‘Abiy Zot Avek Pasyans’

“Abiy zot avek konpasyon . . . ek pasyans.” —KOLOSYEN 3:12, NW.

1. Donn legzanp en dimoun ki’n vreman demontre pasyans.

RÉGIS, ki reste dan sid was Lafrans ti batize konman en Temwen Zeova an 1952. Pour plizyer lannen, son madanm ti fer tou sa ki i ti kapab pour anpes li servi Zeova. I ti esey pers trou dan larou son transpor pour anpes li asiste bann renyon, e en fwa i ti menm swiv li letan i ti pe pres port-an-port e monk li letan i ti pe koz avek bann dimoun konsernan sa bon nouvel Rwayonm. Malgre lopozisyon ki Régis ti kontinyelman gannyen, i ti kontinyen demontre pasyans. Alor, Régis i en bon  legzanp pour tou Kretyen, vi ki Zeova i ekspekte tou son adorater pour annan pasyans dan zot relasyon avek lezot.

2. Ki sa mo Grek pour “pasyans” i literalman vedir, e ki lide sa mo i donnen?

² Mo Grek pour “pasyans” i literalman vedir “longer lespri.” Nouvo Testaman an Kreol Seselwa i tradwir sa mo konman “pasyans” katorz fwa. Tou le de lekspresyon Ebre ek Grek ki’n ganny tradwir “pasyans” i donn lide tolerans e pa ankoler vitman.

3. Konman ki pwenn-vi Kretyen lo pasyans i diferan avek pwenn-vi bann Grek ki ti viv dan premye syek?

³ Bann Grek dan premye syek pa ti konsider pasyans konman en bon kalite. Sa mo li menm pa’n zanmen ganny servi par bann filozof Stoisyen. Dapre en spesyalis Labib, William Barclay, pasyans “i tou lekontrer avek sa ki bann Grek i konsider konman bon kalite,” ki glorifye parmi lezot keksoz, “refi pour toler okenn lensilt oubyen ditor.” I dir: “Pour bann Grek en zonm kapab ti en zonm ki pou fer tou pour revanze. Pour bann Kretyen en zonm kapab i en zonm ki, menm si i kapab revanze, i refize pour fer li.” Bann Grek ti kapab konsider pasyans konman en siny febles, me parey dan lezot ka, “sa ki en lafoli pour Bondye, i pli saz ki zonm, e sa ki febles Bondye, i pli for ki zonm.”—1 Korentyen 1:25.

Legzanp Kris dan Domenn Pasyans

4, 5. Ki bon legzanp pasyans Zezi ti donnen?

⁴ Dezyenm apre Zeova, Zezi Kri in donn en bon legzanp dan domenn pasyans. Kan i ti anba bokou presyon, Zezi ti montre en kontrol enpresyonan. Profesi ti dir konsernan li: “I ti ganny maltrete, e i ti les li ganny aflize; pourtan i pa ti ouver son labous. I ti ganny anmennen parey en mouton kot labatwar; e parey en femel mouton ki reste trankil devan bann ki koup son lalenn, i pa ti ouver son labous.”—Izai 53:7.

⁵ Zezi ti demontre en pasyans remarkab diran son minister lo later! I ti andir bann kestyon ki son bann lennmi ti demann li pour met li dan pyez ek bann lensilt fer par bann ki ti opoz li. (Matye 22:15-46; 1 Pyer 2:23) I ti annan pasyans avek son bann disip, menm kan zot ti dispit zanmen fini lo sa ki pli gran parmi zot. (Mark 9:33-37; 10:35-45; Lik 22:24-27) E Zezi ti vreman demontre en kontrol ekselan sa zour swar ki i ti ganny trai kan Pyer ek Zan ti dormi apre ki i ti demann zot pour “veye”!—Matye 26:36-41.

6. Ki mannyer Pol ti benefisye avek pasyans Zezi, e ki nou kapab aprann atraver sa?

⁶ Apre son lanmor ek rezireksyon, Zezi ti kontinyen demontre pasyans. Zapot Pol sirtou ti konn sa vi ki oparavan i ti persekit bann Kretyen. Pol ti ekrir: “Sa i en parol vre ki merit ganny aksepte e krwar: Kris Zezi in vin dan lemonn pour sov bann peser; e mwanmenm premye; me i’n fer mwan gras pour ki par mwan, pli gran peser, Zezi-Kri i montre tou son pasyans pour servi en legzanp pour tou bann ki pou krwar pli tar e resevwar lavi eternel.” (1 Timote 1:15, 16) Nenport ki lavi nou ti annan avan, si nou met nou lafwa dan Zezi, i pou annan pasyans avek nou—me byensir i ekspekte nou pour ‘pratik bann keksoz ki montre vreman ki nou’n repanti.’ (Akt 26:20; Romen 2:4) Bann mesaz ki Kris ti anvoye pour sa set kongregasyon dan Lazi Miner i montre ki kantmenm i pran pasyans, i ekspekte amelyorasyon dan nou konportman.—Revelasyon, sapit 2 ek 3.

En Fri Lespri

7. Ki relasyon i annan ant pasyans ek lespri sen?

⁷ Dan senkyenm sapit son let ki i ti ekrir bann Kretyen Galat, Pol ti konpar aktivite laser avek fri lespri. (Galat 5:19-23) Vi ki pasyans i en kalite Zeova, sa kalite i sorti kot li e i en fri son lespri. (Egzod 34:6,  7) Anfet, pasyans i katriyenm dan sa lalis fri lespri ki Pol i dekrir, ansanm avek “lanmour, lazwa, lape, . . . labonte, fidelite, ladouser, kontrol lo son prop lekor.” (Galat 5:22, 23) Alors, kan bann serviter Bondye i demontre sa kalite pasyans ki Bondye li menm i demontre, zot fer li anba lenfliyans lespri sen.

8. Kwa ki pou fer nou kapab kiltiv fri lespri, enkli pasyans?

⁸ Me sa pa vedir ki Zeova i enpoz son lespri lo en dimoun. Nou bezwen pare pour les li enfliyans nou. (2 Korentyen 3:17; Efezyen 4:30) Nou les lespri travay dan nou lavi par kiltiv son bann fri dan tou sa ki nou fer. Apre ki Pol ti nonm bann aktivite laser ek bann fri lespri, i ti azoute: “Si nou viv par Lespri, annou les Lespri osi kontrol nou lavi. Pa bezwen tronp ou lekor, personn pa kapab anbet Bondye. En dimoun i rekolte sa ki in senmen. Si i senm sa ki fer plezir son natir imen, i pou rekolte dapre son natir imen, lanmor. Me si i senm sa ki fer plezir Lespri, i pou rekolte sorti kot Lespri, lavi eternel.” (Galat 5:25; 6:7, 8) Si nou anvi reisi kiltiv pasyans, nou bezwen osi kiltiv larestan fri ki lespri sen i prodwir dan bann Kretyen.

“Lanmour i pasyan”

9. Pour ki rezon petet ki Pol ti dir bann Korentyen ki “lanmour i pasyan”?

⁹ Pol ti montre ki i annan en relasyon spesyal ant lanmour ek pasyans kan i ti dir: “Lanmour i pasyan.” (1 Korentyen 13:4) En spesyalis Labib, Albert Barnes, i sizere ki Pol ti met lanfaz lo sa akoz ti annan konpetisyon ek konfli dan kongregasyon Kretyen an Korent. (1 Korentyen 1:11, 12) Barnes i fer resorti: “Sa mo ki’n ganny servi la [pour pasyans] i kontrer avek depese: avek bann manifestasyon ek lide lakoler, e avek iritasyon. I enplik en leta lespri ki letan i ganny oprimen e provoke i kapab SIPORTE POUR EN BON PE LETAN.” Menm konmela, lanmour ek pasyans i kontribye en kantite pour gard lape dan kongregasyon Kretyen.

10. (a) Dan ki fason lanmour i ed nou pour annan pasyans, e ki konsey zapot Pol ti donnen dan sa domenn? (b) Ki komanter en spesyalis Labib ti fer lo pasyans ek labonte Bondye? (Vwar not anba lo paz.)

¹⁰ “Lanmour i pasyan, e i bon; lanmour . . . pa rod son prop lentere; i pa pran lakoler.” Alor, dan plizyer fason, lanmour i ed nou pour annan pasyans. * (1 Korentyen 13:4, 5) Lanmour i ed nou pour siport kanmarad e i fer nou mazinen ki nou tou nou enparfe e nou annan defo ek febles. I ed nou pour annan konsiderasyon pour lezot e pour pardonnen. Zapot Pol ti ankouraz  nou pour “montre limilite, ladouser ek pasyans; avek lanmour siport kanmarad, fer tou pour prezerv linite ki Sent-Espri i donnen par lape ki ini zot ansanm avek kanmarad.”—Efezyen 4:1-3.

11. Akoz i sirtou enportan pour demontre pasyans dan bann kominote Kretyen?

¹¹ Pour bann group Kretyen ki travay oubyen reste ansanm ki swa dan bann kongregasyon, bann Betel, bann lakaz misyonner, bann lekip konstriksyon, oubyen bann lekol, pasyans delapar tou manm i kontribye pour gard lape ek lazwa. Akoz diferan personnalite, gou, ledikasyon, standar lapolites e menm lizyenn, bann sitiasyon iritan i kapab arive detanzaot. Sa bann sitiasyon i osi kapab arive dan bann fanmiy. I vreman enportan pour pa ankoler vitman. (Proverb 14:29; 15:18; 19:11) Pasyans—andire avek lespwar ki sitiasyon i a sanze pour vin meyer—i neseser delapar tou sa ki enplike.—Romen 15:1-6.

Pasyans i ed nou pour andire

12. Akoz pasyans i enportan dan bann sitiasyon iritan?

¹² Pasyans i ed nou pour andir bann sitiasyon iritan ki pa sanble pou fini en zour oubyen ki napa en solisyon deswit. Sa ti leka avek Régis ki nou’n mansyonnen okonmansman lartik. Pour plizyer lannen, son madanm ti opoz son zefor pour servi Zeova. Me en zour i ti vin kot li an pleran e dir: “Mon konnen ki i laverite. Ed mwan. Mon anvi en letid Labib.” Avek letan i ti batize konman en Temwen. Régis i dir: “Sa i prouve ki Zeova in beni sa bann lannen lalit, pasyans, ek landirans.” Son pasyans ti ganny rekonpanse.

13. Kwa ki ti ed Pol pour andire, e konman ki son legzanp i kapab ed nou pour andire?

¹³ Dan premye syek N.L., zapot Pol ti demontre en bon legzanp dan domenn pasyans. (2 Korentyen 6:3-10; 1 Timote 1:16) Ver lafen son lavi, letan i ti pe donn konsey son konpanyon Timote ki ti pli zenn ki li, Pol ti averti li ki tou Kretyen pou fer fas avek leprev. Pol ti sit son prop leksperyans e i ti rekomann bann kalite Kretyen debaz ki neseser pour landirans. I ti ekrir: “Ou’n swiv byen mon bann lansennyman, mon kondwit, mon bann laspirasyon, mon lafwa, mon pasyans, mon lanmour, mon perseverans, mon bann persekisyon, ek mon bann soufrans, ki kalite soufrans mon’n pas ladan Antyos, Ikonyonm, List, ek tou sa bann persekisyon ki mon’n siporte? Me Senyer in delivre mwan dan tou. Dayer tou sa ki oule viv en lavi fidel dan Kris Zezi pou ganny persekite.” (2 Timote 3:10-12; Akt 13:49-51; 14:19-22) Pour nou kapab andire, nou tou nou bezwen lafwa, lanmour, ek pasyans.

 Abiy zot avek Pasyans

14. Avek ki Pol ti konpar bann bon kalite tel parey pasyans, e ki konsey i ti donn bann Kretyen an Kolos?

¹⁴ Zapot Pol ti konpar pasyans ensi ki lezot kalite Kretyen avek bann lenz ki bann Kretyen i devret met lo zot apre ki zot in abandonn bann pratik ki annan pour fer avek sa “vye natir.” (Kolosyen 3:5-10) I ti ekrir: “Konman pep ki Bondye in swazir, en pep sen ki Bondye i kontan, zot devre [abiy zot, NW ] avek konpasyon, labonte, limilite, ladouser ek pasyans. Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad. E par lao tousala, annan lanmour ki soud tou keksoz parfetman ansanm dan larmoni.”—Kolosyen 3:12-14.

15. Kan bann Kretyen i “abiy zot” avek pasyans ensi ki lezot kalite Kretyen, ki rezilta sa i anmennen?

¹⁵ Kan bann manm dan en kongregasyon i “abiy zot” avek konpasyon, labonte, limilite, ladouser, pasyans ek lanmour, zot kapab rezourd bann problenm e al an avan dan linite dan servis Zeova. Bann sirveyan Kretyen sirtou i bezwen annan pasyans. I annan bann moman kot zot bezwen reprimann en lot Kretyen, me i annan diferan fason pour reprimann en dimoun. Pol ti dekrir sa pli bon latitid kan i ti ekrir Timote: “Konvenk dimoun, reprimande, ankouraze ansenny avek bokou pasyans.” (2 Timote 4:2) Wi, mouton Zeova i devret touzour ganny trete avek pasyans, dinite, ek tandres.—Matye 7:12; 11:28; Akt 20:28, 29; Romen 12:10.

“Pran Pasyans avek zot tou”

16. Ki kapab arive kan nou “pran pasyans avek zot tou”?

¹⁶ Pasyans ki Zeova i annan anver limanite i met nou anba en lobligasyon moral pour ‘pran pasyans avek tou dimoun.’ (1 Tesalonisyen 5:14) Sa i enplik pran pasyans avek nou bann fanmiy ki pa Temwen, nou bann vwazen, bann koleg travay ek bann kanmarad lekol. Serten Temwen in arive sirmont bokou prezidis par siport pour plizyer lannen bann koze mirak oubyen lopozisyon direk par dimoun ki zot asosye avek dan travay oubyen dan lekol. (Kolosyen 4:5, 6) Zapot Pyer ti ekrir: “Zot devre annan bonn kondwit parmi bann payen pour ki ler zot ganny akize pour mal fer, bann payen a rekonnet zot bonn aksyon e rann glwar Bondye zour i pou vini.”—1 Pyer 2:12.

17. Ki mannyer nou kapab imit lanmour Zeova ek son pasyans, e akoz nou devret fer sa?

¹⁷ Pasyans Zeova pou sinifye delivrans pour plizyer milyon dimoun. (2 Pyer 3:9, 15) Si nou imit lanmour Zeova ek son pasyans, nou pou kontinyen pres avek pasyans sa bon nouvel lo Rwayonm Bondye  e ansenny lezot pour soumet anba renny Rwayonm Kris. (Matye 28:18-20; Mark 13:10) Si nou aret prese, i pou konmsi nou anvi limit pasyans Zeova e nou pa’n rekonnet lobzektif son pasyans, pour anmenn dimoun ver repantans.—Romen 2:4.

18. Ki Pol ti priye pour bann Kolosyen?

¹⁸ Dan son let pour bann Kretyen an Kolos, Lazi Miner, Pol ti ekrir: “Pour sa rezon, depi ki nou’n tann koz lo zot, nou’n touzour priy pour zot. Nou demann Bondye pour ranpli zot avek konnesans son lavolonte, avek lasazes ek konpreansyon ki son Lespri i donnen, pour ki zot ava kapab viv, en lavi ki Bondye i aprouve e ki fer li plezir dan tou sa ki zot fer. Koumsa par zot bon travay zot ava prodwi fri, e zot ava progrese dan konnesans Bondye. Ki Bondye i ranpli zot avek lafors par pisans son laglwar, pour ki zot a kapab siport tou avek pasyans.” —Kolosyen 1:9-11.

19, 20. (a) Ki mannyer nou kapab evite konsider pasyans Zeova konman en leprev? (b) Ki benefis i annan kan nou pran pasyans?

¹⁹ Pasyans ki Zeova i kontinyen demontre pa pou en leprev pour nou si nou ‘ranpli avek konnesans son lavolonte,’ ki “tou dimoun i ganny sove e ganny konnesans laverite.” (1 Timote 2:4) Nou pou kontinyen ‘prodwi fri par nou bon travay,’ sirtou dan predikasyon “sa Bonn Nouvel Rwayonm.” (Matye 24:14) Si nou kontinyen fer sa fidelman, Zeova pou ‘ranpli nou avek son lafors,’ pour ed nou “kapab siport tou avek pasyans.” Kan nou fer sa, nou pou viv “en lavi ki Bondye i aprouve,” e nou pou santi lape kan nou konnen nou pe ‘fer li plezir dan tou sa ki nou fer.’

²⁰ Fotespere ki nou annan en konviksyon total dan sa lasazes ki par deryer pasyans Zeova. I fer posib nou delivrans ek delivrans bann dimoun ki ekout nou predikasyon ek lansennyman. (1 Timote 4:16) Kiltiv bann fri lespri—lanmour, labonte, ladouser, ek kontrol lo nou prop lekor—pou fer nou kapab pasyante avek lazwa. Nou pou pli kapab viv dan lape avek manm nou fanmiy ensi ki nou bann frer ek ser dan kongregasyon. Pasyans pou osi ed nou pour pran pasyans avek nou bann koleg travay oubyen kanmarad lekol. E nou pasyans pou annan en bi, pour sov bann ki dan mal e pour glorifye Zeova, en Bondye ki annan pasyans.

[Not anba lo paz]

Eski ou kapab eksplike?

• Dan ki fason Kris i en bon legzanp dan domenn pasyans?

• Kwa ki pou ed nou kiltiv pasyans?

• Ki mannyer pasyans i ed bann fanmiy, bann Kretyen ki viv e travay ansanm, ek bann ansyen?

• Konman ki letan nou annan pasyans sa i anmenn benefis pour nou e pour lezot?

[Kestyon]

[Portre lo paz 29]

Menm anba bokou presyon, Zezi ti pran pasyans avek son bann disip

[Portre lo paz 30]

Bann sirveyan Kretyen i ganny ankouraze pour montre en bon legzanp an sa ki konsern pasyans dan zot relasyon avek zot frer

[Portre lo paz 31]

Si nou imit lanmour ek pasyans Zeova, nou pou kontinyen pres sa bon nouvel

[Portre lo paz 32]

Pol ti priye ki bann Kretyen i “kapab siport tou avek pasyans”