Konplet Avek En Konviksyon Ferm
Konplet Avek En Konviksyon Ferm
“I pe touzour lit pour zot dan son bann lapriyer afen ki zot finalman konplet e avek en konviksyon ferm dan tou lavolonte Bondye.”—KOLOSYEN 4:12, NW.
1, 2. (a) Ki bann enkrwayan ti remarke konsernan bann premye Kretyen? (b) Konman ki liv Kolosyen i reflekte en lentere ranpli avek lanmour?
BANN disip Zezi ti annan en lentere profon dan zot bann konpanyon Kretyen. Tertilyen (en ekriven dezyenm ek trwazyenm syek N.L.) ti koz lo labonte ki zot ti montre anver bann orfelen, bann pov, ek bann aze. Bann enkrwayan ti sitan enpresyonnen par sa bann temwannyaz lanmour ki zot ti dir konsernan bann Kretyen, ‘Gete konman zot kontan kanmarad.’
2 Liv Kolosyen i reflekte sa menm lentere ranpli avek lanmour ki lapot Pol ek son konpanyon Epafras ti annan pour bann frer ek ser an Kolos. Pol ti ekrir zot: Epafras “pe touzour lit pour zot dan son bann lapriyer afen ki zot finalman konplet e avek en konviksyon ferm dan tou lavolonte Bondye.” Pour lannen 2001, Temwen Zeova pou adopte konman zot teks lannen sa bann mo dan Kolosyen 4:12, NW: “Konplet e avek en konviksyon ferm dan tou lavolonte Bondye.”
3. Ki sa de keksoz ki Epafras ti demande dan lapriyer?
3 Ou kapab vwar ki bann lapriyer Epafras pour bann ki i ti kontan ti annan de laspe: (1) ki zot “finalman konplet” e (2) ki zot “avek en konviksyon ferm dan tou lavolonte Bondye.” Sa lenformasyon in ganny enkli dan Lekritir pour nou benefis. Alor demann ou lekor, ‘Ki mon bezwen fer personnelman pour finalman konplet e avek en konviksyon ferm dan tou lavolonte Bondye? E ki lefe pou annan ler mon fer sa?’ Annou vwar.
Fer Tou Posib pour “Konplet”
4. Dan ki sans bann Kolosyen ti bezwen “konplet”?
4 Epafras ti senserman anvi ki son bann frer ek ser spirityel an Kolos i “finalman konplet.” Sa term ki Pol ti servi, ki’n ganny tradwi isi par “konplet,” i kapab donn en sans parfe, adilt, oubyen matir. (Matye 19:21; Ebre 5:14; Zak 1:4, 25) Probableman ou konnen ki kan en dimoun i en Temwen Zeova batize sa pa otomatikman vedir ki i en Kretyen spirityelman adilt. Pol ti ekrir bann Efezyen, ki ti pe reste dan was Kolos. I ti dir zot ki bann sirveyan ek bann ansennyan pe sey ed zot tou pour ‘ariv dan linite lafwa e dan konnesans Garson Bondye; pour vin bann adilt e pour konn en devlopman konplet parey Kris.’ Dan en lot landrwa, Pol ti konsey bann Kretyen pour “dan zot rezonnman montre matirite.”—Efezyen 4:8-13; 1 Korentyen 14:20.
5. Konman ki nou kapab fer li en lobzektif endispansab pour vin en endividi konplet?
5 Si serten an Kolos pa ti ankor vin adilt oubyen matir spirityelman, sa ti bezwen vin zot lobzektif. Eski sa pa i merit aplik pour nou osi ozordi? Menm si nou’n batize pour plizyer dizenn lannen ouswa resaman, eski nou vwar klerman ki nou’n progrese dan nou abilite pour rezonnen e dan nou bann pwenn-vi? Eski nou pran an konsiderasyon bann prensip Labib avan ki nou fer bann desizyon? Konsernan bann size an rapor avek Bondye ek lentere kongregasyon, eski zot pe pran en plas mazer dan nou lavi, olye segonder? Nou pa kapab ilistre tou fason dan ki nou kapab reflekte en tel devlopman pour vin konplet, me annou konsider de legzanp.
6. Dan ki domenn en endividi i kapab progrese ver perfeksyon, parey Zeova i ete?
6 Premye legzanp: Meton nou’n grandi dan en lanvironnman karakterize par prezidis oubyen ostilite anver bann dimoun ki annan en diferan ras, nasyonalite, oubyen rezyon. Nou aprezan konnen ki Bondye pa fer lapreferans e ki nou osi nou pa devret fer li. (Akt 10:14, 15, 34, 35) Dan nou kongregasyon oubyen rezyon, i annan bann endividi ki annan en lorizin diferan, alor nou rankontre zot. Pourtan, ziska ki pwen ki nou gard serten santiman negatif anndan kont zot, oubyen annan soupson pour sa bann tel dimoun? Eski nou vin en pe anmer, vit pour pans negativman si sa enn avek en lorizin diferan i fer en fot oubyen en pti lofans kont nou? Demann ou lekor, ‘Eski mon bezwen fer plis progre pour annan menm pwenn-vi avek Bondye lo fason ki i vwar keksoz?’
7. Pour vin en Kretyen pli konplet ki kalite pwenn-vi nou bezwen devlope lo lezot?
7 Dezyenm legzanp: Dapre Filipyen 2:3, nou pa devret fer “nanryen par lespri egois e vantar, me avek limilite konsider lezot pli enportan.” Ki mannyer nou pe progrese dan sa laspe? Sak dimoun i annan bann febles ek bann pwen for. Si dan lepase nou ti vitman remark febles lezot, eski nou’n progrese, eski nou nepli ekspekte ki zot preske ‘parfe’? (Zak 3:2) Aprezan, plis ki oparavan, eski nou kapab vwar—menm rod—bann fason dan ki lezot i pli siperyer? ‘Mon bezwen admet ki sa ser i pli siperyer ki mwan lo pasyans.’ ‘Sa enn i reflekte en lafwa pli optimis.’ ‘Fransman, i en pli bon ansennyan ki mwan.’ ‘I pli kapab kontrol son tanperaman ki mwan.’ Petet serten Kolosyen ti bezwen progrese dan sa domenn. Me nou, eski nou bezwen fer progre?
8, 9. (a) Dan ki sans ki Epafras ti priye ki bann Kolosyen i konplet? (b) Prouve ki nou konplet, i sizer kwa konsernan lavenir?
8 Epafras ti priye ki bann Kolosyen i “konplet.” Evidaman, Epafras ti pe priy Bondye pour ki dan mezir ki bann Kolosyen i konplet, matir, e bann Kretyen adilt, ki zot ti pou finalman prouve ki zot konplet oubyen ki zot reste koumsa.
9 Nou pa kapab prezimen ki sak endividi ki vin en Kretyen, menm si i vin en Kretyen matir, i pou kontinyen reste koumsa. Zezi ti dir ki en garson, en lanz Bondye, “pa’n tenir bon dan laverite.” (Zan 8:44, NW ) Pol ti rapel bann Korentyen konsernan serten ki dan lepase ti servi Zeova pour en pe letan me apre zot ti aret dan semen. I ti averti bann frer ki’n ganny swazir par lespri sen: “Sa ki krwar i pe debout, fer atansyon ki i pa tonbe.” (1 Korentyen 10:12) Sa i donn plis sinifikasyon sa lapriyer ki bann Kolosyen i “finalman [prouve ki zot] konplet.” Enn fwa ki zot ti’n konplet oubyen adilt, zot ti bezwen persiste, non pa retourn an aryer, fatige, oubyen elwanye. (Ebre 2:1; 3:12; 6:6; 10:39; 12:25) Alor zot ti pou “konplet” zour zot lenspeksyon ek laprouvasyon final.—2 Korentyen 5:10; 1 Pyer 2:12.
10, 11. (a) Ki model Epafras in les deryer pour nou konsernan lapriyer? (b) Anliny avek sa ki Epafras ti fer, ki rezolisyon ou ti a kontan fer?
10 Nou’n deza diskit lo lenportans pour priy spesifikman pour lezot par mansyonn zot non e ki nou bezwen presi kan nou demann Zeova pour ed zot, konsol zot, beni zot, e akord zot lespri sen. Lapriyer Epafras pour bann Kolosyen ti sa kalite lapriyer. Nou kapab—annefe nou devret—vwar dan sa bann parol en sizesyon presye lo sa ki nou met devan Zeova dan lapriyer konsernan nou menm. San dout, nou devret demann led Zeova pour ki endividyelman nou “finalman konplet.” Eski ou fer li?
11 Akoz ou pa mansyonn ou sitiasyon dan lapriyer? Dir Bondye aki degre ki ou’n progres ver sa leta “konplet,” adilt, e matirite. Enplor li pour ed ou rekonnet bann domenn dan ki ou bezwen grandi ankor spirityelman. (Psonm 17:3; 139:23, 24) Sirman, ou annan bann tel domenn ki bezwen amelyorasyon. Alor, olye dekouraze akoz sa, sipliy Bondye klerman e ouvertman pour ed ou progrese. Fer sa plis ki enn fwa. Anfet, akoz ou pa rezoli ki sa semenn ki pe vini ou pou priy oprofon pour ou “finalman konplet.” E plàn pour fer li pli souvan kan ou egzamin teks pour lannen. Dan ou lapriyer, konsantre lo bann tandans ki ou annan pour rekile, fatige oubyen elwanye avek servis Bondye e konman ki ou kapab evit sa.—Efezyen 6:11, 13, 14, 18.
Priy pour en Konviksyon Ferm
12. Akoz bann Kolosyen sirtou ti bezwen en “konviksyon ferm”?
12 Epafras ti osi priy pour en lot keksoz ki ti esansyel pour bann Kolosyen ganny trouve finalman dan en kondisyon akseptab devan Bondye. I osi neseser pour nou. Kwa sa? I ti priye ki zot “avek en konviksyon ferm dan tou lavolonte Bondye.” Zot ti antoure par bann lansennyman kontrer ek filozofi devaster, enkli serten ki ti annan en laparans tronper vre ladorasyon. Par egzanp, zot ti ganny met anba presyon pour obzerv bann zour spesyal par pa manz ditou oubyen fete, parey ti otrefwa egzize anba ladorasyon Zwif. Bann fo ansennyan ti konsantre lo bann lanz, sa bann lespri pwisan ki ti ganny servi pour delivre Lalwa avek Moiz. Zis mazinen ki ou ti’n ganny ekspoze avek sa bann kalite presyon! Ti annan en miltitid bann lide kontrer ki ti vreman konfizan.—Galat 3:19; Kolosyen 2:8, 16-18.
13. Ki fakter bann Kolosyen ti bezwen rekonnet pour kapab ed zot, e konman sa i kapab ed nou osi?
13 Pol ti kontraye an metan laksan lo rol Zezi Kri. “Tel ki zot in aksepte Kris Zezi zot Senyer, kontinyen reste atase avek li. Viv anrasinen dan li; bati zot lavi lo li; reste touzour pli ferm dan lafwa dapre sa lansennyman ki zot in resevwar.” Wi, ti annan en bezwen (pour bann Kolosyen e pour nou) annan en konviksyon total lo rol Kris dan plan Bondye e dan nou lavi. Pol ti eksplike: “Kris i posed dan son lekor pre[z]ans tou natir konplet Bondye. E zot, zot in resevwar lavi konplet dan Kris, ki domin tou lotorite ek pouvwar spirityel.”—Kolosyen 2:6-10.
14. Akoz lesperans ti vreman en keksoz reel pour bann ki ti an Kolos?
14 Bann Kolosyen ti bann Kretyen swazir par lespri sen. Zot lespwar ti diferan, lavi dan lesyel, e zot ti annan tou rezon pour gard sa lesperans briyan. (Kolosyen 1:5) Dayer, ti “lavolonte Bondye” ki zot annan en konviksyon ferm ki zot lesperans i vreman sir. Eski okenn parmi zot ti devret annan dout lo sa lespwar? Pa ditou! Eski i devret diferan pour tou bann ozordi ki’n ganny lespwar avek Bondye pour viv dan paradi lo later? Sertennman pa! Sa lespwar byen solid i evidaman form parti “lavolonte Bondye.” Aprezan, reflesir en pe lo sa bann kestyon: Si ou pe sey ou mye pour vin enn parmi sa “gran lafoul” ki pou sirviv sa “gran ladetres,” ki degre reel ou lespwar i ete? (Revelasyon 7:9, 14, NW ) Eski i form parti ou “konviksyon ferm dan tou lavolonte Bondye”?
15. Ki bann kalite ki relye avek kanmarad e ki enkli lesperans, Pol ti fer resorti?
15 Kan nou dir “lesperans” nou pa pe koz lo en swe, oubyen en rev imaziner. Nou kapab vwar sa atraver en seri pwen ki Pol ti fer resorti avek bann Romen pli boner. Dan sa seri, sak keksoz ki ganny mansyonnen i relye oubyen konekte avek en lot. Get byen kote Pol i met “lesperans” dan son rezonnman: “Nou rezoui osi dan nou bann soufrans, akoz nou konnen ki lasoufrans i prodwi perseverans, perseverans i prodwi fidelite dan leprev e fidelite i prodwi lesperans. Sa lesperans pa tronp nou, parski lanmour Bondye in ganny deverse dan nou leker par Sent-Espri ki Bondye in donn nou.”—Romen 5:3-5.
16. Anmezir ki ou ti aprann laverite Biblik, ki lesperans ou ti gannyen?
16 Kan bann Temwen Zeova ti partaz pour premye fwa sa mesaz Labib avek ou, en serten verite ti atir ou latansyon, petet kondisyon bann mor oubyen rezireksyon. Pour bokou, premye nouvo dekouvert ti sa posibilite pour viv dan paradi lo later. Mazin kan ou ti tann sa lansennyman pour premye fwa. Pa i ti en lesperans merveye—maladi ek lavyeyes pou nepli egziste, ou pou kapab kontinyen viv pour apresye bann fri ou travay, e pou annan lape avek bann zannimo! (Eklezyast 9:5, 10; Izai 65:17-25; Zan 5:28, 29; Revelasyon 21:3, 4) Ou ti ganny en lesperans ekstraordiner!
17, 18. (a) Konman sa seri ki Pol in prezante avek bann Romen i lye avek lesperans? (b) Ki kalite lesperans ki enplike dan Romen 5:4, 5, e eski ou annan sa kalite lesperans?
17 Avek letan, probableman ou’n fer fas avek serten lopozisyon oubyen persekisyon. (Matye 10:34-39; 24:9) Menm resaman, bann Temwen dan diferan pei in eksperyans piyaz dan zot lakaz oubyen menm ganny forse pour vin refizye. Serten in ganny atake fizikman, zot bann piblikasyon in ganny sezi, oubyen zot in vin lobze bann rapor mansonz dan medya. Nenport ki form persekisyon ou’n kapab fer fas avek, parey Romen 5:3 i dir, ou ti kapab rezwir dan soufrans, e sa ti anmenn ou en bon rezilta. Menm, parey Pol ti ekrir, sa soufrans ti prodwi dan ou perseverans. Perseverans ti apre anmenn ver en kondisyon aprouve. Ou ti konnen ki ou ti pe fer sa ki byen, ou ti pe fer lavolonte Bondye byensir, alor ou ti sir ki ou annan son laprouvasyon. Par parol Pol, ou ti santi ki ou dan “en kondisyon aprouve.” Pol ti kontinyen an dizan ki sa “[kondisyon aprouve, NW ] i prodwi lesperans.” Sa i paret en pe abnormal. Akoz ki Pol i sit “lesperans” dernyen dan sa seri? Pa ou ti annan lesperans byen avan, kan ou ti tann sa bon nouvel pour premye fwa?
18 I kler ki Pol pa pe aktyelman refer avek santiman ki nou ti annan okonmansman pour lespwar lavi parfe. Sa ki i pe refer avek i al pli lwen ki sa; i pli profon, pli stimilan. Kan nou andire fidelman e alor realize ki nou annan laprouvasyon Bondye, sa i fer en lefe profon ki agrandir e afermi nou lesperans ki nou ti annan okonmansman. Sa lespwar i vin pli reel, pli solid, pli personnel. Sa lesperans deplizanpli entans i briy pli for. I penetre nou nanm, nou santi li telman profon. E “sa lesperans pa tronp nou, parski lanmour Bondye in ganny deverse dan nou leker par Sent-Espri ki Bondye in donn nou.”
19. Konman ki ou lesperans i devret form parti ou lapriyer toulezour?
19 I ti lapriyer senser Epafras ki son bann frer ek ser an Kolos i kontinyen ganny afekte e konvenki par sa ki ti’n ganny prezante devan zot, annan “en konviksyon ferm dan tou lavolonte Bondye.” Fotespere ki nou tou endividyelman nou apros Bondye regilyerman osize nou lesperans. Dan ou bann lapriyer personnel, enkli ou lesperans an rapor avek nouvo monn. Avek konviksyon total ki i pou vini, eksprim ou lanvi profon pour vwar sa nouvo monn. Sipliy Zeova pour ed ou aprofondi e elarzi ou konviksyon. Parey Epafras ti priye ki bann Kolosyen i annan “en konviksyon ferm dan tou lavolonte Bondye,” ou osi fer sanmenm. Fer li souvan.
20. Si detrwa i detourn kont sa semen Kretyen, akoz sa pa merit en lakoz pour dekouraze?
20 Ou pa devret santi ou deranze oubyen dekouraze par lefe ki pa tou ki reste konplet e avek konviksyon ferm. Serten i kapab tonbe, vire, oubyen senpleman abandonnen. Sa ti arive parmi bann ki ti pli entim avek Zezi, son bann zapot. Me ler Zida ti vire pour vin en tret, eski lezot zapot ti ralanti oubyen arete? Pa ditou! Pyer ti aplik Psonm 109:8 pour montre ki en lot ti a pran plas Zida. En ranplasan ti ganny swazir e bann fidel serviter Bondye ti aktivman kontinyen zot travay predikasyon. (Akt 1:15-26) Zot ti determinen pour reste konplet avek konviksyon ferm.
21, 22. Dan ki sans ki ler ou konplet avek en konviksyon ferm, sa pa pou pas san apersevwar?
21 Ou kapab totalman asire ki si ou konplet e avek en konviksyon ferm dan tou lavolonte Bondye, sa pa pou pas san apersevwar. I pou ganny obzerve e apresye. Par ki?
22 Bon, ou bann frer ek ser, ki konn ou e kontan ou, pou remarke. Menm si laplipar pa met li an parol, lefe pou parey avek sa ki nou lir dan 1 Tesalonisyen 1:2-6: “Nou touzour remersi Bondye lo size zot tou e nou touzour mansyonn zot dan nou lapriyer. Nou rapel devan nou Bondye e Papa, ki mannyer zot in pratik zot lafwa e akonpli en travay lanmour an restan ferm dan lesperans dan nou Senyer Zezi. Nou pa’n anons zot levanzil zis par parol, me osi par lapisans e dan Lespri Sen avek lasirans konplet. . . . Zot in swiv nou legzanp ek legzanp nou Senyer.” Bann Kretyen fidel otour ou pou santi parey kan zot remarke ki ou “konplet e avek en konviksyon ferm dan tou lavolonte Bondye.”—Kolosyen 1:23.
23. Kwa ki ou devret determinen pour fer pandan sa lannen ki pe vini?
23 Sertennman, ou Papa seles pou obzerve e sa pou fer li plezir. Ou kapab annan konfyans dan sa. Akoz? Parski ou konplet e avek en konviksyon ferm “dan tou lavolonte Bondye.” Dan en fason ankourazan, Pol ti ekrir bann Kolosyen konsernen anmenn “en lavi ki Bondye i aprouve e ki fer li plezir dan tou sa ki zot fer.” (Kolosyen 1:10) Wi, i posib pour bann imen enparfe fer li plezir dan tou sa ki zot fer. Ou bann frer ek ser Kolosyen ti fer sa. Bann Kretyen otour ou la konmela pe fer li. Ou osi ou kapab fer li! Alor, pandan sa lannen ki pe vini les ou lapriyer ek ou aksyon sak zour prouve ki ou determinen pour “finalman konplet e avek en konviksyon ferm dan tou lavolonte Bondye.”
Eski Ou Kapab Mazinen?
• Kwa ki i enplike dan leta ‘konplet’?
• Ki keksoz konsernan ou menm ki ou devret enkli dan lapriyer?
• Parey i ganny sizere dan Romen 5:4, 5, ki kalite lesperans ou swete annan?
• Ki lobzektif nou letid in motiv ou pour annan diran sa lannen ki pe vini?
[Kestyon]
[Portre lo paz 13]
Epafras ti priye ki son bann frer i konplet, avek en konviksyon ferm lo Kris e lo zot lesperans
[Portre lo paz 16]
Plizyer milyon lezot i partaz ou lesperans sir ek ou konviksyon ferm