Apresye vre Valer ou Lavi
Apresye vre Valer ou Lavi
“Disan Kris . . . i pirifye zot konsyans avek son travay initil pour nou servi Bondye vivan.”—EBRE 9:14.
1. Kwa ki montre ki nou atas en gran valer avek nou lavi?
SI EN dimoun i demann ou ki kantite valer ou lavi i annan, ki ou pou reponn? Nou atas en gran valer avek nou lavi—nou prop lavi ek lavi lezot. Se pour sa rezon ki nou al kot dokter pour sonny nou ler nou malad oubyen nou al fer en egzaminasyon detanzaot. Nou anvi reste vivan e an bonn sante. Menm laplipar dimoun aze oubyen bann ki annan en dezabilite pa anvi mor. Zot anvi reste vivan.
2, 3. (a) Ki lobligasyon Proverb 23:22 i fer resorti? (b) Ki mannyer Bondye i enplike dan sa lobligasyon ki Proverb 23:22 i mansyonnen?
2 Valer ki ou atase avek ou lavi i annan en lefe lo ou relasyon avek lezot. Par egzanp, Parol Bondye i dir: “Ekout ou papa ki’n fer ou, e pa mepriz ou manman zis akoz i’n vye.” (Proverb 23:22) ‘Ekoute’ pa vedir zis tann en parol. Sa proverb pe demande ki nou ekoute e apre obeir. (Egzod 15:26; Deterononm 7:12; 13:18; 15:5; Zozye 22:2; Psonm 81:13) Akoz Parol Bondye pe demann ou pour ekout ou papa ek ou manman? Pa zis akoz zot pli vye ki ou oubyen zot annan plis leksperyans ki ou. Rezon ki i donnen se akoz zot “in fer ou.” Serten Labib in tradwir sa verse koumsa: “Ekout ou papa ki’n donn ou lavi.” Alor si ou atas en gran valer avek ou lavi, i fer sans pour ou santi en lobligasyon anver sa enn ki’n donn ou lavi.
3 Byensir, si ou en Kretyen ou rekonnet ki ou lavi i sorti premyerman kot Zeova. Gras a li, ou’n “ganny lavi” li menm, ou kapab “mouvmante,” e ou en kreatir ki sansib. Ou egziste, ou kapab mazin konsernan lavenir oubyen fer plan pour lavenir, menm pour ou lavi eternel. (Akt 17:28; Psonm 36:9; Eklezyast 3:11) An armoni avek sa ki Proverb 23:22 i dir, i byen ki nou “ekout” Bondye avek lobeisans. I osi apropriye pour nou anvi konpran pwennvi Bondye lo lavi e les li gid nou, olye prefer lezot lopinyon lo lavi.
Montre Respe pour Lavi
4. Ki mannyer respe pour lavi ti vin en keksoz enportan byen boner dan listwar imen?
4 Byen boner dan listwar imen, Zeova ti fer kler ki i pa pe les zonm servi (oubyen abiz) lavi dan nenport ki fason. Akoz son zalouzi ek lakoler, Kaen ti pran lavi son frer Abel, ki ti en inosan. Eski ou krwar Kaen ti annan drwa fer en desizyon parey konsernan lavi? Bondye pa ti krwar sa. I ti apel Kaen pour demann en leksplikasyon pour sa ki i ti’n fer: “Ki ou’n fer? Ekoute! Disan ou frer laba ater pe kriy mwan.” (Zenez 4:10) Remarke ki disan Abel ater ti reprezant son lavi, ki’n ganny pran dan en fason kriyel e i ti pe kriy Bondye pour vanze.—Ebre 12:24.
5. (a) Ki Bondye ti enterdi dan letan Noe, e pour ki sa ti aplike? (b) Dan ki sans sa lenterdiksyon ti en pa enportan?
5 Apre Deliz, zonm ti fer en nouvo depar, avek zis wit dimoun. Dan en deklarasyon ki aplik pour tou imen, Bondye ti devwal plis lenformasyon konsernan valer ki i atase avek lavi ek disan. I ti dir ki imen i kapab manz lavyann zannimo, me i ti met en restriksyon: “Tou zannimo ki bouze e vivan i kapab ganny servi konman manze pour zot. Pareyman, mon donn zot tou bann vezetasyon ver. Zis laser avek son lavi, savedir son disan, zot pa devret manze.” (Zenez 9:3, 4) Serten Zwif i krwar sa ti vedir ki imen pa devret manz lavyann oubyen disan en zannimo ki ankor vivan. Me plitar i ti kler ki Bondye ti pe defann manz disan pour viv. Deplis, sa lord ki Bondye ti donnen atraver Noe ti en gran pa an avan dan lakonplisman Son gran plan konsernan disan. Sa ti en plan ki ti pou permet bann imen ganny lavi eternel.
6. Ki mannyer atraver Noe Bondye ti fer resorti Son pwennvi lo valer lavi?
6 Bondye ti kontinyen: ‘Deplis, mon pou demande ki zot disan i ganny rann. Mon pou demann tou kreatir vivan, zonm, e tou sa ki en frer pour li pour rann lavi en zonm. Nenport ki ki vers disan zonm, son prop disan pou ganny verse par zonm, parski i ti fer zonm dan resanblans Bondye.’ (Zenez 9:5, 6) Ou kapab vwar atraver sa deklarasyon ki ti ganny fer pour lafanmiy imen antye, ki pour Bondye disan en zonm i reprezant son lavi. Kreater i donn en dimoun lavi, alors personn pa devret pran sa lavi, ki ganny reprezante par son disan. Si en dimoun i komet en mert parey Kaen, Kreater i annan drwa ‘demann’ son lavi an retour.
7. Akoz nou devret enterese avek deklarasyon ki Bondye ti fer avek Noe konsernan disan?
7 Atraver son deklarasyon, Bondye ti pe demann imen pour pa mal servi disan. Eski ou’n deza demann ou lekor akoz sa? Anplis ki sa, kwa ki’n fer Bondye annan en tel pwennvi lo disan? Anfet, larepons i annan pour fer avek enn bann lansennyman pli enportan dan Labib. Sa lansennyman i tre enportan dan sa mesaz ki nou prese, kantmenm bokou larelizyon i prefere inyor li. Ki sa lansennyman, e konman ou lavi, desizyon, ek aksyon i enplike?
Disan—Konman i ganny byen servi?
8. Dan Lalwa, ki restriksyon Zeova ti mete lo lizaz disan?
8 Zeova ti donn plis detay lo lavi ek disan kan i ti donn nasyon Izrael Lalwa Moiz. Kan i ti fer sa, i ti pran ankor en lot pa dan lakonplisman son plan. Petet ou konnen ki Lalwa ti demann pour ofer Bondye bann lofrann parey legren, delwil, ek diven. (Levitik 2:1-4; 23:13; Nonm 15:1-5) Ti osi annan bann sakrifis zannimo. Konsernan sakrifis zannimo, Bondye ti dir: “Lavi i dan disan e mwan mon’n met li lo lotel pour zot kouver zot pese avek, akoz disan i kouver pese par sa lavi dan li. Se pour sa ki mon’n dir avek bann garson Izrael: ‘Personn parmi zot pa devret manz disan.’ ” Zeova ti kontinyen par dir ki si en dimoun parey en saser oubyen en fermye i touy en zannimo pour manze, i ti bezwen les son disan koul ater e kouver li avek lapousyer. Later i marspye Bondye, e letan sa dimoun i les sa disan koul ater, i rekonnet ki lavi pe retourn kot sa Enn ki donn lavi.—Levitik 17:11-13; Izai 66:1.
9. Ki sa sel fason Lalwa ti permet servi disan, e avek ki bi?
9 Sa lalwa pa ti zis en koutim relizye ki napa okenn lenportans pour nou. Eski ou’n remarke akoz bann Izraelit pa ti konsonm disan? Bondye ti dir: “Se pour sa ki mon’n dir avek bann garson Izrael: ‘Personn parmi zot pa devret manz disan.’ ” Akoz sa? “Mwan mon’n met [disan] lo lotel pour zot kouver zot pese avek.” Eski ou remarke ki sa i donn plis leklersisman akoz Bondye ti dir Noe ki imen pa devret manz disan? Kreater ti deside konsider disan konman en keksoz vreman enportan, e rezerv li pour en lizaz spesyal ki ti pou kapab sov bokou lavi. I ti pou zwe en rol enportan pour kouver pese. Alors, anba Lalwa, sel fason ki Bondye ti permet servi disan ti lo lotel pour kouver pese bann Izraelit, ki ti oule Zeova pardonn zot.
10. Akoz disan zannimo pa ti kapab pardonn pese konpletman, me ki sa bann sakrifis anba Lalwa ti fer rapel?
10 Bann Kretyen ti familye avek sa lide ki disan i servi pour kouver pese. Zapot Pol ti pe refer avek sa laspe dan Lalwa, kan i ti ekrir: “Annefe, dapre Lalwa preski tou keksoz i ganny pirifye par disan, e san versman disan napa pardon pese.” (Ebre 9:22) Pol ti montre klerman ki sa bann sakrifis ki bann Izraelit ti ofer pa ti fer zot vin parfe e san pese. I ti ekrir: “Sa bann sakrifis i fer bann dimoun rapel zot pese lannen apre lannen, parski i enposib pour disan toro ek bouk fer disparet pese.” (Ebre 10:1-4) Kantmenm sa, sa bann sakrifis ti itil. Zot ti rapel bann Izraelit ki zot ti bann peser e zot ti bezwen en lot keksoz pour ganny pardonnen konpletman. Me si disan ki ti reprezant lavi bann zannimo pa ti kapab kouver pese konpletman, eski ti annan okenn lezot disan ki ti pou kapab fer li?
Sa Enn ki donn Lavi i ofer Solisyon
11. Ki mannyer nou konnen ki sakrifis disan zannimo ti pe viz ver en serten keksoz?
11 Anfet, sa Lalwa ti pe viz ver en keksoz bokou pli efikas dan lakonplisman lavolonte Bondye. Pol ti demande: “Alor, akfer Lalwa?” I ti reponn: “I ti ganny entrodwi akoz pese, ziska ki sa desandan Abraam i arive, avek ki promes ti fer. Sa Lalwa ti ganny anonse par bann lanz atraver en entermedyer [Moiz].” (Galat 3:19) Pareyman, Pol ti ekrir: “Lalwa annefe, zis parey en lonbraz bann bon keksoz ki pe vini, non pa en reprezantasyon egzakt bann realite.”—Ebre 10:1.
12. Eksplike konman plan Bondye konsernan disan in devlope ptit-a-pti.
12 An rezimen, gard antet ki dan letan Noe Bondye ti permet bann imen manz lavyann zannimo me zot pa ti kapab konsonm disan. Avek letan, Bondye ti dir ki “lavi i dan disan.” Wi, i ti deside pour konsider disan konman lavi li menm e i ti dir: “Mwan mon’n met [disan] lo lotel pour zot kouver zot pese avek.” Me ti annan en lot zoli devlopman dan plan Bondye ki ti pe al arive. Lalwa ti lonbraz bann bon keksoz ki ti pe vini. Ki sa bann bon keksoz?
13. Akoz lanmor Zezi ti enportan?
13 Larealite ti tourn otour lanmor Zezi Kri. Ou konnen ki Zezi ti ganny tortire e kloute lo en poto. I ti mor konman en kriminel. Pol ti ekrir: “Kan nou ti ankor san okenn lafors, Kris dan letan fikse, ti mor pour bann peser. . . . Bondye in prouv son lanmour pour nou: Kan nou ti ankor peser, Kris in mor pour nou.” (Romen 5:6, 8) Letan Kris ti mor pour nou, i ti fourni en ranson pour kouver nou pese. Sa ranson i tre enportan dan sa mesaz ki nou prese. (Matye 20:28; Zan 3:16; 1 Korentyen 15:3; 1 Timote 2:6) Ki sa i annan pour fer avek disan ek lavi, e konman ou lavi i enplike?
14, 15. (a) Ki mannyer serten tradiksyon Labib i met lanfaz lo lanmor Zezi dan Efezyen 1:7? (b) Ki pwen dan Efezyen 1:7 ki nou kapab manke?
14 Serten larelizyon i met lanfaz lo lanmor Zezi. Zot bann manm i dir bann keksoz parey “Zezi in mor pour mwan.” Annou vwar konman serten Labib i tradwir Efezyen 1:7: “Se dan li e atraver son lanmor ki nou’n ganny delivrans, savedir nou lofans in ganny retire.” (The American Bible, par Frank Scheil Ballentine, 1902) “Par lanmor Kris nou’n ganny libere, e nou pese in ganny pardonnen.” (Today’s English Version, 1966) “Se dan Kris e atraver li ek sakrifis son lavi ki nou’n ganny libere, en liberasyon ki vedir pardon pour pese.” (The New Testament, par William Barclay, 1969) “Se atraver lanmor Kris ki nou pese in ganny pardonnen e nou’n ganny libere.” (The Translator’s New Testament, 1973) Dan sa bann tradiksyon, ou kapab vwar ki lanfaz i ganny mete lo lanmor Zezi. Serten i kapab dir, ‘Me lanmor Zezi i vreman enportan. Me ki sa bann tradiksyon pa mansyonnen?’
15 Anfet, si ou ti bezwen depan zis lo sa bann tradiksyon, ou ti kapab mank en pwen byen enportan, e sa ti kapab restrikte ou konprenezon lo mesaz Labib. Sa bann tradiksyon i kasyet en mo Grek, ki teks orizinal Efezyen 1:7 i servi ki vedir “disan.” Alors, bokou Labib, parey Traduction du monde nouveau, i pli pre avek teks orizinal: “Dan li, nou’n ganny delivrans par son disan, nou’n resevwar pardon nou pese, selon larises son lagras.”—Nou ki’n met an italik.
16. Ki sa bout “par son disan” i devret fer nou konpran?
16 Sa bout “par son disan” i tre enportan e i devret fer nou konpran bokou keksoz an rapor avek disan. Bokou plis ti enplike olye zis lanmor en dimoun, menm lanmor sa zonm parfe, Zezi. Zezi ti akonpli sa ki Lalwa ti’n anonse, sirtou sa Zour Propisyasyon. Pour sa zour spesyal, bann zannimo ki ti’n ganny presize par Lalwa ti ganny sakrifye. Apre gran pret ti anmenn en pe zot disan dan lasanm Tre Sen dan tabernak oubyen tanp. La i ti prezant sa disan devan Bondye, konmsi Bondye ti vreman la.—Egzod 25:22; Levitik 16:2-19.
17. Ki mannyer Zezi ti akonpli sa ki Zour Propisyasyon ti reprezante?
17 Pol ti eksplike ki Zezi ti akonpli sa ki Zour Propisyasyon ti reprezante. Premyerman, i ti mansyonnen ki gran pret an Izrael ti antre dan Tre Sen enn fwa par an avek disan ofer pour “limenm premyerman, e pour pese lepep.” (Ebre 9:6, 7) An armoni avek sa, apre ki Zezi ti resisite konman en lespri, i ti al dan lesyel. Vi ki i ti en lespri, i ti napa en lekor avek laser ek disan, i ti kapab “prezant limenm devan Bondye pour nou.” Ki i ti prezant avek Bondye? Pa en keksoz fizik me en keksoz ki annan bokou sinifikasyon. Pol ti kontinyen: “Kris in vini konman Gran Pret . . . , i’n antre enn fwa pour tou dan sangtyer, non pa avek disan bouk ek toro, me avek son prop disan pour fer nou ganny en delivrans eternel. Si annefe, i ti posib ki disan bouk ek toro . . . zistifye zot, konbyen plis ankor disan Kris, ki par Lespri eternel ti ofer limenm konman en viktim san tas devan Bondye, i pirifye zot konsyans avek son travay initil pour nou servi Bondye vivan.” Wi, Zezi ti prezant Bondye valer son disan.—Ebre 9:11-14, 24, 28; 10:11-14; 1 Pyer 3:18.
18. Akoz sa ki Labib i dir lo disan i devret enportan pour nou Kretyen ozordi?
18 Sa laverite divin i fer nou konpran bann laspe merveye sa ki Labib i dir lo disan, setadir akoz Bondye i vwar li parey i vwar, ki pwennvi nou devret annan lo la, e akoz nou devret respekte restriksyon ki Bondye in mete lo fason ki nou servi disan. Kan ou lir bann Lekritir Grek, ou pou trouv plizyer landrwa ki refer avek disan Kris. (Vwar bwat.) Sa i montre klerman ki sak Kretyen i devret met lafwa dan “disan [Kris.]” (Romen 3:25, nou ki’n met an italik) I’n posib pour nou ganny pardon e annan lape avek Bondye selman “atraver disan ki i’n [Zezi] verse.” (Kolosyen 1:20, NW ) Sa i sirman leka pour bann ki Zezi in fer en lalyans spesyal avek pour renny avek li dan lesyel. (Lik 22:20, 28-30; 1 Korentyen 11:25; Ebre 13:20) I osi leka pour “sa gran lafoul” ozordi, ki pou sirviv ‘sa gran ladetres’ ki pe vini e viv pour touzour dan paradi isi lo later. Dan en sans senbolik, zot ‘in lav zot rob dan disan Lanyo.’—Revelasyon 7:9, 14.
19, 20. (a) Akoz Bondye in swazir pour restrikte lafason ki nou servi disan, e konman nou devret santi anver sa? (b) Ki nou devret enterese pour konnen?
19 I kler ki pour Bondye disan i annan en sinifikasyon spesyal. Sa i devret leka pour nou osi. Kreater, ki santi li konsernen avek lavi, i annan sa drwa pour met en limit lo sa ki imen i fer avek disan. Akoz son gran konsern menm pour nou lavi, i ti determinen pour servi disan selman dan en fason tre enportan, sa sel fason ki fer lavi eternel posib. Sa ti enplik disan presye Zezi. Pa nou rekonesan ki Zeova in azir pour nou prop dibyen par servi disan, disan Zezi, dan en fason ki sov lavi! Deplis, pa nou devret rekonesan anver Zezi ki’n vers son disan pour nou! Vreman, nou kapab konpran santiman zapot Zan: “Zezi-Kri i kontan nou, e i’n delivre nou avek tou nou bann pese par son disan, e i’n fer nou vin en rwayonm pret pour servi son Bondye e Papa. Pour li glwar, ek pouvwar pour touzour! Amenn.”—Revelasyon 1:5, 6.
20 Depi byen lontan, nou Bondye ki’n donn nou lavi e ki ranpli avek sazes ti annan antet sa plan pour sov lavi. Alors, nou kapab demande, ‘Ki lefe sa i devret fer lo nou desizyon ek aksyon?’ Lartik swivan pou adres sa kestyon.
Ki ou pou reponn?
• Ki nou kapab aprann konsernan pwennvi Bondye lo disan dan sa resi lo Abel ek Noe?
• Ki restriksyon Bondye ti mete lo konman servi disan dan Lalwa e akoz?
• Ki mannyer Zezi ti akonpli sa ki Zour Propisyasyon ti reprezante?
• Ki mannyer disan Zezi i kapab sov nou lavi?
[Kestyon]
[Bwat lo paz 12]
KI DISAN KI SOV LAVI?
“Vey byen zot lekor e pran swen troupo ki Sent-Espri in konfye zot konman bann gardyen. Pran swen Legliz ki Bondye in gannyen par disan son prop Garson.”—Akt 20:28.
“Aprezan ki nou’n ganny konsidere konman zis, par son disan, i annan plis rezon pour sov nou devan lakoler Bondye.”—Romen 5:9.
“Zot ti . . . san okenn lespwar e san Bondye dan lemonn. Me aprezan, dan Kris zot ki ti lwen in ganny raprose par disan Kris.”—Efezyen 2:12, 13.
“Par son Garson alor, Bondye in deside rekonsilye avek limenm liniver an antye. E ensi par [disan verse lo poto, NW ] Bondye in fer lape, e in rekonsilye avek limenm tou keksoz swa lo later ou dan lesyel.”—Kolosyen 1:19, 20.
“Mon bann frer, . . . nou annan konfyans pour antre dan sangtyer par disan Zezi.”—Ebre 10:19.
“Zot in ganny delivre dan zot mannyer viv initil ki zot ti erite avek zot zanset, pa par mwayen bann lobze ki perdi valer, . . . me par disan presye Kris, ki’n ofer limenm konman en lanyo san defo e san okenn tas.”—1 Pyer 1:18, 19.
“Si nou pe viv dan lalimyer parey limenm i dan lalimyer, nou pe viv ini avek kanmarad e disan Zezi, son garson i lav nou avek tou pese.”—1 Zan 1:7.
“Ou diny pour resevwar sa liv e dekaste son bann sele. Parski ou ti ganny egorze, e par ou disan, ou’n raste pour Bondye, zonm dan tou ras, tou langaz, tou pep ek tou nasyon.”—Revelasyon 5:9.
“Lakizater nou bann frer . . . in ganny zet ater. E zot in ganny laviktwar lo li akoz disan Lanyo e akoz parol mesaz ki zot in anonse.”—Revelasyon 12:10, 11.
[Portre lo paz 10]
Atraver Lalwa, Bondye ti montre klerman ki disan ti pou zwe en rol dan pardon pese
[Portre lo paz 11]
Atraver disan Zezi, bokou lavi ti pou kapab ganny sove