Zot In Siport Zot Pikan Dan Zot Laser

“Mon’n ganny en pikan dan mon laser, en lanz Satan, pour tap mwan zanmen fini.”—2 KORENTYEN 12:7, NW.

1. Ki serten problenm ki dimoun pe fer fas avek denozour?

ESKI ou pe lite avek serten difikilte ki pe persiste dan ou lavi? Si i leka, ou pa tousel. Dan sa “letan kritik e difisil pour siporte,” bann Kretyen fidel pe siport bokou lopozisyon, problenm familyal, maladi, traka larzan, troub emosyonnel, lanmor en dimoun pros, ek lezot difikilte. (2 Timote 3:1-5) Dan serten pei, lavi bokou dimoun pe ganny menase par mankman manze ek lager.

2, 3. Ki latitid negatif nou kapab devlope kan nou fer fas avek bann problenm ki parey en pikan dan nou laser, e konman ki sa i kapab danzere?

² Bann problenm koumsa i kapab fer en dimoun krwar ki i pa kapab fer nanryen pour ed son lekor, sirtou si problenm i vin tou ansanm. Remarke ki Proverb 24:10 i dir: “Eski ou’n montre ou dekouraze dan letan ladetres? Ou lafors pou vin pti gin.” Wi, letan nou dekouraze akoz leprev ki nou ladan, sa i kapab pran nou lafors ki nou byen bezwen e i kapab afebli nou determinasyon pour andire ziska lafen. Konman sa i kapab arive?

³ Dekourazman i kapab fer nou pa vwar keksoz dan en fason ekilibre. Par egzanp, i fasil pour nou egzazer nou difikilte e konmans pran pitye pour nou lekor. Serten i menm kapab kriy avek Bondye, “Akoz ou pe les sa ariv avek mwan?” Si en tel latitid negatif i pran rasin dan leker en dimoun, i kapab fer li perdi son lazwa ek konfyans. En serviter Bondye i kapab telman dekouraze ki i aret “konbat sa bon konba dan lafwa.”—1 Timote 6:12.

4, 5. Dan serten ka, konman ki Satan i enplike dan nou problenm, me ki konfyans nou kapab annan?

⁴ Byensir pa Zeova ki anmenn bann leprev lo nou. (Zak 1:13) Serten leprev i ariv lo nou senpleman akoz nou pe sey montre nou fidel avek li. Anfet, tou sa ki servi Zeova i fer zot lekor vin target son pli gran lennmi, Satan Dyab. Dan sa pti gin letan ki reste li, ‘bondye sa syek’ pe sey fer tou dimoun ki kontan Zeova aret fer Son lavolonte. (2 Korentyen 4:4) Satan pe koz otan soufrans ki i kapab lo nou lasosyasyon frer partou dan lemonn. (1 Pyer 5:9) I vre ki Satan pa touzour responsab pour tou nou problenm, me i kapab eksplwat bann problenm ki nou fer fas avek pour esey afebli nou plis ankor.

⁵ Me kantmenm Satan oubyen son bann zarm ki i servi i kapab vreman pwisan, nou kapab defet li! Ki mannyer nou kapab asire? Akoz Zeova i konbat pour nou. I’n fer sir ki son bann serviter i konn byen bann taktik ki Satan i servi. (2 Korentyen 2:11) Anfet, Parol Bondye i koz en kantite lo bann leprev ki fer soufer bann vre Kretyen. Dan ka zapot Pol, Labib i servi sa lekspresyon “en pikan dan mon laser.” Akoz? Annou vwar an bref konman Parol Bondye i eksplik sa fraz. Apre nou pou vwar ki pa zis nou tousel ki bezwen led Zeova pour sirmont sa bann leprev.

 Akoz bann Leprev i parey Pikan

6. Ki Pol ti oule dir par “en pikan dan mon laser,” e ki sa pikan ti kapab ete?

⁶ Pol ki ti’n vreman pas dan bokou leprev, ti ganny enspire pour ekrir: “Mon’n ganny en pikan dan mon laser, en lanz Satan, pour tap mwan zanmen fini, afen ki mon pa tro elev mon lekor.” (2 Korentyen 12:7, NW ) Ki sa pikan ki ti dan laser Pol? En pikan ki’n antre dan fon nou lapo i vreman fer mal. Alor sa portre ki Pol i servi pour dekrir son sitiasyon i sizer en keksoz ki ti fer li soufer—swa fizikman, emosyonnelman, oubyen dan tou le de fason. I kapab ki Pol ti pe soufer avek en problenm lizye oubyen lezot problenm lasante. Oubyen i kapab ki sa pikan ti serten endividi ki ti kestyonn kalifikasyon Pol konman en zapot e met an dout son travay predikasyon ek lansennyman. (2 Korentyen 10:10-12; 11:5, 6, 13) Nenport kwa ki sa pikan ti ete, i ti reste la e i pa ti kapab sorti.

7, 8. (a) Ki sa lekspresyon “tap mwan zanmen fini” i endike? (b) Akoz i sitan enportan pour nou siport okenn pikan ki pe fatig nou la konmela?

⁷ Remarke ki sa pikan ti pe tap Pol zanmen fini. I enteresan pour note ki sa verb Grek ki Pol in servi la i sorti dan en mo ki dekrir premye artikilasyon ledwa spesyalman pour donn kou-d-pwen. Sa mo in ganny servi dan en sans literal dan Matye 26:67 (vwar osi Traduction du monde nouveau) e i’n ganny servi dan en sans senbolik dan 1 Korentyen 4:11. Dan sa bann verse, i donn lide pe ganny tap kou-d-pwen. Etan donnen ki Satan i annan en gran laenn pour Zeova ek Son bann serviter, nou kapab asire ki Dyab ti kontan ki en pikan ti pe tap Pol zanmen fini. Pareyman ozordi, Satan i byen kontan kan en pikan i fatig nou dan nou laser.

⁸ Alors, parey Pol, nou bezwen konnen ki mannyer pour siport sa bann pikan. Sa i enplik nou lavi. Mazinen ki Zeova i anvi prolonz nou lavi pour touzour dan son nouvo monn, kot pou napa bann problenm parey pikan ki pou antour nou ankor. Pour ed nou ranport sa zoli pri, Bondye in donn nou bokou legzanp dan son Parol sen, Labib, ki montre ki son bann serviter fidel in reisi fer fas avek zot pikan dan zot laser. Zot ti bann dimoun ordiner e enparfe parey nou. Egzamin legzanp serten parmi sa “gro nyaz temwen,” i kapab ed nou pour ‘avek determinasyon fer sa lakours ki i’n propoz nou.’ (Ebre 12:1) Medit lo sa ki zot in andire i kapab donn nou plis konfyans ki nou osi nou kapab siport nenport pikan ki Satan i kapab servi kont nou.

Bann Pikan ki ti fatig Mefiboset

9, 10. (a) Konman ki Mefiboset ti eksperyans en pikan dan son laser? (b) Ki bon aksyon Lerwa David ti fer anver Mefiboset, e ki mannyer nou kapab imit David?

⁹ Annou vwar legzanp Mefiboset, garson zanmi David, Yonatann. Kan Mefiboset ti annan senk an, i ti ganny nouvel ki  son papa, Yonatann, ek son granpapa, Lerwa Sail, ti’n ganny touye. Nouris Mefiboset ti panik. I ti “pran li . . . , me kan i ti pe taye pour sove tou panike, i ti tonbe e vin bwate.” (2 Samyel 4:4) Sa dezabilite ti bezwen vreman en pikan pour Mefiboset siporte anmezir ki i ti grandi.

¹⁰ Detrwa lannen plitar, Lerwa David ti demontre labonte leker anver Mefiboset akoz lanmour ki i ti annan pour Yonatann. David ti donn li propriyete antye Sail e i ti fer Ziba, serviter Sail, okip sa later. David ti osi dir Mefiboset: “Ou pou toultan manz dipen lo mon latab.” (2 Samyel 9:6-10) San dout, labonte leker ki David ti demontre anver Mefiboset ti rekonfort li e ede pour apez lannwi ki son dezabilite ti mete lo li. Pa sa i en bon leson pour nou! Nou osi nou devret demontre labonte anver bann ki pe lite avek en pikan dan zot laser.

11. Ki Ziba ti pretann lo Mefiboset, me ki mannyer nou konnen ki sa ki i ti dir pa ti vre? (Vwar not anba lo paz.)

¹¹ Plitar, Mefiboset ti bezwen lit avek ankor en lot pikan dan son laser. Son serviter Ziba ti koz manti lo li avek Lerwa David, ki sa letan ti pe sove an Zerizalenm akoz rebelyon ki Absalon, garson David, ti pe fer. Ziba ti dir ki Mefiboset ti’n montre li enfidel par reste Zerizalenm avek lespwar pour pran plas lerwa. * David ti krwar mansonz Ziba e pran tou sa ki ti pour Mefiboset e donn sa manter!—2 Samyel 16:1-4.

12. Ki mannyer Mefiboset ti reazir anver son sitiasyon, e konman ki i en bon legzanp pour nou?

¹² Toudmenm, kan Mefiboset ti finalman rankontre David, i ti rakont lerwa sa ki ti’n vreman arive. I ti pe prepar li pour li al zwenn David kan Ziba ti trik li e ofer pour al dan son plas. Eski David ti koriz sa fot? Pa toutafe. I ti diviz sa propriyete ant Mefiboset ek Ziba. La ankor, petet sa ti kapab vin en lot pikan dan laser Mefiboset. Eski sa ti dezapwent li en kantite? Eski i ti proteste kont desizyon David par konplent ki sa pa zis? Non, avek limilite i ti aksepte swe lerwa. I ti konsantre lo laspe pozitif, i ti kontan ki lerwa lezitim Izrael ti’n retournen sen e sof. Mefiboset in vreman donn en bon legzanp par siport son dezabilite, kalonmni, ek dezapwentman.—2 Samyel 19:24-30.

Neemya ti siport son bann Leprev

13, 14. Ki bann pikan ki Neemya ti bezwen siporte kan i ti retourn an Zerizalenm pour rebatir miray sa lavil?

¹³ Mazin sa bann pikan senbolik ki Neemya ti siporte kan i ti retourn dan lavil Zerizalenm ki ti ankor san son miray dan senkyenm syek A.N.L. I ti vwar ki sa lavil ti san defans, e ki sa bann Zwif ki ti’n retourn kot zot ti mal organize, dekouraze, e enpir dan lizye Zeova. Menm si i ti’n ganny lotorizasyon avek Lerwa Artazekses pour rebatir miray Zerizalenm, pa ti pran bokou letan pour Neemya aprann ki bann gouverner dan bann pei pros pa ti kontan son misyon ditou. “Pour zot i ti paret en keksoz byen mal pour en zonm vin rod en bon keksoz pour bann garson Izrael.”—Neemya 2:10.

¹⁴ Sa bann adverser etranze ti fer tou sa ki ti dan zot pouvwar pour aret travay Neemya. Zot menas, mansonz, kalonmni, entimidasyon—enkli bann espyon ki zot ti anvoye pour dekouraz li—ti bezwen parey bann pikan ki ti pe kontinyelman fatig li dan son laser. Eski manipilasyon son bann lennmi ti fer li abandonnen? Non! I ti met son konfyans antyerman dan Zeova e i pa ti afebli. Alors, kan miray Zerizalenm ti finalman ganny rebatir, sa ti fourni en temwannyaz permanan ki Zeova ti soutenir Neemya avek lanmour.—Neemya 4:1-12; 6:1-19.

15. Ki problenm parmi bann Zwif ki ti fatig Neemya en kantite?

 ¹⁵ Vi ki i ti gouverner, Neemya ti bezwen lit avek bokou problenm ki ti egziste parmi pep Bondye. Sa bann difikilte ti parey bann pikan ki ti fatig li en kantite akoz zot ti afekte relasyon lepep avek Zeova. Bann dimoun ki ti ris ti pe demann en lentere ki ti tro o, e zot bann frer ki ti mwen fortinen ti bezwen donn zot later e menm vann zot zanfan dan lesklavaz pour kapab pey det ensi ki taks bann Pers. (Neemya 5:1-10) Bokou Zwif ti pe vyol Saba e zot pa ti pe soutenir bann Levit ek tanp. Deplis, serten ti’n marye avek “bann madanm Asdodit, Amonit e Moabit.” Sa ti vreman fer soufer Neemya! Me napa enn sa bann pikan ki ti fer li arete. I ti servi tou lokazyon pour defann avek zel lalwa drwat Bondye. Parey Neemya, annou pa les kondwit enfidel lezot dekouraz nou pour servi Zeova fidelman.—Neemya 13:10-13, 23-27.

Plizyer lezot Fidel ti siporte

16-18. Konman ki Izaak ek Rebeka, Ana, David, ek Osea ti rankontre problenm familyal?

¹⁶ Dan Labib i annan plizyer lezot legzanp bann dimoun ki ti siport bann sitiasyon penib ki kapab ganny konpare avek en pikan. En sours sa bann pikan ki komen ti problenm familyal. Sa de madanm Ezai “ti en sours lanmertim pour Izaak ek Rebeka,” paran Ezai. Rebeka ti menm dir ki i ay son lavi akoz sa de madanm. (Zenez 26:34, 35; 27:46) Mazin osi Ana e konman Penina, lot madanm son msye, ti “irit li bokou” akoz Ana ti steril. Petet laplipar-di-tan Ana ti siport sa ridikil dan lakour. Penina ti osi sifok li an piblik—san dout devan son bann fanmiy ek zanmi—pandan ki lafanmiy ti pe al lafet an Silo. Sa ti konmsi i ti pe pous sa pikan pli dan fon dan laser Ana.—1 Samyel 1:4-7.

¹⁷ Mazin enpe sa ki David ti andire akoz zalouzi fou son boper, Lerwa Sail. Pour sov son prop lavi, David ti forse viv anba kavern ros dan dezer Enn-gedi, kot i ti bezwen grenp bann pasaz apik, difisil e danzere. Sa lenzistis ti bezwen irit li, parski i pa ti’n fer nanryen mal kont Sail. Malgre sa, pour plizyer lannen David ti mars an tayan—tousala akoz zalouzi Sail.—1 Samyel 24:14, 15; Proverb 27:4.

¹⁸ Imazin sa problenm familyal ki profet Osea ti rankontre. Son madanm ti komet adilter. Son imoralite ti bezwen parey pikan ki ti’n ganny anfonse dan leker Osea. Deplis, i ti’n bezwen soufer bokou plis ankor kan son madanm ti donn nesans de zanfan ilezitim an rezilta fornikasyon!—Osea 1:2-9.

19. Ki persekisyon ki ti fer soufer profet Mikaya?

¹⁹ Persekisyon i en lot pikan dan laser. Reflesir lo leksperyans profet Mikaya. Ti bezwen vreman tourmant Mikaya, li ki ti en  zonm drwat, pour vwar Lerwa mesan, Aab, antoure avek bann fo profet e krwar zot bann mansonz ki ti evidan. Deplis, ki sef sa bann triker ti fer kan Mikaya ti dir Aab ki tou sa bann profet ti pe koz par “en lespri tronper”? I ti “tap Mikaya lo son lazou”! Sa ki ti pli pir ankor se reaksyon Aab kan Zeova ti averti ki sa kanpanny pour reganny Ramot-Gilead pa ti pou en sikse. Aab ti donn lord ki Mikaya i ganny met dan prizon e ki son rasyon manze i ganny diminyen. (1 Lerwa 22:6, 9, 15-17, 23-28) Mazin osi Zeremi e fason ki son bann persekiter kriyel ti tret li.—Zeremi 20:1-9.

20. Ki pikan Naomi ti bezwen siporte, e konman ki i ti ganny rekonpanse?

²⁰ En lot sitiasyon penib ki kapab ganny konpare avek en pikan dan laser se kan nou perdi en dimoun ki nou ti pros avek. Naomi ti bezwen siport son douler kan i ti perdi son msye ek son de garson dan lanmor. I ti retourn an Betleenm ankor pe santi sa bann kou ki’n vreman fer li soufer. I ti demann son bann zanmi pour pa apel li Naomi, me Mara, en non ki montre ki i’n pas dan bann leksperyans penib. Me alafen Zeova ti rekonpans li pour son perseverans avek en pti zanfan ki ti pou vin zanset Mesi.—Rit 1:3-5, 19-21; 4:13-17; Matye 1:1, 5.

21, 22. Konman ki Zob ti ganny aflize avek pert, e ki mannyer i ti reazir?

²¹ Mazinen konman Zob ti’n bezwen soke pour tann lanmor sibit e vyolan son dis zanfan ki i ti byen kontan, e deplis pour perdi tou son bann zannimo ek serviter. Son lemonn ti koule en sel kou! Letan Zob ti ankor anba sok sa bann kou, Satan ti frap li avek maladi. Petet Zob ti mazinen ki i ti pe al mor avek sa maladi fatal. Son douler ti vin sitan ensiportab ki i ti mazinen ki lanmor ti pou en soulazman pour li.—Zob 1:13-20; 2:7, 8.

²² Konmsi sa pa ti ase, son madanm dan son douler ek langwas, ti vin kot li e kriye: “Modi Bondye e mor!” Konman sa ti en pikan dan son laser ki ti deza dan douler! Deplis, trwa konpanyon Zob, olye rekonfort li, ti atak li avek bann rezonnman tronper, akiz li pour komet serten pese an kasyet e prezimen ki se sa ki’n fer son maler. Zot fo largiman ti pous sa bann pikan pli dan fon ankor. Mazinen osi ki Zob pa ti konnen akoz sa bann keksoz terib ti pe ariv avek li e i pa ni ti konnen ki son lavi ti pou ganny eparnyen. Pourtan, “dan tou sa, Zob pa ti fer pese e i pa ti dir nanryen endiny lo Bondye.” (Zob 1:22; 2:9, 10; 3:3; 14:13; 30:17) Kantmenm i ti ganny antoure avek plizyer pikan anmenmtan, i pa ti zanmen abandonn son lentegrite. Pa en legzanp ankourazan!

23. Akoz sa bann serviter fidel ki nou’n diskit lo la ti kapab siport diferan pikan dan zot laser?

²³ Sirman i annan ankor plizyer lezot legzanp parey dan Labib. Dan en sans senbolik, tou sa bann serviter fidel ti bezwen lit avek zot prop pikan. E zot ti fer fas avek diferan kalite problenm. Pourtan, zot ti annan en keksoz an komen. Napa enn parmi zot ki ti arete servi Zeova. Malgre tou sa bann leprev ki ti fer zot soufer, zot ti ranport laviktwar lo Satan gras a lafors ki Zeova ti donn zot. Konman sa? Nou lartik swivan pou reponn sa kestyon e pou montre konman nou osi nou kapab fer fas avek okenn keksoz ki parey en pikan dan nou laser.

[Not anba lo paz]

Ki ou pou reponn?

• Akoz bann problenm ki nou fer fas avek i kapab ganny konpare avek bann pikan dan nou laser?

• Nonm serten sa bann pikan ki Mefiboset ek Neemya ti bezwen siporte.

• Parmi sa bann endividi dan Labib ki’n siport diferan pikan dan zot laser, legzanp lekel ki ou’n vwar pli tousan e akoz?

[Study Questions]

[Portre lo paz 9]

Mefiboset ti bezwen siport son dezabilite, kalonmni, ek dezapwentman

[Portre lo paz 11]

Neemya ti persevere malgre lopozisyon