Dan en vwayaz ki lekol ti’n organize, serten garson adolesan ti ganny akize konmkwa zot ti’n abiz en lot garson seksyelman. Zot tou zot ti sorti dan en gran lekol prive Kanada. Apre sa lensidan, en zournalis ki apel Leonard Stern ti ekri dan zournal Ottawa Citizen: “Bann zenn i kapab entelizan, annan en bon ledikasyon ouswa ris me sa pa anpes zot fer bann move keksoz.”

Msye Stern ti osi dir: “Normalman ou ti pou ekspekte ki sa keksoz pli enportan ki en paran ti pou ansenny son zanfan, i pour konnen kwa ki byen e kwa ki mal. Me i paret ki en kantite paran i santi ki i pli enportan pour zot zanfan fer byen lekol e ganny bann bon travay pour zot ganny en kantite larzan.”

I vre ki lekol i enportan. Me menm sa pli bon ledikasyon ki en dimoun i kapab gannyen kot lekol, pa kapab ed li lalit avek bann move dezir ouswa move tandans. Kote alor, nou kapab aprann kwa ki byen e kwa ki mal?

Labib i parey en laglas. Ler nou get ladan, nou vwar pli byen nou bann limit ek febles. (Zak 1:23-25) Me Labib i fer plis ki sa. I ed nou fer bann sanzman neseser pour ki nou arive devlop bann kalite ki promot vre lape ek larmoni. Sa bann kalite i enkli labonte, fer sa ki byen, pasyans, kontrol lo nou lekor ek lanmour. Labib i menm dir ki lanmour i “soud keksoz ansanm dan en fason parfe.” (Kolosyen 3:14) Akoz lanmour i sitan spesyal? Remarke ki Labib i dir konsernan sa kalite.

• “Lanmour i pasyan e i bon. Lanmour pa zalou. I pa fer vantar e i pa orgeye, i pa fer nanryen ki fer onte, i pa rod son prop lentere, i pa ankoler fasilman. I pa gard rankin. I pa pran plezir dan lemal, me i pran plezir dan laverite. I siport tou keksoz, . . . i andir tou keksoz. Lanmour i reste pour touzour.”​—1 Korentyen 13:4-8.

• “Lanmour pa fer ditor son prosen.”​—Romen 13:10.

• “Me avan tou, zot devret kontan kanmarad en kantite, parski lanmour i kouver en kantite pese.”​—1 Pyer 4:8.

Ler ou avek dimoun ki kontan ou, ki mannyer ou santi ou? Sen e sof? An sekirite? Kalm? Wi, ou konnen ki zot anvi sa ki pli bon pour ou, ki zot pa pou zanmen fer ekspre pour bles ou.

Lanmour i osi kapab motiv dimoun pour fer bann sakrifis, menm pour sanz zot fason viv pour ki i fer lezot dibyen. Par egzanp, ler en zonm ki nou pou apel George ti vin granpapa, i ti vreman anvi  pas letan avek son pti zanfan. Me i ti annan en problenm. George ti fim en kantite e son zann pa ti oule ki i fimen dan prezans sa pti baba. Ki George ti fer? Menm si i ti’n fimen pour 50 an, i ti aret fimen pour byennet son pti zanfan. Pa lanmour i vreman pwisan!

Lanmour i en kalite ki nou aprann pour devlope. Bann paran i zwe en gran rol pour ansenny zot zanfan ki mannyer pour demontre lanmour. Zot fer sa ler zot nouri, protez e ed zot zanfan ler zot ganny blese ouswa ler zot malad. Bann bon paran i koz avek zot zanfan e ansenny zot. Zot osi disiplin zot zanfan, ki enkli ansenny zot bann bon prensip lo sa ki byen ek sa ki mal. An plis, bann bon paran i kit en bon legzanp pour zot zanfan swiv.

Me malerezman, serten paran pa pran zot responsabilite. Eski sa i vedir ki zot zanfan pa pou zanmen vin bann bon dimoun? Definitivman non! Menm plizyer dimoun aze, enkli serten ki pa’n grandi dan en bon fanmir, in fer bann gran sanzman dan zot lavi. Zot in vin bann dimoun ki demontre lentere pour lezot e ou kapab kont lo zot. Parey nou pou vwar dan sa lot lartik, sa i menm enkli serten ki lezot ti krwar ki zot pa ti pou zanmen kapab sanze!