Ki Lavenir bann Legliz?

EN PASTER sorti Yougannda i dir: “Dimoun ki reste Langleter i ankor krwar dan Bondye me zot pa anvi dedye zot lavi pour swiv legzanp Kris.” Apepre 20 an pase, sa pret ti reisi sirviv latak vyolan lo son larelizyon an Yougannda. Ozordi, i fer en lapres zis 10 minit dan klib bann zonm an Leeds, Langleter, avan ki zot konmans zwe bingo.

Lanmisyon Anglikan Letazini ki’n fek ganny formen, pe osi fer fas avek en kriz spirityel. Sit Internet sa lorganizasyon i dir ki “ozordi Letazini i annan en pli gran popilasyon dimoun ki koz Angle ki pa manm en serten legliz e ki pa enterese avek keksoz spirityel.” I azoute ki “Letazini pe vin sa landrwa ki bezwen misyonner.” Apre bokou zefor anven pour fer sanzman dan zot legliz, sa nouvo lorganizasyon in deside aret swiv tradisyon e asosye avek bann lider sorti Lazi ek Lafrik pour konmans “en kanpanny relizye dan Letazini.”

Me akoz misyonner sorti Lafrik, Lazi, ek Sid Lanmerik pe prese avek bi pour ‘sov dimoun’ dan bann pei Lerop ek Nor Lanmerik, bann pei ki ti swadizan Kretyen?

Lekel ki pe sov Lekel?

Pour plis ki kat san lannen, bann misyonner Eropeen ti al dan bann pei ki bann Eropeen ti kolonize, parey Lafrik, Lazi, bann zil Pasifik, ek Sid Lanmerik. Zot ti al avek bi pour fer sa bann dimoun ki zot ti konsider payen aksepte zot larelizyon. Avek letan, sa bann koloni Lanmerik, ki ti sipoze baze lo bann prensip Kretyen ti fer sa travay zot osi e finalman depas bann misyonner Eropeen par etablir zot prop lorganizasyon relizye pour pres Levanzil dan lemonn antye. Aprezan, sitiasyon in devir anba lao.

 Andrew Walls, ki fondater e osi direkter Sant pour Letid larelizyon Kretyen dan Pei Lafrik, Lazi, ek Sid Lanmerik, i dir: “Landrwa kot legliz Katolik ek Anglikan ti pli for in sanze.” An 1900, 80 poursan dimoun ki ti dir zot Kretyen ti swa bann Eropeen oubyen dimoun sorti dan Nor Lanmerik. Me ozordi, 60 poursan tou bann ki dir zot Kretyen i viv Lafrik, Lazi, ek Lanmerik Latin. Resaman en rapor dan medya ti deklare: “Bann legliz Katolik dan Lerop i depan lo bann pret ki sorti Filipin ek Lenn,” e “enn dan sis pret ki pe servi dan bann parwas Katolik Lanmerik i sorti dan lezot pei.” Pei Ba, bann paster Afriken ki laplipar i sorti Gana, i vwar zot konman “en legliz misyonner lo en kontinan ki nepli enterese avek larelizyon.” Konmela bokou paster sorti Brezil i fer bann kanpanny relizye dan plizyer rezyon Langleter. En ekriven ti fer sa remark ki avan bann misyonner ti al Lafrik, Lazi ek Sid Lanmerik, me konmela i tou lekontrer.

En Tanpet pe aprose

I tre probab ki i pou kontinyen annan en bezwen pour misyonner lo kontinan Nor Lanmerik ek Lerop. Zot de kontinan ki pli ale dimoun napa okenn lentere dan keksoz relizye. En magazin i dir ki “mwens ki 10 poursan Kretyen an Lekos i al lanmes regilyerman.” Lafrans ek Lalmanny i pli mwens ankor. En lot rapor ti revele ki “apepre 40 poursan Ameriken ek 20 poursan Kanadyen i dir zot al legliz regilyerman.” Tandis ki Filipin preski 70 poursan dimoun i asiste lanmes, e dan lezot pei ki pe devlope i parey.

I enteresan pour dir osi, ki bann krwayan dan bann pei Lafrik, Lazi, ek Sid Lanmerik i pli anvi reste atase avek tradisyon zot legliz ki bann dan Nor Lanmerik ek Lerop. Par egzanp, dapre en serve ki’n ganny fer Lerop ek Letazini, bann Katolik dan sa bann pei i dir ki zot nepli annan konfyans dan bann pret. Zot osi demande ki bann dimoun ordiner ek bann madanm i kapab partisip plis dan bann aktivite legliz. Parkont, bann Katolik ki reste Sid avek Ekwater i donn tou zot sipor legliz lo sa bann size. Deplizanpli, plis dimoun dan Sid avek Ekwater pe siport tradisyon legliz. Sa pe kree en sitiasyon ki pou fer en konfli en zour ant sa de parti lemonn. Philip Jenkins, en profeser larelizyon ek listwar, i predir: “I tre probab ki ankor dan 10 oubyen 20 an, bann Kretyen dan tou le de kote lemonn pa pou rekonnet kanmarad konman Kretyen.”

An rapor avek sa ki pe arive, Andrew Walls i dir ki en size irzan ki devret ganny konsidere i “ki mannyer Kretyen sorti Lafrik, Lazi, Lanmerik Latin, Nor Lanmerik, ek Lerop i kapab viv ansanm dan en menm legliz, e ansanm eksprim menm lafwa.” Ki ou panse? Eski bann legliz i kapab sirviv dan en lemonn ki divize? Kwa ki fer vre Kretyen ini? Lartik swivan pou donn bann larepons sorti dan Labib. I pou osi donn levidans kler konsernan en group Kretyen ki ini e pe deza prospere dan lemonn antye.

[Portre lo paz 4]

Sa ti en legliz avan, aprezan i en restoran

[Portre lo paz 4]

AP Photo/Nancy Palmieri