Byenfe Ki Sa Bon Nouvel I Aporte

“Zeova in swazir mwan pour anons bon nouvel bann dimoun dou. I’n anvoy mwan pour pans sa bann ki annan leker brize, . . . pour konsol tou bann ki an dey.”—IZAI 61:1, 2.

1, 2. (a) Ki Zezi ti revele lo li e konman i ti fer sa? (b) Ki bann byenfe sa bon nouvel ki Zezi ti anonse ti anmennen?

EN ZOUR Saba boner dan son minister, Zezi ti dan sinagog an Nazaret. Dapre rapor, “zot ti donn li liv profet Ezai. I ti ouver dan landrwa kot i’n ekri: ‘Lespri Senyer i lo mwan, akoz in konsakre mwan pour anons Bonn Nouvel.’ ” Zezi ti kontinyen lir sa pasaz profetik. Apre i ti asize e dir: “Ozordi sa parol Lekritir ki zot in tande in akonpli.”—Lik 4:16-21.

² Dan sa fason, Zezi ti idantifye son lekor konman sa evanzelizater ki ti’n ganny profetize, ki ti pou anons sa bon nouvel e konsol bann dimoun. (Matye 4:23) E sa ki Zezi ti annan ti vreman en nouvel! I ti enform bann ki ti ekout li: “Mwanmenm lalimyer lemonn, sa ki swiv mwan pa pou mars dan fernwanr, me i a ganny lalimyer lavi.” (Zan 8:12) I ti osi dir: “Si zot obei byen sa ki mon ansenny zot, zot a vin vreman mon disip. Zot a konn laverite e laverite i ava fer zot lib.” (Zan 8:31, 32) Wi, Zezi ti annan “parol lavi eternel.” (Zan 6:68, 69) Lalimyer, lavi, laliberte—sirman sa i bann byenfe ki nou devret seri!

3. Ki bon nouvel ki bann disip Zezi ti prese?

³ Apre Lapannkot lannen 33 N.L., bann disip ti kontinyen fer sa travay evanzelizasyon ki Zezi ti fer. Zot ti pres “sa Bonn  Nouvel Rwayonm” avek bann Izraelit ensi ki bann dimoun lezot nasyon. (Matye 24:14; Akt 15:7; Romen 1:16) Bann ki ti akeyir sa bon nouvel ti arive konn Zeova Bondye. Zot ti ganny libere dan lesklavaz relizye e zot ti form parti sa nouvo nasyon spirityel, “Izrael Bondye,” ki son bann manm i annan lespwar pour renny pour touzour dan lesyel avek zot Senyer, Zezi Kri. (Galat 5:1; 6:16; Efezyen 3:5-7; Kolosyen 1:4, 5; Revelasyon 22:5) Anfet, sa ti bann byenfe vreman presye!

Travay Evanzelizasyon konmela

4. Dan ki fason sa lord pour pres bon nouvel pe ganny akonpli denozour?

⁴ Denozour, bann Kretyen swazir, ki pe ganny soutenir par en “gran lafoul” ‘lezot mouton,’ pe kontinyen akonpli sa lord profetik ki Zezi ti donnen okonmansman. (Revelasyon 7:9; Zan 10:16) An rezilta, sa bon nouvel pe ganny prese lo en lesel ki pa’n zanmen deza ganny vwar oparavan. Bann Temwen Zeova in al dan 235 pei ek teritwar “pour anons bon nouvel bann dimoun dou. . . , pour pans sa bann ki annan leker brize, pour anons laliberte pour bann ki’n ganny anprizonnen, e pour ouver gran lizye bann prizonnyen; pour anons lannen faver delapar Zeova ek zour vanzans delapar nou Bondye; pour konsol tou bann ki an dey.” (Izai 61:1, 2) Alors, sa travay evanzelizasyon ki bann Kretyen pe fer pe kontinyen anmenn byenfe pour bokou dimoun e vre rekonfor pour “bann ki dan soufrans.”—2 Korentyen 1:3, 4.

5. An rapor avek pres sa bon nouvel, konman ki bann Temwen Zeova i diferan avek bann legliz Kretyente?

⁵ I vre ki bann legliz Kretyente i sponnser diferan form evanzelizasyon. Bokou i anvoy bann misyonner dan lezot pei pour konverti lezot dimoun. Par egzanp, The Orthodox Christian Mission Center Magazine i donn bann rapor lo aktivite bann misyonner Ortodoks an Madagaskar, Sidafrik, Latanzani, ek Zimbabwe. Selman, parey dan lezot legliz Kretyente, dan legliz Ortodoks lamazorite manm pa partisip dan sa travay. Parkont, tou bann Temwen Zeova i sey zot mye pour partisip dan travay evanzelizasyon. Zot konpran ki proklanm sa bon nouvel i endike ki zot annan en vre lafwa. Pol ti dir: “Avek leker ki en dimoun i egzers lafwa pour ladrwatir, me avek labous ki i fer deklarasyon piblik pour delivrans.” En lafwa ki pa pous en dimoun pour azir, i an realite en lafwa mor. —Romen 10:10, NW; Zak 2:17.

Bon Nouvel ki anmenn bann Byenfe eternel

6. Ki bon nouvel ki pe ganny prese denozour?

⁶ Temwen Zeova i pres pli bon nouvel ki kapab annan. Zot ouver zot Labib e montre bann dimoun ki anvi ekoute ki Zezi in sakrifye son lavi pour donn limanite en fason pour apros Bondye, pour ganny pardonnen zot pese, e pour ganny lespwar pour viv eternelman. (Zan 3:16; 2 Korentyen 5:18, 19) Zot anonse ki Rwayonm Bondye in ganny etabli dan lesyel anba Lerwa swazir, Zezi Kri, e ki byento i pou retir mesanste lo later e administre sa travay restorasyon Paradi. (Revelasyon 11:15; 21:3, 4) Pour akonpli profesi Izai, zot enform zot vwazen ki la i “lannen faver delapar Zeova” kot bann imen i ankor kapab aksepte sa bon nouvel. Zot osi averti ki byento “zour vanzans delapar nou Bondye” pou vini, kot Zeova pou met en lafen avek tou bann mesan ki pa repantir.—Psonm 37:9-11.

7. Ki leksperyans ki demontre linite bann Temwen Zeova, e akoz zot rezwir en tel linite?

⁷ Dan en monn ranpli avek trazedi ek dezas, sa i sel bon nouvel ki anmenn bann byenfe eternel. Bann ki aksepte li i form parti avek en lasosyasyon Kretyen mondyal ki ini ansanm e ki pa les diferans nasyonal, tribi, oubyen ekonomik diviz zot. Zot in demontre “lanmour ki soud tou keksoz parfetman ansanm dan larmoni.” (Kolosyen 3:14; Zan 15:12) Sa ti evidan lannen pase dan en  pei Lafrik. En zour bomaten lavil prensipal sa pei ti lev par tapaz fizi. Ti annan en lesey kou-d-eta. Kan bann levennman ti devlop dan en konfli etnik, en fanmiy Temwen ti ganny kritike akoz i ti donn en plas reste en lot Temwen ki ti sorti dan en lot group etnik. Sa fanmiy ti reponn: “Zis Temwen Zeova ki pe reste kot nou.” Pour zot, diferans etnik pa ti enportan; me se lanmour Kretyen—rekonfort bann ki ti dan bezwen—ki ti enportan. En madanm ki trouv fanmiy avek sa Temwen, ti fer sa remark swivan menm si li menm i pa en Temwen: “Bann dimoun dan lezot larelizyon ti trai zot frer ki ti dan menm larelizyon avek zot. Zis Temwen Zeova ki pa ti fer sa.” Plizyer lensidan parey ki’n ganny raporte dan bann pei ki’n ganny desire par lager sivil i montre ki Temwen Zeova i vreman “kontan zot bann frer dan lafwa.”—1 Pyer 2:17.

Sa bon Nouvel i sanz Dimoun

8, 9. (a) Ki sanzman sa bann ki aksepte sa bon nouvel i fer? (b) Ki bann leksperyans ki montre pouvwar ki sa bon nouvel i annan?

⁸ Sa bon nouvel i annan keksoz pour fer avek sa ki Pol ti apel “lavi dan letan prezan, ek dan lavenir.” (1 Timote 4:8) I pa zis ofer en lespwar sir e merveye pour lavenir, me i osi amelyor “lavi dan letan prezan.” Bann Temwen i ganny gide personnelman par Parol Bondye, Labib, pour viv en lavi ki an armoni avek lavolonte Bondye. (Psonm 119:101) Zot kiltiv bann kalite tel konman ladrwatir ek fidelite ki fer zot ganny en nouvo personnalite.—Efezyen 4:24.

⁹ Annou vwar legzanp Franco. I ti annan en problenm lakoler. Kan keksoz ti al mal, i ti vin sitan ankoler ki i ti konmans kas tou keksoz. Son madanm ti etidye Labib avek Temwen Zeova, e zot legzanp Kretyen ti ed Franco ptit-a-pti pour realize ki i ti bezwen sanze. I ti etidye Labib avek zot e finalman i ti kapab demontre fri lespri lape ek kontrol lo son lekor. (Galat 5:22, 23) I ti enn parmi sa 492 ki ti batize an Belzik pandan lannen servis 2001. Annou pran legzanp Alejandro osi. Sa zennonm ti’n vin sitan adikt avek drog ki i ti degrade ziska en pwen pour depan lo en landrwa kot dimoun i zet salte pour viv, i ti rekiper sa ki i ti kapab pour vann pour ki i kapab aste son drog. Kan i ti annan 22 an, bann Temwen Zeova ti ankouraz Alejandro pour etidye Labib, e i ti aksepte. I ti lir Labib toulezour e i ti asiste bann renyon Kretyen. I ti aranz son lavi sitan vit ki dan mwens ki sis mwan, i ti kapab partisip dan travay evanzelizasyon—enn parmi sa 10,115 ki ti fer sa lannen pase an Panama.

 Bon Nouvel—En Benediksyon pour bann Dimoun dou

10. Lekel ki akeyir sa bon nouvel, e konman ki zot latitid i sanze?

¹⁰ Izai ti profetize ki sa bon nouvel ti pou ganny anonse avek bann dimoun dou. Lekel sa bann dimoun dou? Zot sa bann dimoun ki ganny dekrir dan liv Akt konman “bann ki ti dan dispozisyon neseser pour lavi eternel.” (Akt 13:48, NW ) Zot bann dimoun ki annan limilite ki sorti dan tou ran sosyal e ki’n vreman akeyir sa mesaz laverite. Sa bann dimoun i aprann ki fer lavolonte Bondye i anmenn bann benediksyon ki bokou pli ris ki okenn keksoz ki sa monn i ofer. (1 Zan 2:15-17) Me ki mannyer Temwen Zeova i arive tous leker bann dimoun dan zot travay evanzelizasyon?

11. Dapre Pol, konman ki sa bon nouvel ti devret ganny anonse?

¹¹ Annou vwar legzanp zapot Pol, ki ti ekrir bann Korentyen: “Kan mon ti vin kot zot frer, mon pa ti vin anons mister Bondye avek parol konplike, ou lasazes. Parski mon ti deside pour pa pres nanryen parmi zot eksepte Zezi-Kri, partikilyerman Zezi-Kri krisifye.” (1 Korentyen 2:1, 2) Pol pa ti esey enpresyonn bann ki ti ekout li avek son konnesans. I ti pres zis bann laverite ki’n ganny lasirans divin, bann laverite ki ozordi in ganny rikorde dan Labib. Remark osi lankourazman ki Pol ti donn Timote son konpanyon dan sa travay evanzelizasyon: “Anons Laparol, ensiste.” (2 Timote 4:2) Timote ti bezwen anons “Laparol,” mesaz Bondye. Pol ti osi ekri Timote sa: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.”—2 Timote 2:15.

12. Konman ki bann Temwen Zeova ozordi i pran kont parol Pol ek son legzanp?

¹² Bann Temwen Zeova i pran kont legzanp Pol, ensi ki son parol ki i ti dir Timote. Zot rekonnet ki Parol Bondye i annan pouvwar e zot byen servi li letan zot montre zot prosen lespwar ki i ofer ek son parol rekonfortan. (Psonm 119:52; 2 Timote 3:16, 17; Ebre 4:12) I vre ki zot servi byen bann piblikasyon ki baze lo Labib afen ki bann dimoun enterese i kapab ganny enpe plis konnesans lo Labib dan zot letan lib. Me zot toultan esey montre dimoun sa ki Labib i dir. Zot konnen ki Parol enspire Bondye pou motiv bann dimoun ki annan limilite. E kan zot servi li dan sa fason, zot prop lafwa i ganny fortifye osi.

“Konsol tou bann ki an dey”

13. Pandan lannen 2001, ki levennman ki ti fer annan en gran bezwen pour rekonfort bann ki ti an dey?

¹³ Lannen 2001 ti annan son prop dezas, e an rezilta, bokou dimoun ti bezwen rekonfor. Septanm lannen pase, nou ti vwar en legzanp remarkab Letazini kot ti annan bann latak teroris lo World Trade Center, New York, ek Pentagon pros avek Washington, D.C. Sa latak ti met sa pei antye dan en gran sok! Malgre sa, bann Temwen Zeova ti sey zot mye pour akonpli zot misyon pour “konsol tou bann ki an dey.” Nou pou vwar konman zot ti fer sa atraver ennde leksperyans.

14, 15. Konman ki bann Temwen dan de diferan lokazyon ti kapab servi Labib dan en fason efikas pour rekonfort bann dimoun ki ti an dey?

¹⁴ En Temwen ki en evanzelizater aplentan ti apros en madanm lo trotwar e demann li ki i panse lo sa bann latak teroris ki’n arive resaman. Sa madanm ti konmans plere. I ti dir ki i sagren e i swete ki i ti a kapab ede dan nenport ki fason. Sa Temwen ti dir li ki Bondye i vreman enterese avek nou tou, e i ti lir Izai 61:1, 2. Sa parol divinman enspire ti fer sans pour sa madanm, ki ti dir ki tou dimoun i an dey. I ti aksepte en trak e demann sa Temwen pour vizit li seli.

¹⁵ De Temwen ki ti pe fer sa travay  evanzelizasyon ti zwenn en zonm pe travay anba son langar. Vi ki sa trazedi kot World Trade Center ti fek arive, zot ti ofer pour montre li bann parol rekonfortan dan Labib. Avek son konsantman, zot ti lir 2 Korentyen 1:3-7, ki enkli sa parol: “Nou resevwar en gran konsolasyon par Kris.” Sa zonm ti apresye ki son bann vwazen Temwen ti pe partaz en keksoz rekonfortan avek lezot e i ti dir: “Fotespere Bondye i beni sa zoli travay ki zot pe fer.”

16, 17. Rakont de leksperyans ki montre pouvwar ki Labib i annan pour ed bann dimoun ki dan latristes oubyen ki dan sok apre bann trazedi?

¹⁶ En Temwen ki ti pe retournen pour vwar bann dimoun enterese ti zwenn garson en madanm ki ti’n montre lentere avan e i ti eksplike ki i ti enterese pour vwar konman ki son bann vwazen i ete apre sa trazedi ki ti’n fek pase. Sa zonm ti sirprann pour vwar ki sa Temwen ti’n pran son prop letan pour vizit bann dimoun e vwar konman zot ete. I ti dir ki i ti pe travay ase pros avek World Trade Center kan sa latak ti arive e ki i ti vwar tou sa ki ti arive. Kan i ti demande akoz Bondye i permet soufrans, sa Temwen ti lir serten verse dan Labib, ki enkli Psonm 37:39, ki dir: “Delivrans bann dimoun drwat i sorti kot Zeova; I zot fortres dan letan ladetres.” Sa zonm ti demann sa Temwen byen zantiman konman ki li ek son fanmiy i ete, i ti demann li pour retournen, e i ti eksprim son lapresyasyon senser pour sa vizit.

¹⁷ En madanm ki bann Temwen ti zwenn letan zot ti pe vizit zot vwazen ti en lot parmi sa milye dimoun an dey ki bann Temwen Zeova ti rekonforte dan sa bann zour apre latak teroris. I ti vreman ofanse par sa ki ti’n arive e i ti ekoute letan zot ti pe lir Psonm 72:12-14: “Parski i pou delivre sa enn pov ki pe kriy osekour, osi sa enn ki aflize e nenport ki ki napa personn pour vin ed li. I pou senpatiz avek sa enn ki senp e pov, e i pou sov nanm bann ki pov. I pou liber zot nanm dan lopresyon e dan vyolans, e zot disan pou presye dan son lizye.” Sa parol ti vreman fer sans! Sa madanm ti demann sa de Temwen pour relir sa bann verse ankor e i ti envit zot dan son lakaz pour kontiny diskisyon. Apre sa konversasyon, en letid Labib ti konmanse.

18. Ki mannyer en Temwen ti ed son prosen kan i ti ganny envite pour reprezant zot dan lapriyer?

 ¹⁸ En Temwen i travay dan en restoran dan en kominote ase ris kot bann dimoun pa ti montre gran lentere dan sa bon nouvel Rwayonm oparavan. I paret ki sa latak teroris ti’n sekwe sa kominote. Son Vandredi swar apre sa latak, manedyer sa restoran ti envit tou dimoun deor avek en labouzi pour obzerv en moman silans e refleksyon an memwar bann viktim. Avek respe pour zot santiman, sa Temwen ti sorti deor e debout trankil lo trotwar. Sa manedyer ti konnen ki i en Temwen Zeova, alor apre sa moman refleksyon, i ti demann li pour reprezant zot dan lapriyer. Sa Temwen ti dakor. Dan son lapriyer, i ti mansyonn sa kantite dimoun ki ti an dey e i ti dir ki kantmenm zot pe plere i annan lespwar. I ti mansyonn sa letan kot sa bann lensidan terib pa pou ariv ankor e i ti dir ki tou dimoun i kapab apros pli pre avek Bondye konfor atraver konnesans egzakt dan Labib. Apre ki zot ti’n dir “Amenn,” sa manedyer—swivi par plis ki 60 dimoun ki ti an deor sa restoran—ti vin kot sa Temwen, remersye li, e may li, an dizan ki sa ti pli bon lapriyer ki i ti’n deza tande.

En Byenfe pour Kominote

19. Ki leksperyans ki demontre ki serten i rekonnet bann standar tre onivo ki Temwen Zeova i annan?

¹⁹ Sirtou dan sa lepok ki nou pe viv, bann kominote kot bann Temwen Zeova i aktif i benefisye avek zot prezans—parey bokou in remarke. Konman ki en pep ki promot lape, lonnekte, ek bon moral pa ava annan en bon lenfliyans? Dan en pei dan sant Lazi, bann Temwen ti zwenn en zonm ki ti zofisye dan en ansyen lazans sekirite sa pei. I ti dir ki en fwa i ti ganny demande pour enspekte diferan lorganizasyon relizye. Kan i ti enspekte bann Temwen Zeova, i ti enpresyonnen par zot lonnekte ek zot bon kondwit. I ti admir zot lafwa ferm e lefe ki zot lansennyman i baze lo Labib. Sa zonm ti aksepte pour etidye Labib.

20. (a) Ki aktivite Temwen Zeova ki’n ganny raporte lannen pase i montre? (b) Kwa ki endike ki i annan bokou travay pour fer, e ki mannyer nou vwar nou privilez pour fer sa travay evanzelizasyon?

²⁰ Dapre sa ennde leksperyans ki’n ganny rakonte dan sa lartik, dan sa milye ki nou ti kapab rakonte, i kler ki bann Temwen Zeova ti vreman okipe pandan lannen servis 2001. * Zot ti koz avek plizyer milyon dimoun, zot ti rekonfort bokou ki ti pe plere, e zot travay evanzelizasyon in anmenn bann bon rezilta. Ti annan 263,431 ki ti senboliz zot dedikasyon avek Bondye par batenm. Lakantite evanzelizater lo nivo mondyal ti ogmante par 1.7 poursan. E lefe ki 15,374,986 ti asiste Memoryal lanmor Zezi ki ganny fer tou le zan, sa i endike ki i annan ankor bokou travay pour fer. (1 Korentyen 11:23-26) Annou kontinyen rod bann dimoun dou ki aksepte sa bon nouvel. E osi lontan ki lannen faver Zeova i kontinyen, annou kontinyen rekonfort bann ki “annan leker brize.” Pa sa travay ki nou pe fer i vreman satisfezan! Sirman nou tou nou dakor avek parol Izai: “Sirman mon pou rezwir dan Zeova. Mon nanm pou zwaye dan mon Bondye.” (Izai 61:10) Fotespere Bondye i kontinyen servi nou anmezir ki i akonpli sa parol profetik: “Souvren Senyer pou fer zermen lazistis ek louanz devan tou bann nasyon.”—Izai 61:11.

[Not anba lo paz]

Eski ou rapel?

• Konman bann dimoun dou ti benefisye atraver sa bon nouvel ki Zezi ti prese?

• Ki byenfe bann ki ti byen akeyir sa travay evanzelizasyon ki bann disip Zezi ti fer dan premye syek ti gannyen?

• Konman ki dimoun ki’n akeyir sa bon nouvel ozordi in ganny bokou byenfe?

• Konman nou vwar nou privilez pour parmi enn sa bann evanzelizater?

[Study Questions]

[Portre lo paz 25]

Temwen Zeova i touzour mazin zot responsabilite pour fer sa travay evanzelizasyon

[Portre lo paz 27]

Bann dimoun ki aksepte sa bon nouvel i form parti avek en lasosyasyon frer dan lemonn antye