Annou Rezwir Dan Travay Rekolt!

“I annan en gran rekolt ki’n pare me napa ase zouvriye. Pour sa rezon, sipliy met rekolt pour anvoy zouvriye.” —MATYE 9:37, 38.

1. Kwa ki ed nou persevere pour fer lavolonte Bondye?

KAN nou mazin sa zour ki nou ti batize konman enn bann serviter Zeova, i konmsi in fek arive yer, menm si i ti ariv ennde lannen pase oubyen bokou lannen avan. Loue Zeova ti vin pwen santral nou lavi ki nou ti’n dedye avek li. Anmezir ki nou ti servi byen tou lokazyon ki prezant devan nou pour ed lezot pour antann sa mesaz Rwayonm e petet aksepte li, nou pli gran preokipasyon ti pour servi Zeova avek lazwa. (Efezyen 5:15, 16) Ziska prezan, nou’n vwar ki letan i taye kan nou byen okipe “dan travay Senyer.” (1 Korentyen 15:58) Kantmenm nou rankontre problenm, nou lazwa pour fer lavolonte Zeova i ensit nou pour kontinyen fer sa travay.—Neemya 8:10.

2. Kwa ki kontribye anver sa lazwa ki nou eksperyanse dan nou travay rekolt senbolik?

² Konman Kretyen, nou pe fer en travay kot nou rekolte dan en sans senbolik. Zezi Kri ti konpar rasanbleman bann endividi pour lavi eternel avek en rekolt. (Zan 4:35-38) Vi ki nou pe partisip dan sa aktivite rekolt, i pou ankourazan pour nou si nou egzamin lazwa ki bann premye zouvriye rekolt ti eksperyanse. Nou pou egzamin trwa fakter ki kontribye pour donn nou lazwa dan sa travay rekolt. Sa i (1) nou mesaz lespwar, (2) sikse dan nou travay, e (3) nou latitid pezib konman bann zouvriye rekolt.

Anvoye konman bann Zouvriye dan Rekolt

3. Dan ki domenn bann premye disip ti eksperyans lazwa?

³ Lavi bann premye zouvriye dan sa rekolt—sirtou sa 11 zapot fidel Zezi—ti vreman sanze lannen 33 N.L. kan zot ti al lo en montanny an Galile pour zwenn Kris ki ti’n resisite! (Matye 28:16) Aparaman, “plis ki 500 son bann disip” ti prezan sa zour. (1 Korentyen 15:6) Sa komann ki Zezi ti donn zot ti kontinyen rezonnen dan zot zorey. I ti dir zot: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Malgre persekisyon vyolan, zot ti eksperyans bokou lazwa dan sa travay rekolt kan zot ti vwar kongregasyon bann disip Kris pe ganny etabli dan plizyer landrwa. Avek letan, ‘sa Levanzil ti’n ganny anonse avek tou dimoun dan lemonn antye.’—Kolosyen 1:23; Akt 1:8; 16:5.

4. Dan ki sirkonstans bann disip Kris ti ganny anvoye?

⁴ En pe pli boner dan son minister an Galile, Zezi ti apel son 12 zapot e anvoy zot pour anonse sirtou ki: “Rwayonm lesyel i pros!”  (Matye 10:1-7) Li menm i ti “al partou dan bann lavil ek dan bann vilaz [an Galile]. I ti ansennyen dan zot bann sinagog e i ti pres bonn nouvel rwayonm e i ti geri tou bann malad ek bann ki enfirm.” Zezi ti annan pitye pour bann lafoul “akoz zot ti fatige e dekouraze parey bann mouton ki napa berze.” (Matye 9:35, 36) Telman i ti santi li touse, i ti dir son bann disip: “I annan en gran rekolt ki’n pare me napa ase zouvriye. Pour sa rezon, sipliy met rekolt [Zeova Bondye] pour anvoy zouvriye.” (Matye 9:37, 38) An Zide, kan ti reste li zis sis mwan pour konplet son minister lo later, lopinyon Zezi lo nesesite pour ganny bann zouvriye rekolt ti ankor touzour parey. (Lik 10:2) Dan tou le de ka, i ti anvoy son bann disip konman bann zouvriye rekolt.—Matye 10:5; Lik 10:3.

Nou Mesaz Lespwar

5. Ki kalite mesaz ki nou anonse?

⁵ Ozordi, nou ki bann serviter Zeova, nou reponn sa lapel pour vin zouvriye rekolt avek bokou lazwa. En fakter ki kontribye bokou pour fer nou zwaye i lefe ki nou anmenn en mesaz lespwar pour bann ki dekouraze. Parey bann premye disip Zezi, pa nou annan en gran privilez pour proklanm sa bon nouvel—en mesaz ki donn vre lespwar—bann ki “fatige e dekouraze parey bann mouton ki napa berze”!

6. Ki aktivite bann zapot ti partisip ladan dan premye syek?

⁶ Dan milye premye syek, lapot Pol ti byen okipe pe pres sa bon nouvel. Sirman son travay rekolt ti efikas, parski ler i ti ekrir bann Kretyen an Korent ver lannen 55 N.L., i ti dir: “Bann frer, aprezan mon oule fer zot rapel ki mannyer mon’n anons zot Levanzil, ki zot in resevwar, avek ki zot lafwa i atas byen for.” (1 Korentyen 15:1) Bann zapot ansanm avek lezot premye Kretyen ti bann zouvriye rekolt ki ti travay dir. Menm si Labib pa dir konbyen zapot ki ti sirviv sa bann levennman kritik ki ti fini par destriksyon Zerizalenm lannen 70 N.L., nou konnen ki lapot Zan ti ankor pe prese 25 an plitar.—Revelasyon 1:9.

7, 8. Ki mesaz lespwar bann serviter Zeova pe anonse avek plis irzans ki zanmen oparavan?

⁷ Apre sa, bann syek dominen par klerze Kretyente, “sa Gran Rebel” aposta ti swiv. (2 Tesalonisyen 2:3) Toudmenm, ver lafen diznevyenm syek, bann ki ti pe esey zot mye pour viv zot lavi dapre lansennyman bann premye Kretyen ti aksepte sa mesaz lespwar, ki ti pe anons Rwayonm. Anfet, depi son premye nimero (Zilyet 1879) tit sa magazin ti enkli sa parol “Anons Prezans Kris,” “Anons Rwayonm Kris,” oubyen “Pe anons Rwayonm Zeova.”

⁸ Rwayonm seles Bondye ti ganny etabli e donnen avek Zezi an 1914, e aprezan nou pe anons sa mesaz lespwar avek plis irzans ki zanmen oparavan. Akoz? Se akoz enn parmi bann byenfe ki Rwayonm pou anmennen, se lafen sa sistenm mesan ki nou pe viv ladan i tre pros. (Danyel 2:44) Ki pli bon mesaz i kapab annan? E ki pli gran lazwa i annan ki kontribye pour anons sa Rwayonm avan ki ‘gran ladetres’ i demare?—Matye 24:21; Mark 13:10.

Nou Travay i en sikse

9. Ki lenstriksyon Zezi ti donn son bann disip, e ki mannyer dimoun ti reazir anver sa mesaz Rwayonm?

⁹ En lot fakter ki kontribye pour fer nou zwaye konman bann zouvriye rekolt i sa sikse ki nou gannyen kan nou rod bann ki vin disip e zwenn nou dan sa travay rekolt. Dan lannen 31-32 N.L., Zezi ti donn son bann disip sa lenstriksyon swivan: “Kan zot ariv dan en lavil oubyen en vilaz, rode ki sennla ki [merite, NW ].” (Matye 10:11) Pa tou dimoun ki ti merite. Sa nou kapab vwar par lafason ki zot ti reazir anver sa mesaz Rwayonm. Toudmenm, bann disip Zezi ti pres sa bon nouvel avek zel partou kot zot ti kapab vwar dimoun.

10. Konman ki Pol ti kontinyen rod bann ki ti merite?

¹⁰ Apre lanmor ek rezireksyon Zezi, bann disip ti kontinyen travay dir pour rod bann  ki ti merite. Pol ti rezonn avek bann Zwif dan zot sinagog e avek bann dimoun ki i ti zwenn lo laplas piblik an Atenn. Kan i ti donn en temwannyaz Lareopaz dan sa lavil Grek, “ti annan kantmenm serten ki ti krwar. Parmi zot ti annan Deni, manm konsey Lareopaz, avek en madanm ki ti apel Damaris ek lezot ankor.” Partou kot Pol ti ale, i ti en legzanp dan pres ‘an piblik e kaz-an-kaz.’—Akt 17:17, 34; 20:20.

11. Ki bann metod ki ti ganny servi pour akonpli predikasyon dan bann lannen oparavan?

¹¹ Diran bann dernyen dizenn lannen dan diznevyenm syek, bann Kretyen swazir ti rod bann ki merite avek bokou lardyes. Dan en lartik ki ti annan pour tit “Anointed to Preach,” Zion’s Watch Tower Zilyet/Out 1881 ti dir: “Predikasyon sa bon nouvel . . . pe kontinyen ganny anonse avek bann ki ‘annan limilite’—bann ki pare e kapab ekoute, afen ki parmi zot lekor Kris i ava kapab devlope, bann zeritye ansanm avek li.” Bann zouvriye rekolt ti souvan zwenn dimoun sorti lanmes e donn zot bann trak ki kontyen bann mesaz Biblik ki’n ganny fer avek en bi pour provok en bon reaksyon delapar bann ki merite. Apre en bon obzervasyon lo efikasite sa metod temwannyaz, Latour Veyer le 15 Me, 1903, ti ankouraz bann zouvriye rekolt pour distribye bann trak “port-an-port, dan Dimans bomaten.”

12. Konman ki nou’n fer nou travay predikasyon vin pli efikas? Donn legzanp.

¹² Dan bann lannen pli resan, nou’n elarzi nou minister par kontakte bann dimoun dan lezot landrwa apar ki zot lakour. Sa in vreman efikas dan bann pei kot kondisyon ekonomik ek bann aktivite detant i fer dimoun absante kot zot lakour dan bann letan ki nou abityelman pase. An Langleter, kan en Temwen ek son konpanyon ti remark bann viziter anbarke dan bis pour retourn kot zot apre ki zot ti’n pas en lazournen obor lanmer, zot ti pran kouraz pour antre dan sa bann bis e prezant bann kopi Latour Veyer ek Réveillez-vous! avek sa bann pasaze. Dan en mwan, zot ti distribye 229 magazin. Zot rakonte: “Nou pa per pour donn temwannyaz obor lanmer, dan bann landrwa komers, oubyen per okenn lezot defi ki nou kapab rankontre akoz nou konnen ki Zeova i touzour avek nou.” Zot in etabli en distribisyon magazin, konmans en letid Labib, e tou le de in partisip dan servis pionye asistan.

13. Ki bann sanzman dan nou minister ki aprezan neseser dan serten landrwa?

¹³ Anmezir ki nou kontinyen rod bann ki merite, petet i neseser fer en bon evalyasyon lo nou minister dan serten landrwa. Kantmenm bokou Temwen in annan labitid pour pres port-an-port dan Dimans bomaten, dan serten landrwa zot in vwar ki vizit bann dimoun boner dan bomaten i mwen efikas akoz sa bann dimoun i kapab ankor pe dormi. Apre ki zot in fer en sanzman dan zot progranm, bokou Temwen i aprezan pres pli tar dan lazournen petet apre bann renyon Kretyen. E sa in vreman raport bokou fri. Lannen pase lakantite proklanmater Rwayonm ti ogmant par 2.3 poursan. Sa i onor Met rekolt e i fer nou leker kontan.

Mentenir Lape dan Travay Rekolt

14. Ki latitid nou devret annan kan nou pres nou mesaz, e akoz?

¹⁴ En lot rezon ki fer nou zwaye i relye avek nou latitid pezib ki nou manifeste dan sa travay rekolt. Zezi ti dir: “Kan zot antre dan en lakaz, dir, ‘Lape i a avek zot.’ Si bann zabitan sa lakaz i resevwar zot, zot salitasyon lape i a reste avek sa lakaz.” (Matye 10:12, 13) Sa mo salitasyon an Ebre ensi ki son ekivalan an Grek i donn sa lide ‘Port byen.’ Sa santiman i afekte lafason ki nou apros dimoun kan nou pres sa bon nouvel. Nou swete ki zot pou reazir favorableman anver sa mesaz Rwayonm. Pour bann ki fer li, zot annan sa lespwar pour rekonsilye avek Bondye anmezir ki zot repantir zot pese, sanz zot lavi e fer son lavolonte. An retour, lape avek Bondye i anmenn  ver lavi eternel.—Zan 17:3; Akt 3:19; 13:38, 48; 2 Korentyen 5:18-20.

15. Konman ki nou kapab mentenir en latitid pezib kan en dimoun pa reazir favorableman avek nou travay predikasyon?

¹⁵ Ki mannyer nou kapab gard nou lape menm kan reaksyon ki nou gannyen pa favorab? Zezi ti dir: “Si zot pa ganny resevwar, zot salitasyon lape i a retourn kot zot.” (Matye 10:13) Dan resi ki Lik ti donnen konsernan sa 70 disip ki ti’n ganny anvoye, Zezi ti mansyonnen: “Si i annan la en dimoun ki posed lape, ou swe lape i a reste avek li, sinon ou swe lape i a retourn avek ou.” (Lik 10:6) Kan nou apros bann dimoun avek sa bon nouvel, nou fer li byen dan en fason agreab e pezib. Si sa dimoun ki nou pe koz avek pa montre okenn lentere, ouswa i konplent oubyen i pas en vilen remark, sa pou fer ki nou mesaz lape i ‘retourn avek nou.’ Me sa pa priv nou sa lape, ki en fri lespri Bondye.—Galat 5:22, 23.

En bon Lobzektif pour bann Zouvriye Rekolt

16, 17. (a) Ki nou lobzektif kan nou fer bann retourn vizit? (b) Ki mannyer nou kapab ed bann ki annan kestyon lo Labib?

¹⁶ Konman bann zouvriye rekolt nou kontan ki nou annan en par pour fer dan rasanbleman bann dimoun pour lavi eternel. E pa nou rezwir kan en dimoun ki nou pres avek i reazir favorableman, i anvi konn plis, e i montre ki i “en dimoun ki posed lape”! Petet i annan bokou kestyon baze lo Labib e nou vwar li enposib pour reponn tou dan en sel vizit. Vi ki i pa touzour apropriye pour reste en kantite letan kot en dimoun ki nou pe vizit li pour premye fwa, ki nou kapab fer? Nou kapab annan menm lobzektif avek sa enn ki ti ganny rekomande apepre 60 an pase.

¹⁷ “Tou Temwen Zeova i devret pare pour kondwir bann letid model dan Labib.” Sa i en deklarasyon ki ti aparet dan trwazyenm seri sa pti liv Étude modèle ki ti ganny pibliye an 1937 a 1941. I kontinyen par dir: ‘Tou proklanmater [Rwayonm] i devret travay dir e fer tou sa ki posib pour ed bann dimoun ki oule fer plezir Bondye e ki montre lentere dan mesaz Rwayonm. Ou bezwen retournen pour revwar sa bann dimoun, reponn zot bann kestyon . . . , e konmans en letid model . . . oplivit posib.’ Wi, lobzektif nou bann  retourn vizit se pour konmans en letid Labib e kondwir li regilyerman. * En latitid amikal ek en lentere senser dan sa dimoun ki enterese pou pous nou pour prepar byen e pour kondwir en letid dan en fason ki efikas.

18. Ki mannyer nou kapab ed bann nouvo pour vin disip Zezi Kri?

¹⁸ Avek led liv Konnesans Ki Anmenn ver Lavi Eternel ek brosir tel konman Sa ki Bondye i ekspekte nou fer?, nou kapab kondwir bann letid Labib ki efikas e alor nou kapab kontribye pour ed bann nouvo ki enterese pour vin disip. Ler bann etidyan Labib i vwar ki nou pe esey imit sa Gran Ansennyan, Zezi Kri, probableman zot osi zot pou aprann par nou latitid pezib e zwaye, nou senserite, ek nou respe pour bann standar ek gidans Zeova. Kan nou ed bann nouvo par reponn zot kestyon, annou osi fer sa ki nou kapab pour ansenny zot konman pour reponn bann ki kestyonn zot. (2 Timote 2:1, 2; 1 Pyer 2:21) Vi ki nou bann zouvriye rekolt senbolik, sirman nou byen kontan pour vwar ki lannen pase en mwayenn 4,766,631 letid Labib ti ganny kondwir partou dan lemonn. Nou tre kontan sirtou si nou personnelman nou parmi sa bann zouvriye rekolt ki annan en par dan sa aktivite letid Labib.

Kontinyen rezwir dan Rekolt

19. Akoz ti annan tou rezon pour rezwir pandan rekolt diran minister Zezi e en pe letan apre?

¹⁹ Pandan minister Zezi e en pe letan apre, zot ti annan bon rezon pour rezwir dan rekolt. Apre sa, bokou dimoun ti reazir favorableman anver sa bon nouvel. Zour Lapannkot lannen 33 N.L., ti annan plis lazwa akoz apepre 3,000 dimoun ti aksepte lenstriksyon Pyer, zot ti resevwar lespri sen Zeova, e zot ti form parti nasyon Izrael spirityel Bondye. Anfet, zot ti kontinyen ogmante, e zot lazwa ti agrandi ofiramezir ki Zeova “ti azout avek zot group tou bann ki ti pe ganny sove.”—Akt 2:37-41, 46, 47; Galat 6:16; 1 Pyer 2:9.

20. Kwa ki donn nou bokou lazwa dan nou travay rekolt?

²⁰ Pandan sa letan, profesi Izai ti realize: “Ou’n fer sa nasyon vin en gran nonm; ou’n fer son lazwa vin gran. Zot in rezwir devan ou parey zot rezwir dan letan rekolt, parey  bann ki zwaye kan zot pe partaz benefis.” (Izai 9:3) Menm si aprezan nou vwar ki sa ‘gran nasyon’ ki konpoze avek bann Kretyen swazir in preski konplete, nou resanti en kantite lazwa kan nou obzerv lezot zouvriye rekolt ki pe kontinyen agrandi lannen apre lannen.—Psonm 4:7; Zekarya 8:23; Zan 10:16.

21. Ki nou pou diskite dan nou prosen lartik?

²¹ Sirman nou annan bokou rezon pour kontinyen rezwir dan nou travay rekolt. Nou mesaz lespwar, nou travay pour rod bann ki merite, ek nou latitid pezib—tou sa bann fakter i fer nou zwaye konman bann zouvriye rekolt. Malgre sa, zot ensit bokou pour reazir dan en fason negatif. Lapot Zan ti eksperyans sa. I ti ganny anprizonnen lo zil Patmos “akoz Parol Bondye ek temwanyaz Zezi.” (Revelasyon 1:9) Alor, ki mannyer nou kapab gard nou lazwa menm kan nou rankontre persekisyon ek lopozisyon? Kwa ki pou ed nou pour fer fas avek latitid deplizanpli dir ki ganny demontre par bokou ki nou pres avek? Nou prosen lartik pou reponn sa bann kestyon an servan Labib konman en led.

[Not anba lo paz]

Ki ou pou reponn?

• Kisisa sa travay rekolt senbolik?

• Ki kalite mesaz nou anonse?

• Akoz nou travay pour rod bann disip i en sikse?

• Ki mannyer nou mentenir lape dan sa travay rekolt?

• Akoz ki nou kontinyen rezwir dan rekolt?

[Kestyon]

[Portre lo paz 10]

Predikasyon dan premye ek ventyenm syek

[Portre lo paz 11]

Parey Pol, bann zouvriye rekolt denozour pe esey kontakte dimoun partou

[Portre lo paz 11]

Proklanm sa bon nouvel avek en bon leta lespri