Delivrans Pour Bann Ki Swazir Lalimyer
Delivrans Pour Bann Ki Swazir Lalimyer
“Zeova i mon lalimyer ek mon delivrans. Mon pou per ki sennla?”—PSONM 27:1.
1. Ki bann provizyon ki donn lavi ki Zeova i ofer?
ZEOVA i Sours lalimyer soley ki fer lavi posib lo later. (Zenez 1:2, 14) I osi Kreater lalimyer spirityel, ki elimin teneb lemonn Satan, ki vedir lanmor. (Izai 60:2; 2 Korentyen 4:6; Efezyen 5:8-11; 6:12) Bann ki swazir lalimyer i kapab dir ansanm avek sa psalmis: “Zeova i mon lalimyer ek mon delivrans. Mon pou per ki sennla?” (Psonm 27:1a) Toutfwa, zis parey ti arive dan letan Zezi, bann ki prefer teneb pa kapab ekspekte en zizman favorab.—Zan 1:9-11; 3:19-21, 36.
2. Dan letan ansyen, ki ti arive avek bann ki ti rezet lalimyer Zeova ek bann ki ti ekout son parol?
2 Dan letan Izai, laplipar ki ti form parti sa pep ki Zeova ti fer lalyans avek ti rezet lalimyer. An konsekans, Izai ti temwanny destriksyon Rwayonm nor Izrael konman en nasyon. E an 607 A.N.L., Zerizalenm ek son tanp ti ganny detrir e bann zabitan Zida ti ganny anmennen an egzil. Toutfwa, bann ki ti ekout parol Zeova ti ganny fortifye pour reziste lapostazi dan sa letan. Konsernan 607 A.N.L., Zeova ti promet ki bann ki ekout li ti pou sirviv. (Zeremi 21:8, 9) Ozordi, nou ki kontan lalimyer nou kapab aprann bokou atraver sa ki ti arive sa letan.—Efezyen 5:5.
Lazwa Bann ki dan Lalimyer
3. Ozordi, ki konfyans nou kapab annan, ki ‘nasyon drwat’ nou kontan, e ki “lavil for” sa “nasyon” i annan?
3 “Nou annan en lavil for. [Bondye] i met delivrans pour bann miray ek ranpar. Ouver bann baro, zot bann zonm, pour ki sa nasyon drwat ki pe gard kondwit fidel i kapab antre.” (Izai 26:1, 2) Sa i bann parol ranpli avek lazwa ki ti ganny eksprimen par bann ki ti met zot konfyans dan Zeova. Bann Zwif fidel dan letan Izai ti get Zeova konman sel Sours reel pour sekirite, non pa bann fo bondye zot konpatriyot. Ozordi, nou annan menm konfyans. Deplis, nou kontan ‘nasyon drwat’ Zeova—“Izrael Bondye.” (Galat 6:16, NW ; Matye 21:43) Zeova osi i kontan sa nasyon akoz son kondwit fidel. Avek son benediksyon, Izrael Bondye i annan en “lavil for,” en lorganizasyon ki parey en lavil, ki siport e protez li.
4. Ki latitid mantal ki ti a byen nou kiltive?
4 Bann ki dan sa “lavil” i byen konnen ki “dezir ki byen etabli [Zeova] pou prezerve dan lape konstan, parski dimoun in ganny fer pour met konfyans dan [Zeova].” Zeova i soutenir bann ki pare pour konfye dan li e konform avek son bann prensip drwat. Alor, bann fidel an Zida ti ekout konsey Izai: “Met konfyans dan Zeova pour touzour, ou lepep, akoz i dan Ya Zeova sa Rose pour touzour.” (Izai 26:3, 4; Psonm 9:10; 37:3; Proverb 3:5) Sa bann ki annan sa latitid mantal i get “Ya Zeova” konman sa sel Rose solid. Zot rezwir en “lape konstan” avek li.—Filipyen 1:2; 4:6, 7.
Imilyasyon Pour Bann Lennmi Bondye
5, 6. (a) Konman ki ansyen Babilonn ti ganny imilye? (b) Dan ki fason “Gran Babilonn” ti ganny abese?
5 Me si bann ki annan konfyans dan Zeova i soufer ladetres? Zot napa nanryen pour per. Zeova i permet bann tel keksoz pour en serten letan, me avek letan i anmenn soulazman, e sa bann ki pe koz sa soufrans i fer fas avek zizman. (2 Tesalonisyen 1:4-7; 2 Timote 1:8-10) Konsider ka en serten “lavil eleve.” Izai i dir: “[Zeova] in zet anba bann ki pe reste lo oter, lavil eleve. I abes li, i abes li ziska later; i fer li tous lapousyer. Lipye pou pyetin li, lipye sa enn aflize, lepa bann dimoun senp.” (Izai 26:5, 6) Sa lavil eleve ki ganny mansyonnen isi i kapab pe refer avek Babilonn. Sa lavil ti sirman afliz pep Bondye. Me ki ti arive avek Babilonn? An 539 A.N.L., i ti tonm dan lanmen bann Med ek Pers. Pa sa ti en imilyasyon!
6 Dan nou letan, parol profetik Izai i byen dekrir sa ki’n arive avek “Gran Babilonn” depi 1919. Sa lavil eleve ti sibir en defet anbarasan sa lannen, kan i ti forse liber pep Zeova anba detansyon spirityel. (Revelasyon 14:8) Sa ki ti arive apre ti pli anbarasan ankor. Sa pti group Kretyen ti aprezan ‘pyetin’ sa enn ki ti kaptir zot oparavan. An 1922, zot ti konmans anons larive lafen Kretyente, an atiran latansyon lo sa kat lavertisman ki tronpet bann lanz ti donnen dan Revelasyon 8:7-12 ek sa trwa maler ki ti ganny predir dan Revelasyon 9:1–11:15.
“Santye en Dimoun Drwat, se Ladrwatir”
7. Ki gidans bann ki tourn ver lalimyer Zeova i gannyen, e dan ki sennla zot espere e ki zot seri?
7 Zeova i fourni delivrans pour bann ki tourn ver son lalimyer, e i gid zot santye, parey Izai i montre: “Santye en dimoun drwat, se ladrwatir. Akoz ou drwat, ou pou aplati semen ki en dimoun drwat i swiv. Wi, konsernan santye ou zizman, O Zeova, nou’n annan lespwar dan ou. Dezir nanm ti pour ou non e pour ou memoryal.” (Izai 26:7, 8) Zeova i en Bondye ki drwat, e bann ki ador li i bezwen obzerv son bann standar drwat. Kan zot fer sa, Zeova i gid zot, i aplati zot semen. An swivan son gidans, bann dimoun dou i montre ki zot esper an li e seri bokou son non—son “memoryal.”—Egzod 3:15.
8. Ki latitid egzanpler Izai ti demontre?
8 Izai ti seri non Zeova. Sa i evidan dan son parol swivan: “Avek mon nanm mon ti dezir ou pandan lannwit; wi; avek mon lespri dan mwan, mon kontinyen rod ou; parski, ler i annan zizman sorti kot ou pour later, ladrwatir i sa ki bann zabitan later prodiktif pou sertennman aprann.” (Izai 26:9) Izai ti dezir Zeova ‘avek son nanm’—avek tou sa ki i ete. Imazin sa profet pe servi bann moman trankil pandan lannwit pour priy Zeova, pour eksprim son bann panse pli profon e resers avek larder gidans Zeova. Pa i en bon legzanp! Deplis, Izai ti aprann ladrwatir atraver bann akt zizman Zeova. Konsernan sa, i rapel nou sa nesesite pour kontinyen reste vizilan e reveye pour rekonnet lavolonte Zeova.
Serten ti Swazir Teneb
9, 10. Ki bann akt bonte ki Zeova ti akonpli anver son nasyon enfidel, me konman zot ti reazir?
9 Zeova ti manifeste en gran bonte leker anver Zida, me malerezman pa tou ki ti reazir byen. Laplipar-di-tan, lamazorite ti swazir rebelyon ek lapostazi olye lalimyer laverite ki Zeova ti ofer. Izai ti dir: “Menm si sa ki mesan i ganny montre faver, i pa pou aprann ladrwatir. Dan pei lonnekte i pou azir enzis e i pa pou vwar grander Zeova.”—Izai 26:10.
10 Dan letan Izai, kan lanmen Zeova ti protez Zida kont son bann lennmi, lamazorite ti refize pour rekonnet sa. Kan i ti beni zot avek son lape, sa nasyon pa ti montre okenn rekonesans. Alor, Zeova ti les zot al servi “lezot met,” e finalman an 607 A.N.L. i ti les zot ganny pran an egzil Babilonn. (Izai 26:11-13) Toudmenm, avek letan en restan sa nasyon, ki ti’n aprann atraver disiplin, ti retourn dan zot pei natal.
11, 12. (a) Ki lavenir sa bann ki ti kaptir Zida? (b) An 1919, ki lavenir ti rezerve pour sa enn ki ti met serviter swazir Zeova an detansyon?
11 Me ki ti arive avek sa ki ti kaptir Zida? Izai i reponn dan en sans profetik: “Zot in mor; zot pa pou viv. San lafors dan lanmor, zot pa pou leve. Alor ou’n donn ou latansyon afen ki ou a aneanti zot e detrir tou mansyon lo zot.” (Izai 26:14) Anfet, apre ki i ti tonbe an 539 A.N.L., Babilonn ti napa okenn lavenir. Avek letan, sa lavil ti pou nepli egziste. I ti pou “san lafors dan lanmor,” e son lanpir imans ti pou ganny met dekote dan bann liv listwar. Pa sa i en lavertisman pour bann ki annan lespwar dan bann pwisans sa monn!
12 Serten laspe sa profesi ti ganny en lakonplisman kan Bondye ti permet ki son bann serviter swazir i al an detansyon spirityel an 1918 e apre liber zot an 1919. Apartir sa moman, lavenir ti sonm pour sa enn ki ti met zot an detansyon, prensipalman Kretyente. Me annefe ti annan bann benediksyon tre ris ki ti’n ganny rezerve pour pep Zeova.
“Ou’n Azout Avek sa Nasyon”
13, 14. Ki bann benediksyon ris bann serviter swazir Zeova in rezwir depi 1919?
13 Bondye ti beni leta lespri repantans son bann serviter swazir an 1919 e i ti ogmant zot nonm. Premyerman, latansyon ti lo rasanbleman bann dernyen manm Izrael Bondye, e apre “en gran lafoul” ‘lezot mouton’ ti konmans ganny rasanble. (Revelasyon 7:9; Zan 10:16) Profesi Izai ti predir sa bann benediksyon: “Ou’n azout avek sa nasyon; O Zeova, ou’n azout avek sa nasyon; ou’n glorifye ou menm. Ou’n agrandi lwen tou frontyer sa pei. O Zeova, pandan ladetres zot in tourn zot latansyon ver ou; zot in vers en pti son lapriyer kan zot ti resevwar ou disiplin.”—Izai 26:15, 16.
14 Ozordi, frontyer Izrael Bondye in propaz partou lo later, e sa gran lafoul ki’n ganny azoute i konpri aktyelman anviron sis milyon, ki avek lantouzyasm pe kontribye anver sa travay pour anons sa bon nouvel. (Matye 24:14) Eski sa pa i en benediksyon Zeova! E konman i anmenn laglwar lo son non! Sa non pe ganny tande ozordi dan plis ki 235 pei—en lakonplisman ekselan son promes.
15. Ki rezireksyon senbolik ti arive an 1919?
15 Zida ti bezwen led Zeova pour reisi sape anba detansyon an Babilonn. Zot pa ti pou kapab fer li lo zot menm. (Izai 26:17, 18) Pareyman, liberasyon Izrael Bondye an 1919 ti laprev soutyen Zeova. I pa ti pou posib san li. Sa sanzman dan zot kondisyon ti sitan sirprenan ki Izai ti konpar li avek en rezireksyon: “Ou bann mor pou viv. En kadav pour mwan—zot pou leve. Leve e kriye avek lazwa, zot ki abit dan lapousyer! Parski ou laroze i parey laroze bann mov, e later pou fer tonbe [setadir donn nesans] menm bann ki napa lafors dan lanmor.” (Izai 26:19; Revelasyon 11:7-11) Wi, nou kapab dir ki bann ki san lafors dan lanmor pou ne ankor pour rekonmans zot aktivite!
Proteksyon dan Bann Moman Danzere
16, 17. (a) An 539 A.N.L., ki bann Zwif ti bezwen fer pour sirviv defet Babilonn? (b) Sa “bann lasanm enteryer” i kapab pe endik kwa denozour, e konman zot benefisye nou?
16 Bann serviter Zeova i toultan bezwen son proteksyon. Toudmenm, byento i pou avans son lanmen kont lemonn Satan pour dernyen fwa, e son bann adorater pou bezwen son led plis ki zanmen oparavan. (1 Zan 5:19) An rapor avek sa moman danzere, Zeova i averti nou: “Ale, mon pep, antre dan ou bann lasanm enteryer, e ferm ou bann laport deryer ou. Kasyet ou pour selman en moman ziska ki mon denonsyasyon i pase. Parski, regarde! Zeova pe sorti dan son plas pour vin devan pour demann kont pour lerer zabitan sa pei kont li, e sa pei pou sirman ekspoz disan ki’n ganny verse e pou nepli kouver bann ki’n ganny touye.” (Izai 26:20, 21; Tsefanya 1:14) Sa lavertisman ti endik bann Zwif konman pour sirviv defet Babilonn an 539 A.N.L. Bann ki ti ekoute ti bezwen reste dan zot lakaz, kot zot ti pou ganny proteze kont konket ki bann solda ti pe fer dan semen.
17 Ozordi, “bann lasanm enteryer” dan sa profesi i kapab pe refer avek sa dizenn milye kongregasyon pep Zeova partou dan lemonn. Sa bann kongregasyon i en proteksyon menm konmela, en landrwa kot bann Kretyen i trouv sekirite parmi zot bann frer e dan bon lanmen bann ansyen. (Izai 32:1, 2; Ebre 10:24, 25) Sa i vre sirtou la ki lafen sa sistenm i pros e kot sirvivans pou depan lo lobeisans.—Tsefanya 2:3.
18. Ki mannyer Zeova pou byento “touy sa mons delo sale”?
18 Konsernan sa letan, Izai i profetize: “Sa zour Zeova, avek son gran sab dir e for, pou tourn son latansyon ver Levyatan, sa serpan glisan, menm Levyatan, sa serpan malonnet, e sertennman i pou touy sa mons delo sale ki dan lanmer.” (Izai 27:1) Lekel “Levyatan” dan nou letan? Aparaman i “serpan lantikite,” Satan li menm, ansanm avek son sistenm mesan, ki i servi pour fer lager kont Izrael Bondye. (Revelasyon 12:9, 10, 17; 13:14, 16, 17) An 1919, Levyatan ti perdi son kontrol lo pep Bondye. Finalman, i pou disparet. (Revelasyon 19:19-21; 20:1-3, 10) Donk, Zeova pou “touy sa mons delo sale.” Antretan, napa naryen ki Levyatan i kapab sey fer kont pep Bondye ki i pou vreman reisi. (Izai 54:17) Konman sa garanti i rekonfortan!
“En Plantasyon Rezen Diven Kimen”
19. Ki kondisyon larestan Kretyen swazir denozour?
19 Eski pa nou annan tou rezon pour rezwir lefe ki Zeova i donn nou tou sa lalimyer? Definitivman! Izai i dekrir lazwa pep Zeova, dan en fason merveye, kan i ekrir: “Sa zour, sant avek li: ‘En plantasyon rezen diven kimen! Mwan, Zeova, mon pe protez li. Atou moman mon pou aroz li. Afen ki personn pa tourn son latansyon kont li, mon pou protez li aswar ensi ki lizour.’ ” (Izai 27:2, 3) Zeova in pran swen avek son “plantasyon rezen,” larestan Izrael Bondye, e avek zot bann konpanyon travayan. (Zan 15:1-8) An rezilta, zot in aport fri ki anmenn laglwar lo son non e prodwir bokou lazwa parmi son bann serviter lo later.
20. Ki mannyer Zeova i protez kongregasyon Kretyen?
20 Nou byen kontan ki lakoler Zeova ki i ti annan oparavan kont son bann serviter swazir—rezon akoz i ti permet zot al anba detansyon spirityel an 1918—in fini. Zeova li menm i dir: “Mon napa firer. Lekel ki pou donn mwan bann touf pikan ek move zerb dan batay? Mon pou mars lo la. Mon pou met dife ladan anmenmtan. Si non fodre ki i sezi mon forteres, ki i fer lape avek mwan; lape, fodre ki i fer avek mwan.” (Izai 27:4, 5) Pour asire ki son bann plantasyon rezen i kontinyen prodwi “diven kimen” an abondans, Zeova i kraz e konsonm tou lenfliyans, konparab avek move zerb, ki ti a kapab gat zot. Alor, fodre ki personn pa met an danze byennet kongregasyon Kretyen! Fodre ki tou i ‘sezi forteres Zeova,’ rod son faver ek son proteksyon. An fezan sa, nou pe fer lape avek Bondye—en keksoz ki sitan enportan ki Izai i mansyonn de fwa.—Psonm 85:1, 2, 8; Romen 5:1.
21. Dan ki fason later prodiktif in ranpli avek “prodwi”?
21 Bann benediksyon i kontinyen: “Dan bann zour ki pe vini Zakob pou pran rasin, Izrael pou fleri e vreman bourzonnen; e zot pou ranpli sirfas later prodiktif avek prodwi.” (Izai 27:6) Sa verse in ganny akonpli depi 1919, i fourni en laprev manifik ki Zeova i annan pwisans. Bann Kretyen swazir in ranpli later avek “prodwi,” nouritir spirityel byen nourisan. Antoure par en monn koronpi, zot mentenir bann standar eleve Zeova avek bokou lazwa. E Zeova i kontinyen beni zot avek ogmantasyon. An rezilta, zot bann konpanyon ki konpri plizyer milyon lezot mouton, pe “ofer [Bondye] ladorasyon lizour konman aswar.” (Revelasyon 7:15) Fotespere ki nou touzour gard sa gran privilez pour pran sa “prodwi” ensi ki partaz li avek lezot!
22. Ki bann benediksyon bann ki aksepte lalimyer i gannyen?
22 Eski nou pa rekonesan ki Zeova pe ekler son pep spirityelman, dan sa letan difisil kot teneb pe kouver later e fernwanr epe pe kouver bann kominote nasyonal? (Izai 60:2; Romen 2:19; 13:12) Pour tou bann ki aksepte li, en tel lalimyer i vedir lape lespri ek lazwa la konmela, e menm lavi eternel dan lavenir. Nou annan tou rezon, alor, nou ki kontan lalimyer, pour ouver nou leker pour loue Zeova ansanm avek sa psalmis: “Zeova i forteres mon lavi. Mon pou annan lakrent pour ki sennla? Esper an Zeova; annan kouraz e fodre ki ou leker i for. Wi, esper an Zeova.”—Psonm 27:1b, 14.
Eski Ou Mazinen?
• Ki lavenir i rezerve pour bann ki oprim pep Zeova?
• Ki ogmantasyon Izai ti profetize?
• Ki sa bann “lasanm enteryer” ki nou devret reste ladan e akoz?
• Akoz kondisyon pep Zeova i anmenn louanz pour li?
[Kestyon]
[Bwat lo paz 30]
NOUVO PIBLIKASYON
Laplipar lenformasyon ki nou’n diskit lo la dan sa de lartik letid ti ganny prezante konman en diskour dan progranm lasanble distrik 2000/2001. Alafen sa diskour, en nouvo piblikasyon ti ganny lanse, ki annan pour tit La prophétie d’Isaïe, lumière pour tous les humains I. Sa liv 416 paz i kontyen en diskisyon verse par verse lo premye 40 sapit sa liv Izai.
[Portre lo paz 26]
Selman bann zis ki ganny permet pour reste dan “lavil for” Zeova, son lorganizasyon
[Portre lo paz 27]
Izai ti resers Zeova “pandan lannwit”
[Portre lo paz 29]
Zeova pe protez son “plantasyon rezen” e pe fer li prodwi fri