Resers Zeova Avan Son Zour Lakoler
Resers Zeova Avan Son Zour Lakoler
“Resers Zeova . . . Resers ladrwatir, resers limilite. Probableman ou kapab ganny kasyet zour lakoler Zeova.”—TSEFANYA 2:3.
1. Ki kondisyon spirityel Zida ti ladan kan Tsefanya ti konmans son aktivite profetik?
TSEFANYA ti konmans son travay profet pandan en letan kritik dan listwar Zida. Kondisyon spirityel sa nasyon ti’n ariv en nivo tre ba. Olye met zot konfyans dan Zeova, lepep ti pe tourn ver bann pret payen ek bann astrolog pour gidans. Ladorasyon Baal, avek son bann seremoni fertilite ti’n ranpli pei. Bann dirizan sosyete—bann prens, bann nob, ek bann ziz—ti pe oprese sa bann menm dimoun ki zot ti sipoze pe proteze. (Tsefanya 1:9; 3:3) I pa etonnan ki Zeova ti deside pour ‘avans son lanmen’ kont Zida ek Zerizalenm pour detri zot!—Tsefanya 1:4.
2. Ki lespwar ti annan pour bann serviter fidel an Zida?
2 Kantmenm sa sitiasyon ti move, ti annan toutfwa en pti lalimyer lespwar. Yosiya, garson Amonn, ti lo tronn sa letan. Menm si i ti senpleman en zanfan, Yosiya ti vreman kontan Zeova. Si sa nouvo lerwa ti reetablir ladorasyon pir an Zida, pa i ti pou en soulazman pour sa pti group ki ti pe fidelman servi vre Bondye! Petet lezot ti pou motive pour zwenn avek zot, ki fer ki zot ti pou ganny prezerve zour lakoler Zeova.
Bann Kondisyon pour Ganny Prezerve
3, 4. Ki sa trwa kondisyon ki en endividi i bezwen ranpli afen ki i ganny prezerve “zour lakoler Zeova”?
3 Eski serten endividi ti vreman kapab ganny sove zour lakoler Zeova? Wi, akondisyon ki zot ranpli sa trwa kondisyon dekrir dan Tsefanya 2:2, 3. Anmenmtan ki nou lir sa bann verse, annou port en latansyon spesyal lo sa bann kondisyon. Tsefanya ti ekrir: “Avan ki sa ki’n ganny ordonnen i donn nesans okenn keksoz, avan ki lazournen i pase zis parey lapousyer lapay, avan ki i ariv lo zot lakoler brilan Zeova, avan ki i ariv lo zot zour lakoler Zeova, resers Zeova, zot tou ki annan limilite lo later, ki’n pratik Son desizyon zizman. Resers ladrwatir, resers limilite. Probableman ou kapab ganny kasyet zour lakoler Zeova.”
4 Pour ganny prezerve, alor, en dimoun ti bezwen (1) resers Zeova, (2) resers ladrwatir, e (3) resers limilite. Sa bann legzizans i devret enteres nou bokou ozordi. Akoz? Parski zis parey Zida ek Zerizalenm ti fer fas avek en zour zizman dan setyenm syek A.N.L., bann nasyon swadizan Kretyen—annefe tou bann mesan—pe diriz ver en konfrontasyon final avek Zeova dan sa “gran ladetres” ki pe aprose. (Matye 24:21, NW ) Tou bann ki anvi ganny kasyet sa letan i devret pran aksyon definitif depi konmela menm. Konman? Par resers Zeova, resers ladrwatir, e resers limilite avan i tro tar!
5. Ki ‘resers Zeova’ i enplike ozordi?
5 Ou kapab dir: ‘Mon en serviter Bondye, mon’n dedye mon lavi, mon’n batize e mon en Temwen Zeova. Pa mon’n deza fini ranpli sa bann kondisyon?’ An realite, i enplik bokou plis ki dedye nou lavi pour Zeova. Izrael ti en nasyon dedye, me dan letan Tsefanya bann dimoun an Zida pa ti pe viv an armoni avek sa dedikasyon. E rezilta se ki sa nasyon ti finalman ganny rezete. Ozordi, ‘resers Zeova’ i enplik devlop e mentenir en relasyon pros, personnel avek li e asosye avek son lorganizasyon teres. I vedir arive konnen konman ki Bondye i vwar keksoz e montre ki nou sansib avek son bann santiman. Nou resers Zeova ler nou etidye son Parol atantivman, medit lo la, e aplik son konsey dan nou lavi. Anmezir ki nou resers gidans Zeova dan lapriyer senser e swiv direksyon son lespri sen, nou relasyon avek li i afermi e nou ganny pouse pour servi li avek ‘tou nou leker, tou nou nanm, ek tou nou lafors vital.’—Deterononm 6:5; Galat 5:22-25; Filipyen 4:6, 7; Revelasyon 4:11.
6. Konman ki nou “resers ladrwatir,” e akoz ki sa i posib menm dan sa monn?
6 Sa dezyenm kondisyon ki ganny mansyonnen dan Tsefanya 2:3 se pour “resers ladrwatir.” Laplipar nou, nou ti fer bann sanzman enportan afen ki nou kalifye pour batenm Kretyen, me nou devret kontinyen mentenir bann standar drwat Bondye toudilon nou lavi. Serten ki ti’n konmans byen dan sa domenn i’n les zot ganny gate par sa monn. I pa fasil pour resers ladrwatir, parski nou antoure par bann dimoun ki konsider limoralite seksyel, koz manti, vole, ek lezot pese konman keksoz normal. Pourtan, en profon dezir pour fer plezir Zeova i kapab venk okenn tandans pour resers laprouvasyon sa monn par esey melanz nou avek li. Zida ti perdi faver Bondye akoz i ti esey imit son bann vwazen payen. Olye imit lemonn, annou alor “fer tou zefor pour fer tou parey” Bondye e konstaman travay pour ‘vin en dimoun konpletman nouvo, kree dan resanblans Bondye e ki tou dimoun i war ki nou viv dan en fason zis e sen dapre laverite.’—Efezyen 4:24; 5:1.
7. Ki mannyer nou “resers limilite”?
7 Trwazyenm pwen ki ganny fer resorti dan Tsefanya 2:3, i ki nou devret “resers limilite” si nou anvi ganny kasyet zour lakoler Zeova. Sak zour, nou antre an kontak avek bann zonm, bann fanm, ek bann zenn ki kapab fer tou eksepte abes zot. Pour zot, annan en tanperaman dou i en defo. Si ou soumet fasilman, sa i ganny konsidere konman en febles grav. Zot egzizan, egois, e dominer, zot panse ki zot bann “drwa” personnel ek preferans i devret atoupri ganny satisfe. Pa i ti a tris si serten sa bann tre i detenn lo nou! La i letan pour “resers limilite.” Konman? Par soumet nou avek Bondye e avek limilite, aksepte son disiplin e konform nou avek son lavolonte.
Akoz “Probableman” Ganny Kasyet?
8. Ki sa mo “probableman” dan Tsefanya 2:3 i endike?
8 Remarke ki Tsefanya 2:3 i dir: “Probableman ou kapab ganny kasyet zour lakoler Zeova.” Akoz ki Tsefanya i servi sa mo “probableman” ler i ti pe adres bann “ki annan limilite lo later”? Bon, sa bann dimoun ki’n montre limilite ti’n pran bann pa pozitif, me i pa ti pou byen pour zot met tro bokou konfyans dan zot prop lekor. Zot pa ti ankor ariv alafen zot lavi e prouve ki zot in reste fidel. I ti posib ki serten antre zot ti kapab tonm dan pese. I menm ka avek nou. Zezi ti dir: “Sa ki reste fidel ziska lafen pou ganny sove.” (Matye 24:13) Wi, pour ganny sove zour lakoler Zeova i depan lo si nou kontinyen fer sa ki byen dan son lizye. Eski sa i ou determinasyon ferm?
9. Ki bann aksyon ki zenn Lerwa Yosiya ti pran?
9 Aparaman parol Tsefanya ti pous Lerwa Yosiya pour “resers Zeova.” Lekritir i dir ki: “Dan wityenm lannen son renny, pandan ki [Yosiya] ti zis en zenn garson [apepre 16 an], i ti konmans resers Bondye son zanset David.” (2 Kronik 34:3) Yosiya ti osi kontinyen ‘resers ladrwatir,’ parski nou lir: “E dan douzyenm lannen [ler Yosiya ti annan apepre 20 an] i ti konmans pirifye Zida ek Zerizalenm avek bann landrwa o ek bann poto sakre ek bann zimaz skilpte ek bann stati an metal. Deplis, zot ti demoli devan li bann lotel Baal.” (2 Kronik 34:3, 4) Yosiya ti “resers limilite” osi, kan avek limilite i ti fer plezir Zeova an pirifyan pei, par elimin idolatri ek lezot pratik fo relizyon. Lezot ki ti montre limilite ti’n bezwen rezwir avek bann tel devlopman!
10. Ki ti arive an Zida an 607 A.N.L., me lekel ki ti ganny prezerve?
10 Bokou Zwif ti retourn ver Zeova pandan renny Yosiya. Apre lanmor Lerwa, sepandan, laplipar ti retourn dan zot vye mannyer—dan bann pratik ki Bondye pa ti aksepte ditou. Parey Zeova ti’n anonse, bann Babilonnyen ti ranvers Zida e ti detri son lavil kapital, Zerizalenm, an 607 A.N.L. Toudmenm, sitiasyon pa ti konpletman dezespere. Profet Zeremi, sa Etyopyen Ebed-melek, bann desandan Yonadab, ek lezot fidel ti ganny kasyet sa zour lakoler Zeova.—Zeremi 35:18, 19; 39:11, 12, 15-18.
Bann Lennmi Bondye—Port Latansyon!
11. Akoz i en defi pour reste fidel avek Bondye ozordi, me ki bann lennmi pep Zeova i devret konsidere?
11 Antretan ki nou pe esper zour lakoler Zeova lo sa sistenm mesan, nou ‘pas dan diferan leprev.’ (Zak 1:2) Dan en bon pe pei ki pretann dir ki zot protez laliberte relizye, bann pret in servi zot lenfliyans avek bann lotorite gouvernmantal pour anmenn bann persekisyon kriyel lo pep Bondye. Bann zonm san prensip in kalonmnyen bann Temwen Zeova, klasifye zot konman en “sekt danzere.” Bondye i okouran zot bann aksyon, e i pa pou les sa pase san pinisyon. Son bann lennmi ti ava fer byen pour konsider sa ki ti arive avek serten ansyen lennmi son pep tel konman bann Filisten. Profesi i dir: “Konsernan Gaza, en lavil abandonnen se sa ki i pou devenir; e Askelonn en dezer inabite. Konsernan Asdod, dan milye lazournen zot pou sas li, konsernan Ekronn, i pou ganny derasinen.” Bann lavil Filisten, Gaza, Askelonn, Asdod, ek Ekronn ti pou konpletman ganny detri.—Tsefanya 2:4-7.
12. Ki ti arive avek Filisti, Moab ek Amonn?
12 Sa profesi i kontinyen: “Mon’n antann repros par Moab e sa bann parol ensilt par bann garson Amonn, avek ki zot in repros mon pep e kontinyen mont lo en ton kont zot teritwar.” (Tsefanya 2:8) I vre ki Lezip ek Etyopi ti soufer anba lanmen bann anvaiser Babilonnyen. Me ki zizman Bondye kont Moab ek Amonn, bann nasyon ki ti sorti dan desandans neve Abraam, Lot? Zeova ti predir: “Moab li menm pou vin zis parey Sodonm, e bann garson Amonn parey Gomor.” Kontrerman avek zot zanset—sa de fiy Lot, ki ti sirviv destriksyon Sodonm ek Gomor—Moab ek Amonn orgeye pa ti pou ganny kasyet zour zizman Bondye. (Tsefanya 2:9-12; Zenez 19:16, 23-26, 36-38) Ozordi, oli Filisti e oli son bann lavil? E konsernan Moab ek Amonn ki en letan ti fyer? Rode ki mannyer ou oule, ou pa pou trouv zot.
13. Ki dekouvert arkeolozik ki ti ganny fer an Niniv?
13 Dan letan Tsefanya, Lanpir Asiryen ti lo pik son pouvwar. Pour dekrir en seksyon en pale ki ti ganny dekouver dan kapital Asiryen, Niniv, arkeolog Austen Layard ti ekrir: “Bann plafon . . . ti divize an bann konpartiman kare, penn avek bann fler, ouswa avek bann reprezantasyon zannimo. Serten ti ganny dekore avek ivwar, sak konpartiman ti ganny antoure avek bann bor ek bann friz elegan. Bann bim, ensi ki bann kote sa bann lasanm, ti petet ganny kouver, ouswa menm plake, avek lor ek larzan, e bann dibwa pli rar ki enkli en kalite sed presye ki ti tre aparan, ti ganny servi pour bann travay dibwa.” Toudmenm, parey ti ganny predir dan profesi Tsefanya, Asiri ti pou ganny detrir e son lavil, Niniv, ti pou vin “en landrwa abandonnen.”—Tsefanya 2:13.
14. Konman ki profesi Tsefanya konsernan Niniv ti akonpli?
14 Selman 15 an apre ki Tsefanya ti pronons sa profesi, Niniv pwisan ti ganny detri, son bann pale rwayal ti redwir an debri. Wi, sa lavil fyer ti redwir an pousyer. Nivo devastasyon ti ganny predir dan en fason frapan: “Tou lede pelikan ek tang pou pas lannwit parmi bann latet pilye. En lavwa pou kontinyen sante par lafnet. I pou annan devastasyon dan lantre.” (Tsefanya 2:14, 15) Bann batiman rwayal Niniv pou apropriye selman pour en kalite gro tang ek bann pelikan reste ladan. Dan bann semen lavil, ou ti pou nepli antann dibri bann komersan, leokri bann gerye, kantik bann pret. Lo bann semen piblik ki ti otrefwa byen okipe, ou ti pou selman antann en lavwa efreyan ki pe sante par lafnet, petet sanson plentif en zwazo ouswa souf divan. Pareyman, tou bann lennmi Bondye ava trouv zot lafen!
15. Ki nou kapab aprann lo sa ki ti arive avek Filisti, Moab, Amonn, ek Asiri?
15 Ki nou kapab aprann kan nou konsider sa ki ti arive avek Moab, Amonn, Filisti, ek Asiri? Nou aprann ki etan bann serviter Zeova, nou napa nanryen pour per nou bann lennmi. Bondye i vwar tou sa ki pe opoz son pep. Zeova ti pran aksyon kont son bann lennmi dan lepase, e denozour i pou anmenn son bann zizman lo tou later abite. Me i pou annan sirvivan—‘en gran lafoul sorti dan tou nasyon.’ (Revelasyon 7:9) Ou kapab parmi zot—me selman si ou kontinyen resers Zeova, resers ladrwatir, e resers limilite.
Maler Pour bann Malfeter Ensolan!
16. Ki profesi Tsefanya ti dir konsernan bann prens ek bann dirizan relizye an Zida, e akoz sa parol i apropriye pour bann swadizan Kretyen?
16 Profesi Tsefanya i adres ankor Zida ek Zerizalenm. Tsefanya 3:1, 2 i dir: “Maler pour sa lavil dominer ki rebel e pe polye li menm! I pa’n ekout en lavwa; i pa’n aksepte disiplin. Dan Zeova i pa’n met konfyans. Ver son Bondye i pa’n aprose.” I telman trazik ki bann zefor ki Zeova in fer pour disiplin son pep in pas anven! Latitid enpitwayab bann prens, bann nob, ek bann ziz ti vreman deplorab. Tsefanya ti eksprim son dezakor anver kondwit san laont bann dirizan relizye, an dizan: “Son bann profet ti ensolan, ti bann zonm traizon. Son bann pret zot menm ti profann sa ki ti sen; zot ti fer vyolans avek lalwa.” (Tsefanya 3:3, 4) Pa sa parol i apropriye pour bann profet ek pret relizye ki swadizan Kretyen ozordi! Avek lensolans, zot in retir non Bondye dan zot tradiksyon Labib e zot in ansenny bann doktrin ki mal reprezant sa Enn ki zot proklanm adore.
17. Ki swa dimoun i ekoute ou non, akoz ki nou bezwen kontinyen deklar sa bon nouvel?
17 Avek bonte, Zeova ti averti lepep konsernan aksyon ki i ti pe al pran. I ti anvoy son bann serviter, bann profet—konman Tsefanya ek Zeremi—pour ankouraz lepep avek ensistans pour repantir. Wi, “Zeova . . . pa ti pou fer okenn keksoz san ladrwatir. Bomaten apre bomaten i ti kontinyen donn son prop desizyon zizman. Okonmansman lazournen i pa ti manke.” Avek ki rezilta? “Me sa enn san ladrwatir pa ti pe konn okenn laont,” Tsefanya ti dir. (Tsefanya 3:5) En lavertisman parey pe ganny anonse ozordi. Si ou en proklanmater sa bon nouvel, ou annan en par dan sa travay lavertisman. Kontinyen deklar sa bon nouvel san arete! Ki swa dimoun i ekoute ou non, pour Bondye ou minister i en sikse osi lontan ki ou pe akonpli li fidelman; ou pa bezwen onte kan ou pe fer travay Bondye avek zel.
18. Konman ki Tsefanya 3:6 pou ganny akonpli?
18 Egzekisyon zizman Bondye pa pou limit avek dezolasyon bann relizyon swadizan Kretyen. Zeova pe elarzi son kondannasyon pour enkli tou nasyon: “Mon ti retrans bann nasyon; zot bann latour dan kwen [miray] ti ganny dezole. I ti devaste zot bann lari, afen ki okenn dimoun pa ti traverse. Zot bann lavil ti ganny les abandonnen.” (Tsefanya 3:6) Sa bann parol i telman asire, ki Zeova i koz lo sa bann destriksyon konmsi i’n fini arive. Ki ti arive avek lavil Filisti, Moab, ek Amonn? E konsernan kapital Asiryen, Niniv? Zot destriksyon i servi konman en legzanp pour averti bann nasyon ozordi. Nou pa devret monk Bondye.
Kontinyen Resers Zeova
19. Ki serten kestyon ki nou ti a kapab reflesir lo la?
19 Dan letan Tsefanya, lakoler Bondye ti ganny lanse lo bann ki, avek mesanste, ti pe “fer tou zot mannyer azir vin tord.” (Tsefanya 3:7) Menm zafer pou arive dan nou letan. Eski ou vwar laprev ki zour lakoler Zeova i pros? Eski ou pe kontinyen “resers Zeova” an lizan son Parol regilyerman—toulezour? Eski ou “resers ladrwatir” an vivan en lavi ki moralman prop an armoni avek bann standar Bondye? Eski ou pe “resers limilite” par pare pour abes ou devan Bondye e obeir li ek son bann laranzman pour ganny sove?
20. Ki kestyon nou pou vwar dan sa dernyen lartik lo profesi Tsefanya?
20 Si nou fidelman kontinyen resers Zeova, ladrwatir, ek limilite, nou ekspekte rezwir bokou benediksyon konmela menm—wi, menm dan sa “bann dernyen zour,” kot nou lafwa pe ganny teste. (2 Timote 3:1-5; Proverb 10:22) Me nou kapab demande, ‘Etan bann serviter Zeova, dan ki bann fason ki nou pe ganny beni ozordi e ki bann fitir benediksyon ki profesi Tsefanya i annan pour bann ki pou ganny kasyet zour lakoler Zeova, ki pe apros tre vit?’
Konman Ou Ti a Reponn?
• Konman ki dimoun i “resers Zeova”?
• Ki “resers ladrwatir” i enplike?
• Konman nou kapab “resers limilite”?
• Akoz nou devret kontinyen resers Zeova, ladrwatir, ek limilite?
[Kestyon]
[Portre lo paz 10]
Eski ou pe resers Zeova atraver letid Labib ek lapriyer senser?
[Portre lo paz 13]
Parski zot kontinyen resers Zeova, en gran lafoul pou sirviv zour son lakoler