gouvernman lemonn e in siport zot. Me byento Zeova pou met dan leker bann gouvernman “son nide pour ki zot fer son lavolonte.” Ki pou arive apre? Sa bann gouvernman setadir sa “dis lerwa” pou atak bann fo larelizyon e detri zot.​—Rev. 17:1, 2, 16, 17.

 ¹⁵ Ki mannyer nou konnen ki Gran Babilonn i pros pour ganny detrir? Pour nou konn larepons sa kestyon, i ti pou byen ki nou rapel ki en parti lavil Babilonn dan letan lontan ti ganny proteze avek Larivyer Efrat. Liv Revelasyon i konpar sa plizyer milyon dimoun ki siport Gran Babilonn avek en “kantite delo.” (Rev. 17:15) Me i osi dir ki sa delo ti pou “sek” ki montre ki fo larelizyon ti pou perdi en kantite dimoun ki siport zot. (Rev. 16:12) Ozordi sa profesi pe vin vre parski en kantite dimoun pa relizye e zot pe rod solisyon pour zot problenm dan lezot fason.

16. Ki byenfe nou gannyen ler nou konpran bann profesi konsernan Nasyon-z-ini e destriksyon Gran Babilonn?

¹⁶ Ki byenfe nou gannyen? Vi ki en kantite dimoun nepli siport fo larelizyon e lefet ki Nasyon-z-ini i egziste dan nou letan, sa i montre ki nou pe viv dan bann dernyen zour. Menm si en kantite dimoun nepli siport Gran Babilonn, i pa sa ki pou detri bann fo larelizyon. Parey nou’n vwar pli boner,  Zeova pou met dan leker sa “dis lerwa” setadir sa bann pouvwar politik ki siport Nasyon-z-ini “son nide pour ki zot fer son lavolonte.” Sa bann pouvwar politik pou detri Gran Babilonn en sel kou e sa pou sok lemonn antye. d (Rev. 18:8-10) Sa destriksyon pou annan en gran lefe lo lemonn antye e i kapab ki sa letan lavi pou difisil. Me pep Bondye pou annan omwen de rezon pour zwaye. Premyerman, fo larelizyon ki sa pli gran lennmi Bondye pou nepli egziste e dezyenmman, byento nou pou ganny delivre dan sa move lemonn.​—Lik 21:28.

17-18. (a) Ki mannyer nou kapab kontinyen ranforsi nou lafwa? (b) Ki nou pou diskite dan sa lartik ki swiv?

¹⁷ Danyel ti predir ki “vre konnesans [ti] pou vin annabondans.” I sanmenm ki’n arive. Aprezan nou konpran bann profesi konsernan nou letan. (Dan. 12:4, 9, 10) Sa bann profesi in ganny akonplir dan en fason egzakt e sa i fer nou annan plis lapresyasyon pour Zeova ek son Parol enspire. (Iza. 46:10; 55:11) Alor kontinyen ranforsi ou lafwa par etidye byen Parol Bondye e par ed lezot pour devlop en bon lanmitye avek Zeova. Zeova pou protez bann ki met tou zot konfyans dan li e i pou donn zot “lape dirab.”​—Iza. 26:3.

¹⁸ Dan sa lartik ki swiv, nou pou diskit lo bann profesi konsernan kongregasyon Kretyen dan bann dernyen zour. Parey nou pou vwar, sa bann profesi i osi montre ki nou pe viv dan bann dernyen zour. Nou pou vwar lezot levidans ki montre ki Zezi konman nou Lerwa pe diriz son bann disip fidel.