Vre Kretyen pe prospere

MINISTER Zezi Kri ti fer en gran lefe dan lemonn dan premye syek. Sa ki i ti dir ti ankourazan, enteresan, fasil pour konpran, e itil. Bann dimoun ti byen enpresyonnen par son mesaz. Bokou dimoun ki ti tann li koze ti ganny touse en kantite par son parol.—Matye 7:28, 29.

San okenn lafreyer Zezi ti refize mel avek bann sistenm relizye e politik dan son letan. Me i ti en zonm ki bann senp dimoun ti fasilman kapab aprose. (Matye 11:25-30) I ti fransman rekonnet lenfliyans bann move lespri lo later e i ti demontre ki i pli for ki zot. (Matye 4:2-11, 24; Zan 14:30) Zezi ti kapab klerman eksplik relasyon ant soufrans ek pese. I ti kontan koz lo sa ki Rwayonm Bondye pou fer pour soulaz limanite pour touzour. (Mark 2:1-12; Lik 11:2, 17-23) Enn fwa pour tou, i ti retir sa vwal ki pour bokou bokou letan ti’n kasyet vre personnalite son Papa. I ti fer konnen non Bondye avek tou bann ki ti anvi annan en relasyon avek Li.—Zan 17:6, 26.

Alor, i pa sirprenan ki malgre persekisyon sever delapar bann group relizye e politik, bann disip Zezi ti propaz son mesaz pwisan vitman. Dan zis apepre 30 an, bann kongregasyon Kretyen ti ganny formen dan Lafrik, Lazi ek Lerop e zot ti byen devoue. (Kolosyen 1:23) Sa bann laverite senp ki Zezi ti ansennyen ti liber bann dimoun senp partou dan Lanpir Romen.—Efezyen 1:17, 18.

Me ki mannyer tou sa bann nouvo disip sorti dan diferan sitiasyon ekonomik, kiltir, langaz, ek relizyon ti pou zwenn ansanm e ini dan sa ki zapot Pol ti apel “en sel lafwa”? (Efezyen 4:5) Kwa ki ti pou fer zot kontinyen reste “dakor ansanm” pour ki zot pa divize? (1 Korentyen 1:10) Vi ki konmela i annan en gran divizyon ant tou sa bann ki dir zot Kretyen, nou devret egzamin sa ki Zezi li menm ti ansennyen.

Kwa ki fer Kretyen ini?

Ler i ti pe ganny zize devan Pons Pilat, Zezi ti idantifye kwa ki fer Kretyen ini. I ti dir: “Mon’n ne e mon’n vin dan lemonn pour servi temwen pour laverite. Tou sa ki pour laverite i pou ekout mon lavwa.” (Zan 18:37) Alors, aksepte lansennyman Zezi avek larestan Parol Bondye, Labib, i fer en gran lefe lo bann vre disip Kris. Se sa ki fer zot ini ansanm.—1 Korentyen 4:6; 2 Timote 3:16, 17.

 Byensir, i ti pou annan bann kestyon ek dezakor antre bann disip Zezi parler. Kwa ki ti pou ed zot? Zezi ti eksplike: “Kan Lespri laverite i vini, i pou gid zot dan laverite an antye. I pa pou koz avek son prop lotorite, me i pou dir zot tou sa ki i’n tande e i pou anons zot tou sa ki pou arive.” (Zan 16:12, 13) Alors, lespri sen Bondye ti pou ed bann vre disip Zezi konpran laverite anmezir ki Bondye i revel li. Sa lespri ti pou osi prodwir fri, parey lanmour, lazwa, ek lape ki an retour ti pou promot linite parmi zot.—Akt 15:28; Galat 5:22, 23.

Zezi pa ti permet ki son bann disip i fer diferan group parmi zot. I pa ti ni donn zot lotorite pour eksplik laverite Labib dan en lot fason pour adapte avek bann tradisyon kiltirel oubyen relizye bann dimoun ki zot ti pou rankontre. Plito, dernyen zour ki i ti avek zot, i ti priy avek bokou santiman: “Mon pa priy zis pour zot, me osi pour tou bann ki pou krwar mwan akoz zot mesaz. Pour ki zot tou, zot ava vin en sel. Parey ou mon Papa ou dan mwan e mwan mon dan ou, ki zot osi zot ava dan nou, pour ki lemonn i a krwar ki ou, ki’n anvoy mwan.” (Zan 17:20, 21) Alor, vre linite an espri e an verite ti pou vin en mark evidan pour bann disip Kris depi okonmansman ziska nou letan. (Zan 4:23, 24) Me ozordi bann legliz i divize olye ini. Akoz sa i leka?

Akoz bann Legliz i divize

I annan en kantite diferan krwayans ek pratik parmi bann ki dir zot Kretyen ozordi. Akoz? Fransman, zot pa’n swiv lansennyman Zezi. En zournalis ti dir: “Parey dan lepase, ozordi Kretyen i aksepte sa ki al byen avek zot bezwen e inyor nenport verse Labib ki pa an armoni avek zot prop tradisyon relizye.” Sa i egzakteman sa ki Zezi ek son bann zapot ti predir ti pou arive.

Par egzanp, anba lenfliyans lespri sen, zapot Pol ti ekrir son konpanyon Timote: “Parski en letan pe vini, kot dimoun pou nepli siport lansennyman laverite. Me zot pou swiv zot prop dezir; zot pou rasanble en kantite ansennyan otour zot pour dir zot sa ki zot zorey i oule tande. Zot pou nepli oule ekout laverite, me zot pou prefer bann fab.” Eski tou Kretyen ti pou ganny anbete? Non. Pol ti kontinyen: “Me ou, [gard ou bon sans, NW ] dan tou sirkonstans, siport lasoufrans, fer ou travay konman predikater levanzil, e ranpli ou devwar dan servis Bondye.” (2 Timote 4:3-5; Lik 21:8; Akt 20:29, 30; 2 Pyer 2:1-3) Timote ek lezot Kretyen fidel ti viv an armoni avek sa konsey enspire.

Bann vre Kretyen i ankor ini

Parey Timote, bann vre Kretyen pe kontinyen gard zot bon sans par rezet bann rezonnman imen e par aksepte selman sa ki Labib i dir konman baz zot bann krwayans. (Kolosyen 2:8; 1 Zan 4:1) Parey bann Kretyen dan premye syek, bann Temwen Zeova pe akonpli zot minister. Dan plis ki 230 pei, zot pe anmenn partou kote mesaz ki Zezi li menm ti ansennyen, sa bon nouvel Rwayonm. Annou vwar kat fason enportan ki montre bann Temwen Zeova pe imit Zezi e pe pratik sa vre larelizyon Kretyen nenport landrwa kot zot reste. Zot pe fer sa dan linite.

Zot krwayans i baze lo Parol Bondye. (Zan 17:17) En pret Belzik ti ekrir sa lo nou: “En keksoz ki nou kapab aprann avek bann Temwen Zeova se ki zot pare pour ekout Parol Bondye e zot determinen pour koz lo Labib avek lezot.”

Zot depan lo Rwayonm Bondye pour anmenn en solisyon pour problenm lemonn. (Lik 8:1) An Barranquilla, Kolonbi, en Temwen ti koz avek Antonio, en gran siporter en parti politik. Sa Temwen pa ti siport son parti, i pa ti ni promot lezot lide  politik. Plito, i ti ofer pour etidye Labib avek Antonio ek son bann ser pour nanryen. Pa bokou letan apre, Antonio ti realize ki Rwayonm Bondye i vreman sa sel lespwar pour bann dimoun pov Kolonbi e dan lezot landrwa.

Zot onor non Bondye. (Matye 6:9) Maria ti en Katolik senser ki pe reste Lostrali. Ler Temwen Zeova ti zwenn Maria pour premye fwa, i ti les zot montre li non Bondye dan Labib. Ki mannyer i ti reazir? “Ler mon ti vwar non Bondye dan Labib pour premye fwa, mon ti plere. Mon ti telman touse lefe ki mon ti vreman kapab konn e servi non personnel Bondye.” Maria ti kontinyen etidye Labib, e pour premye fwa dan son lavi, i ti arive konn personnalite Zeova e kapab devlop en relasyon dirab avek li.

Lanmour i fer zot ini. (Zan 13:34, 35) En lartik dan en magazin Kanada, apele Ladysmith-Chemainus Chronicle, ti dir: “Ki swa ou annan en krwayans relizye oubyen non, ou devret felisit sa 4,500 Temwen Zeova ki ti travay 24 lo 24 pandan sa semenn edmi ki’n pase pour konstri en Lasal Lasanble 2,300 met an Cassidy . . . Pour fer sa dan lazwa san argimante, dispit, oubyen rod laglwar pour zot menm, i en vre legzanp lansennyman Kris.”

Alor egzamin bann levidans. Pandan ki bann profeser relizye, bann misyonner ek bann krwayan dan bann larelizyon Kretyen sa lemonn i kontinyen lite avek sa kriz ki pe arive dan zot legliz, vre Kretyen pe prospere dan lemonn antye. Vreman, vre Kretyen pe akonpli zot devwar predikasyon e ansenny Parol Bondye. (Matye 24:14; 28:19, 20) Si ou parmi sa bann ki pe “plennyen e zemir” akoz bann keksoz degoutan ki pe arive ozordi e ou trouble par sa divizyon ki annan parmi bann larelizyon Kretyen sa lemonn, nou envit ou pour zwenn bann Temwen Zeova dan en ladorasyon Kretyen ini, sa sel vre Bondye, Zeova.—Ezekyel 9:4; Izai 2:2-4.