Devlop Lakrent Pour Zeova Dan Ou Leker
Devlop Lakrent Pour Zeova Dan Ou Leker
“Si selman zot devlop lakrent dan zot leker pour mwan e touzour gard mon bann komannman.”—DETERONONM 5:29.
1. Kwa ki fer nou asire ki en zour dimoun pou ganny libere avek lafreyer?
LAFREYER in trouble imen pour plizyer syek. Lafreyer lafen, maladi, krim, oubyen lager i konstaman kit plizyer milyon dimoun dan lenkyetid. Se pour sa rezon ki Universal Declaration of Human Rights in eksprim son dezir pour anmenn en lemonn kot tou dimoun pou ganny libere avek lafreyer. * Erezman, Bondye li menm i asir nou ki en tel lemonn pou vin en realite —menm si i pa pou vin atraver zefor ki zonm pe fer. Atraver son profet, Mika, Zeova i promet nou ki dan son nouvo monn kot ladrwatir pou egziste, ‘pou napa personn ki pou fer son pep tranble.’—Mika 4:4.
2. (a) Konman ki Labib i enplor nou pour annan lakrent pour Bondye? (b) Ki bann kestyon nou kapab demande letan nou reflesir lo nou lobligasyon pour annan lakrent pour Bondye?
2 Lo lot kote, lafreyer i kapab en lafors pozitif. Dan Labib, plizyer fwa bann serviter Bondye i ganny ankouraze pour annan lakrent pour Zeova. Moiz ti dir avek bann Izraelit: “Se pour Zeova ou Bondye ki ou devret annan lakrent, e se li ki ou devret servi.” (Deterononm 6:13) Plizyer syek plitar, Salomon ti ekrir: “Annan lakrent pour sa vre Bondye e gard son bann komannman. Akoz sa i tou lobligasyon zonm.” (Eklezyast 12:13) Atraver nou travay predikasyon, ki ganny fer anba sipervizyon bann lanz, nou osi nou enplor bann dimoun pour “annan lakrent pour Bondye e donn li laglwar.” (Revelasyon 14:6, 7, NW ) Apard ki annan lakrent pour Zeova, bann Kretyen i bezwen kontan li avek tou zot leker. (Matye 22:37, 38) Ki mannyer nou kapab kontan Bondye e anmenmtan annan lakrent pour li? Akoz nou bezwen annan lakrent pour en Bondye lanmour? Ki benefis nou gannyen kan nou kiltiv lakrent pour Bondye? Pour reponn sa bann kestyon, nou bezwen premyerman konpran ki savedir annan lakrent pour Bondye e ki mannyer sa kalite lakrent i form en par fondamantal dan nou relasyon avek Zeova.
Ladmirasyon, Respe profon, ek Lakrent
3. Ki savedir annan lakrent pour Bondye?
3 Lakrent pour Bondye i en santiman ki bann Kretyen i devret annan pour zot Kreater. En fason ki sa lakrent i ganny dekrir se “en ladmirasyon ek respe profon pour Kreater e en lafreyer pozitif pour depler li.” Alors, lakrent pour Bondye i enfliyans de laspe enportan dan nou lavi: nou latitid anver Bondye ek nou latitid anver kondwit ki i pa kontan. Evidaman, tou le de laspe i vreman enportan e i merit latansyon spesyal. Parey Vine’s Expository Dictionary of New Testament Words i fer resorti, pour bann Kretyen sa lakrent avek respe profon i ‘en motivasyon ki kontrol zot lavi, dan domenn spirityel ensi ki moral.’
4. Ki mannyer nou kapab devlop bann santiman ladmirasyon ek respe profon pour nou Kreater?
4 Ki mannyer nou kapab devlop bann santiman ladmirasyon ek respe profon pour nou Kreater? Nou emerveye kan nou vwar en zoli peizaz, en delo fannen tre enpresyonan, oubyen en soley kouse vreman manifik. Sa santiman i vin pli for kan nou vwar, avek nou lizye lafwa, lanmen Bondye par deryer sa bann travay kreatif. Deplis, parey Lerwa David, nou rekonnet ki nou enferyer konpare avek kreasyon enpresyonan Zeova. “Kan mon vwar ou lesyel, travay ou ledwa, lalin ek zetwal ki ou’n prepare, ki zonm mortel i ete ki ou gard li antet?” (Psonm 8:3, 4) Sa gran ladmirasyon i fer nou santi en respe profon, ki pous nou pour remersye e loue Zeova pour tou sa ki i fer pour nou. David ti osi ekrir: “Mon pou loue ou parski dan en fason ki enspir lakrent mon’n ganny fer dan en fason merveye. Ou bann travay i merveye, parey mon nanm i byen okouran.”—Psonm 139:14.
5. Akoz nou devret annan lakrent pour Zeova, e ki bon legzanp nou annan dan sa domenn?
5 Bann santiman ladmirasyon ek respe profon i kree en lakrent saliter ranpli avek respe pour pwisans Bondye konman Kreater e pour son lotorite konman Dirizan lezitim liniver. Dan en vizyon ki zapot Zan ti vwar, “bann ki ti’n ganny laviktwar lo sa bebet ek son zimaz”—bann disip Kris ki’n ganny swazir dan zot pozisyon seles—pe proklanmen: “Ou travay i gran e merveye. Lerwa bann nasyon! Tou ou bann plan i zis e vre. Senyer, lekel ki pa pou respekte ou? Lekel ki pou refize rann ou glwar?” (Revelasyon 15:2-4) Lakrent pour Bondye, ki sorti dan en respe profon pour son grander, i fer sa bann ki renny avek Kris dan Rwayonm seles donn loner Bondye konman lotorite siprenm. Kan nou pran an konsiderasyon tou sa ki Zeova in akonpli e sa fason drwat ki i gouvern liniver, eski pa nou annan bokou rezon pour annan lakrent pour li?—Psonm 2:11; Zeremi 10:7.
6. Akoz nou devret annan en lafreyer saliter pour depler Zeova?
6 Me apard ki ladmirasyon ek respe profon, lakrent pour Bondye i bezwen enkli en lafreyer saliter pour depler li oubyen dezobei li. Akoz? Parski menm si Zeova “pa ankoler vitman, e ris an bonte leker,” nou bezwen mazinen ki “dan okenn ka i pa pou akord gras pour pinisyon.” (Egzod 34:6, 7) Kantmenm Zeova i annan lanmour ek pitye, i pa toler sa ki pa drwat ek bann move pratik ki ganny fer volonterman. (Psonm 5:4, 5; Abakouk 1:13) Bann dimoun ki volonterman fer sa ki mal dan lizye Zeova san repantir e ki pe opoz li, pa pou sap son pinisyon. Parey zapot Pol ti dir, “i en keksoz terib pour tonm dan lanmen Bondye vivan.” Annan en lafreyer saliter pour tonm dan en tel sitiasyon i vin en proteksyon pour nou alafendizour.—Ebre 10:31.
“Se avek li ki zot devret atase”
7. Ki bann rezon ki nou annan pour met nou konfyans dan pouvwar delivrans Zeova?
7 Lakrent ansanm avek respe profon pour Bondye e konsyans profon lo son pwisans ekstraordiner i konmansman konfyans dan Zeova. Zis parey en pti zanfan i santi li proteze kan son papa i la obor li, nou osi nou santi nou an sekirite e konfidan anba gidans Zeova. Remarke konman bann Izraelit ti reazir apre ki Zeova ti tir zot an Lezip: “Izrael ti kapab vwar sa gran lanmen ki Zeova ti met an aksyon kont bann Ezipsyen; e bann dimoun ti konmans annan lakrent pour Zeova e met lafwa dan Zeova.” (Egzod 14:31) Leksperyans Elisa i osi en laprev ki “lanz Zeova pe kanp tou otour bann ki annan lakrent pour li, e i sov zot.” (Psonm 34:7; 2 Lerwa 6:15-17) Listwar modern bann Temwen Zeova e petet nou prop leksperyans i konfirmen ki Bondye i demontre son pwisans an faver bann ki servi li. (2 Kronik 16:9) Alors nou konpran ki “dan lakrent Zeova i annan en konfyans solid.”—Proverb 14:26.
8. (a) Akoz lakrent pour Bondye i pous nou pour mars dan son semen? (b) Eksplike konman nou devret “atase” avek Zeova.
8 Lakrent saliter pour Bondye pa zis fer nou met konfyans dan li me i osi motiv nou pour mars dan son semen. Kan Salomon ti inogir tanp, i ti priy Zeova: “Afen ki [Izrael] i annan lakrent pour ou par mars dan ou semen toulezour ki zot vivan lo sirfas later ki ou ti donn nou zanset.” (2 Kronik 6:31) Pli boner, Moiz ti enplor bann Izraelit: “Deryer Zeova zot Bondye ki zot devret marse, e pour li ki zot devret annan lakrent, e se son bann komannman ki zot devret garde, e se son lavwa ki zot devret ekoute, e se li ki zot devret servi, e se avek li ki zot devret atase.” (Deterononm 13:4) Parey sa bann verse i montre klerman, dezir pour mars dan semen Zeova e pour “atase” avek li i vin atraver konfyans ki nou met dan li. Wi, lakrent pour Bondye i fer nou obeir li, servi li e atase avek li, zis parey en zanfan i kapab atase avek son papa dan ki i annan konfyans total.—Psonm 63:8; Izai 41:13.
Kontan Bondye i vedir annan Lakrent pour li
9. Ki relasyon lanmour ek lakrent pour Bondye i annan?
9 Dapre pwenn-vi Labib, lakrent pour Bondye pa anpes nou kontan li dan okenn fason. Okontrer bann Izraelit ti ganny enstri pour “annan lakrent pour Zeova . . . afen ki zot a mars dan tou son semen e pour kontan li.” (Deterononm 10:12) Alors, lakrent pour Bondye ek lanmour pour Bondye i relye etrwatman avek kanmarad. Lakrent pour Bondye i pous nou pour mars dan son semen, e sa an retour i demontre ki nou annan lanmour pour li. (1 Zan 5:3) Sa i lozik akoz letan nou kontan en dimoun, i toutafe normal pour nou per pangar nou a bles li. Bann Izraelit ti bles Zeova par zot kondwit rebel dan dezer. Byensir, nou pa ti a anvi fer nanryen pour fer nou Papa seles santi en tel tristes. (Psonm 78:40, 41) Okontrer, vi ki “Zeova i pran plezir dan bann ki annan lakrent pour li,” nou lobeisans ek fidelite i fer son leker rezwir. (Psonm 147:11; Proverb 27:11) Lanmour pour Bondye i pous nou pour fer li plezir, e lakrent pour Bondye i anpes nou bles li. Olye kontredir kanmarad, zot de kalite ki konplimant kanmarad.
10. Ki mannyer Zezi ti montre ki i pran plezir dan lakrent pour Zeova?
10 Lavi Zezi Kri i montre klerman konman ki nou kapab kontan Bondye e anmenmtan annan lakrent pour li. Profet Izai ti dir lo Zezi: “Lespri Zeova i bezwen repoz lo li, lespri lasazes ek lentelizans, lespri konsey ek lafors, lespri konnesans ek lakrent Zeova; e son plezir pou dan lakrent Zeova.” (Izai 11:2, 3) Dapre sa profesi, lespri Bondye ti pous Zezi pour annan lakrent pour son Papa ki dan lesyel. Deplis, nou remarke ki sa lakrent, olye vin en fardo, i ti en sours satisfaksyon. Zezi ti pran plezir pour fer lavolonte Bondye e fer li plezir, menm dan bann sitiasyon pli difisil. Kan i ti pe alfer fas avek egzekisyon lo poto siplis, i ti dir Zeova: “Pa selon mon volonte me selon ou volonte.” (Matye 26:39) Akoz i ti annan sa lakrent pour Bondye, Zeova ti ekout siplikasyon son Garson avek faver, i ti fortifye li, e sov li dan lanmor.—Ebre 5:7.
Aprann annan Lakrent pour Zeova
11, 12. (a) Akoz nou bezwen aprann annan lakrent pour Bondye? (b) Ki mannyer Zezi i ansenny nou pour annan lakrent pour Zeova?
11 Kontrerman avek sa ladmirasyon ki nou natirelman resanti kan nou an fas avek pwisans ek grander lanatir, lakrent pour Bondye pa vin otomatikman. Se pour sa ki pli gran David, Zezi Kri, i ofer nou sa lenvitasyon dan en fason profetik: “Bann garson, vini, ekout mwan; lakrent pour Zeova se sa ki mon pou ansenny zot.” (Psonm 34:11) Ki mannyer nou kapab aprann atraver Zezi pour annan lakrent pour Zeova?
12 Zezi ti ansenny nou pour annan lakrent pour Zeova par ed nou pour konpran personnalite merveye nou Papa seles. (Zan 1:18) Legzanp Zezi li menm i revele konman ki Bondye i panse e konman ki i azir avek lezot, parski Zezi i reflekte parfetman personnalite son Papa. (Zan 14:9, 10) Deplis, atraver sakrifis Zezi, nou ganny akse avek Zeova kan nou priy pour demann pardon pour nou pese. Sa manifestasyon ekstraordiner mizerikord Bondye i en rezon pwisan dan li menm pour annan lakrent pour li. En psalmis ti ekrir: “Parski avek ou i annan vre pardon, pour ki zot annan lakrent pour ou.”—Psonm 130:4.
13. Ki bann letap ki’n ganny soulinyen dan liv Proverb ki ed nou pour annan lakrent pour Zeova?
13 Liv Proverb i souliny en seri letap ki kapab ed nou pour devlop lakrent pour Bondye. “Mon garson, si ou resevwar mon bann parol e apresye mon bann komannman, pour port latansyon lo lasazes avek ou zorey, afen ki ou a enklin ou leker ver disernman; si, anplis ki sa, ou kriy lentelizans li menm e ou fer rezonnen ou lavwa ver disernman li menm, . . . dan sa ka, ou pou konpran lakrent Zeova, e ou pou trouv konnesans Bondye.” (Proverb 2:1-5) Alor, pour annan lakrent pour Bondye, nou bezwen etidye son Parol, fer nou mye pour konpran son lenstriksyon, e apre montre nou atantif anver son konsey.
14. Ki mannyer nou kapab swiv sa konsey ki ti ganny donnen avek bann lerwa Izrael?
14 Sak lerwa dan ansyen Izrael ti ganny enstri pour fer en kopi Lalwa e “lir li toulezour dan son lavi, pour ki i aprann annan lakrent pour Zeova son Bondye afen ki i gard tou parol dan sa lalwa.” (Deterononm 17:18, 19) Lektir ek letid Labib i egalman enportan pour nou si nou anvi aprann annan lakrent pour Zeova. Ofiramezir ki nou met an pratik bann prensip Labib, nou gradyelman ganny lasazes ek konnesans divin. Nou konmans “konpran lakrent Zeova” akoz nou vwar bann bon lefe ki i fer dan nou lavi, e nou seri nou relasyon avek Bondye. Deplis, kan nou rasanble ansanm avek bann konpanyon Kretyen, bann zenn ensi ki bann aze i kapab ekout lansennyman Bondye, aprann annan lakrent pour li, e mars dan son semen.—Deterononm 31:12.
Ere tou sa ki annan Lakrent pour Zeova
15. Dan ki fason lakrent pour Bondye i relye avek nou ladorasyon pour li?
15 Dapre sa ki nou’n diskite, nou kapab vwar ki lakrent pour Bondye i en bon latitid ki nou tou nou devret kiltive, vi ki i en par esansyel dan nou ladorasyon pour Zeova. I fer nou annan konfyans total dan li, mars dan son semen, e atase avek li. Parey ti leka avek Zezi Kri, lakrent pour Bondye i kapab osi motiv nou pour viv an akor avek nou ve dedikasyon la konmela e pour touzour.
16. Akoz Zeova i ankouraz nou pour annan lakrent pour li?
16 Lakrent pour Bondye pa devret provok en lafreyer malsen ni en restriksyon tro eksesif. Labib i asir nou: “Ere tou dimoun ki annan lakrent pour Zeova, ki pe mars dan son bann semen.” (Psonm 128:1) Zeova i ankouraz nou pour annan lakrent pour li akoz i konnen ki sa i en kalite ki pou protez nou. Nou remark son lentere ranpli avek lanmour dan parol ki i ti dir avek Moiz: “Si selman [bann Izraelit i] devlop lakrent dan zot leker pour mwan e touzour gard mon bann komannman, afen ki tou i ava al byen pour zot e pour zot garson pour letan endefini!”—Deterononm 5:29.
17. (a) Ki benefis ki nou gannyen kan nou annan lakrent pour Bondye? (b) Ki laspe lakrent pour Bondye ki nou pou egzaminen dan nou prosen lartik?
17 Pareyman, tou pou al byen pour nou si nou devlop lakrent pour Bondye dan nou leker. Dan ki fason? Premyerman, en tel latitid pou fer plezir Bondye e pou anmenn nou pli pre avek li. David ti konnen dapre son prop leksperyans ki “i pou akonpli dezir bann ki annan lakrent pour li, e i pou tann zot lapel pour led, e i pou sov zot.” (Psonm 145:19) Dezyenmman, lakrent pour Bondye pou benefisye nou akoz i pou annan en lefe lo nou latitid anver sa ki mal. (Proverb 3:7) Lartik swivan pou egzaminen konman ki sa lakrent i protez nou kont danze spirityel, e i pou revwar serten legzanp bann zonm dan Labib ki ti annan lakrent pour Bondye e ti detourn kont lemal.
[Not anba lo paz]
^ par. 1 Lasanble Zeneral Nasyon Ini ti adopte Universal Declaration of Human Rights le 10 Desanm, 1948.
Eski ou kapab reponn sa bann Kestyon?
• Ki savedir annan lakrent pour Bondye, e ki lefe sa i fer lo nou?
• Ki relasyon i annan ant annan lakrent pour Bondye e mars dan son semen?
• Ki mannyer legzanp Zezi i montre ki lakrent pour Bondye i relye avek lanmour pour Bondye?
• Dan ki fason nou kapab devlop lakrent pour Zeova dan nou leker?
[Kestyon]
[Portre lo paz 20]
Zetwal: Portre par Malin, © IAC/RGO 1991
[Portre lo paz 22]
Bann lerwa Izrael ti ganny demande pour fer en kopi personnel Lalwa e lir li sak zour
[Portre lo paz 23]
Lakrent pour Zeova i fer nou met konfyans dan li parey en garson i met konfyans dan son papa