Bann Pwen enteresan dan Liv Egzod
Parol Bondye i vivan
Bann Pwen enteresan dan Liv Egzod
LIV Egzod i en vre zistwar ki koz konsernan en group dimoun ki ti ganny delivre dan lesklavaz. (Egzod 1:13) I osi en resi eksitan konsernan nesans en nasyon. Bann mirak enpresyonan, en sistenm lalwa ekselan, ek konstriksyon tabernak i osi lezot laspe enteresan sa liv. An gro, se sa ki sa liv Labib apele Egzod i kontyen.
Sa liv ti ganny ekrir par Moiz, en profet Ebre. Egzod i rakont leksperyans bann Izraelit pandan en peryod letan 145 an. I konmans depi lanmor Zozef an 1657 A.N.L. ziska ki tabernak ti konplete an 1512 A.N.L. Me sa resi i plis ki zis listwar. I form parti parol Bondye, oubyen mesaz pour limanite. Vi ki i form parti parol Bondye, alor i “vivan e i annan pisans.” (Ebre 4:12) Alor, liv Egzod i annan en gran lenportans pour nou.
“BONDYE TI TANN ZOT ZEMISMAN”
Bann desandans Zakob ki ti pe viv Lezip ti ogmant sitan vit ki lotorite Lezip ti pas en lalwa pour fer zot soufer konman lesklav. Faraon ti menm donn lord pour touy tou bann pti garson Izraelit. En pti baba trwa mwan apele Moiz ti reisi sap sa maler, e fiy Faraon ti adopte li. Menm si i ti grandi dan lakour fanmiy Faraon, ler i ti annan 40 an, Moiz ti pran kote avek son prop nasyon e i ti touy en Ezipsyen. (Akt 7:23, 24) Moiz ti forse sove e al Madyann. Laba, i ti marye e viv son lavi konman en berze. Kot en brousay ki ti pe brile dan en fason mirakile, Zeova ti demann Moiz pour retourn Lezip pour gid e retir bann Izraelit dan lesklavaz. Son frer Aaron ti ganny apwente konman son portparol.
Larepons pour bann Kestyon lo Labib:
3:1—Ki kalite pret Yitro ti ete? Dan letan bann patrias, sef lafanmiy ti servi konman en pret pour son fanmiy. I evidan ki Yitro ti sef en tribi Madyanit. Vi ki bann Madyanit ti desandans Abraam atraver Ketoura, petet zot ti’n arive konn ladorasyon Zeova.—Zenez 25:1, 2.
4:11—Dan ki sans Zeova i fer bann koz pa, sourd, ek bann aveg? Menm si i annan moman kot Zeova li menm ti fer dimoun pa vwar kler e pa koze, i pa responsab pour tou sa bann dezabilite. (Zenez 19:11; Lik 1:20-22, 62-64) Sa i rezilta pese ki nou’n erite. (Zob 14:4; Romen 5:12) Me vi ki Bondye in permet sa sitiasyon egziste, i kapab dir ki i’n fer bann koz pa, sourd, ek aveg.
4:16—Dan ki fason Moiz ti “servi konman Bondye” pour Aaron? Moiz ti en reprezantan Bondye. Alor, Moiz ti vin “konman Bondye” pour Aaron, ki ti reprezant e koz pour Moiz.
Leson pour nou:
1:7, 14. Zeova ti siport son pep ler zot ti pe soufer Lezip. Ozordi osi, Zeova i siport son bann Temwen, menm ler zot rankontre bann persekisyon sever.
1:17-21. Zeova i mazin nou “pour lebyen.”—Neemya 13:31.
3:7-10. Zeova i sansib kan son pep i kriy osekour.
3:14. Zeova i toultan akonpli son plan. Alors nou kapab annan konfyans ki byento Zeova pou fer nou lesperans ki baze lo Labib vin en realite.
4:10, 13. Moiz ti demontre ki i napa ditou konfyans dan son abilite pour koze. I ti sipliy Bondye pour anvoy en lot dimoun pour koz avek Faraon, menm si Zeova ti asir li ki i pou siport li. Kantmenm sa, Zeova ti servi Moiz e i ti donn li sa lasazes ek lafors neseser pour akonpli son latas. Olye konsantre lo nou bann mankman, annou depan lo Zeova e fidelman akonpli nou travay pour prese e pour ansennyen.—Matye 24:14; 28:19, 20.
DELIVRANS GRAS A BANN MIRAK
Moiz ek Aaron ti al devan Faraon, e demann li permisyon pour bann Izraelit al dan dezer pour fer en lafet pour Zeova. Sa dirizan Ezipsyen ti refiz zot avek en ler arogan. Zeova ti servi Moiz pour anmenn plizyer fleo terib enn deryer lot. Se selman apre sa dizyenm fleo ki Faraon ti les bann Izraelit ale. Me deswit, Faraon ek son lafors militer ti tay deryer bann Izraelit. Me Zeova ti fer en semen pour zot sove atraver Lanmer Rouz e i ti delivre son pep. Bann Ezipsyen ki ti pe swiv ti noye ler lanmer ti kouver zot.
Larepons pour bann Kestyon lo Labib:
6:3—Dan ki fason Abraam, Izaak, ek Zakob pa ti konn non Bondye? Sa bann patrias ti servi non Bondye e ti resevwar promes sorti kot Zeova. Me zot pa ti konnen oubyen fer leksperyans ki se Zeova ki fer sa bann promes ganny akonpli.—Zenez 12:1, 2; 15:7, 13-16; 26:24; 28:10-15.
7:1—Ki mannyer Moiz ti vin “Bondye pour Faraon”? Zeova ti donn Moiz pouvwar ek lotorite lo Faraon. Alors, ti napa nesesite pour per sa lerwa.
7:22—Kote bann pret Ezipsyen ti ganny delo ki pa ti’n vin disan? Petet, zot ti servi en pe delo ki ti’n ganny pran dan Larivyer Nil avan sa fleo. Zot ti osi kapab anmas delo ki pa ti’n ganny afekte, par fouy bann pi otour Larivyer Nil.—Egzod 7:24.
8:26, 27—Akoz Moiz ti dir ki bann Ezipsyen pa ti pou kontan ditou bann sakrifis ki Izrael ti pou fer? Bann Ezipsyen ti ador diferan kalite zannimo. Alors, lefe ki Moiz ti mansyonn bann sakrifis sa ti fer son demann pli konvenkan, pour Izrael ganny permisyon pour al sakrifye avek Zeova.
12:29—Lekel ki ti ganny konsidere konman premye ne? Premye ne ti enkli zis bann mal. (Nonm 3:40-51) Faraon, ki li menm ti en premye ne, pa ti ganny touye. I ti annan son prop fanmiy. Sa dizyenm fleo pa ti touy sef lafanmiy, me garson premye ne sa fanmiy.
12:40—Konbyen letan bann Izraelit ti reste Lezip? Sa 430 lannen ki ganny mansyonnen dan sa verse ti enkli sa letan ki bann garson Izrael ti pase “dan pei Lezip e osi dan pei Kanaan.” (Vwar not anba lo paz.) Ler i ti annan 75 an, Abraam ti travers Larivyer Efrat an 1943 A.N.L. lo son semen pour al Kanaan. (Zenez 12:4) Depi sa letan ziska ler Zakob, alaz 130 an, ti antre Lezip ti fer 215 lannen. (Zenez 21:5; 25:26; 47:9) Alor bann Izraelit ti pas sa menm peryod letan Lezip, savedir 215 lannen.
15:8—Vi ki delo dan Lanmer Rouz ti paret “kaye,” eski an realite sa delo ti’n vin ays? Sa verb Ebre ki ganny tradwir “kaye” i vedir vin pli pti oubyen vin epe. Dan Zob 10:10, sa lekspresyon i ganny servi pour dile kaye. Alor, sa delo ki ti paret kaye pa ti neseserman vedir ki sa delo ti’n vin ays. Si sa “divan for sorti dan les” mansyonnen dan Egzod 14:21 ti ase fre pour fer sa delo vin ays, san dout Labib ti ava mansyonn lafreser ki sa ti pou’n fer. Vi ki ti napa nanryen vizib ki ti pe tenir sa delo, alor i ti annan sa laparans konmsi i solid, dir, oubyen kaye.
Leson pour nou:
7:14–12:30. Sa Dis Fleo pa ti ariv par azar. Zot ti ganny predir e zot ti ariv egzakteman parey ti’n ganny endike. Sa Dis Fleo i klerman montre ki nou Kreater i annan kontrol lo delo, soley, zensek, zannimo ek dimoun. Zot osi montre ki Bondye i kapab swazir serten maler pour anmenn lo son bann lennmi e anmenmtan protez son bann adorater.
11:2; 12:36. Zeova ti beni son pep. I paret ki i ti pe fer sir ki bann Izraelit ti ganny zot rekonpans pour travay ki zot ti fer Lezip. Zot ti antre Lezip konman en pep lib, me non pa konman prizonnyen lager pour zot vin lesklav.
14:30. Nou kapab annan konfyans ki Zeova pou delivre son bann adorater pandan ‘gran ladetres’ ki pe vini.—Matye 24:20-22; Revelasyon 7:9, 14.
ZEOVA TI ORGANIZ EN NASYON AVEK LI KONMAN SEF SIPRENM
Trwazyenm mwan apre zot delivrans Lezip, bann Izraelit ti pe kanpe obor montanny Sinai. La, zot ti ganny sa Dis Komannman ek lezot lalwa. Zot ti aksepte pour fer en lalyans avek Zeova e zot ti vin en nasyon teokratik, savedir dirize par Zeova li menm. Moiz ti pas 40 zour dan montanny, kot i ti ganny lenstriksyon konsernan vre ladorasyon ek konstriksyon tabernak, en tanp portab. Antretan, bann Izraelit ti fer e ador en pti bef annor. Ler Moiz ti sorti lo montanny e vwar sa ki zot ti pe fer, i ti telman ankoler ki i ti kraz sa de tablet ros ki Bondye ti’n donn li. Apre ki zot ti’n ganny pinisyon neseser, Moiz ti mont ankor lo montanny e i ti ganny de nouvo tablet ros. Ler Moiz ti retournen, tabernak ti konmans ganny fer. Alafen zot premye lannen konman en pep lib, sa zoli latant ek tou son bann meb ti fini ganny fer e ganny etablir. Apre sa, Zeova ti ranpli sa latant avek son laglwar.
Larepons pour bann Kestyon lo Labib:
20:5—Dan ki fason Zeova ti anmenn “pinisyon pour fot bann papa” lo bann fitir zenerasyon? Apre ki en dimoun i ariv en laz responsab, i ganny zize dapre son prop kondwit ek latitid. Me ler nasyon Izrael ti konmans ador zidol, plizyer zenerasyon ki ti vini apre ti soufer konsekans sa aksyon. Menm bann Izraelit fidel ti santi lefe sa move kondwit. Move kondisyon relizye sa nasyon ti fer li difisil pour bann dimoun fidel reste atase avek Zeova.
23:19; 34:26—Ki ti sinifikasyon sa lalwa pour pa bwi en pti kabri dan dile son manman? Bwi en pti kabri (oubyen lezot zannimo) dan dile son manman ti paret en koutim payen avek lide pour fer lapli tonbe. Deplis, vi ki dile en manman se pour nouri son piti, i ti pou en keksoz kriyel pour bwi son piti ladan. Sa lalwa ti ede montre pep Bondye ki zot ti devret montre konpasyon.
23:20-23—Lekel sa lanz ki ganny mansyonnen la, e konman ki non Zeova ti “dan li”? I tre probab, ki sa lanz ti Zezi avan i ti vin lo later. I ti ganny servi pour diriz bann Izraelit lo zot semen pour Later Promiz. (1 Korentyen 10:1-4) Non Zeova i “dan li” dan lesans ki Zezi i sa enn prensipal ki soutenir e sangtifye non son Papa.
32:1-8, 25-35—Akoz Aaron pa ti ganny pini pour fer sa pti bef annor? Aaron pa ti dakor pour ador sa zidol. Plitar, i ti evidan ki i ti zwenn avek lezot Levit pour pran pozisyon pour Bondye e kont sa bann ki ti opoz Moiz. Apre ki bann ki ti koupab ti ganny pini, Moiz ti rapel sa pep ki zot ti’n fer en gro pese. Sa i endike ki ti annan lezot apard Aaron ki ti osi resevwar mizerikord Zeova.
33:11, 20—Ki mannyer Bondye ti koz avek Moiz “fas a fas”? Sa lekspresyon i endik en konversasyon entim ant de dimoun. Moiz ti koz avek reprezantan Bondye e i ti antann bann lenstriksyon sorti kot Zeova atraver sa reprezantan. Me Moiz pa ti vwar Zeova, vi ki ‘napa okenn zonm ki kapab vwar Bondye e kontinyen viv.’ Annefe, Zeova pa ti koz avek Moiz li menm. Galat 3:19 i dir ki lalwa “ti ganny anonse par bann lanz atraver en entermedyer.”
Leson pour nou:
15:25; 16:12. Zeova i pran byen swen avek son pep.
18:21. Bann zonm ki ganny swazir dan kongregasyon Kretyen i devret osi bann zonm konpetan, diny konfyans, pa egois e ki annan lakrent pour Bondye.
20:1–23:33. Napa en lot ki kapab donn pli bon lalwa ki Zeova. Ler bann Izraelit ti obeir son bann lalwa, zot ti kapab ador li dan en fason annord e avek lazwa. Zeova pe diriz en lorganizasyon ozordi. Ler nou korpere avek sa lorganizasyon nou pou trouv boner ek sekirite.
Gran Lenportans pour nou
Ki liv Egzod i dir nou konsernan Zeova? I prezant li konman sa enn ki fourni bezwen lezot avek lanmour, ki anmenn delivrans dan en fason enpresyonan, e ki akonpli son plan. I sa Bondye ki diriz son lorganizasyon teokratik.
Ler ou lir Labib pour lasemenn pour prepar Lekol Minister Teokratik, ou pou sirman ganny touse par sa ki ou aprann dan liv Egzod. Ler ou egzamin sa seksyon “Larepons pour bann Kestyon lo Labib,” ou pou ganny en konprenezon pli oprofon lo serten verse Labib. Bann komanter anba “Leson pour nou” pou montre ou konman ou kapab benefisye atraver lektir Labib pour lasemenn.
[Portre lo paz 8]
Moiz ti annan limilite e se li ki Zeova ti demande pour gid e retir bann Izraelit dan lesklavaz
[Portre lo paz 9]
Sa Dis Fleo ti demontre kontrol ki nou Kreater i annan lo delo, soley, zensek, zannimo ek dimoun
[Portre lo paz 10]
Atraver Moiz, Zeova ti organiz bann Izraelit konman en nasyon avek Li konman sef siprenm