IMEN I ANVI KI LEZOT I KONTAN ZOT. San lanmour, napa okenn maryaz, fanmir oubyen lanmitye ki kapab ere. I pa drol alor ki lanmour i en keksoz vreman enportan pour santi nou byen mantalman e pour fer nou ere. Me kisisa “lanmour”?

Nou pa pe koz lo lanmour romantik me lo en lanmour ki pli enportan ankor. Sa kalite lanmour i fer en dimoun demontre lentere senser e met lentere lezot avan sa ki pour li. I sa lanmour ki ganny gide par prensip ki sorti dan Labib me ki osi enkli lafeksyon ek santiman.

Labib i dekrir lanmour dan en zoli fason ler i dir: “Lanmour i pasyan e i bon. Lanmour pa zalou. I pa fer vantar e i pa orgeye, i pa fer nanryen ki fer onte, i pa rod son prop lentere, i pa ankoler fasilman. I pa gard rankin. I pa pran plezir dan lemal, me i pran plezir dan laverite. I siport tou keksoz, . . . i toultan annan lespwar e i andir tou keksoz. Lanmour i reste pour touzour.”​—1 Korentyen 13:4-8.

Sa kalite lanmour pou “reste pour touzour.” Anfet, i kapab vin pli for avek letan e vi ki i pasyan, bon e pardonn tou, i “soud keksoz ansanm dan en fason parfe.” (Kolosyen 3:14) Alor, bann lanmitye ki baze lo sa kalite lanmour i stab e sa bann dimoun i ere menm si zot enparfe. Par egzanp, annou koz lo maryaz.

Zezi Kri ti ansenny bann prensip enportan lo maryaz. Par egzanp, i ti dir: “‘En zonm pou kit son papa ek son manman e i pou atase avek son madanm e zot de pou vin en sel,’ . . . Alor, sa ki Bondye in ini ansanm zonm pa devret separe.” (Matye 19:5, 6) Nou vwar omwen de prensip enportan dan sa verse.

“ZOT DE POU VIN EN SEL.” Maryaz i sa lanmitye pli entim ki imen i kapab annan. Lanmour i protez sa lanmitye kont enfidelite e i anpes sa msye oubyen sa madanm vin “en sel lekor” avek en dimoun ki pa son konzwen. (1 Korentyen 6:16; Ebre 13:4) Enfidelite i detri konfyans e kas maryaz. Si i annan zanfan dan maryaz, zot kapab ganny afekte emosyonnelman e sa ki pli pir ankor zot kapab santi ki personn pa kontan zot oubyen menm gard rankin kont zot paran.

“SA KI BONDYE IN INI ANSANM.” Maryaz i en keksoz sakre. Bann koup ki rekonnet sa, i fer zefor pour fer sir ki zot maryaz i reste for. Zot pa deswit oule kite ler i annan problenm. Zot lanmour i sitan for ki i difisil pour zot maryaz kase. Sa kalite lanmour ki “siport tou keksoz,” i ed sa koup rezourd problenm pour ki zot ini e anpe.

Ler bann paran i annan sa kalite lanmour kot zot met lentere kanmarad avan, sa i benefisye bann zanfan dan sa fanmir. En zenn fiy ki apel Jessica ti dir: “Mon papa ek mon manman ti vreman kontan e respekte kanmarad. Ler mon vwar ki mon manman i respekte mon papa espesyalman ler i annan pour fer avek zanfan, sa i fer mwan anvi vin parey li.”

Lanmour i kalite prensipal Bondye. Anfet Labib i dir: “Bondye i lanmour.” (1 Zan 4:8) Alor, i pa sirprann nou ki Zeova i ganny apele “sa Bondye ere.” (1 Timote 1:11) Nou osi nou pou ere ler nou fer zefor pour imit bann kalite ki nou Kreater i annan espesyalman son lanmour. Efezyen 5:1, 2 i dir: “Zot bann zanfan ki Bondye i kontan, swiv son legzanp. Kontinyen viv dan lanmour.”