“I Ava Apros Avek Zot”

“[Bondye] pa lwen avek sakenn parmi nou.”—AKT 17:27.

1, 2. (a) Kan nou get en lesyel ranpli avek zetwal, ki kestyon nou kapab demande konsernan Kreater? (b) Konman Labib i asir nou ki imen i annan valer dan lizye Zeova?

ESKI ou’n deza santi ou emerveye par sa kantite zetwal ki annan dan lesyel aswar ler napa nyaz? Zis sa kantite zetwal ek grander lesyel i enspir dan nou en gran ladmirasyon. Later i zis en pti pwen dan sa liniver imans. Eski sa i vedir ki nou Kreater, “ki Tre O lo tou later,” i tro siperyer pour enterese avek bann imen? Oubyen eski i tro lwen avek zot ki zot pa kapab trouv li?—Psonm 83:18.

² Labib i asir nou ki bann imen i annan valer dan lizye Zeova. Anfet, Parol Bondye i ankouraz nou pour rod li, an dizan: “I pa lwen avek sakenn parmi nou.” (Akt 17:27; 1 Kronik 28:9) Vreman, si nou pran bann pa pour apros avek Bondye, i pa pou inyor nou bann zefor. Konman? Nou teks pour lannen 2003 i donn sa larepons rekonfortan: “I ava apros avek zot.” (Zak 4:8) Annou diskit serten benediksyon merveye ki Zeova i vers lo bann ki pros avek li.

En Kado sorti spesyalman kot Zeova

3. Ki kado Zeova i donn bann ki apros avek li?

³ Premyerman, Zeova in rezerv en kado presye pour son pep. Napa okenn pouvwar, larises, ek ledikasyon dan sa lemonn ki kapab ofer sa kado. I en kado spesyal, enn ki Zeova i donn zis bann ki pros avek li. Lekel sa kado? Parol Bondye i reponn: “Si . . . ou fer rezonnen ou lavwa pour ganny disernman li menm, si ou kontinyen rod li konmsi larzan, e ou kontinyen resers li konmsi ou pe resers en trezor kasyet, dan sa ka, ou pou konpran lakrent Zeova, e ou pou trouv konnesans Bondye. Parski Zeova li menm i donn lasazes.” (Proverb 2:3-6) Mazin bann imen enparfe pe kapab trouv “konnesans Bondye”! Sa kado se konnesans dan Parol Bondye. I ganny konpare avek “trezor kasyet.” Akoz?

4, 5. Akoz “konnesans Bondye” i kapab ganny konpare avek “trezor kasyet”? Donn en legzanp.

 ⁴ Premyerman, konnesans Bondye i annan en gran valer. Enn son rekonpans pli presye i lespwar pour viv pour touzour. (Zan 17:3) Me sa konnesans i anrisir nou lavi depi konmela menm. Par egzanp, nou letid lo Parol Bondye in fer nou konn larepons pour bann kestyon enportan parey: Lekel non Bondye? (Psonm 83:18) Ki i arive vreman avek en dimoun apre ki i’n mor? (Eklezyast 9:5, 10) Ki lavolonte Bondye pour later ek bann imen? (Izai 45:18) Nou’n osi arive konn pli bon fason viv. Sa i par aplik bann bon konsey dan Labib. (Izai 30:20, 21; 48:17, 18) Par egzanp, nou annan bon gidans ki ed nou pour fer fas avek bann traka lavi e pour viv en lavi ki anmenn boner ek satisfaksyon. Pli enportan ankor, nou letid lo Parol Bondye in ed nou pour konn bann kalite merveye Zeova e pour apros avek li. Eski i annan okenn keksoz pli presye ki annan en relasyon entim avek Zeova baze lo “konnesans Bondye”?

⁵ I annan en lot rezon akoz konnesans Bondye i kapab ganny konpare avek “trezor kasyet.” Parey bokou trezor, sa konnesans i ase rar dan sa lemonn. Zis sis milyon adorater Zeova dan sa sis bilyon dimoun ki viv lo later, oubyen 1 dan 1,000, ki’n trouv “konnesans Bondye.” Pour montre konman ki i rar pour konn laverite dan Parol Bondye, annou get zis en kestyon Labib: Ki i arive avek en dimoun apre ki i’n mor? Nou konnen ki Labib i dir ki kan nou mor napa nanryen ki kit nou pour al viv en lot landrwa. Bann dimoun mor pa konsyan nanryen. (Ezekyel 18:4) Pourtan, laplipar larelizyon i aksepte sa fo krwayans ki en keksoz anndan nou i kontinyen viv apre lanmor. Sa i en krwayans ki bann larelizyon Kretyente i annan an komen. I osi ganny aksepte dan larelizyon Boudis, Endou, Islanm, Sikism, Sinto, Taoism, ek Zidaism. Zis mazinen, plizyer bilyon dimoun in ganny anbete par sa fo doktrin!

6, 7. (a) Lekel selman ki kapab trouv “konnesans Bondye”? (b) Ki legzanp ki montre ki Zeova in beni nou par donn nou en konprenezon ki bokou “dimoun malen e entelizan” napa?

⁶ Akoz napa plis dimoun ki’n trouv “konnesans Bondye”? Sa se akoz en dimoun pa kapab konpran byen Parol Bondye san Son led. Mazinen ki sa konnesans i en kado. Zeova i donn li avek zis bann ki anvi rod son Parol avek senserite ek limilite. Sa bann dimoun pa neseserman pli entelizan dan lemonn. (1 Korentyen 1:26) Bokou zot i kapab menm ganny konsidere konman bann dimoun “senp san gran ledikasyon” dapre standar sa lemonn. (Akt 4:13) Me sa pa enportan. Zeova i donn nou son “konnesans” konman en rekonpans akoz i vwar bann bon kalite dan nou leker.

⁷ Annou vwar en legzanp. Bokou spesyalis dan bann larelizyon Kretyen in ekrir bann gro gro liv lo Labib. Sa bann liv referans i kapab eksplik konteks istorik, definisyon bann mo Ebre ek Grek, e lezot ankor. Avek tou sa ledikasyon ki zot annan, eski sa bann spesyalis in vreman trouv “konnesans Bondye”? Par egzanp, eski zot konpran byen tenm Labib, setadir zistifikasyon drwa Zeova pour dirize par mwayen son Rwayonm seles? Eski zot konnen ki Zeova, Zezi, ek lespri sen pa en sel? Nou nou annan en bon konprenezon lo sa size. Akoz? Zeova in fer nou byen konpran bann laverite biblik ki bokou “dimoun malen  e entelizan” pa arive konpran. (Matye 11:25) Pa Zeova i rekonpans bann ki pros avek li!

“Zeova pe protez  tou sa bann ki kontan li”

8, 9. (a) Ki mannyer David ti dekrir en lot benediksyon pour bann ki pros avek Zeova? (b) Akoz bann vre Kretyen i bezwen proteksyon Bondye?

⁸ Bann ki pros avek Zeova i rezwir en lot benediksyon. Sa i Son proteksyon. Psalmis David, ki ti pas atraver bokou difikilte ek problenm, ti ekrir: “Zeova i pre avek tou bann ki envok li, tou bann ki envok li avek fidelite. I pou akonpli dezir bann ki annan lakrent pour li, e i pou tann zot lapel pour led. I pou sov zot. Zeova pe protez tou sa bann ki kontan li.” (Psonm 145:18-20) Wi, Zeova i pre avek tou bann ki kontan li. Alors i kapab vitman reponn zot lapel pour led.

⁹ Akoz nou bezwen proteksyon Bondye? Vi ki nou pe viv dan “letan kritik e difisil pour siporte,” nou osi nou ganny afekte. Deplis, lennmi prensipal Zeova, Satan, pe sirtou target bann vre Kretyen. (2 Timote 3:1) Sa lennmi rize i determinen pour ‘devor’ nou. (1 Pyer 5:8) Satan i persekit nou, i met presyon lo nou, e i tant nou. I osi rod bann move latitid dan nou ki i kapab eksplwate. I annan en lobzektif antet: pour afebli nou lafwa e detri nou spirityalite. (Revelasyon 12:12, 17) Vi ki nou bezwen fer fas avek en lennmi ki vreman for, eski pa i rekonfort nou pour konnen ki “Zeova pe protez tou sa bann ki kontan li”?

10. (a) Konman ki Zeova i protez son pep? (b) Ki kalite proteksyon ki pli enportan e akoz?

¹⁰ Me ki mannyer Zeova i protez son pep? Pa akoz i’n promet nou son proteksyon ki nou pa pou rankontre ditou problenm dan sa lemonn. I pa vedir osi ki Zeova i oblize fer mirak pour nou. Toudmenm, Zeova i fourni proteksyon fizik pour son pep konman en group. Apre tou, i pa pou zanmen permet Dyab elimin son bann vre serviter lo later! (2 Pyer 2:9) Pli enportan ankor, Zeova i protez nou spirityelman. I ekip nou avek sa ki nou bezwen pour andir bann leprev e pour protez nou relasyon avek li. Alafendizour, proteksyon spirityel i proteksyon pli enportan. Akoz? Osi lontan ki nou annan nou relasyon avek Zeova, napa nanryen, ni menm lanmor, ki pou kapab fer nou ditor pour touzour.—Matye 10:28.

11. Ki bann laranzman Zeova in fer pour protez son pep spirityelman?

¹¹ Zeova in fer bokou laranzman pour protez bann ki pros avek li spirityelman. Atraver son Parol, Labib, i donn nou lasazes pour fer fas avek diferan leprev. (Zak 1:2-5) Letan nou aplik bann konsey pratik i konman en proteksyon dan li menm. Deplis, Zeova i donn “Lespri Sen tou bann ki demann li.” (Lik 11:13) Sa lespri i lafors pli pwisan dan liniver. Alors i kapab ekip nou pour fer fas avek nenport leprev oubyen tantasyon ki nou rankontre. Atraver Kris, Zeova in fourni bann “kado zonm.” (Efezyen 4:8) Sa bann zonm i kalifye spirityelman. Zot sey zot mye pour reflekte gran konpasyon Zeova letan zot ed zot bann konpanyon Kretyen.—Zak 5:14, 15.

12, 13. (a) Konman Zeova i fourni nou nouritir spirityel kan i ler? (b) Ki mannyer ou santi konsernan laranzman ki Zeova in fer pour nou byennet spirityel?

 ¹² Zeova i fourni en lot keksoz pour protez nou: nouritir spirityel kan i ler. (Matye 24:45) Atraver bann piblikasyon, ki enkli magazin Latour Veyer ek Réveillez-vous!, Zeova i fourni nou sa ki nou bezwen kan nou bezwen li. I osi fer sa atraver bann renyon ek lasanble. Eski ou rapel en zour ki ou ti tann en keksoz dan renyon oubyen dan lasanble ki ti tous ou, fortifye ou, oubyen rekonfort ou? Eski ou’n deza lir en lartik dan en Latour Veyer oubyen en Réveillez-vous! e santi ki sa in ganny ekrir pour ou?

¹³ Enn bann zouti ki Satan i servi byen se dekourazman, e nou pa ganny eparnyen avek son lefe. I konn byen ki si nou kontinyen dekouraze, sa i kapab pran nou lafors. I menm kapab fer nou napa kouraz pour defann nou lekor. (Proverb 24:10) Vi ki Satan pe sey profit lo nou bann santiman negatif, alors nou bezwen led. Parfwa, magazin Latour Veyer ek Réveillez-vous! i pibliy bann lartik ki ed nou pour konbat dekourazman. En ser Kretyen ti ekrir konsernan enn sa bann lartik: “Mon lir sa lartik preski toulezour, e larm i ankor touzour vini dan mon lizye sak fwa mon lir li. Mon kit li obor mon lili pour mon kapab lir li sak fwa mon santi mwan dekouraze. Sa bann lartik koumsa i fer mwan santi lanmen Zeova otour mwan pe protez mwan.” * Eski nou pa rekonesan anver Zeova pour fourni nou nouritir spirityel kan i ler? Mazinen ki laranzman ki i’n fer pour nou byennet spirityel i montre ki i pros avek nou e ki i pe donn nou son proteksyon.

Akse avek sa Enn “ki ekout Lapriyer”

14, 15. (a) Ki benediksyon ki Zeova i donn bann ki pros avek li? (b) Akoz i vreman en privilez remarkab pour kapab koz avek Zeova nenport ler dan lapriyer?

¹⁴ Eski ou’n deza remarke ki pli en dimoun i ganny plis pouvwar ek lotorite, pli i vin difisil pour ganny akse avek li? Me eski sa i leka avek Zeova? Eski i tro lwen avek nou pour li enterese avek sa ki bann senp imen i annan pour dir li? Okontrer, lapriyer i en lot benediksyon ki Zeova i donn bann ki pros avek li. I vreman en privilez remarkab pour koz avek sa Enn “ki ekout lapriyer,” nenport ler ki nou anvi. (Psonm 65:2) Akoz?

¹⁵ Annou pran en legzanp. Manedyer en gran lakonpanni i annan en kantite responsabilite. I deside kwa ki i pou fer li menm e kwa ki i pou donn lezot pour fer. Pareyman, Dirizan pli o dan liniver i swazir kwa ki i pou fer li menm e kwa ki i pou donn lezot pour fer. Mazin tou sa ki Zeova in donn Zezi son Garson byenneme pour fer. I’n donn son Garson “drwa pour zize.” (Zan 5:27) Bann lanz “in ganny soumet avek li.” (1 Pyer 3:22) Zeova in donn li son lespri sen pwisan pour ed  li gid son bann disip lo later. (Zan 15:26; 16:7) Alors Zezi ti kapab dir: “Mon’n ganny tou pouvwar dan lesyel ek lo later.” (Matye 28:18) Pourtan, an sa ki konsern lapriyer, Zeova in deside pour enplik li personnelman. Se pour sa ki Labib i demann nou pour adres nou lapriyer zis avek Zeova, onon Zezi.—Psonm 69:13; Zan 14:6, 13.

16. Akoz nou kapab annan konfyans ki Zeova i vreman ekout nou lapriyer?

¹⁶ Eski Zeova i vreman ekout nou lapriyer? Si i pa ti enterese, i pa ti pou zanmen ensiste ki nou “priye tou letan” oubyen larg nou fardo ek traka lo li. (Romen 12:12; Psonm 55:22; 1 Pyer 5:7) Bann serviter fidel dan lepase ti annan konfyans total ki Zeova i ekout zot lapriyer. (1 Zan 5:14) Se pour sa ki psalmis David ti dir: “[Zeova] i antann mon lavwa.” (Psonm 55:17) Nou osi nou annan tou rezon pour krwar ki Zeova i pros avek nou e pare pour ekout tou sa ki nou annan pour dir e osi nou traka.

Zeova i rekonpans Son bann Serviter

17, 18. (a) Ki mannyer Zeova i santi anver servis fidel ki son bann kreatir entelizan i ofer li? (b) Eksplike konman Proverb 19:17 i montre ki Zeova i remark nou bann bon aksyon.

¹⁷ Vi ki Zeova i pli o dan liniver, sa ki bann senp imen pa fer oubyen refize pour fer pa afekte li. Parkont, Zeova i en Bondye ki montre lapresyasyon. I apresye e menm pran plezir dan bann servis fidel ki son bann kreatir entelizan i rann li. (Psonm 147:11) Alors, sa i en lot byenfe ki bann ki pros avek Zeova i gannyen: I rekonpans son bann serviter.—Ebre 11:6.

¹⁸ Labib i montre klerman ki Zeova i apresye sa ki son bann adorater i fer. Par egzanp, nou lir: “Sa ki pe rann servis bann ki pov, pe pret Zeova, e I pou rekonpans li pour son bon aksyon.” (Proverb 19:17) Konsiderasyon ki Zeova i annan pour bann ki pov ti ganny reflekte dan Lalwa Mozaik. (Levitik 14:21;  19:15) Ki mannyer Zeova i santi kan nou imit son mizerikord dan lafason ki nou tret bann ki dan bezwen? Kan nou donn bann ki dan bezwen, e pa ekspekte nanryen an retour, Zeova i vwar sa konman en lón ki’n ganny fer avek Li. I promet ki i pou repey sa det par son laprouvasyon ek benediksyon. (Proverb 10:22; Matye 6:3, 4; Lik 14:12-14) Wi, kan nou montre konpasyon anver en konpanyon Kretyen ki dan bezwen, sa i tous Zeova. Konman nou rekonesan pour konnen ki nou Papa seles i remark nou bann bon aksyon!—Matye 5:7.

19. (a) Akoz nou kapab asire ki Zeova i apresye zefor ki nou fer pour prese e fer disip? (b) Konman Zeova i rekonpans sa ki nou fer pour soutenir son Rwayonm?

¹⁹ Zeova i sirtou apresye sa ki nou fer dan zentere son Rwayonm. Kan nou apros avek Zeova, i normal pour nou anvi servi nou letan, lenerzi, ek resours pour partisip otan posib dan predikasyon e fer disip. (Matye 28:19, 20) Parfwa, nou kapab ganny sa santiman ki nou pa pe fer bokou. Nou lenperfeksyon i kapab menm fer nou demann nou lekor si Zeova i satisfe avek nou bann zefor. (1 Zan 3:19, 20) Me Zeova i seri tou kado ki sorti dan en leker ki motive avek lanmour menm si sa kado i kapab tre pti. (Mark 12:41-44) Labib i asir nou: “Bondye pa enzis pour oubliy travay ki zot in fer, ni lanmour ki zot in montre pour li.” (Ebre 6:10) Anfet, Zeova i mazin e rekonpans menm pli pti servis ki nou rann pour soutenir son Rwayonm. Apard ki sa bann benediksyon spirityel ki nou pe gannyen an abondans, nou esper avek enpasyans lazwa ki lavi dan nouvo lemonn pou anmennen. Sa letan, Zeova pou ouver son lanmen e satisfer dezir tou bann ki pros avek li!—Psonm 145:16; 2 Pyer 3:13.

20. Pandan lannen 2003, ki mannyer nou kapab mazin nou teks pour lannen, e avek ki rezilta?

²⁰ Pandan lannen servis 2003, annou demann nou lekor si nou pe konstaman fer zefor pour apros avek nou Papa seles. Si nou pe fer li, nou kapab asire ki i pou reazir parey i’n promet. Apre tou, “Bondye . . . pa zanmen manti.” (Tit 1:2) Si ou apros avek li, i pou apros avek ou. (Zak 4:8) Avek ki rezilta? Nou pou ganny bokou benediksyon depi konmela ek loportinite pour vin pli pre avek Zeova tou dilon nou lavi.

[Not anba lo paz]

Eski ou rapel?

• Ki kado Zeova i donn bann ki pros avek li?

• Ki bann laranzman Zeova i fer pour protez son pep lo plan spirityel?

• Akoz i vreman en privilez remarkab pour priy Zeova nenport ki ler?

• Konman Labib i montre ki Zeova i apresye servis fidel ki son bann kreatir spirityel i ofer li?

[Kestyon]

[Portre lo paz 15]

Zeova in beni nou par donn nou en bon konprenezon lo laverite spirityel

[Portre lo paz 17]

Zeova i fourni proteksyon spirityel

[Portre lo paz 18]

Zeova i pros avek nou, i pare pour ekout tou nou lapriyer