En Letan nou ti Loulou—Aprezan nou Mouton!

Kan nou de Sakina nou ti ankor manrmay, nou ti reste obor kanmarad. Sakina ti gro e for, tandis ki mwan mon ti ptipti e meg. Souvannfwa nou ti dispit avek kanmarad, me en zour nou ti ganny en gro lager. Depi sa zour, nou pa ti ni koz avek kanmarad, ni dir kanmarad bonzour. Finalman, nou tou le de nou ti al reste en lot landrwa e nou pa ti konnen kote kanmarad ti ete.

An 1994, mon ti konmans etidye Labib avek bann Temwen Zeova, e mon personnalite ti sanze ptit-a-pti. Kat an plitar, letan mon ti pe asiste nou zournen lasanble spesyal an Bujumbura, Burundi, mon ti sirprann pour rankontre Sakina. Mon ti kontan ki i ti la prezan, me nou bonzour ti plito fre fre. Plitar pandan lazournen, mon ti sirprann letan mon ti vwar li parmi bann kandida batenm! Li osi i ti’n konpletman sanze. I ti nepli sa dimoun ki ti kontan lager, ki mon ti souvan pe dispit avek. I ti vreman en plezir pour vwar li pe demontre piblikman par batenm delo ki i’n dedye son lavi avek Bondye!

Kan i ti sorti dan delo, mon ti degaze pour anmay li e mon ti soufle dan son zorey: “Ou rapel ki mannyer nou ti lager?” “Wi,” i ti dir mwan, “mon rapel, me sa ti dan lepase. Aprezan mon en nouvo dimoun.”

Nou tou le de, nou byen kontan ki nou’n trouv laverite dan Labib ki fer dimoun ini avek kanmarad. Nou kontan osi ki nou personnalite ki ti parey pour en loulou in sanze pour vin parey pour en mouton ki apartenir pour sa Gran Berze, Zeova. Vreman, laverite ki dan Labib i sanz lavi dimoun.