An Avan Ver Laviktwar Final!
An Avan Ver Laviktwar Final!
“Mon ti war en seval blan. Sa ki ti pe mont li ti annan en fles dan son lanmen, e zot ti donn li en kouronn; i ti ale konman en venker e pour ganny laviktwar.”—REVELASYON 6:2.
1. Ki levennman ki ti pou arive dan lavenir ki Zan ti vwar dan vizyon?
GRAS a lenspirasyon divin, zapot Zan ti kapab vwar sa ki ti pou arive 1,800 an plitar e i ti dekrir kouronnman Kris konman Lerwa. Zan ti bezwen lafwa pour li krwar sa ki i ti vwar dan sa vizyon. Ozordi, nou annan levidans kler ki sa kouronnman ki ti ganny profetize in fini arive depi 1914. Avek nou lizye lafwa nou vwar Zezi Kri, pe “ale konman en venker e pour ganny laviktwar.”
2. Ki reaksyon Dyab apre ki Rwayonm ti ganny etabli, e ki levidans sa in donn nou?
2 Apre ki Rwayonm ti ganny etabli, Satan ti ganny pouse dan lesyel, ki ti fer li lalit pli for e avek en pli gran firer, me byensir sa pa ti ogmant son sans pour reisi. (Revelasyon 12:7-12) Son lakoler in fer sitiasyon lemonn vin pli kritik ki zanmen oparavan. Ou a krwar lasosyete imen pe pouri. Pour bann Temwen Zeova sa i en levidans kler ki zot Lerwa pe al an avan “pour ganny laviktwar.”
Sosyete en nouvo Monn pe ganny formen
3, 4. (a) Ki bann sanzman dan lorganizasyon ki’n ganny fer dan kongregasyon Kretyen depi ki Rwayonm ti ganny etabli, e akoz sa ti neseser? (b) Parey Izai ti predir, ki benefis sa bann sanzman in anmennen?
3 Enn fwa ki Rwayonm ti’n etabli, ti’n ler pour kongregasyon Kretyen ki ti’n ganny reetablir—e ki ti aprezan annan plis responsabilite—adopte plis bann metod ek karakteristik kongregasyon Kretyen premye syek. Alor, Latour Veyer le 1 ek le 15 Zen, 1938, ti analize konman ki bann Kretyen i devret organize. Plitar dan son nimero le 15 Mars, 1972, i ti donn plis leksplikasyon lo Konsey Direkter dan son lartik “Un collège central est différent d’une association déclarée.” An 1972, bann konsey ansyen ti ganny apwente pour asiste bann kongregasyon lokal e enstri zot.
4 Reetablisman en bon sirveyans ti vreman fortifye kongregasyon Kretyen. En lot keksoz ki ti kontribye ver sa lefe ti laranzman ki Konsey Direkter ti fer pour enstri bann ansyen lo zot responsabilite, enkli form zot pour tret bann pese grav. Sa bann devlopman gradyel ki lorganizasyon teres Bondye in eksperyanse ek lefe pozitif ki sa in anmennen ti ganny predir dan Izai 60:17: “Olye kwiv mon pou anmenn lor, olye feray mon pou anmenn larzan, olye dibwa ek kwiv e olye bann ros ek feray; mon pou etabli lape konman ou bann sirveyan e ladrwatir konman bann ki donn ou latas.” Sa bann amelyorasyon ti demontre benediksyon Bondye e i ti en laprev ki Bondye i aprouv sa bann ki ti pe siport ouvertman son Rwayonm avek zel.
5. (a) Ki mannyer Satan ti reazir kan Zeova ti beni Son pep? (b) An armoni avek Filipyen 1:7, konman ki pep Zeova in reazir anver lakoler Satan?
5 Satan pa ti inyor sa bon latansyon ek gidans ki Bondye ti donn son pep apre ki Rwayonm ti’n ganny etabli. Annou vwar konman. An 1931, sa pti group Kretyen ti nepli anrezistre senpleman konman bann Etidyan Labib. An akor avek Izai 43:10, zot ti bann Temwen Zeova! Ki swa par kwensidans ou non, Dyab ti lans en seri persekisyon eksepsyonnel partou dan lemonn. Menm dan bann pei tel konman Letazini, Kanada, ek Lalmanny, ki ti normalman ganny rekonnet pour zot liberte relizye, bann Temwen ti bezwen plizyer fwa bataye legalman pour prezerv zot liberte relizye. An 1988, Lakour Siprenm Letazini ti’n deza vwar 71 ka ki ti enplik bann Temwen Zeova, e de tyer ladan ti ganny zize dan zot faver. Ozordi, bann batay legal pe kontinyen partou dan lemonn, afen ki parey dan premye syek, nou kapab “defann e konsolid levanzil.”—Filipyen 1:7.
6. Eski lenterdiksyon ek restriksyon i anpes pep Zeova al an avan? Donn legzanp.
6 Pandan bann lannen 1930, zis avan Dezyenm Lager Mondyal, bann gouvernman diktater ti enterdi oubyen restrikte travay bann Temwen Zeova dan bann pei konman Lalmanny, Lespanny, ek Zapon. Me pandan lannen 2000, zis dan sa trwa pei tousel ti annan 500,000 proklanmater Rwayonm ki ti aktif. Sa ti fer preske dis fwa lakantite Temwen ki ti annan dan lemonn antye an 1936! I kler ki bann lenterdiksyon ek restriksyon pa kapab anpes pep Zeova al an avan anba direksyon zot Sef venker, Zezi Kri.
7. Ki levennman remarkab ti arive an 1958, e ki sanzman enpresyonan nou’n vwar apre sa?
7 An 1958, sa progre ti vreman ganny manifeste kan pli gran lasanble ki bann Temwen Zeova in deza gannyen, Lasanble Enternasyonal Lavolonte Divin, ti ganny organize New York, avek en maksimonm lasistans 253,922. An 1970 laport ti’n ouver pour zot aktivite dan sa trwa pei ki nou’n fek mansyonnen, eksepte pour sa ki ti apel Les Lalmanny sa letan. Me bann Temwen ti ankor touzour ganny enterdi Linyon Sovyetik e osi dan bann pei ki ti alye avek li dan Pakt Varsovi. Ozordi i annan plis ki 500,000 Temwen aktif dan sa bann pei ki ti Kominis oparavan.
8. Ki rezilta ti annan kan Zeova ti beni son pep, e ki Latour Veyer 1950 ti annan pour dir lo la?
8 Temwen Zeova in ganny beni avek plis ogmantasyon akoz zot in kontinyen “rod plito Rwayonm Bondye ek son lazistis.” (Matye 6:33) Literalman, profesi Izai in fini ganny akonpli: “Sa enn ki pti pou vin en milye, e sa enn tipti en nasyon pwisan. Mwan menm Zeova, mon pou akseler li dan son letan.” (Izai 60:22) E sa pa fini lanmenm. Zis dan sa dernyen dis an ki’n pase, lakantite defanser Rwayonm ti ogmante par 1,750,000 dimoun. Sa bann dimoun in volonterman form parti en group ki en Latour Veyer an 1950 ti fer sa remark lo la: “Bondye pe aprezan prepar sosyete en nouvo monn. . . . Sa group pou pas atraver Armagedon, . . . zot pou premye lo sa ‘nouvo later’ . . . , zot ganny organize dan en fason teokratik, vi ki zot konn bann prosedir lorganizasyon.” Sa lartik ti konklir: “Alor, konman sosyete sa nouvo monn, annou al an avan nou tou san get deryer!”
9. Konman ki bann keksoz ki bann Temwen Zeova in aprann pandan plizyer lannen in vreman benefisye zot?
9 Antretan, sosyete sa nouvo monn ki pe kontinyelman grandi, in aprann savwar fer ki’n vreman itil e petet menm i pou servi zot dan travay restorasyon apre Armagedon. Par egzanp, bann Temwen in aprann organiz bann gran lasanble, aport led sekour vitman, e konstri bann batiman dan en pti lespas letan. Sa bann aktivite koumsa in fer bokou dimoun admir e respe bann Temwen Zeova.
Koriz bann fo Lenpresyon
10, 11. Montre konman ki bann fo lenpresyon lo bann Temwen Zeova in ganny korize.
10 Toutfwa, i annan serten dimoun ki akiz bann Temwen Zeova konmkwa zot viv en lavi ki pa an akor avek lasosyete imen. Sa i prensipalman akoz pwenn-vi Biblik ki bann Temwen i annan lo bann size parey transfizyon disan, pa pran kote dan bann zafer sa monn, fimen, ek moralite. Me deplizanpli piblik pe konmans rekonnet ki i vo lapenn konsider pwenn-vi bann Temwen. Par egzanp, en dokter Lapolonny ti telefonn biro ladministrasyon bann Temwen Zeova e dir ki i ti pe debat pour plizyer er-d-tan lo size transfizyon disan avek son bann koleg lopital. Sa diskisyon ti konmanse apre ki en lartik ti’n aparet dan en zournal Polonnen Dziennik Zachodni. Sa dokter ti admet, “Mwan personnelman, mon regrete ki disan in ganny servi tro bokou dan domenn medikal. Sa i bezwen sanze, e mon kontan ki kelken in lev sa size. Mon ti a kontan ganny plis lenformasyon.”
11 Dan en konferans ki ti ganny fer lannen pase, bann lotorite medikal sorti Izrael, Kanada, Lerop, ek Letazini ti diskit lo bann lenformasyon ki’n ganny prepare pour ed bann dokter tret pasyan san servi disan. Dan sa miting, ki ti deroule Laswis, en pwen ti ganny fer resorti ki kontrerman avek pwenn-vi zeneral lakantite pasyan ki ti mor ti pli bokou parmi bann ki ti pran transfizyon disan ki bann pasyan ki pa ti pran disan. An zeneral, bann pasyan Temwen Zeova i kapab sorti lopital pli vit ki bann ki’n ganny trete avek disan, ki an retour i minimiz fre tretman.
12. Donn en legzanp konman ki bann dimoun o plase in felisit bann Temwen Zeova pour pa pran par dan politik.
12 Deplis, bann bon komanter in ganny fer lo desizyon bann Temwen Zeova pour pa pran kote dan bann zafer sa monn avan e pandan Dezyenm Lager Mondyal, kot zot ti reziste latak brital Nazi. Sa video La fermeté des Témoins de Jéhovah face à la persécution nazie ki’n ganny prodwi par Temwen Zeova ti ganny zwe premye fwa pour piblik le 6 Novanm, 1996, dan kan konsantrasyon Ravensbrück an Lalmanny. Bokou komanter favorab ti ganny fer lo la. Dan louvertir en lot prezantasyon parey ki ti fer kot fame kan konsantrasyon an Bergen-Belsen le 18 Avril, 1998, direkter pour Sant Ledikasyon Politik ki baze Lower Saxony, Dr. Wolfgang Scheel, ti admet: “En keksoz ki zennan dan listwar se ki bann Temwen Zeova in rezet Sosyalis Nasyonal avek en pli gran determinasyon ki bann legliz Kretyen. . . . Nenport ki pwenn-vi nou kapab annan lo lansennyman ek larder relizye bann Temwen Zeova, zot merit ganny respe pour zot determinasyon pandan rezim Nazi.”
13, 14. (a) Ki bon remark ki ti ganny fer an faver bann premye Kretyen par en sours ki zot pa ti pe ekspekte? (b) Donn legzanp bann bon komanter ki’n ganny fer an faver pep Bondye dan nou letan.
13 Kan bann dimoun o plase oubyen bann desizyon lakour i an faver Temwen Zeova dan bann size kontrovers, sa i kapab diminyen bann prezidis e fer bann Temwen ganny vwar en pe pli byen. Sa i souvan fer li posib pour zot koz avek dimoun ki oparavan pa ti zanmen pare pour ekoute. Alor bann Temwen Zeova i vreman akeyir e apresye sa bann keksoz koumsa. Sa i fer nou rapel sa ki ti arive an Zerizalenm dan premye syek. Kan lakour siprenm Zwif, Sannedren, ti anvi touy bann Kretyen akoz zot ti pe pres avek zel, Gamalyel, “en profeser Lalwa ki dimoun ti byen estimen” ti averti an dizan: “Mon bann kanmarad Izraelit, fer byen atansyon sa ki zot oule fer avek sa bann zonm. . . . Pa bezwen pran ka avek sa bann zonm; les zot trankil. Parski si se zonm ki deryer sa ek travay ki zot pe fer, i pou disparet limenm. Me si sa i travay Bondye, zot pa pou kapab detri li. Fer atansyon ki zot pa pe lit kont Bondye.”—Akt 5:33-39.
14 Parey Gamalyel, resaman bann dimoun o plase in eksprimen ki zot an faver ki bann Temwen Zeova i ganny zot liberte relizye. Par egzanp, ansyen tyermenn Lakademi Enternasyonal pour Laliberte Larelizyon ek Krwayans ti argimante: “Nou pa devret refiz en larelizyon son drwa relizye senpleman akoz lasosyete pa konsider son konviksyon konman akseptab oubyen an konformite avek lasosyete.” En profeser ki etidye larelizyon liniversite Leipzig ti demann en kestyon enportan an rapor avek en delegasyon gouvernman Lalmanny ki ti ganny etabli pour fer lanket lo sa ki zot apel bann sekt relizye. I ti demande: “Akoz ki zis bann pti group relizye ki devret ganny met anba obzervasyon me non pa sa de gran larelizyon [Larelizyon Katolik Romen ek Larelizyon Literiyen]?” Nou kapab fasilman trouv larepons dan sa ki en ansyen zofisye Alman ti ekrir: “San dout, par deryer lasenn, bann fanatik relizye i dikte delegasyon gouvernman lo desizyon politik ki zot pran.”
Nou rod Soulazman avek ki Sennla?
15, 16. (a) Akoz sa ki Gamalyel ti kapab fer ti limite? (b) Lekel sa trwa lezot dimoun o plase ki ti limite dan sa ki zot ti kapab fer an faver Zezi?
15 Sa ki Gamalyel ti dir ti senpleman atir latansyon lo lefe ki en travay ki annan soutyen Bondye pa kapab fel. San dout, bann premye Kretyen ti benefisye par sa ki i ti dir avek Sannedren, me zot pa ti oubliye osi ki Zezi ti dir ki son bann disip ti pou ganny persekite. Sa ki Gamalyel ti fer ti met en lafen avek plan bann sef relizye pour touy zot, me i pa ti elimin persekisyon konpletman, parski nou lir dan Akt 5:40: “Zot ti apel bann zapot, fer bat zot, e donn zot lord pour pa koz ankor lo Zezi. Apre sa zot ti les zot ale.”
16 Letan Zezi ti pe ganny zize, Pons Pilat, ki pa ti trouv okenn rezon pour kondann li, ti esey liber li. Me i pa ti arive fer li. (Zan 18:38, 39; 19:4, 6, 12-16) Ti menm annan de manm Sannedren, Nikodenm ek Zozef ki ti sorti Arimate, ki ti dakor avek Zezi me zot pouvwar pour anpes lakour pran aksyon kont Zezi ti limite. (Lik 23:50-52; Zan 7:45-52; 19:38-40) Soulazman ki bann zonm i kapab anmennen kan zot defann pep Zeova—pour nenport ki rezon—i limite. Lemonn pou kontinyen ay bann vre disip Kris zis parey zot ti ay li. Zis Zeova ki kapab anmenn soulazman konplet.—Akt 2:24.
17. Ki pwenn-vi realistik bann Temwen Zeova i annan, e akoz zot determinasyon pour kontinyen pres sa bon nouvel pa diminyen?
17 Vi ki zot annan en pwenn-vi realistik, bann Temwen Zeova i ekspekte ki persekisyon i kontinyen. Lopozisyon pou arete selman kan sistenm Satan i ganny defet final. Pourtan, sa persekisyon menm si i pa en keksoz agreab, i pa anpes bann Temwen akonpli zot devwar pour pres lo Rwayonm. Pa zot annan laprouvasyon divin, alors akoz zot ava arete? Zot get zot Sef kouraze, Zezi Kri, konman sa bon legzanp.—Akt 5:17-21, 27-32.
18. Ki bann difikilte ki pep Zeova i ankor bezwen fer fas avek, me ki rezilta ki zot konvenki zot pou gannyen?
18 Vre larelizyon in fer fas avek lopozisyon ferm depi okonmansman. Byento, i pou vin lobze en latak final ki pou ganny fer par Gog, Satan depi ler i’n ganny abese kan i ti ganny pouse dan lesyel. Me vre larelizyon pou sirviv. (Ezekyel 38:14-16) Anba gidans Satan, “bann lerwa lo later an antye” pou “konbat avek Lanyo, e Lanyo pou ganny laviktwar lo zot akoz i Senyer-de-senyer e Rwa-de-rwa.” (Revelasyon 16:14; 17:14) Wi, nou Lerwa pe al an avan pour laviktwar e byento i pou “ganny laviktwar.” I vreman en gran privilez pour al avek li, parski nou konnen ki byento napa personn ki pou kontredir bann adorater Zeova ankor kan zot dir: “Bondye i pour nou”!—Romen 8:31; Filipyen 1:27, 28.
Eski ou kapab eksplike?
• Ki Zeova in fer pour fortifye kongregasyon Kretyen depi ki Rwayonm in ganny etabli?
• Ki Satan in fer pour anpes Kris ganny laviktwar, e avek ki rezilta?
• Ki pwenn-vi ekilibre nou devret annan lo sa ki bann ki pa Temwen i fer dan nou faver?
• Ki Satan pou fer byento, e avek ki rezilta?
[Kestyon]
[Portre lo paz 30]
Desizyon bann Temwen pour pa pran kote dan Dezyenm Lager Mondyal i ankor pe anmenn loner pour Zeova