En msye ek madanm ki fidel avek kanmarad i vwar zot maryaz konman en linyon permanan ki fer zot santi zot stab. Tou lede i annan konfyans ki zot pou onor zot promes maryaz menm si zot pas dan difikilte.

Serten koup i reste ansanm akoz zot per sa ki zot fanmir ek zanmi pou dir si zot divorse. Par kont, sa pli bon rezon pour en koup reste ansanm i akoz zot kontan e annan respe pour kanmarad.

PRENSIP LABIB: “En msye pa devret kit son madanm.”​—1 Korentyen 7:11.

“Si ou pa oule ou maryaz i kase, ou pa pou ofans vitman. Ou pou pardonnen e demann leskiz vitman. Ou vwar bann problenm konman bann lobstak e non pa konman rezon pour divorse.”​—Micah.

Ler i annan problenm, bann konzwen ki pa vreman fidel avek kanmarad i kapab zis dir ki zot pa devret ansanm e rod rezon pour divorse.

“Bokou dimoun i marye akoz zot konnen ki si keksoz pa marse, zot kapab divorse. Ler zot fer sa, i montre ki depi o konmansman zot pa fidel avek kanmarad.”​—Jean.

REFLESIR

Ler ou pe dispit avek ou konzwen . . .

• Eski ou regrete ki ou’n marye avek li?

• Eski ou reve ou avek en lot dimoun?

• Eski ou dir bann parol parey “Mon pe kite ek ou” oubyen “Mon pe al rod en dimoun ki vreman apresye mwan”?

Si ou’n reponn wi pour enn oubyen plis sa bann kestyon, la i lemoman pour ranforsi ou maryaz.

KOZ AVEK OU KONZWEN

• Eski nou nepli kontan kanmarad parey avan? Si wi, akoz?

• Ki nou kapab fer pour kontinyen reste fidel?

SIZESYON

• Tanzantan ekrir bann pti letdamour pour ou konzwen

• Montre ki ou fidel avek li par met son portre lo ou biro dan travay

• Telefonn oubyen anvoy li en pti teks tou le zour ler ou pe travay

PRENSIP LABIB: “Sa ki Bondye in ini ansanm zonm pa devret separe.”​—Matye 19:6.