“Gete! Sa I Nou Bondye”
“Gete! Sa I Nou Bondye”
Sa lenformasyon ki ganny diskite dan sa de lartik letid i baze lo sa liv Approchez-vous de Jéhovah, ki ti sorti dan bann lasanble distrik ki ti ganny fer partou dan lemonn pandan lannen 2002/03. —Vwar sa lartik “I’n konble en Plas vid dan mon Leker,” lo paz 29.
“Gete! Sa i nou Bondye. Nou’n annan lespwar dan li, e i pou sov nou. Sa i Zeova.”—IZAI 25:9.
1, 2. (a) Konman ki Zeova ti refer avek patrias Abraam, e ki sa i kapab fer nou demann nou lekor? (b) Konman Labib i asir nou ki i posib pour nou annan en relasyon pros avek Bondye?
“MON zanmi.” Sa i lafason ki Zeova, Kreater lesyel ek later, ti refer avek patrias Abraam. (Izai 41:8) Zis mazinen—en senp imen pe rezwir en lanmitye avek sa Enn pli o dan liniver! Ou kapab demann ou lekor, ‘Eski i posib pour mwan vin sitan pros avek Bondye?’
2 Labib i asir nou ki i posib pour nou annan en relasyon pros avek Bondye. Abraam ti ganny akorde sa relasyon pros akoz i “ti krwar dan Bondye.” (Zak 2:23) Ozordi osi, Zeova i “annan en relasyon entim avek bann dimoun drwat.” (Proverb 3:32) Dan Zak 4:8, Labib i ankouraz nou: “Apros avek Bondye, e i ava apros avek zot.” I kler ki si nou pran bann pa pour apros avek Bondye, i pou reazir. Annefe, i pou apros avek nou. Me eski sa parol enspire i vedir ki nou, bann imen peser e enparfe, nou pran premye pa? Pa ditou. Relasyon entim avek Zeova i posib selman parski nou Bondye ki annan lanmour in pran de pa enportan.—Psonm 25:14.
3. Ki sa de pa Zeova in pran pour fer li posib pour rezwir en lanmitye avek li?
3 Premyerman, Zeova ti fer laranzman pour Zezi “donn son lavi konman pri pour liberasyon bokou dimoun.” (Matye 20:28) Sa sakrifis in fer posib pour nou vin pros avek Bondye. Labib i fer resorti: “Nou, nou kontan akoz Bondye in kontan nou an premye.” (1 Zan 4:19) Wi, vi ki Bondye “in kontan nou an premye,” in poz fondasyon pour nou annan sa lanmitye avek li. Dezyenmman, Zeova in revel li avek nou. Dan nenport lanmitye ki nou devlope, sa relasyon i baze lo konn sa dimoun, admir e apresye son bann kalite ki i annan. Annou vwar ki sa i vedir. Si Zeova ti en Bondye ki kasyet, ki imen pa kapab konnen, nou pa ti pou zanmen kapab vin pros avek li. Parkont, olye kasyet li, i anvi ki nou konn li. (Izai 45:19) Dan son Parol, Labib, i revel li dan bann term ki nou kapab konpran. Sa i pa zis en laprev ki i kontan nou me ki i anvi nou konn li e kontan li konman nou Papa ki dan lesyel.
4. Konman nou pou santi konsernan Zeova anmezir ki nou arive konn son bann kalite pli byen?
4 Eski ou’n deza vwar en pti zanfan montre son bann zanmi son papa e apre dir avek lazwa ek lafyerte, “Sa mon dadi”? Bann adorater Bondye i annan tou rezon pour santi menm parey konsernan Zeova. Labib i predir en letan kot bann dimoun fidel pour kriye: “Gete! Sa i nou Bondye.” (Izai 25:8, 9) Pli nou ganny en pli bon konprenezon lo bann kalite Zeova, pli nou pou santi ki nou annan sa pli bon Papa e sa zanmi pli pros ki nou kapab mazinen. Wi, ler nou konpran byen bann kalite Zeova, sa i donn nou plizyer rezon pour apros avek li. Alors annou egzaminen konman Labib i revel bann kalite prensipal Zeova—pwisans, lazistis, lasazes, ek lanmour. Dan sa lartik, nou pou diskit lo sa trwa premye kalite.
I annan en gran Pwisans
5. Akoz i apropriye ki zis Zeova tousel ki ganny apele “Toupisan,” e dan ki fason ki i servi son pwisans ekstraordiner?
5 Zeova i annan en gran pwisans. (Zob 37:23) Zeremi 10:6 i dir: ‘Napa personn ki parey ou, dan okenn fason, O Zeova. Ou gran, e ou non i pwisan.’ Kontrerman avek lezot kreatir, Zeova i annan en pwisans ki napa limit. Pour sa rezon, zis li tousel ki ganny apele “Toupisan.” (Revelasyon 15:3) Zeova i servi son pwisans ekstraordiner pour kree, pour detrir, pour proteze, e pour restore. Konsider zis de legzanp, son pwisans pour kree ek son pwisans pour proteze.
6, 7. Ki kantite pwisan soley i ete, e sa i donn levidans ki laverite enportan?
6 Ki ou santi lo ou lapo letan ou debout deor midi en zour ki byen ansoleye? Larder soley. An realite, ou pe santi rezilta pwisans ki Zeova i annan pour kree. Ki kantite pwisan soley i ete? Dan son milye, son tanperatir i apepre 15 milyon degre santigrad. Si ou ti kapab pran en pti bout soley groser latet en pin e met li la lo later, ou pa ti pou kapab debout sen e sof en distans 140 kilomet avek sa pti sours lasaler! Tou le segonn, soley i larg lenerzi ki ekivalan avek leksplozyon plizyer santenn milyon bonm nikleer. Pourtan, zis sa distans ki fodre, later i fer letour sa four ekstraordiner ki vreman tre so. Si soley ti tro pros avek later, tou delo lo later ti pou evapore; si i ti tro lwen avek later, tou delo ti pou vin ays. Dan tou le de ekstrenm, lavi pa ti pou kapab egziste lo nou plannet.
7 Menm si zot lavi i depan lo soley, plizyer dimoun i pran soley pour en nanryen ditou. Alor, zot pa arive vwar ki soley i kapab ansenny nou. Psonm 74:16 i dir sa lo Zeova: “Ou menm ki’n prepar lalimyer, menm soley.” Wi, soley i glorifye Zeova, “sa Enn ki’n fer lesyel ek later.” (Psonm 146:6) Kantmenm sa, i zis enn parmi plizyer kreasyon ki ansenny nou konsernan sa gran pwisans ki Zeova i annan. Pli nou aprann konsernan pwisans ki Zeova i annan pour kree, nou respe pour li i vin pli profon.
8, 9. (a) Ki legzanp ranpli avek tandres ki montre nou ki Zeova i pare pour protez e pran swen avek son bann adorater? (b) Ki swen sa berze dan letan Labib ti fourni pour son mouton, e ki sa i ansenny nou lo nou Gran Berze?
8 Zeova i osi servi son gran pwisans pour protez e pran swen avek son bann serviter. Labib i osi servi bann legzanp vivan e atiran pour dekrir bann promes Zeova pour protez nou. Par egzanp, remark Izai 40:11. Zeova i konpar li avek en berze e son pep avek mouton. Nou lir: “Parey en berze i pou pran swen avek son prop troupo. Avek son lebra i pou rasanble bann pti mouton ansanm; e i pou met zot lo son lestoman. I pou pran swen avek bann ki pe donn tete.” Eski ou kapab esey vwar dan ou lespri sa ki pe ganny dekrir dan sa verse?
9 I annan zis en pti gin zannimo ki pa kapab defann zot lekor parey bann mouton domestik. En berze dan letan Labib ti bezwen annan kouraz pour protez son mouton kont lelou, lours, ek lyon. (1 Samyel 17:34-36; Zan 10:10-13) Me ti annan letan kot sa berze ti bezwen montre tandres ler i ti pe protez e pran swen avek en mouton. Par egzanp, ler en mouton i donn nesans lwen avek troupo, konman ki sa berze pou gard sa pti mouton san defans ki fek ne sen e sof? I pou anmenn li dan son lebra, petet pour plizyer zour, “lo son lestoman,” setadir dan sa gran lesarp ki vin otour likou ek lestoman. Me konman en pti mouton pou kapab ariv lo lestoman sa berze? Sa pti mouton i kapab apros sa berze e menm frot frot avek son lipye. Parkont, se sa berze ki ti pou bezwen bese, fil son lebra, ramas sa pti mouton, e met li lo son lestoman kot i pou santi li an sekirite. Sa i en legzanp ranpli avek tandres pour montre nou ki nou Gran Berze i pare pour protez e pran swen avek son bann serviter!
10. Ki proteksyon Zeova i fourni konmela, e akoz en tel proteksyon i sirtou enportan?
10 Zeova in fer plis ki senpleman promet proteksyon. Dan letan Labib, i ti demontre dan plizyer fason mirakile ki i kapab “delivre bann dimoun ki atase avek li dan difikilte.” (2 Pyer 2:9) Me konsernan nou letan? Nou konnen ki i pa servi son pwisans pour protez nou kont tou maler ozordi. Me i fourni en keksoz pli enportan ankor—proteksyon spirityel. Nou Bondye lanmour i protez nou kont danze spirityel par ekip nou avek sa ki nou bezwen pour nou kapab andir leprev e pour prezerv nou relasyon avek li. Par egzanp, Lik 11:13 i fer resorti: “Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” Sa lafors pwisan i kapab ekip nou avek bann kalite neseser pour nou kapab fer fas avek nenport leprev oubyen problenm ki nou rankontre. (2 Korentyen 4:7) Alors Zeova i fer keksoz pour prezerv nou lavi, pa zis pour ennde lannen, me pour leternite. Avek sa lespwar antet, nou kapab vwar nenport soufrans dan sa sistenm konman “bann pti soufrans” ki tanporer. (2 Korentyen 4:17) Eski nou pa santi nou atire avek en Bondye ki servi son pwisans dan en fason ranpli avek lanmour dan nou faver?
“Zeova i kontan Lazistis”
11, 12. (a) Akoz lazistis Zeova i atir nou avek li? (b) Ki konklizyon David ti tonm lo la konsernan lazistis Zeova, e konman sa parol enspire i kapab rekonfort nou?
11 Zeova i fer sa ki drwat e zis, e i fer li dan en fason konsistan, san okenn lapliferans. Lazistis Bondye i pa en kalite ki ganny demontre dan en fason dir e san santiman, ki fer nou rekile avek li. Me i en kalite atiran ki fer nou apros avek Zeova. Labib i klerman dekrir laspe atiran sa kalite ki tous leker. Annou alors, konsider trwa fason dan ki Zeova i demontre son lazistis.
12 Premyerman, lazistis Zeova i pous li pour montre fidelite anver son bann serviter. Psalmis David ti eksperyans pour li menm laspe lazistis Zeova. Atraver son prop leksperyans ek son letid lo bann fason Zeova, ki konklizyon David ti tonm lo la? I ti deklare: “Zeova i kontan lazistis, e i pa pou kit son bann fidel. Zot pou ganny garde pour letan endefini.” (Psonm 37:28) Sa i en lasirans rekonfortan! Nou Bondye pa pou zanmen abandonn bann ki fidel avek li. Nou kapab alor depan lo son lanmitye ek son lanmour ki i annan pour nou. Son lazistis i garanti sa!—Proverb 2:7, 8.
13. Konman ki lentere ki Zeova i annan pour bann ki ti dan sitiasyon difisil i evidan dan Lalwa ki i ti donn Izrael?
13 Dezyenmman, lazistis Bondye i konsyan bezwen bann dimoun ki pe soufer. Lentere ki Zeova i annan pour bann ki ti dan sitiasyon difisil i evidan dan Lalwa ki i ti donn avek Izrael. Par egzanp, Lalwa ti fer bann laranzman pour asire ki bann orfelen ek bann vev pa ti ganny maltrete e neglize. (Deterononm 24:17-21) Zeova ti rekonnet ki mannyer lavi ti kapab difisil pour sa bann fanmiy koumsa, e li menm i ti vin zot Ziz ek sa Enn ki protez zot. (Deterononm 10:17, 18) I ti averti bann Izraelit ki si zot viktimiz sa bann fanm ek zanfan san defans, i ti pou antann zot lapel osekour. Parey i ganny rikorde dan Egzod 22:22-24, i ti dir: “Wi, mon lakoler pou monte.” Menm si lakoler i pa enn bann kalite dominan Bondye, i demontre lakoler dan en fason ki zis e drwat ler i vwar bann aksyon lenzistis ki ganny fer par ekspre, sirtou kan bann viktim i bann ki pa kapab defann zot lekor.—Psonm 103:6.
14. Ki sa levidans vreman remarkab ki montre ki Zeova pa fer lapliferans?
14 Trwazyenmman, dan Deterononm 10:17, Labib i asir nou ki Zeova “pa montre lapliferans anver personn e pa aksepte gous.” Kontrerman avek bokou dimoun ki annan pouvwar oubyen lotorite, Zeova pa les li ganny enfliyanse par larises materyel oubyen laparans an deor. I napa okenn prezidis ni fer preferans pour personn. En levidans vreman remarkab ki i pa montre lapliferans i sa: Sa loportinite pour vin son bann vre adorater, avek lespwar pour viv pour touzour, i pa ganny rezerve zis pour en pti group dimoun spesyal. Okontrer, Akt 10:34, 35 i fer resorti: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” Sa lespwar i posib pour tou dimoun, san pran kont ki zot pozisyon dan lasosyete, kouler zot lapo, oubyen pei ki zot reste ladan. Eski pa sa ki vre lazistis? Annefe, en pli bon konprenezon lo lazistis Zeova i fer nou apros pli pre avek li!
‘Lasazes Bondye i vreman profon’
15. Kisisa lasazes, e konman ki Zeova i demontre li?
15 Zapot Pol ti santi li pouse pour dir sa parol ki ganny rikorde dan Romen 11:33: “Son konnesans ek son lasazes i vreman profon!” Wi, anmezir ki nou mazin lo diferan laspe gran lasazes Zeova, nou definitivman santi sa profon respe ek devosyon pour li. Me konman nou kapab dekrir sa kalite? Lasazes i anmenn konnesans, disernman, ek konprenezon ansanm pour prodwir bann bon lefe. Par servi son gran konnesans ek son konprenezon profon, Zeova i touzour fer bann pli bon desizyon posib, e servi pli bon fason ki egziste pour akonpli zot.
16, 17. Konman ki kreasyon Zeova i konfirm son gran lasazes? Donn en legzanp.
16 Ki serten levidans spesifik ki annan konsernan gran lasazes ki Zeova i annan? Psonm 104:24 i dir: “Konman ou bann travay i bokou, O Zeova! Ou’n fer zot tou avek lasazes. Later i ranpli avek ou bann prodiksyon.” Vreman, pli nou aprann konsernan bann keksoz ki Zeova in fer, pli nou vwar nou pe devlop en gran ladmirasyon pour son lasazes. Zis mazinen, bann syantis in aprann bokou par etidye bann kreasyon Zeova! I annan menm en domenn syantifik ki esey imit bann keksoz dan lanatir pour prodwir plis materyo ek masin.
17 Par egzanp, petet ou’n obzerv en lakaz bib avek bokou ladmirasyon. I vreman en kreasyon merveye. Menm si ler nou get zot, zot paret frazil, serten sa bann pti bren difil i pli for ki feray, pli for ki sa materyo ki ganny servi pour fer bann lenz ki kapab reziste en bal fizi. Ki sa i vreman vedir? Esey mazin en lakaz bib grander en lasenn ki ganny servi lo en bato lapes. En tel lakaz bib ti pou sitan for ki i ti pou kapab aret en avyon ki pe anvole dan lezer! Wi, Zeova in fer tou sa bann keksoz “avek lasazes.”
18. Konman ki nou vwar lasazes Zeova, lefe ki i’n servi zonm pour ekrir son Parol, Labib?
18 Pli gran levidans lasazes Zeova i kapab ganny vwar dan son Parol, Labib. Bann konsey saz ki trouve dan Labib i vreman montre nou ki pli bon fason pour viv. (Izai 48:17) Me lasazes Zeova ki pa kapab ganny konpare i osi evidan dan lafason ki Labib ti ganny ekrir. Ki mannyer? Dan son lasazes, Zeova ti swazir pour servi zonm pour ekrir son Parol. Si i ti’n servi bann lanz pour ekrir son Parol enspire, eski Labib ti pou annan menm lefe lo nou? I vre ki bann lanz ti pou’n kapab dekrir Zeova dapre zot pozisyon eleve e osi eksprim zot prop devosyon pour li. Me eski nou ti pou kapab konpran pwennvi sa bann kreatir spirityel parfe, ki zot konnesans, leksperyans, ek lafors i pli siperyer ki pour nou?—Ebre 2:6, 7.
19. Ki legzanp ki montre ki servi bann zonm pour ekrir Labib i fer li atiran pour nou?
19 Vi ki imen ki’n ganny servi pour ekrir Labib, sa i fer ki Labib i atiran pour nou. Son bann ekriven ti bann zonm avek santiman parey pour nou. Lefe ki zot ti enparfe, zot ti rankontre leprev ek presyon parey avek nou. Dan serten ka, zot ti ekrir zot prop leksperyans, santiman ek lalit. (2 Korentyen 12:7-10) Alors zot ti ekrir bann parol ki okenn lanz pa ti pou’n kapab eksprimen. Pran, par egzanp, parol David ki ganny rikorde dan Psonm 51. Dapre son pti lentrodiksyon, David ti konpoz sa psonm apre ki i ti’n komet en pese grav. I ti devid son leker, par eksprim son gran sagrinasyon e sipliy Bondye pour pardonn li. Verse 2 ek 3 i dir: “Retir tou mon bann fot, e pirifye mwan avek mon pese. Parski mon konn mon bann fot, e mon pese i devan mwan konstaman.” Remark verse 5: “Gete! Dan lerer mon’n ganny met o monn avek douler lakousman, e dan pese mon manman in fer mwan.” Verse 17 i azoute: “Bann sakrifis pour Bondye i en lespri fatige; en leker brize e kraze, O Bondye, ou pa pou meprize.” Eski ou pa santi langwas sa ekriven? Lekel, apard ki en imen enparfe, ki kapab eksprim sa bann kalite santiman?
20, 21. (a) Akoz nou kapab dir ki menm si Labib in ganny ekrir par zonm, Labib i kontyen lasazes Zeova? (b) Kwa ki pou ganny diskite dan prosen lartik?
20 Par servi sa bann imen enparfe, Zeova i fourni nou egzakteman sa ki nou bezwen—en resi ki’n “ganny enspire par Bondye” me ki’n ganny ekrir dan bann term ki imen pou konpran fasilman. (2 Timote 3:16) Wi, sa bann ekriven ti ganny gide par lespri sen. Zot ti alor ekrir lasazes Zeova, pa sa ki pour zot. Nou kapab met tou nou konfyans dan sa lasazes. I sitan pli siperyer ki nou prop lasazes, ki Bondye i ankouraz nou: “Met ou konfyans dan Zeova avek tou ou leker e pa apiy lo ou prop lentelizans. Dan tou ou semen pran li an konsiderasyon, e li i pou fer drwat tou ou santye.” (Proverb 3:5, 6) Par pran aker sa bon konsey, nou vin pli pros avek nou Bondye ki ranpli avek lasazes.
21 Lanmour i sa kalite Zeova ki pli atiran e pli zoli dan tou. Lafason ki Zeova in demontre lanmour pou ganny diskite dan nou prosen lartik.
Eski ou rapel?
• Ki bann pa ki Zeova in pran pour ki nou kapab devlop en lanmitye avek li?
• Nonm detrwa legzanp pwisans Zeova pour kree ek son pwisans pour proteze.
• Dan ki fason Zeova i demontre son lazistis?
• Konman ki lasazes Zeova i evidan dan son kreasyon osi byen ki dan Labib?
[Kestyon]
[Portre lo paz 20]
Parey en berze ki met en pti mouton lo son lestoman, avek tandres Zeova i pran swen avek Son mouton
[Portre lo paz 22]
Lasazes Zeova i evidan dan lafason ki Labib ti ganny ekrir