Letid Personnel Ki Ekip Nou Pour Vin Bann Ansennyan
Letid Personnel Ki Ekip Nou Pour Vin Bann Ansennyan
“[Reflesir lo sa bann keksoz; konsantre ladan, NW ] ki tou dimoun i a war ou progre. Vey byen ou lekor e fer byen atansyon avek ou lansennyman.”—1 TIMOTE 4:15, 16.
1. Ki nou kapab dir konsernan moman ki nou fer nou letid personnel?
LABIB i dir dan Eklezyast 3:1 ki “pour tou keksoz i annan en letan fikse.” Sa i osi vre avek letid personnel. Bokou i vwar li difisil pour reflesir lo bann keksoz spirityel si letan ek landrwa pa apropriye. Par egzanp, apre en lazournen travay byen dir ek en gro lasyet manze aswar, eski ou pou anvi etidye, sirtou si ou’n alonze dan ou sofa prefere devan televizyon? Pa vreman. Alors, ki pli bon solisyon? I kler ki nou bezwen swazir kan e kote pour etidye avek bi pour retir maksimonm byenfe pour nou bann zefor.
2. Laplipar-di-tan, ki pli bon moman pour fer letid personnel?
2 Bokou i vwar ki pli bon moman pour zot etidye se boner dan bomaten kan zot lespri i ankor fre. Lezot i servi zot brek midi pour etidye en pti pe. Remarke dan sa bann legzanp swivan kan serten ti fer bann aktivite spirityel enportan. Lerwa David dan ansyen Izrael ti ekrir: “Dan bomaten les mwan tann konsernan ou labonte leker, akoz mon’n plas mon konfyans dan ou. Fer mwan konn sa semen ki mon devret mars lo la, akoz mon’n ofer ou mon lekor konman en sakrifis.” (Psonm 143:8) Profet Izai ti montre ki i rekonnet lenportans letid li osi, kan i ti dir: “Souvren Senyer Zeova li menm in ansenny mwan ki pour dir, pour ki mon kapab konnen konman pour reponn bann ki fatige avek en parol. I leve bomaten apre bomaten; i ouver mon zorey pour ekout parey bann disip.” Alor, pwen ki pe fer resorti se ki nou bezwen etidye e kominik avek Zeova kan nou pli kapab konsantre, nenport moman dan lazournen.—Izai 50:4, 5; Psonm 5:3; 88:13.
3. Ki bann kondisyon ki neseser pour en letid efikas?
3 En lot fakter pour fer en letid efikas, se ki nou pa devret swazir pour asiz dan en sez oubyen en sofa ki pli konfortab. Sa i pa pli bon fason pour reste eveye. Kan nou pe etidye, fodre ki nou byen konsantre. En lanvironnman tro konfortab i kapab fer tou lekontrer. Trankilite ek mwens distraksyon i neseser pour etidye e medite. Nou pa pou ganny meyer rezilta si nou esey etidye avek radyo, televizyon, oubyen zanfan ki pe lager pour ganny nou latansyon. Kan Zezi ti anvi medite, i ti al dan en landrwa trankil. I ti osi koz lo lenportans pour rod en landrwa kot nou vwar nou tousel pour priye.—Matye 6:6; 14:13; Mark 6:30-32.
Letid personnel ki ekip nou pour reponn en Etidyan
4, 5. Dan ki fason brosir Ekspekte i en led pratik?
4 Letid personnel i agreab kan nou servi plizyer zouti baze lo Labib pour kapab fouy pli profon lo en size. Nou fer sa sirtou kan nou bezwen reponn bann bon kestyon ki en dimoun enterese i demande. (1 Timote 1:4; 2 Timote 2:23) Konman pwen depar, plizyer nouvo pe etidye sa brosir Sa ki Bondye i ekspekte nou fer, * ki aprezan disponib dan 261 langaz. I en piblikasyon senp me presi ki baze antyerman lo Labib. I ed son bann lekter konpran vitman sa ki Bondye i ekspekte pour vre ladorasyon. Parkont, sa brosir pa donn en letid detaye lo sak size ki ganny egzaminen. Ki ou pou fer pour trouv plis lenformasyon ki baze lo Labib pour reponn bann kestyon ou etidyan?
5 Pour bann ki annan Watchtower Library lo CD-ROM dan zot langaz, i fasil pour ganny akse avek en gran varyete lenformasyon lo konpiter. Me pour bann ki napa sa lekipman? Annou egzamin de topik ki ganny konsidere dan brosir Ekspekte pour vwar konman nou kapab agrandir nou konprenezon e kapab donn plis detay—sirtou si en dimoun i demann bann kestyon parey, Ki sennla Bondye, e ki mannyer Zezi ti vreman ete?—Egzod 5:2; Lik 9:18-20; 1 Pyer 3:15.
Ki sennla Bondye?
6, 7. (a) Ki kestyon ki ganny souleve konsernan Bondye? (b) Ki fot grav ki en paster ti fer dan son diskour?
6 Leson 2 dan brosir Ekspekte i reponn sa kestyon enportan, Ki sennla Bondye? Sa i en pwen byen enportan akoz en dimoun pa kapab ador vre Bondye si i pa konn Li oubyen petet i annan doutans lo Son legzistans. (Romen 1:19, 20; Ebre 11:6) Pourtan, dimoun partou dan lemonn i annan en kantite diferan krwayans konsernan lidantite Bondye. (1 Korentyen 8:4-6) Sakenn i kapab annan en larepons diferan pour eksplik lidantite Bondye. Laplipar larelizyon Kretyen i krwar dan Trinite setadir Bondye, Zezi, ek lespri sen i en sel. En paster byen renonmen Letazini ti donn en diskour entitile “Eski ou konn Bondye?” Dan son diskour, i pa ti mansyonn sa non divin ni menm enn fwa, menm si i ti sit Lekritir Ebre plizyer fwa. Byensir i ti lir dan en tradiksyon Labib ki servi “Senyer,” e ki kapab konfizan, kan sa ler Bondye i annan en non, Zeova oubyen Yawe.
7 Sa paster ti mank en pwen enportan kan i ti sit Zeremi 31:33, 34: “ ‘Pou nepli annan okenn zonm ki pou ansenny son konpanyon, ni okenn zonm son frer, an dizan, “Fodre konn Senyer” [an Ebre, “Fodre konn Zeova”], akoz zot tou zot pou konn Mwan, depi sa ki pli pti parmi zot ziska sa ki pli gran parmi zot,’ Senyer [an Ebre, Zeova] i dir.” Sa tradiksyon ki i ti servi in retir sa non inik Bondye, Zeova.—Psonm 103:1, 2.
8. Kwa ki montre lenportans pour servi non Bondye?
8 Psonm 8:9 i eksplike akoz servi non Zeova i sitan enportan: “O Zeova nou Senyer, konman ou non i gran lo later antye!” Konpar sa avek: “O SENYER, nou Senyer, konman ou non i ekselan lo later antye!” (King James Version; vwar osi The New American Bible, The Holy Bible—New International Version, Tanakh—The Holy Scriptures) Pourtan, parey i’n ganny mansyonnen dan lartik avan sa enn, nou kapab ganny “konnesans Bondye” si nou les son Parol eklersi nou. Me ki zouti ki pou ed nou reponn nou bann kestyon konsernan lenportans sa non divin?—Proverb 2:1-6.
9. (a) Ki piblikasyon ki kapab ed nou pour eksplik lenportans pour servi sa non divin? (b) Konman ki bokou tradikter in fel pour montre respe pour non Bondye?
9 Nou kapab get dan sa brosir Le nom divin qui demeure à jamais, ki’n ganny tradwir dan 69 langaz. * Sa seksyon entitile “Le nom divin—sa signification et sa prononciation” (paz 6-11) i montre klerman ki sa kat let ki form non Bondye i aparet apepre 7,000 fwa dan bann ansyen kopi bann liv Labib an Ebre. Pourtan, bann sef relizye ek tradikter dan larelizyon Zwif ek Kretyen in retir li par ekspre dan lamazorite zot bann tradiksyon Labib. * Konman zot kapab pretann konn Bondye e annan en relasyon akseptab avek li si zot refize pour apel li par son non? Son vre non i ouver semen pour konpran son bann plan e ki i ete. Deplis, ki lenportans sa bout lapriyer Zezi kot i dir “nou Papa ki dan lesyel ki ou non sen i ganny glorifye” si non Bondye pa ni menm ganny servi?—Matye 6:9; Zan 5:43; 17:6.
Ki sennla Zezi Kri?
10. Konman nou kapab byen konpran lavi ek minister Zezi?
10 Leson 3 dan brosir Ekspekte i annan pour tit “Ki sennla Zezi Kri?” Dan zis sis paragraf, i donn en leksplikasyon bref lo Zezi, son lorizin, e osi son bi ki i’n vin lo later. Parkont, si ou anvi en resi konplet lo son lavi, napa pli bon resi—apard ki bann Levanzil zot menm—ki Le plus grand homme de tous le temps, ki disponib dan 111 langaz. Sa liv i prezant en resi konplet lo lavi ek lansennyman Zezi dan lord ki ti arive, baze lo sa kat Levanzil. Son 133 sapit i kouver bann levennman dan lavi ek minister Zezi. Pour en metod diferan, par egzanp par topik, ou kapab refer avek Étude perspicace, Volim 2, anba tit “Jésus Christ.”
11. (a) Kwa ki fer Temwen Zeova diferan dan zot krwayans konsernan Zezi? (b) Ki detrwa teks Labib ki prouve ki doktrin Trinite i fo, e ki piblikasyon ki itil dan sa domenn?
11 Dan Kretyente, i annan en deba lo ki mannyer Zezi i kapab Garson Bondye anmenmtan Bondye li menm. Andotmo, sa deba i lo Trinite, sa ki Catechism of the Catholic Church i apel “mister prensipal lafwa Kretyen.” Kontrerman avek bann larelizyon Kretyen, Temwen Zeova i krwar ki Zezi in ganny kree par Bondye me i pa Bondye. En diskisyon ekselan lo sa size i trouve dan sa brosir Doit-on croire à la Trinité?, ki’n ganny tradwir dan 95 langaz. * Parmi sa kantite verse ki i servi pour prouve ki doktrin Trinite i fo i Mark 13:32 ek 1 Korentyen 15:24, 28.
12. Ki lot kestyon ki merit nou latansyon?
12 Sa ki nou’n fek vwar konsernan Bondye ek Zezi Kri, i sizer serten fason ki nou kapab fer letid personnel avek bi pour ed bann etidyan Labib pour ganny konnesans egzakt. (Zan 17:3) Parkont, ki nou pou dir konsernan bann ki’n asosye avek kongregasyon Kretyen pour plizyer lannen? Avek tou sa konnesans ki zot annan lo Labib, eski zot ankor bezwen pran oserye zot letid personnel lo Parol Zeova?
Akoz fodre “vey byen”?
13. Ki fo pwennvi serten i kapab annan konsernan letid personnel?
13 Serten ki’n form parti avek kongregasyon pour plizyer lannen i kapab ganny sa labitid pour depan lo sa konnesans Labib ki zot in gannyen ler zot ti fek konn laverite. I fasil pour dir: “Ou konnen, mon pa bezwen etidye otan ki bann nouvo. Get tou sa letan mon pe lir Labib ek sa bann piblikasyon.” Sa i konmsi ou pe dir: “Mon pa bezwen fatig mwan avek manze aprezan. Get tou sa ki mon’n manze dan lepase!” Nou konnen ki nou lekor i bezwen konstaman ganny nouri avek bann manze nourisan, ki’n ganny byen prepare, pour kapab kit nou an bonn sante e aktif. Konbyen plis nou bezwen mentenir nou lasante ek lafors spirityel!—Ebre 5:12-14.
14. Akoz nou bezwen vey byen nou lekor?
14 Alors, nou tou ki swa pe etidye Labib depi lontan oubyen non, nou devret pran aker konsey ki Pol ti donn Timote, ki sa letan ti en sirveyan matir e responsab: “Vey byen ou lekor e fer byen atansyon avek ou lansennyman, e montre perseverans dan tousala. Si ou azir koumsa ou ava sov ou lekor ek tou bann ki ekout ou.” (1 Timote 4:15, 16) Akoz nou devret pran konsey Pol aker? Mazinen, Pol ti osi fer resorti ki nou annan en batay pour fer kont “tou bann riz Dyab” ek “bann pouvwar move lespri dan ler.” Zapot Pyer ti averti ki Dyab “pe rode ki i pou devore” e sa “ki” i kapab nenport antre nou. Si nou tro annan konfyans dan nou lekor, i kapab sanmenm sa loportinite ki Dyab pe rode.—Efezyen 6:11, 12; 1 Pyer 5:8.
15. Ki defans spirityel nou annan, e konman nou kapab mentenir li?
15 Alors, ki defans nou annan? Zapot Pol i rapel nou: “Zot devre aprezan met lo zot, lekipman proteksyon ki Bondye in donn zot. Alor kan bann move zour difikilte i ava arive, zot a kapab defann zot kont latak lennmi, e kan zot a’n fini lite ziska zot dernyen zour, zot ava ankor kapab tenir ferm.” (Efezyen 6:13) Sa ki esansyel, se pa konman ou lekipman batay ti protez ou en pe letan pase, me si ou’n kontinyen pran swen sa lekipman pour li kapab protez ou la konmela. Alors, sa lekipman konplet ki Bondye i donn nou i devret enkli en konnesans azour lo Parol Bondye. Sa i montre nou ki nou devret toultan reste azour dan nou konprenezon lo laverite parey in ganny revele par Zeova atraver son Parol ek lesklav fidel e pridan. Letid personnel regilye lo Labib ek bann piblikasyon Kretyen i esansyel pour pran swen avek nou lekipman batay spirityel.—Matye 24:45-47; Efezyen 6:14, 15.
16. Ki nou kapab fer pour asire ki nou ‘gran boukliye lafwa’ i dan en bon kondisyon?
16 Pol ti fer resorti en parti esansyel dan nou lekipman batay. Sa se ‘gran boukliye lafwa,’ avek ki nou kapab detourn e tenny tou bann dart alimen Satan. Sa bann dart i kapab bann fo lakizasyon ek lansennyman bann aposta. (Efezyen 6:16) Alors i enportan ki nou verifye ki kantite for nou boukliye lafwa i ete e ki bann pa nou fer pour mentenir e fortifye li. Par egzanp, ou kapab demande: ‘Tou le semenn, mon etidye Labib an servan Latour Veyer, konman nou prepar sa letid? Eski mon etidye ase pour kapab “pous kanmarad pour annan lanmour e fer sa ki byen” par donn bann larepons byen prepare pandan renyon? Eski mon ouver Labib e lir bann verse ki’n ganny mansyonnen me pa site? Kan mon asiste renyon, eski mon ankouraz lezot par partisip avek bokou lantouzyasm?’ Nou manze spirityel i solid, e nou bezwen byen dizer li pour kapab benefisye plennman.—Ebre 5:14; 10:24.
17. (a) Ki pwazon Satan pe servi pour esey afeblir nou spirityalite? (b) Ki remed pour pwazon Satan?
17 Satan i konn febles bann imen enparfe, e nou kapab pa vwar son bann riz. Enn bann fason ki i propaz son move lenfliyans se par fer pornografi disponib fasilman lo televizyon, Internet, video, liv ek magazin. Serten Kretyen in les sa pwazon penetre dan zot defans ki’n afeblir. Sa in fer zot perdi zot privilez dan kongregasyon oubyen sibir bann konsekans pli grav ankor. (Efezyen 4:17-19) Ki remed pour pwazon spirityel Satan? Nou pa devret negliz nou letid personnel regilye, nou bann renyon Kretyen, ek tou nou lekipman batay ki Bondye i donnen. Tousala ansanm i donn nou sa abilite pour fer distenksyon ant sa ki byen ek sa ki mal e pour deteste sa ki Bondye i deteste.—Psonm 97:10; Romen 12:9.
18. Ki mannyer “lepe ki Lespri i donnen” i kapab ed nou dan nou batay spirityel?
18 Si nou mentenir nou labitid Letid Labib regilye, nou pou annan sa bon defans ki konnesans lo Parol Bondye i fourni. Nou pou osi kapab servi “Laparol Bondye konman en lepe ki Lespri i donnen” pour kapab byen atake. Parol Bondye i “pli koupe ki en lepe ki koup de kote. I kapab penetre ziska separasyon lam ek lespri, zwentir ek lanmwel lezo. I arive desifre tou dezir ek sekre leker imen.” (Efezyen 6:17; Ebre 4:12) Si nou konn byen servi sa “lepe,” alor kan nou pou fer fas avek tantasyon, nou pa pou ganny anbete par sa ki paret normal, menm atiran, me ki pourtan i kapab en latrap mortel Satan. Tou sa ki nou konnen e konpran lo Labib pou ed nou rezet sa ki move e fer sa ki byen. Alors nou tou nou devret demann nou lekor: ‘Eski mon lepe i koupe oubyen i grat? Eski mon vwar li difisil pour rapel bann teks Labib ki kapab ranforsi mon latak?’ Annou gard nou bann bon labitid letid personnel lo Labib e dan sa fason nou a kapab reziste Dyab.—Efezyen 4:22-24.
19. Ki byenfe nou kapab gannyen si nou pran oserye nou letid personnel?
19 Pol ti ekrir: “Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.” Si nou pran aker bann parol ki Pol ti ekrir Timote, nou kapab ranforsi nou prop spirityalite e fer nou minister vin pli efikas. Bann ansyen ek asistan ministeryel i kapab anmenn ankor plis byenfe dan kongregasyon, e nou tou nou kapab reste solid dan lafwa.—2 Timote 3:16, 17; Matye 7:24-27.
[Not anba lo paz]
^ par. 4 Normalman, en dimoun ki enterese pou konmans par etidye brosir Ekspekte, apre i pou etidye liv Konnesans Ki Anmenn ver Lavi Eternel. Tou le de in ganny pibliye par Temwen Zeova. Letan ou fer sa, i pou ede elimin bann lobstak ki kapab anpes progre spirityel sa etidyan.
^ par. 9 Pibliye par Temwen Zeova. Bann ki annan Étude perspicace des Écritures dan zot langaz i kapab konsilte Volim 1, anba tit “Jéhovah.”
^ par. 9 Plizyer tradiksyon dan langaz Espanyol ek Katalan i bann eksepsyon remarkab dan lafason ki zot in tradwir sa kat let ki form non Bondye, an servan “Yavé,” “Yahveh,” “Jahvè,” ek “Jehová.”
^ par. 11 Pibliye par Temwen Zeova.
Eski ou mazinen?
• Ki bann kondisyon ki kontribye pour en letid personnel efikas?
• Ki fot plizyer tradiksyon Labib in fer konsernan non Bondye?
• Ki bann teks Labib ou pou servi pour prouve ki lansennyman Trinite i fo?
• Ki nou bezwen fer pour protez nou kont bann riz Satan, menm si nou’n en vre Kretyen pour plizyer lannen?
[Kestyon]
[Portre lo paz 25]
Pour letid personnel efikas, ou bezwen en bon landrwa avek mwens distraksyon
[Portre lo paz 29]
Eski ou “lepe” i koupe oubyen i grat?