“Apros Avek Bondye”
“Apros Avek Bondye”
“Apros avek Bondye, e i ava apros avek zot.”—ZAK 4:8.
1, 2. (a) Ki deklarasyon dimoun i fer souvannfwa? (b) Ki konsey Zak ti donnen, e akoz sa ti neseser?
“BONDYE i avek nou.” Sa parol in vin konman en dekorasyon lo bann lanblenm nasyonal e menm lo liniform bann solda. “Nou met nou konfyans dan Bondye” in ganny grave lo plizyer kalen ek biye. Souvan dimoun i dir ki zot annan en relasyon pros avek Bondye. Pa ou pou dakor ki pour annan en tel relasyon i demann bokou plis ki zis koz lo la oubyen ekrir bann slogan lo la?
2 Labib i montre ki i posib pour nou annan en relasyon avek Bondye. Me nou bezwen fer zefor. Menm serten Kretyen swazir dan premye syek ti bezwen fortifye zot relasyon avek Zeova. Zak ki ti en sirveyan Kretyen, ti bezwen averti zot akoz zot ti annan bann move tandans e zot ti pe vin enpir spirityelman. I ti donn zot sa konsey pwisan: “Apros avek Bondye, e i ava apros avek zot.” (Zak 4:1-12) Ki Zak ti oule dir par sa lekspresyon “apros avek” Bondye?
3, 4. (a) Ki sa lekspresyon “apros avek Bondye” ti’n kapab fer serten dan premye syek rapel? (b) Akoz nou kapab asire ki i posib pour nou apros avek Bondye?
3 Zak ti servi en lekspresyon ki laplipar son lodyans ti pou familye avek. Lalwa ki ti’n ganny donnen atraver Moiz ti presize konman bann pret i kapab “vin pros avek,” oubyen apros Zeova delapar lepep. (Egzod 19:22) Alors, Zak ti kapab pe rapel son lodyans ki zot pa devret pran zot relasyon avek Zeova alalezer. Zeova i posed pli gran lotorite dan liniver.
4 De lot kote, parey en spesyalis Labib i fer remarke, “sa konsey [dan Zak 4:8] i donn en gran lespwar.” Zak ti konnen ki Zeova in touzour envit bann imen enparfe pour apros avek Li. (2 Kronik 15:2) Sakrifis Zezi in ouver semen pour nou apros avek Zeova pli plennman. (Efezyen 3:11, 12) Ozordi, plizyer milyon dimoun in ganny sa loportinite pour apros avek Bondye! Me ki nou kapab fer pour byen servi sa loportinite merveye? An bref, nou pou vwar trwa mwayen ki nou kapab apros avek Zeova.
Kontinyen “konn” Bondye
5, 6. Ki mannyer legzanp Samyel i montre kwa ki enplike dan “konn” Bondye?
5 Dapre Zan 17:3, Zezi ti dir: “Savedir ki zot konn ou konman sel vre Bondye, ek Zezi-Kri ki ou’n anvoye.” Ki Zezi ti oule dir vreman letan i ti mansyonn “konn” Bondye? Plizyer spesyalis in fer remarke ki sa mo ki’n ganny tradwir “konn” ti annan en definisyon pli profon dan son langaz orizinal. I ti enplik en prosedir kontinyel, en prosedir ki kapab menm anmenn ver en relasyon entim avek kanmarad.
6 Dan letan Zezi, sa lide pour konn Bondye byen pa ti nouvo. Par egzanp dan Lekritir Ebre, nou lir ki kan Samyel ti ankor en pti garson, i “pa ti ankor konn Zeova.” (1 Samyel 3:7) Eski sa i vedir ki Samyel pa ti konn preski nanryen lo Bondye? Non. Son paran ensi ki bann pret ti’n bezwen ansenny li en bon pe lo Zeova. Parkont, dapre en spesyalis, sa mo Ebre ki’n ganny servi dan sa verse i kapab “ganny servi pour en relasyon tre entim.” Samyel pa ti ankor arive konn Zeova byen, parey i ti pou konnen plitar letan i ti pou vin portparol Zeova. Ofiramezir ki Samyel ti kontinyen grandi, i ti arive konn Zeova e devlop en relasyon tre entim avek li.—1 Samyel 3:19, 20.
7, 8. (a) Akoz nou pa devret santi nou dekouraze par bann lansennyman Labib ki pli profon? (b) Ki serten laverite profon dan Parol Bondye ki ti a byen nou etidye?
7 Eski ou pe aprann konn Zeova afen ki ou a kapab vin tre pros avek li? Pour fer sa, ou bezwen “kontan” sa nouritir spirityel ki Bondye i fourni. (1 Pyer 2:2) Pa kontant ou avek bann lansennyman debaz. Fer zefor pour etidye en pe bann lansennyman Labib ki pli profon. (Ebre 5:12-14) Eski ou dekouraze akoz ou krwar ki sa bann lansennyman i tro difisil pour ou? Si wi, mazinen ki Zeova i sa “Gran Enstrikter.” (Izai 30:20) I konnen konman pour transmet bann laverite profon dan lespri bann imen enparfe. Alors, i kapab beni zefor senser ki ou fer pour konpran sa ki i pe ansenny ou.—Psonm 25:4.
8 Akoz ou pa egzamin ou lekor an rapor avek bann lansennyman profon Bondye? (1 Korentyen 2:10) Zot pa bann topik annwiyan, parey bann sef relizye oubyen bann ki etidye larelizyon i kapab argimant lo la. Zot bann doktrin vivan ki ansenny nou bann keksoz tre enteresan konsernan nou Papa lanmour. Par egzanp, i annan topik lo ranson, ‘sen sekre,’ ek plizyer lalyans ki Zeova in servi pour beni son pep e akonpli son plan. I en plezir e i vo lapenn etidye ensi ki fer resers lo sa bann topik ek bokou lezot topik parey.—1 Korentyen 2:7.
9, 10. (a) Akoz lorgey i danzere, e kwa ki pou ed nou pour evit li? (b) An sa ki konsern konnesans Zeova, akoz nou devret sey nou mye pour abes nou?
9 Anmezir ki ou konnesans lo bann lansennyman Labib i aprofondi, fer atansyon lorgey. Lorgey i en latitid danzere ki kapab vin avek konnesans. (1 Korentyen 8:1) I danzere akoz i elwanny nou avek Bondye. (Proverb 16:5; Zak 4:6) Mazinen personn napa rezon pour vant son lekor akoz son konnesans. Par egzanp, get sa parol ki sorti dan lentrodiksyon en liv ki evalye bann progre pli resan ki zonm in fer dan domenn syantifik: “Pli nou arive konnen, pli nou realize ki nou pa konn preski nanryen. . . . Tou sa ki nou’n aprann pa nanryen konpare avek sa ki nou ankor annan pour aprann.” I en plezir pour vwar en tel limilite. Konsernan pli gran konnesans, setadir konnesans Zeova, nou annan tou rezon pour abes nou. Akoz?
10 Remark sa bann deklarasyon ki Labib i fer lo Zeova. “Ou bann panse i tre profon.” (Psonm 92:5) ‘Personn pa kapab konpran lentelizans Zeova.’ (Psonm 147:5) ‘Nou pa kapab arive konpran lentelizans [Zeova].’ (Izai 40:28) “Larises Bondye i vreman gran, son konnesans ek son lasazes i vreman profon.” (Romen 11:33) I kler ki nou pa pou zanmen arive konn tou sa ki i annan pour konnen lo Zeova. (Eklezyast 3:11) I’n ansenny nou bokou keksoz merveye. Toudmenm, nou pou toultan annan ankor bokou pour aprann. Pa sa i fer nou kontan e anmenmtan i abes nou? Alors, anmezir ki nou aprann annou touzour servi nou konnesans konman en mwayen pour apros avek Zeova e ed lezot pour fer parey. Pa zanmen servi li konman en mwayen pour lev nou parlao lezot.—Matye 23:12; Lik 9:48.
Eksprim ou Lanmour pour Zeova
11, 12. (a) Konman konnesans lo Zeova i devret enfliyans nou? (b) Kwa ki determinen si lanmour ki en dimoun i annan pour Bondye i vre?
11 Dan en fason apropriye, zapot Pol ti relye konnesans avek lanmour. I ti ekrir: “Mon demande dan mon lapriyer ki zot lanmour i ogmante e vin plis ankor, avek en vre konnesans ek en zizman parfe.” (Filipyen 1:9) Sak laverite presye ki nou aprann lo Zeova ek son plan, i devret ogmant nou lanmour pour nou Papa seles olye fer nou gonfle avek lorgey.
12 Byensir, bokou dimoun ki dir zot kontan Bondye pa vreman kontan li. I vre ki zot kapab annan serten santiman profon dan zot leker. Sa i en bon keksoz. I menm en keksoz admirab kan i an akor avek konnesans egzakt. Me i pa sa vre lanmour pour Bondye. Akoz? Remarke konman Parol Bondye i dekrir vre lanmour: “La lanmour Bondye: ki nou obei son konmannman.” (1 Zan 5:3) Alor, vre lanmour pour Zeova i ganny eksprimen par lobeisans.
13. Ki mannyer lakrent pour Bondye i ed nou pour demontre lanmour pour li?
13 Lakrent pour Bondye pou ed nou pour obeir li. Se kan nou aprann konn Zeova ki nou resanti sa profon respe ek ladmirasyon pour li. Nou aprann konsernan son bann kalite ki san limit tel konman sentete, laglwar, pwisans, lazistis, lasazes, ek lanmour. En tel lakrent i vreman esansyel pour nou apros avek Bondye. Anfet, remarke ki Psonm 25:14 i dir: “Bann ki annan lakrent pour Zeova i annan en relasyon entim avek li.” Alors, si nou per pangar nou depler nou Papa byenneme, sa pou fer nou vin pli pros avek li. Lakrent pour Bondye pou ed nou pour ekout sa bon konsey ki’n ganny rikorde dan Proverb 3:6: “Dan tou ou semen pran li an konsiderasyon, e li i pou fer drwat tou ou santye.” Ki sa i vedir?
14, 15. (a) Nonm serten desizyon ki nou bezwen fer toulezour. (b) Ki mannyer nou kapab fer bann desizyon ki montre nou annan lakrent pour Bondye?
14 Toulezour ou bezwen fer serten desizyon, ki swa i bann gro desizyon oubyen bann pti desizyon. Par egzanp, ki kalite konversasyon ou pou fer avek ou koleg travay, ou kanmarad lekol, oubyen ou vwazen? (Lik 6:45) Eski ou pou donn tou ou zefor dan sa travay ki ou’n gannyen oubyen ou pou zis depese pour fini li? (Kolosyen 3:23) Eski ou pou vin pli pros avek bann dimoun ki napa preski ditou lanmour pour Zeova, oubyen ou pou sey annan en pli bon relasyon avek bann dimoun ki enterese avek keksoz spirityel? (Proverb 13:20) Ki ou pou fer pour promot lentere Rwayonm Bondye, menm dan bann pti fason? (Matye 6:33) Si sa bann prensip Labib ki’n ganny site la i gid ou letan ou fer bann desizyon toulezour, alors ou pou pe vreman pran Zeova an konsiderasyon “dan tou ou semen.”
15 Anfet, sak fwa ki nou pe fer en desizyon, nou devret les nou ganny gide par sa panse: ‘Ki Zeova i anvi mon fer? Kwa ki pou pli fer li plezir?’ (Proverb 27:11) Montre lakrent pour Zeova dan sa fason i en tre bon mwayen pour eksprim nou lanmour pour li. Lakrent pour Bondye i osi motiv nou pour reste prop spirityelman, moralman, e fizikman. Mazinen ki dan sa menm verse ki Zak ti demann bann Kretyen pour “apros avek Bondye,” i ti osi donn sa konsey: “Lav zot lanmen, zot ki komet pese, e pirifye zot leker.”—Zak 4:8.
16. Letan nou donn Zeova sa ki nou annan, ki nou pa pe fer? Me ki nou kapab touzour reisi fer?
16 Byensir, eksprim nou lanmour pour Zeova i pa vedir zis evite fer sa ki mal. Lanmour i osi pous nou pour fer sa ki byen. Par egzanp, konman nou reazir anver gran zenerozite Zeova? Zak ti ekrir: “Tou don ekselan, tou kado parfe i sorti lao, kot Bondye, Papa tou lalimyer.” (Zak 1:17) I vre, kan nou donn Zeova sa ki nou annan, nou pa pe anrisir li. I deza annan tou keksoz ek resours. (Psonm 50:12) Kan nou donn Zeova nou letan ek lenerzi, nou pa pe rann li en servis ki li menm i pa ti a kapab fer. Menm si nou ti pou refize pres sa bon nouvel lo Rwayonm Bondye, i ti kapab fer bann ros fer li! Alors, akoz nou donn Zeova nou resours, letan, ek lenerzi? Premyerman, nou fer li akoz sa i en mwayen pour nou eksprim nou lanmour pour li avek tou nou leker, nanm, lespri, ek lafors.—Mark 12:29, 30.
17. Kwa ki kapab motiv nou pour donn avek lazwa?
17 Kan nou donn Zeova, nou devret kontan pour fer li, “parski Bondye i kontan sa ki donn avek lazwa.” (2 Korentyen 9:7) Sa prensip dan Deterononm 16:17 i kapab ed nou pour donn avek lazwa: “Kado ki sakenn ant nou i donnen i devret dapre benediksyon ki Zeova ou Bondye in donn ou.” Letan nou mazinen ki kantite zenere Zeova in montre li anver nou, nou anvi donn li san ezitasyon. Letan nou donn dan sa fason, sa i fer li kontan zis parey en paran i kontan letan son zanfan i donn li en pti kado. Eksprim nou lanmour dan sa fason i ed nou pour apros avek Zeova.
Apros pli pre avek Zeova atraver Lapriyer
18. Akoz i vo lapenn pour nou reflesir lo konman nou kapab amelyor kalite nou lapriyer?
18 Nou lapriyer personnel i en moman kot nou ganny en bon loportinite pour koz avek nou Papa seles lo nou bann santiman personnel. (Filipyen 4:6) Lapriyer i en fason pour nou apros avek Bondye. Alors, i vo lapenn reflesir lo kalite nou lapriyer. Sa pa vedir ki nou bezwen servi bann zoli mo dan en fason byen organize letan nou pe priye. Nou senpleman bezwen eksprim senserman sa ki annan dan nou leker. Ki mannyer nou kapab amelyor kalite nou lapriyer?
19, 20. Akoz nou medite avan nou priye? Ki bann size apropriye ki nou kapab medit lo la?
19 Nou kapab esey medite avan nou priye. Si nou medite avan nou priye, nou kapab fer en lapriyer ki presi e fer sans. Alors, nou a evite repet bann fraz ki nou abitye dir e ki vin fasilman dan nou lespri. (Proverb 15:28, 29) En keksoz ki kapab ed nou se mazin en pe bann tenm ki Zezi ti mansyonnen dan son model lapriyer e apre vwar konman ki zot relye avek nou prop sirkonstans. (Matye 6:9-13) Par egzanp, nou kapab demann nou lekor ki rol nou ti a kontan zwe pour akonpli lavolonte Zeova isi lo later. Petet nou kapab eksprim nou dezir pour les li servi nou otan posib e demann li led pour akonpli nenport latas ki i donn nou. Eski nou trakas en kantite lo bann keksoz materyel? Ki bann pese ki nou’n fer ki nou bezwen demann pardon? Lo nou kote, ki sennla ki nou bezwen pli pare pour pardonnen? Ki bann tantasyon ki pe fatig nou? Eski nou realize ki nou bezwen proteksyon Zeova oplivit posib dan sa domenn?
20 Anplis ki sa, nou kapab mazin serten dimoun ki nou konnen ki sirtou bezwen led Zeova. (2 Korentyen 1:11) De lot kote, pa oubliye ki nou bezwen remersye Zeova osi. Si nou reflesir, nou pou trouv plizyer rezon pour remersye Zeova e loue li sak zour pour son gran labonte. (Deterononm 8:10; Lik 10:21) Letan nou fer sa, nou ganny en lot byenfe. I fer nou devlop en latitid pli pozitif e pli rekonesan dan lavi.
21. Ki bann legzanp ki nou kapab etidye dan Labib kan nou apros Zeova dan lapriyer?
21 Letid i kapab amelyor nou lapriyer osi. Dan Parol Bondye, i annan bann lapriyer remarkab fer par bann zonm ek fanm fidel. Par egzanp, si nou bezwen fer fas avek en sitiasyon difisil e sa pe trakas nou. I pe menm fer nou enkyet pour nou byennet oubyen byennet bann ki nou pros avek. Dan sa ka, nou kapab lir sa lapriyer ki Zakob ti fer letan i ti pe al rankontre son frer Ezai, ki ti oule revanz avek li. (Zenez 32:9-12) Oubyen nou kapab lir lapriyer ki Lerwa Aza ti fer letan apepre en milyon larme Etyopyen ti menas pep Bondye. (2 Kronik 14:11, 12) Eski nou pe pran traka lo en problenm ki kapab anmenn repros lo non Zeova? Alors i ti a byen nou reflesir lo lapriyer Eliya ki i ti fer devan bann adorater Baal lo montanny Karmel. Lapriyer Neemya konsernan kondisyon deplorab Zerizalenm i en lot ki nou kapab egzaminen. (1 Lerwa 18:36, 37; Neemya 1:4-11) Letan nou lir e medit lo bann lapriyer koumsa, i kapab fortifye nou lafwa. I osi donn nou lide konman nou kapab pli byen apros Zeova konsernan bann traka ki pe fatig nou.
22. Ki nou teks pour lannen 2003? Ki nou kapab demann nou lekor detanzaot pandan sa lannen?
22 Vreman, napa pli gran loner, pli bon lobzektif, ki swiv konsey Zak pour “apros avek Bondye.” (Zak 4:8) Annou fer sa par aprofondi nou konnesans lo Bondye, rode konman nou kapab eksprim lanmour pour li plis ankor, e devlop en relasyon entim avek li dan nou lapriyer. Pandan lannen 2003, annou gard antet nou teks pour lannen, Zak 4:8. Anmenmtan, kontinyen egzamin nou lekor pour vwar si nou pe apros avek Bondye. Aprezan nou pou konsantre lo lot bout sa verse. Dan ki sans Zeova pou “apros avek zot,” e ki benediksyon sa pou anmennen? Lartik swivan pou diskit sa size.
Eski ou rapel?
• Akoz nou bezwen pran oserye sa konsey pour apros avek Bondye?
• Ki serten lobzektif nou kapab etabli pour konn Zeova pli byen?
• Ki mannyer nou kapab demontre ki nou annan vre lanmour pour Zeova?
• Dan ki fason nou kapab vin pli pros avek Zeova atraver lapriyer?
[Kestyon]
[Ekstre lo paz 12]
Teks pour lannen 2003 pou: “Apros avek Bondye, e i ava apros avek zot.” —Zak 4:8.
[Portre lo paz 9]
Anmezir ki i ti grandi, Samyel ti arive konn Zeova pli byen
[Portre lo paz 12]
Sa lapriyer ki Eliya ti fer lo montanny Karmel i en bon legzanp pour nou