POUR BANN PARAN
6: Disiplin
KI I VEDIR
Sa mo disiplin i kapab vedir pour gid oubyen ansennyen. Parfwa, sa i kapab enkli koriz en zanfan ler i’n fer en keksoz mal. Me laplipar ditan, sa mo disiplin i vedir donn en zanfan bann bon konsey ki pou ed li fer bann bon desizyon.
AKOZ I ENPORTAN
Dan sa bann dernyen dizenn lannen ki’n pase, bann paran in preski aret disiplin zot zanfan akoz zot per pangar sa i ava anpes sa zanfan annan konfyans dan son lekor. Par kont, bann paran ki saz i annan serten prensip e zot montre zot zanfan ki mannyer pour swiv.
“Bann zanfan i bezwen konnen kwa ki zot kapab e pa kapab fer pour zot grandi e vin bann adilt responsab. Si en zanfan pa ganny disiplinen, i parey en bato ki napa gouvernay. I pou fer bann move desizyon e sa i kapab anmenn move konsekans.”—Pamela.
SA KI OU KAPAB FER
Ou bezwen konsistan. Si ou zanfan pa swiv ou bann prensip, montre li ki i annan konsekans. De lot kote, si ou zanfan i swiv ou bann prensip, felisit li.
“Vi ki nou viv dan en lemonn kot dimoun pa kontan obeir, mon souvan felisit mon bann zanfan ler zot swiv mon bann prensip. Sa i fer li pli fasil pour zot aksepte disiplin ler i neseser.”—Christine.
PRENSIP LABIB: “Sa ki en dimoun pe senmen, sanmenm ki i pou rekolte osi.”—Galat 6:7.
Ou bezwen rezonnab. Ler ou pe disiplin ou zanfan, pran kont son laz, abilite ek sa keksoz mal ki i’n fer. Disiplin i pli efektiv si i annan pour fer avek sa keksoz mal ki’n ganny fer. Par egzanp, si ou zanfan pa’n swiv bann prensip ki ou’n mete konsernan telefonn, ou kapab pran son telefonn pour en serten letan. An menm tan, evite pran lakoler pour en pti keksoz ki pa vreman enportan.
“Mon esey konpran si mon zanfan in volonterman dezobei oubyen i’n zis fer en move desizyon. Si en zanfan i fer par ekspre e i kontinyen fer menm keksoz mal alor sa zanfan i bezwen ganny korize. Me si i’n zis fer en fot, la i zis bezwen ganny konseye.”—Wendell.
PRENSIP LABIB: “Pa bezwen fer zot zanfan ankoler pour ki zot pa dekouraze.”—Kolosyen 3:21.
Demontre lanmour. I pli fasil pour en zanfan aksepte e aplik disiplin ler i konnen ki son paran pe fer sa akoz i kontan li.
“Ler nou garson ti fer fot, nou ti reasir li ki nou ti vreman fyer ki i’n fer bann bon desizyon dan lepase. Nou ti eksplik li ki sa fot ki i’n fer pa ti pou gat son repitasyon si i ti fer bann azisteman neseser e ki nou ti pou la pour ed li.”—Daniel.
PRENSIP LABIB: “Lanmour i pasyan e i bon.”—1 Korentyen 13:4.
