Labib i kapab amelyor lavi dimoun. Annou vwar legzanp Ricardo ek Andres.

RICARDO: Ler mon ti annan 15 an, mon ti vin manm en geng. Mon bann nouvo zanmi ti annan en gran lenfliyans lo mwan. Anfet, i ti mon lobzektif pour fer di-z-an prizon! Sa i kapab paret bet! Me kot mon ti reste, bann ki’n al prizon ti ganny admire e respekte. Alor mon ti anvi vin parey zot.

Mon ti fer tou sa ki bann dimoun dan en geng i fer. Mon ti vyolan, pran drog e fer sèks. En zour swar mon ti enplike dan en fiziyad. Mon ti krwar mon pou ganny touye, me mon ti ganny sans sove san okenn dimal. Apre sa, mon ti konmans reflesir pli seryezman lo mon lavi ek mon bann lobzektif e mon ti deside sanze. Me ki mannyer mon ti pou fer sa? Kote mon ti pou ganny led?

Laplipar mon fanmir pa ti ere. Zot lavi ti ranpli avek problenm. Me enn mon tonton ek son fanmir ti diferan. Mon ti konnen ki zot ti bann bon dimoun e ki zot ti viv dapre standar Labib. Anfet, mon ti’n aprann avek zot ki Bondye i apel Zeova. Alor, pa bokou letan apre sa fiziyad, mon ti priy Zeova par son non e demann li pour ed mwan. Son lannmen, mon ti sirprann pour vwar en Temwen Zeova devan mon laport! I ti vin mon ansenyan Labib.

Pa lontan apre, mon ti fer fas avek en problenm. Mon bann zanmi avan, ti souvandfwa telefonn mwan e demann mwan pour pas letan avek zot. Menm si i pa ti fasil, mon ti dir zot non. Mon ti determinen pour kontinyen etidye Labib e mon kontan mon’n fer li! Mon lavi in sanz konpletman e mon’n ganny vre lazwa.

Mon rapel mon ti dir Bondye dan mon lapriyer, ki mon pare pour pas di-z-an dan prizon pour ganny respekte konman manm en geng. Alor, mon ti demann li pour permet mwan servi li konman en serviter a plen tan pour omwen di-z-an pour mon ed lezot zis parey mwan mon’n ganny ede. Vi ki mon’n servi konman en serviter a plen tan pour 17 an, mon’n vwar ki Bondye in reponn mon lapriyer! An plis ki sa, mon pa’n zanmen al prizon.

Par kont, en kantite mon bann zanmi avan i dan prizon. Lezot in mor. Ler mon mazin lepase, mon vreman rekonesan anver mon tonton ek son fanmir ki Temwen Zeova. Zot ti pare pour viv dapre prensip Labib. Avek letan mon ti annan plis respe pour zot ki pour okenn dimoun dan sa geng. Me mon pli rekonesan anver Bondye akoz in ansenny mwan sa pli bon fason viv.

 ANDRES: Mon ti ne e grandi dan en landrwa pov, kot i ti annan en kantite dimoun ki ti servi drog, ki ti voler, komet mert e fer prostitisyon. Mon papa ti en alkolik e adikt avek drog kokain. I ti toultan annan problenm ant mon manman ek mon papa, swa zot ti pe fer kankan swa zot ti pe lager.

Mon ti konmans servi drog ek lalkol byen zenn. Mon ti pas laplipar mon letan lo semen pe vole e pe vann bann keksoz ki mon’n vole. Anmezir mon ti pe grandi, mon papa ti esey vin pli pros avek mwan me dan en move fason. I ti montre mwan ki mannyer pour fer antre drog ek lezot keksoz ilegal dan pei e pour vann sa bann keksoz. Mon ti fer en kantite larzan byen vit. En zour lapolis ti aret mwan e mon ti ganny kondannen senk an prizon pour esey komet mert.

En zour bomaten, mon ti tann en lanons lo spiker prizon ki ti envit bann prizonnyen pour asiste en diskisyon baze lo Labib avek Temwen Zeova. Mon ti deside pour asiste. Sa ki mon ti tande ti fer sans, alor mon ti konmans etidye Labib avek Temwen Zeova. Zot pa ti kasyet sa ki Labib i dir, me zot ti montre mwan bann standar Bondye lo moralite.

I pa ti pran bokou letan pour mwan realize ki mon pa ti pou kapab fer bann sanzman neseser lo mwan menm, sirtou ler lezot prizonnyen ki pa ti kontan sa ki mon ti pe fer ti konmans menas mwan. Alor mon ti priye pour ganny kouraz ek lasazes e Zeova ti ed mwan. Anfet, olye les sa bann menas dekouraz mwan, mon ti ganny kouraz pour koz avek lezot prizonnyen lo Labib.

Zour mon ti pou ganny large prizon, mon ti telman per ki mon ti anvi reste pli lontan dan prizon! Ler mon ti pe ale, plizyer prizonnyen ti fer siny avek mwan pour dir mwan orevwar. I annan ki ti menm dir mwan avek bokou lafeksyon, “Fer bon rantre paster.”

Mon pa ni menm kapab mazinen ki mannyer mon lavi ti pou ete si mon pa ti’n les Bondye ansenny mwan. Mon vreman rekonesan ki Bondye i kontan mwan e ki i pa’n vwar mwan konman en dimoun ki pa kapab sanze. *