Eski Zeova i remark sa ki ou fer?

KI MANNYER ou pou reponn sa kestyon? Bokou dimoun pou dir: ‘Mon krwar ki Bondye ti remark bann keksoz ki Moiz, Gideonn ek David ti fer, me mon pa krwar ki i enterese dan okenn keksoz ki mon fer. Definitivman mon pa parey Moiz, Gideonn, ouswa David.’

I vre ki serten zonm fidel dan letan biblik ti fer bann keksoz ekstraordiner par zot lafwa. Zot ti ‘ganny laviktwar lo bann rwayonm, ferm lagel lyon, tenny dife vyolan, e sape dan lanmor par lepe.’ (Ebre 11:33, 34) Parkont, lezot ti demontre zot lafwa dan bann fason ki pa ti tro enpresyonan e Labib i asir nou ki Bondye ti remark sa ki zot ti fer avek lafwa. Par egzanp, annou egzamin legzanp en berze, en profet, ek en vev dan Labib.

En Berze i ofer en Sakrifis

Ki ou rapel lo Abel, dezyenm garson Adan ek Ev? Petet ou rapel ki i ti pas atraver en lanmor martir, en keksoz ki tre probab pa bokou nou pou eksperyanse. Me Bondye ti remark Abel pour en lot rezon.

En zour, Abel ti pran detrwa pli bon zannimo dan son troupo e ofer en sakrifis avek Bondye. Ozordi, son kado i kapab ganny vwar konman senp, me Zeova ti remark sa ki i ti’n fer. I ti osi eksprim son laprouvasyon. Me pa fini la. Apepre kat mil an plitar, Zeova ti enspir zapot Pol pour ekri sa ki Abel ti fer dan liv Ebre. Apre sitan en kantite lannen, Bondye pa ti’n oubliy sa senp sakrifis ki Abel ti fer!—Ebre 6:10; 11:4.

Ki mannyer Abel ti swazir sa kalite sakrifis? Labib pa dir, me i bezwen ki i ti’n reflesir bokou lo sa size. I ti en berze, alors i pa etonnan ki i ti ofer serten son troupo. Me remarke ki i ti donn bann “morso ki ti gra” setadir sa bann ki ti pli meyer. (Zenez 4:4) Petet osi i ti reflesir lo parol Zeova avek sa serpan dan zarden Edenn: “Mon pou met en ostilite ant ou ek sa fanm, ant ou semans ek son semans. I pou kraz ou latet e ou pou kraz son talon.” (Zenez 3:15; Revelasyon 12:9) Kantmenm i pa ti konpran lidantite “sa fanm” ek son “semans,” i posib ki Abel ti realize ki ‘kraz talon’ semans sa fanm ti pou enplik vers disan. I ti sirman rekonnet ki napa lezot keksoz ki pou annan plis valer ki en keksoz vivan. Antouka, sa sakrifis ki i ti ofer ti vreman apropriye.

Parey Abel, bann Kretyen ozordi i fer plezir Bondye par bann sakrifis ki zot fer. Zot pa ofer bann premye ne zot troupo, me zot ‘rann glwar Bondye, setadir, toultan loue non Bondye par zot labous.’ (Ebre 13:15) Nou labous i loue Bondye ler nou partaz nou lafwa avek lezot.

Eski ou ti a kontan amelyor kalite ou sakrifis? Alors port bokou latansyon lo bezwen bann dimoun dan ou teritwar. Kwa ki trakas zot? Kwa ki zot enterese avek? Ki laspe dan mesaz Labib ki pou tous zot? Sak fwa ki ou pe prese, analiz bann vizit ki ou’n fer avek bi pour vin pli efikas. Ler ou koz lo Zeova, fer li avek konviksyon, avek senserite. Fer ki ou sakrifis i “touzour rann glwar Bondye.”

 En Profet i pres avek bann Dimoun ki pa oule ekoute

Konsider aprezan profet Enok. Petet i ti konpletman li tousel konman en serviter Zeova. Eski ou osi, parey Enok, ou sel dimoun dan ou fanmiy ki pe servi Zeova fidelman? Eski ou sa sel etidyan dan ou laklas oubyen sa sel travayer kot ou travay ki atase avek bann prensip Labib? Si wi, petet ou pe rankontre difikilte. Ou bann zanmi, fanmiy, kanmarad lekol, oubyen koleg travay pe ankouraz ou pour dezobei lalwa Bondye. Zot kapab dir: “Personn pa pou zanmen konnen sa ki ou’n fer.” “Nou pa pou dir ou sekre.” Zot kapab ensiste ki i bet pour trakas ou avek bann standar moral Labib akoz Bondye pa enterese avek sa ki ou fer. Petet zot pou fer tou sa ki posib pour ki ou pa kapab reziste zot largiman, akoz zot pa kontan ki ou pa mazin e azir parey zot.

I vre ki i pa fasil pour reziste sa bann kalite presyon, me i pa enposib. Mazin Enok, setyenm desandan Adan. (Zid 14) Omoman ki Enok ti ne, laplipar dimoun ti’n perdi tou pider. Zot fason koze ti fer onte; zot kondwit ti sokan. (Zid 15) Zot ti azir preski menm parey avek bokou dimoun ozordi.

Ki mannyer Enok ti fer fas avek sa sitiasyon? Larepons sa kestyon i enteres nou ozordi. Menm si Enok ti’n kapab sel zonm lo later dan sa letan ki ti ador Zeova, i pa ti vreman li tousel. Enok ti mars avek Bondye.—Zenez 5:22.

Pour Enok, fer plezir Bondye ti keksoz pli enportan dan son lavi. I ti konnen ki mars avek Bondye ti pou vedir plis ki zis viv en bon lavi. Zeova ti ekspekte ki i pres avek lezot. (Zid 14, 15) Sa bann dimoun ti bezwen ganny averti ki zot bann move aksyon ti’n ganny remarke. Enok ti kontinyen mars avek Bondye pour plis ki 300 an, bokou pli lontan ki okenn ant nou in andire. I ti kontinyen mars avek Bondye, ziska son lanmor.—Zenez 5:23, 24.

Parey Enok, nou osi nou’n ganny demande pour al prese. (Matye 24:14) Apard ki pres port-an-port, nou esey partaz sa bon nouvel avek nou bann fanmiy, koleg travay ek kanmarad lekol. Me parfwa, nou kapab ezite pour koze. Eski ou annan sa problenm? Pa dezespere. Imit bann Kretyen premye syek, e priy Bondye pour ganny lardyes. (Akt 4:29) Pa zanmen bliye ki osi lontan ki ou pe mars avek Bondye, ou pa zanmen tousel.

En Vev i prepar en Repa

Imazinen ki en vev, ki nou pa konn son non ti resevwar de benediksyon akoz i ti prepar en senp repa! I pa ti en Izraelit, me i ti en etranze ki ti viv dan dizyenm syek avan nou lepok dan lavil Sarepta. Ver lafen en gran peryod lasesres ek lafamin, manze sa vev ti’n preski fini. I ti reste li zis en pti ponnyen lafarin ek sifizaman delwil pour fer en dernyen repa pour li menm ek son garson.

Dan sa sitiasyon ki i ti ladan, en viziter ti arive. I ti profet Bondye, Eliya, ki ti demande  ki sa vev i partaz en pe manze avek li. I ti annan zis ase pour li avek son garson, e sirman i ti napa nanryen pour partaz avek sa viziter. Me Eliya ti asir li, par parol Zeova, ki si i partaz son manze avek li, li ek son garson pa pou lafen. Sa vev ti bezwen annan lafwa pour krwar ki Bondye Izrael pou remark li, vi ki i ti en vev etranze. Toudmenm, i ti krwar Eliya, e Zeova ti rekonpans li. “Sa gro po lafarin pa ti epize, e sa pti po delwil pa ti diminyen, dapre sa ki Zeova ti’n dir atraver Eliya.” Sa madanm ek son garson ti toultan annan manze ziska ki lafamin ti arete.—1 Lerwa 17:8-16.

Me en lot benediksyon ti pe esper sa vev. En pe letan apre sa mirak, son garson ki i ti byen kontan ti tonm malad e mor. Eliya ti pran pitye e i ti enplor Zeova pour fer sa garson retourn vivan. (1 Lerwa 17:17-24) Pour ki sa i arive, ti pou bezwen en mirak ki pa’n zanmen deza arive. I ti napa okenn rapor ki dir ki en dimoun in deza ganny resisite avan sa! Eski Zeova ti pou montre son konpasyon ankor pour sa vev ki ti sorti dan en pei etranze? I ti montre. Zeova ti otoriz Eliya pour fer sa garson retourn vivan. Plitar Zezi ti fer sa remark lo sa madanm privilezye: “Ti annan en kantite vev dan pei Izrael . . . [Eliya, NW ]. . . ti ganny anvoy[e] kot . . . sa vev dan lavil Sarepta dan pei Sidon.”—Lik 4:25, 26.

Sitiasyon ekonomik denozour i vreman pa stab, menm dan bann pei devlope. Serten gran biznes in bezwen fer bann anplwayer ki’n travay avek zot pour bokou lannen aret travay. Avek posibilite pour perdi son plas travay, i kapab ki en Kretyen i deside pour depans plis letan dan son travay, swete ki son lakonpanni pou gard li. Ler i fer sa i kapab fer li annan mwens letan pour asiste bann renyon Kretyen, partisip dan predikasyon, oubyen pran swen avek bezwen emosyonnel e spirityel son fanmiy. Me i santi ki i bezwen fer tou sa ki i kapab pour li pa perdi sa travay kantmenm i kapab kout li ser.

En Kretyen ki dan en tel difikilte ekonomik i annan rezon pour konsernen. I difisil pour trouv lanplwa denozour. Laplipar nou pa pe fer zefor pour vin ris, me parey sa vev an Sarepta, nou anvi ganny bann nesesite lavi. Me zapot Pol i rapel nou sa ki Bondye ti dir: “Mon pa pou zanmen negliz ou, mon pa pou zanmen abandonn ou.” Avek konfyans nou kapab dir: “Senyer i mon sekour, mon pa per personn. Ki dimoun i kapab fer mwan?” (Ebre 13:5, 6) Pol ti demontre konfyans total dan sa promes, e Zeova ti toultan pran swen avek li. Bondye pou fer menm parey avek nou si nou pa abandonn li.

Nou kapab santi ki nou pa pou fer bann keksoz remarkab parey Moiz, Gideonn, ek David, me nou kapab imit zot lafwa. Nou osi kapab rapel bann senp keksoz ki Abel, Enok, ek sa vev an Sarepta ti fer akoz zot lafwa. Zeova i enterese avek tou sa ki nou fer avek lafwa, menm bann pti keksoz. Ler en etidyan ki annan lakrent pour Bondye i refize aksepte drog avek son bann kanmarad, ler en Kretyen ki travay i rezet bann lapros imoral, oubyen ler en Temwen aze i fidelman asiste bann renyon kongregasyon kantmenm i fatige e napa en bon lasante, Zeova i vwar. Sa i osi fer li kontan!—Proverb 27:11.

Eski ou remark sa ki Lezot i fer?

Wi, Zeova i remark sa ki nou fer. Alor, konman bann ki imit Bondye, nou devret vizilan pour rekonnet zefor ki lezot i fer. (Efezyen 5:1) Akoz ou pa egzamin pli pros bann difikilte ki ou bann konpanyon Kretyen pe fer fas avek pour kapab asiste bann renyon kongregasyon, pour partisip dan predikasyon, menm pour fer bann aktivite toulezour?

Apre, les ou bann konpanyon Kretyen konnen ki ou apresye zot zefor. Zot pou kontan ki ou’n remark zot zefor, e ou lentere i kapab reasir zot ki Zeova osi i remark sa ki zot fer.