Gard Ou Lazwa Dan Servis Zeova
Gard Ou Lazwa Dan Servis Zeova
“Rezoui zot dan Senyer; mon repete, rezoui zot.”—FILIPYEN 4:4.
1, 2. Ki mannyer en frer ek son fanmiy ti kapab gard zot lazwa menm si zot ti’n perdi tou sa ki zot ti annan?
JAMES, en Kretyen aze 70 an ki pe viv an Sera Leonn, in travay dir tou son lavi. Mazinen konman i ti kontan kan i ti finalman reisi anmas ase larzan pour aste en lakaz tou senp avek kat pyes! Me en pe letan apre ki James ek son fanmiy ti’n antre dan zot lakaz, lager sivil ti deklare dan sa pei e zot lakaz ti ganny brile konpletman. Zot ti perdi zot lakaz me zot pa ti perdi zot lazwa. Akoz?
2 James ek son fanmiy pa ti gard zot lespri lo sa ki zot ti’n perdi, me lo sa ki ti reste. James i eksplike: “Menm pandan moman terer, nou ti fer nou bann renyon, lir Labib, priy ansanm, e partaz sa pti gin ki nou ti annan avek lezot. Nou ti kapab gard nou lazwa akoz nou ti konsantre lo nou relasyon merveye ki nou annan avek Zeova.” Sa bann Kretyen fidel ti kapab “kontinyen rezwir” kan zot ti mazin bann byenfe ki zot ti annan, parmi lekel en relasyon personnel e entim avek Zeova ti pli enportan. (2 Korentyen 13:11, NW ) Byensir, zot sitiasyon penib pa ti fasil pour siporte. Me zot pa ti perdi zot lazwa dan Zeova.
3. Konman ki serten premye Kretyen ti gard zot lazwa?
3 Bann premye Kretyen ti rankontre bann leprev konparab avek sa ki James ek son fanmiy ti eksperyanse. Pourtan, kan lapot Pol ti ekrir bann Kretyen Ebre i ti dir sa: ‘Kan zot ti ganny arase zot byen, zot ti aksepte sa avek lazwa.’ Answit, Pol ti eksplik sours zot lazwa: “Zot ti konnen ki zot ti posed bann byen bokou meyer e ki dirab pour touzour.” (Ebre 10:34) Wi, sa bann premye Kretyen ti annan en lesperans pwisan. Zot ti pe atann avek enpasyans pour resevwar en keksoz ki zot pa pou kapab ganny arase—“kouronn lavi” dan Rwayonm seles Bondye, ki pa kapab fletri. (Revelasyon 2:10) Ozordi, nou lesperans Kretyen—ki swa dan lesyel ou lo later—i kapab ed nou mentenir nou lazwa kan nou fer fas avek bann maler.
“Ki Ou Lesperans i Gard Ou dan Lazwa”
4, 5. (a) Akoz ki konsey Pol, ki “ou lesperans i gard ou dan lazwa,” ti ariv dan en moman apropriye pour bann Romen? (b) Kwa ki kapab fer en Kretyen nepli vwar son lesperans?
4 Lapot Pol ti konsey bann konpanyon Kretyen an Ronm ‘ki zot lesperans lavi eternel i gard zot dan lazwa.’ (Romen 12:12) Sa konsey ti vin dan en moman apropriye pour bann Romen. Pa plis ki en deseni apre ki Pol ti ekrir zot, zot ti ganny persekite severman, e serten ti ganny tortire ziska lanmor par lord Lanperer Nero. San dout, zot lafwa ki Bondye ti pou donn zot sa kouronn lavi ki i ti’n promet ti soutenir zot dan zot soufrans. Eski i leka avek nou ozordi?
5 Etan bann Kretyen, nou osi nou ekspekte ganny persekite. (2 Timote 3:12) Deplis, nou rekonnet ki “letan ek levennman san ekspekte” i ariv lo nou tou. (Eklezyast 9:11) En dimoun ki nou kontan i kapab perdi son lavi dan en aksidan. En maladi fatal i kapab koz lanmor en paran oubyen en zanmi pros. Amwen ki nou konsantre lo nou lesperans pour Rwayonm, nou spirityalite i kapab an danze kan nou pas atraver bann tel leprev. Alor, i byen si nou demann nou lekor, ‘Eski mon “lesperans i gard mwan dan lazwa”? Konbyen fwa mon pran letan pour medit lo la? Eski sa Paradi promiz i reel pour mwan? Eski mon imazin mwan ladan? Eski mon enpasyan pour vwar lafen sa sistenm parey i ti leka ler mon ti fek konn laverite?’ Sa dernyen kestyon i merit en refleksyon serye. Akoz? Parski si nou an bonn sante, nou pe viv en lavi ase eze, e nou pe reste dan en pei ki plizoumwen pa ganny afekte avek lager, mankman manze, oubyen dezas natirel, nou ti a kapab—omwen pour lemoman—pa vwar sa nesesite pour nouvo monn Bondye vini.
6. (a) Kan Pol ek Silas ti soufer, lo ki zot ti konsantre? (b) Konman ki legzanp Pol ek Silas i ankouraz nou ozordi?
6 Answit Pol ti konsey bann Romen pour ‘ki dan lasoufrans zot ganny bokou pasyans.’ (Romen 12:12) Pol li menm ti familye avek soufrans. En fwa, i ti ganny en vizyon dan ki en zonm ti envit li pour “pas dan Masedwann” pour ed bann dimoun laba pour aprann konsernan Zeova. (Akt 16:9) Alor, Pol ansanm avek Lik, Silas, ek Timote ti diriz ver Lerop. Kwa ki ti pe esper sa bann misyonner zele? Ladetres! Apre ki zot ti’n pres lavil Filip an Masedwann, Pol ek Silas ti ganny fwete e ganny met dan prizon. Ti kler ki serten zabitan Filip pa ti selman endiferan avek sa mesaz Rwayonm me zot ti osi severman opoze. Eski lafason ki levennman ti’n devlope ti fer sa bann misyonner zele perdi zot lazwa? Non. Apre ki zot ti’n ganny bate e met dan prizon, ‘ver minwi Pol ek Silas ti pe priye e pe sant kantik pour rann glwar Bondye.’ (Akt 16:25, 26) Byensir sa douler bate ki Pol ek Silas ti gannyen pa ti fer zot zwaye ditou, me sa de misyonner pa ti konsantre lo sa. Zot ti avan tou mazin Zeova ek bann fason ki i ti pe beni zot. An perseveran avek lazwa dan ladetres, Pol ek Silas in montre bon legzanp pour zot frer an Filip ek lezot landrwa.
7. Akoz nou lapriyer i devret enkli bann remersiman?
7 Pol ti ekrir: “Priye tou letan.” (Romen 12:12) Eski ou priye kan ou dan lenkyetid? Lo ki size ou priye? Probableman ou mansyonn ou problenm spesifik e ou demann Zeova led. Me ou osi kapab eksprim remersiman pour bann benediksyon ki ou pe rezwir. Kan bann problenm i arive, si nou medit lo bann bon keksoz ki Zeova i fer pour nou, sa pou ed nou pour ‘gard nou lazwa dan lesperans.’ David, ki son lavi ti ranpli avek troub, ti ekrir: “Bokou keksoz ou menm ou’n fer, O Zeova mon Bondye, menm ou bann travay merveye e ou bann panse anver nou; okenn pa kapab ganny konpare avek ou. Si mon ti anvi dir e koz lo la, zot i’n vin pli bokou ki mon kapab rakonte.” (Psonm 40:5) Si parey David, nou regilyerman medit lo bann benediksyon ki nou resevwar sorti kot Zeova, nou pou vwar ki i enposib pour nou pa zwaye.
Gard en Lespri Pozitif
8. Kwa ki ed en Kretyen pour reste zwaye kan i pe pas atraver persekisyon?
8 Zezi ti ankouraz son bann disip pour gard en lespri pozitif kan zot rankontre diferan leprev. I ti dir: “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip.” (Matye 5:11) Ki rezon nou annan pour zwaye dan bann tel sitiasyon? Nou abilite pour reziste lopozisyon i laprev ki lespri Zeova i lo nou. Lapot Pyer ti dir avek bann konpanyon Kretyen dan son letan: “Si zot ganny maltrete pour non Kris, zot ere, parski Lespri laglwar, Lespri Bondye i repoz lo zot.” (1 Pyer 4:13, 14) Par mwayen son lespri, Zeova pou ed nou pour andire e, an rezilta, mentenir nou lazwa.
9. Kwa ki ti ed serten frer pour vwar rezon pour zwaye kan zot ti dan prizon pour zot lafwa?
9 Menm kan nou dan bann sitiasyon pli terib, nou kapab trouv rezon pour rezwir. Sa ti leka avek en Kretyen ki apel Adolf. I ti reste dan en pei kot travay bann Temwen Zeova ti’n ganny restrikte pour plizyer lannen. Adolf ek plizyer son bann konpanyon ti ganny arete e kondannen pour en bon pe letan dan prizon akoz zot ti refize pour renons zot krwayans baze lo Labib. Lavi prizon ti dir, me parey Pol ek Silas, Adolf ek son bann konpanyon ti vwar rezon pour remersi Bondye. Zot fer remarke ki zot leksperyans dan prizon ti ed zot pour fortifye zot lafwa e devlop bann kalite Kretyen ki tre itil, tel ki zenerozite, senpati, ek lafeksyon pour zot frer. Par egzanp, kan en prizonnyen ti ganny en parsel sorti dan lakour, i ti partaz sa ki ti ladan avek son bann konpanyon Kretyen, ki ti konsider sa konman bann provizyon ekstra sorti kot Zeova, sa enn ki donn “tou don ekselan, tou kado parfe.” Sa bann zes bonte ti anmenn lazwa pour sa ki ti donnen ensi pour sa ki ti resevwar. Alor, sa menm leksperyans ki ti annan pour bi afebli zot lafwa ti an realite fer zot vin pli for spirityelman!—Zak 1:17; Akt 20:35.
10, 11. Konman ki en ser ti fer fas avek ganny kestyonnen e kondannen pour en bon pe letan dan prizon?
10 Ella, ki ti reste dan en pei kot travay Rwayonm ti’n ganny restrikte depi byen lontan, ti ganny arete akoz i ti pe partaz son lesperans Kretyen avek lezot. Pour wit mwan, i ti kontinyelman ganny kestyonnen. Kan i ti finalman ganny zize, i ti ganny kondannen pour dis an dan en prizon kot ti napa okenn lezot adorater Zeova. Ella ti annan zis 24 an sa letan.
11 Byensir, sa lide pour pas laplipar son letan konman en zenn adilt dan prizon pa ti rezwir Ella ditou. Me vi ki i pa ti kapab sanz son sitiasyon, i ti deside pour sanz son pwenn-vi. Alor, i ti konmans konsider prizon konman son teritwar personnel pour rann temwannyaz. I dir: “I ti annan sitan bokou pour fer dan predikasyon ki bann lannen ti pas tre vit.” Apre plis ki senk lannen, Ella ti ganny kestyonnen ankor. Bann ki ti pe demann li kestyon ti realize ki bann bar prizon pa ti’n detrir son lafwa, alor zot ti dir li: “Nou pa kapab larg ou; ou pa’n sanze.” “Non, mon’n sanze!” Ella ti reponn dan en lavwa ferm. “Mon annan en pli bon latitid ki ler mon ti antre dan prizon, e mon lafwa i pli for ki avan!” E i ti azoute: “Si zot pa anvi larg mwan, mon a reste ziska ki Zeova i vwar li apropriye pour liber mwan.” Senk an edmi dan prizon pa’n fer Ella perdi son lazwa! I ti aprann kontant li avek nenport sitiasyon ki i ti trouv li ladan. Eski ou kapab aprann keksoz atraver son leksperyans?—Ebre 13:5.
12. Kwa ki kapab fer en Kretyen santi lape lespri dan bann sirkonstans difisil?
12 Pa konklir ki Ella i annan en don eksepsyonnel ki permet li pour fer fas avek bann defi koumsa. Kan i koz lo sa letan ki i ti pe ganny kestyonnen pandan bann mwan avan i ti kondannen, Ella i admet: “Mon rapel mon ledan ti pe bat ansanm, e mon ti santi mwan parey en pti tourtrel ki napa okenn defans.” Toutfwa, Ella ti annan en lafwa for dan Zeova. I’n aprann met son konfyans dan li. (Proverb 3:5-7) An konsekans, Bondye in vin pli reel pour li ki zanmen oparavan. I eksplike: “Sak fwa mon ti antre dan lasanm enterogasyon, mon ti santi lape lo mwan. . . . Pli sitiasyon ti vin pli efreyan, pli sa lape ti vin profon.” Sours sa lape ti Zeova. Lapot Pol i eksplike: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.”—Filipyen 4:6, 7.
13. Kwa ki asir nou ki si nou fer fas avek ladetres, nou pou annan kouraz pour andire?
13 Ella, ki depi sa ti ganny large, ti gard son lazwa malgre problenm. I pa ti fer sa avek son prop lafors me avek lafors ki Zeova ti donn li. I ti leka menm avek lapot Pol, ki ti ekrir: “Alor mon prefere vant mon lekor lo size mon febles, pour ki pisans Kris i repoz lo mwan. . . . Parski ler mon feb, lanmenm ler ki mon for.”—2 Korentyen 12:9, 10.
14. Montre konman ki en Kretyen i kapab adopte en latitid pozitif kan i dan en sitiasyon difisil e ki rezilta i kapab gannyen.
14 Bann presyon ki ou personnelman fer fas avek ozordi i kapab diferan avek sa bann ki nou’n fek vwar. Kantmenm sa, nenport ki kalite presyon ki nou gannyen i difisil pour fer fas avek. Par egzanp, ou anplwayer i kapab kritik ou travay en kantite—bokou plis ki travay bann ki dan lezot larelizyon. Petet i pa posib pour ou trouv en lot travay. Konman ou ti a gard ou lazwa? Mazin Adolf ek son bann konpanyon, ki zot leksperyans dan prizon ti fer zot aprann devlop bann kalite tre esansyel. Si ou fer en zefor senser pour satisfer ou anplwayer—menm si i en dimoun “difisil”—ou pou devlop bann kalite Kretyen tel konman perseverans ek pasyans. (1 Pyer 2:18) Deplis, ou kapab vin pli presye konman en anplwaye, ki ogmant sans pour ou plitar ganny en travay ki pli satisfezan. Aprezan, annou diskit lezot fason ki nou kapab mentenir nou lazwa dan servis Zeova.
Senplifye Ou Lavi I Anmenn Lazwa
15-17. Konman ki en koup ti aprann ki zot kapab tir en pe presyon lo zot, menm si zot pa ti kapab retir son sours konpletman?
15 Petet ou napa bokou swa dan kalite travay profann ki ou fer oubyen landrwa ki ou travay, me i kapab annan lezot laspe ou lavi ki ou kapab annan kontrol lo la. Konsider sa leksperyans swivan.
16 En koup Kretyen ti envit en ansyen pour vin pran en repa kot zot. Pandan lasware, sa frer ek son madanm ti konfye li ki tou resaman zot in santi zot akable avek presyon lavi. Menm si zot tou lede zot ti annan en travay aplentan ki demann bokou zot letan ek zefor, zot pa ti dan en pozisyon pour trouv en lot louvraz. Zot ti demann zot lekor ziska ki tan zot ti pou kapab siporte.
17 Kan zot ti demann sa ansyen konsey, i ti reponn zot, “Senplifye zot lavi.” Konman? Sa frer ek son madanm ti pe pran trwa er-d-tan sak zour pour al travay e retourn kot zot. Sa ansyen, ki ti konn sa koup byen, ti sizere ki zot mazin pour al reste en pe pli pre avek zot landrwa travay afen ki zot a kapab diminyen letan ki zot pran sak zour pour al travay e retourn kot zot. Sa letan ki zot ava ekonomize i a ganny servi pour okip lezot keksoz enportan—oubyen senpleman pour repoz en pe. Si bann presyon lavi pe fer ou perdi en pe ou lazwa, akoz ou pa egzamin ou sitiasyon pour vwar si ou kapab ganny soulaze an fezan serten sanzman?
18. Akoz i enportan pour reflesir byen avan pran bann desizyon?
18 En lot fason pour diminyen presyon se pour reflesir byen avan fer desizyon. Par egzanp, en Kretyen ti deside pour konstri en lakaz. Menm si i pa ti’n zanmen konstri en lakaz avan sa, i ti swazir en plan ki ti byen konplike. I aprezan realize ki i ti kapab evit bann problenm initil si i ti’n “egzamin son bann lepa” avan i swazir en plan pour son lakaz. (Proverb 14:15) En lot Kretyen ti deside pour garanti en lón pour en konpanyon Kretyen. Dapre sa lagreman, si sa enn ki pe ganny prete larzan pa kapab repey sa lón, sa dimoun ki’n garanti sa lón pou oblize peye. Okonmansman, tou keksoz ti mars byen, me avek letan sa dimoun ki ti’n ganny prete larzan ti konmans negliz son lagreman. Sa enn ki ti pret li larzan ti konmans enkyet e i ti demann sa enn ki ti garanti pour repey sa lón antye. Sa ti met en gro presyon lo sa dimoun ki ti garanti sa lón. Eski sa pa ti a’n kapab ganny evite si i ti’n egzamin tou bann fakter ki enplike avan ki i asim responsabilite pour det?—Proverb 17:18.
19. Nonm serten fason dan ki nou kapab diminyen presyon dan nou lavi.
19 Kan nou fatige, fodre pa ki nou konklir ki nou kapab diminyen presyon lo nou e reganny nou lazwa par diminyen letan ki nou pase dan letid personnel, predikasyon ek renyon. Non, fodre pa ki nou fer sa akoz sa i bann mwayen ki fer nou kapab resevwar lespri sen Zeova, ki enn son fri i lazwa. (Galat 5:22) Bann aktivite Kretyen i touzour rafresir nou e normalman i pa tro fatigan. (Matye 11:28-30) I tre probab ki se bann aktivite profann oubyen rekreasyonnel ki fer nou fatige, non pa bann aktivite spirityel. Aprann dormi en ler rezonnab i kapab ede pour rekiper nou. En pti repo anplis i kapab en gran benefis. N. H. Knorr, ki ti servi konman en manm lo Konsey Direkter bann Temwen Zeova ziska son lanmor, ti annan labitid dir bann misyonner: “Kan zot dekouraze, premye keksoz ki zot devret fer se repoze. Zot pou etonnen pour vwar ki laplipar problenm pou pli fasil pour rezourd apre en bon lannwit repo!”
20. (a) Rezim serten fason dan ki nou kapab gard nou lazwa. (b) Ki bann rezon ki ou kapab rapel ki rann nou zwaye? (Vwar bwat lo paz 27.)
20 Bann Kretyen i privilezye pour servi “Bondye ere.” (1 Timote 1:11, NW ) Parey nou’n vwar, nou kapab gard nou lazwa menm kan nou antoure avek bann problenm grav. Annou konsantre lo nou lesperans pour Rwayonm, sanz nou pwenn-vi kan i neseser, e gard nou lavi senp. Alor, nenport ki sitiasyon ki nou trouv nou ladan, nou pou reponn parol Pol: “Rezoui zot dan Senyer; mon repete, rezoui zot.”—Filipyen 4:4.
Reflesir Byen Lo Sa Bann Kestyon:
• Akoz bann Kretyen i devret gard en vizyon kler lo lesperans pour Rwayonm?
• Kwa ki kapab ed nou pour gard nou lazwa dan bann sitiasyon difisil?
• Akoz nou devret senplifye nou lavi?
• Dan ki bann domenn serten in senplifye zot lavi?
[Kestyon]
[Bwat/Portre lo paz 27]
Lezot Rezon Ki Rann Nou Zwaye
Etan bann Kretyen, nou annan plizyer rezon pour rezwir. Annou vwar:
1. Nou konn Zeova.
2. Nou’n aprann laverite dan Parol Bondye.
3. Nou kapab ganny pardonnen pour nou pese par nou lafwa dan sakrifis Zezi.
4. Rwayonm Bondye pe dominen—byento nouvo monn!
5. Zeova in met nou dan en paradi spirityel.
6. Nou pe rezwir en bon lasosyasyon Kretyen.
7. Nou annan privilez pour partisip dan travay predikasyon.
8. Nou vivan, e nou annan en serten lafors dan nou.
Konbyen lezot rezon ou kapab mansyonnen ki rann nou zwaye?
[Portre lo paz 24]
Pol ek Silas ti zwaye menm dan prizon
[Portre lo paz 26]
Eski ou konsantre lo sa fitir nouvo monn ere ki Bondye in promet?