Ki sa Fason donnen ki anmenn Lazwa?

GENIVAL i reste dan en landrwa tre pov dan nor les Brezil. I ti siport son madanm ek son zanfan avek en pti lapey ki i ti gannyen konman en gard sekirite lopital. Kantmenm i ti rankontre difikilte, Genival ti fer sir ki i donn ladim. I tous son vant e i rapel: “Parfwa mon fanmiy ti reste vant vid. Me mon ti anvi donn Bondye mon meyer, menm si i ti kout mwan en kantite.”

Apre ki i ti’n perdi son plas travay, Genival ti kontinyen donn ladim. Son pret ti ankouraz li pour teste Bondye par fer en gran donasyon. Sa pret ti asir li ki Bondye ti pou sertennman beni li. Alors Genival ti deside pour vann son lakaz e donn sa larzan avek legliz.

Pa zis Genival ki annan en tel senserite pour donnen. Bokou dimoun ki tre pov i fidelman donn ladim akoz zot in ganny ansennyen par zot legliz ki ladim i en keksoz ki Labib i demande. Eski sa i vre?

Ladim ek Lalwa

Sa komannman pour donn ladim ti form parti Lalwa ki Zeova Bondye ti donn sa 12 tribi ansyen Izrael plis ki 3,500 an pase. Sa Lalwa ti demande ki en dizyenm (10 poursan) bann prodwi later, fri, ogmantasyon bann zannimo, i ganny donnen avek tribi Levi. Sa ti pou ede siport zot servis spesyal pour Bondye.—Levitik 27:30, 32; Nonm 18:21, 24.

Zeova ti asir bann Izraelit ki Lalwa ‘pa ti pou tro difisil pour zot.’ (Deterononm 30:11) Osi lontan ki zot ti obzerv komannman Zeova fidelman, enkli ladim, zot ti pou resevwar rekolt an abondans parey i ti’n promet. I ti pou osi servi konman en proteksyon kont lapovrete. I ti annan osi en lot ladim ki ti ganny met dekote tou le zan. I ti ganny servi ler sa nasyon ti zwenn ansanm pour son bann lafet relizye. Sa laranzman ti pou kapab alor soutenir bann rezidan etranze, orfelen, ek vev.—Deterononm 14:28, 29; 28:1, 2, 11-14.

Lalwa pa ti spesifye en pinisyon pour bann ki pa ti donn ladim, me sak Izraelit ti moralman oblize siport vre ladorasyon dan sa fason. Annefe, Zeova ti blanm bann Izraelit ki ti neglize pour donn ladim dan letan Malaki, konmkwa zot ti pe depouy li. (Malaki 3:8) Eski menm lakizasyon i aplik pour bann Kretyen ki pa donn ladim?

Annou reflesir en kou. Lalwa ki en pei i etabli i normalman pa aplik pour en lot pei. Par egzanp, sa lalwa ki obliz bann drayver an Langleter pour dray lo kote gos pa aplik pour bann drayver an Frans. Pareyman, sa lalwa ki ti demann ladim ti form parti en lalyans ki Bondye ti fer zis avek nasyon Izrael. (Egzod 19:3-8; Psonm 147:19, 20) Zis bann Izraelit ki ti anba sa lalwa.

Deplis, menm si i vre ki Bondye pa zanmen sanze, parfwa sa ki i demande i sanze. (Malaki 3:6) Labib i dir klerman ki sakrifis Zezi, lannen 33 N.L., “in efas,” oubyen “anil,” sa Lalwa. Sa i enkli sa “drwa [pour] pran ladim.”—Kolosyen 2:13, 14; Efezyen 2:13-15; Ebre 7:5, 18.

Fason ki Kretyen i kontribye

Toudmenm, bann kontribisyon pour siport vre ladorasyon ti ankor neseser. Zezi ti demann son bann disip pour ‘temwanny ziska tou bann landrwa pli elwannyen lo later.’ (Akt 1:8) Pli lakantite krwayan ti ogmante, pli ti annan en gran bezwen pour bann an sennyan ek sirveyan Kretyen vizit e fortifye bann kongregasyon. Parler zot ti bezwen pran swen avek bann vev, orfelen, ek lezot dimoun ki ti dan bezwen. Ki mannyer bann Kretyen premye syek ti kouver sa bann depans?

Ver lannen 55 N.L., en lapel ti ganny lanse avek bann Kretyen non Zwif dan Lerop ek Lazi Miner pour ed en kongregasyon pov an Zide. Dan son let pour kongregasyon an Korent, zapot Pol ti dekrir ki mannyer sa “kontribisyon an faver bann sen” ti ganny organize. (1 Korentyen 16:1) Ou kapab sirprann avek sa ki Pol ti dir konsernan fason ki Kretyen i devret donnen.

Zapot Pol pa ti met presyon lo son bann konpanyon Kretyen pour donnen. Annefe, bann Kretyen an Masedwann ki ti pe rankontre “bann leprev serye” e ki ti tre “pov,” ti kontinyen ‘sipliy Pol pour donn zot privilez pour partisip dan led pour bann sen.’—2 Korentyen 8:1-4.

I vre, Pol ti ankouraz bann Korentyen ki ti pli ris pour imit zot bann frer zenere an Masedwann. Kantmenm sa, en travay referans i fer remarke ki i ti ‘refize donn lord, e i ti plito demande, sizere, ankouraze oubyen lans en lapel. Si bann Korentyen ti ganny forse pour donnen, zot pa ti pou donn avek santiman ek en leta lespri volonter.’ Pol ti konnen ki “Bondye i kontan sa ki donn avek lazwa,” me pa en dimoun ki donn “avek regre ou par lobligasyon.”—2 Korentyen 9:7.

Se en gran lafwa, konnesans ansanm avek lanmour senser pour bann konpanyon Kretyen, ki ti pou motiv bann Korentyen pour donnen volonterman.—2 Korentyen 8:7, 8.

“Dapre sa ki i’n deside”

Olye spesifye en serten kantite, Pol ti selman sizere ki “premye zour sak semenn, sakenn i ava met dekote kot li, sa ki i a’n reisi ekonomize.” (1 Korentyen 16:2) Par fer plan e rezerv en serten kantite larzan lo en baz regilye, bann Korentyen pa ti pou santi zot anba presyon pour donn avek regre oubyen zis ler Pol i la. Alor, kantite ki sak Kretyen ti donnen ti pou en zafer personnel, “dapre sa ki i’n deside.”—2 Korentyen 9:5, 7.

Pour kapab rekolte bokou, bann Korentyen ti bezwen donn avek zenerozite. Napa okenn landrwa ki dir ki zot ti devret donnen ziska zot nepli kapab. Pol ti asir zot: “I pa en kestyon met zot dan lanbara.” Bann kontribisyon ti ‘ganny aksepte par Bondye dapre sa ki en dimoun i annan, non pa dapre sa ki i napa.’ (2 Korentyen 8:12, 13; 9:6) Dan en let ki i ti ekrir plitar, sa zapot ti averti: “Si en dimoun i pa port swen . . . bann ki viv dan son lakaz, i’n abandonn lafwa e i pir ki en non-krwaryan.” (1 Timote 5:8) Pol pa ti ankouraz bann Kretyen pour donnen ziska ki zot nepli kapab siport zot fanmiy.

 Remarke ki Pol ti sirvey en “kontribisyon an faver bann sen” ki ti dan bezwen. Nou pa vwar okenn verse Labib ki dir ki Pol oubyen lezot zapot ti organiz bann kontribisyon oubyen resevwar ladim pour siport zot prop minister. (Akt 3:6) Pol ti toultan rekonesan pour resevwar bann don ki kongregasyon ti anvoy li, me i ti fer sir ki i pa enpoz “en traka” lo son bann frer.—1 Tesalonisyen 2:9; Filipyen 4:15-18.

Legzanp Kontribisyon volonter ozordi

I evidan ki pandan premye syek, bann disip Kris ti donn volonterman, non pa donn ladim. Me petet ou pe demann ou lekor si sa i ankor en mwayen efikas pour siport predikasyon sa bon nouvel e pour pran swen avek bann Kretyen ki dan bezwen.

Konsider sa. An 1879 editer sa magazin ti dir fransman ki zot pa pou “zanmen mandyan ni sipliy zonm pour sipor.” Eski sa desizyon in retard zefor Temwen Zeova pour propaz laverite Labib?

Aktyelman, bann Temwen pe distribye Labib, bann liv Kretyen, ek lezot piblikasyon dan 235 pei. Okonmansman, Latour Veyer, en magazin edikasyonnel baze lo Labib, ti ganny enprimen dan zis en langaz, e 6,000 kopi ti ganny distribye par mwan. Aprezan i’n vin en magazin ki ganny pibliye de fwa par mwan, 24,000,000 kopi i ganny enprimen dan 146 langaz. Pour organiz zot travay edikasyonnel baze lo Labib ki pe ganny fer atraver lemonn, bann Temwen in konstri oubyen annan bann sant ladministrasyon dan 110 pei. Deplis, zot in konstri plizyer milye landrwa renyon e osi byen ki bann gran lasal lasanble pour resevwar bann ki enterese pour ganny plis lenstriksyon lo Labib.

Menm si pran swen avek bezwen spirityel lezot dimoun i en priyorite pour bann Temwen Zeova, zot pa negliz bezwen materyel  zot konpanyon Kretyen. Ler zot bann frer i soufer akoz lefe lager, tranbleman-d-ter, lasesres, ek movetan, zot pare pour fourni latizann, manze, lenz, ek lezot nesesite. Tousala i ganny finanse par bann donasyon ki bann Temwen ek bann kongregasyon i fer.

Kontribisyon volonter i en bon mwayen pour kontribye. Deplis i pa met okenn fardo lo bann ki mizer, tel parey Genival ki’n ganny mansyonnen pli boner. Erezman, avan ki Genival ti kapab vann son lakaz, Maria, en minis aplentan Temwen Zeova ti vizit li. Genival i rapel: “Sa konversasyon in sov mon fanmiy en kantite difikilte ki pa neseser.”

Genival ti dekouver ki travay Senyer pa depan lo ladim. Annefe, ladim nepli en keksoz ki Labib i demande. I ti aprann ki bann Kretyen i ganny beni ler zot donn avek tou zot leker, me ki zot pa oblize donn plis ki sa ki zot kapab donnen.

Donn volonterman in anmenn vre lazwa pour Genival. I eksprimen: “Ki swa mon kapab oubyen pa kapab donn sa 10 poursan, mon kontan avek mon kontribisyon, e mon asire ki Zeova osi i kontan.”

[Bwat/Portre lo paz 6]

Ki serten Ansennyan Kretyen ti dir konsernan Ladim?

“Bann ki pli ris parmi nou i ed bann ki dan bezwen . . . Sa bann ki reisi dan lavi, e ki bonker, i donn sa ki zot panse i apropriye.”—The First Apology, Justin Martyr, 150 N.L.

‘Bann Zwif ti dedye [10 poursan] sa ki zot ti annan avek Bondye, me tandis ki bann Kretyen, zot ti met tou sa ki zot ti annan dekote pour plan Senyer, . . . parey sa pov vev ki ti met tou sa ki i ti annan dan trezor Bondye.’—Against Heresies, Irenaeus, 180 N.L.

“Menm si i annan en bwat ki kapab met larzan, sa larzan pa’n ganny mete pour aste delivrans, ni pey pour larelizyon. Enn fwa par mwan, si en dimoun i kontan, i met en pti larzan dan bwat; me selman si i anvi, e si i kapab: akoz i pa forse; tou i ganny fer volonterman.”—Apology, Tertullian, 197 N.L.

“Vi ki Legliz ti agrandi e plizyer lenstitisyon ti ganny kree, i ti neseser ki bann lalwa i ganny fer ki ti pou garanti ki legliz i ganny byen soutenir. Ladim ki sorti dan Vye Lalwa (Lalwa Mozaik) ti ganny adopte. . . . Dapre serten dokiman, i endike ki sa ti ganny adopte par bann levek ki ti rasanble an Tours an 567 e osi an Macon an 585.”​—The Catholic Encyclopedia.

[Portre lo paz 5]

Donn volonterman i anmenn lazwa

[Portre lo paz 7]

Bann kontribisyon volonter i siport travay predikasyon, led sekour, ek konstriksyon bann landrwa renyon