Ki Valer Lespwar Rezireksyon i annan pour ou?

“Ou pe ouver ou lanmen e satisfer dezir tou kreatir vivan.”​—PSONM 145:16.

1-3. Ki lespwar serten i annan pour lavenir? Donn legzanp.

CHRISTOPHER ki ti annan nef an ek son frer ansanm avek zot tonton, tantin, ek zot de kouzen ti’n pas lazournen bomaten dan predikasyon obor lavil Manchester, Langleter. Nou magazin Réveillez-vous!, i eksplik nou sa ki ti pase. “Son apremidi, zot ti vwayaz ansanm pour vizit bann landrwa enteresan Blackpool, en lavil obor lakot. Zot tou le 6 ti parmi 12 dimoun ki ti ganny touye sirplas dan en aksidan trafik, ki lapolis ti dekrir konman ‘en vre olokos.’ ”

² Sa zour swar avan sa trazedi, sa fanmiy ti’n asiste Letid Liv Kongregasyon, kot sa size lanmor ti’n ganny diskite. Papa Christopher ti dir: “Christopher ti toultan en garson ki ti reflesir en kantite. Sa zour swar i ti koz konsernan en nouvo lemonn ek son lespwar pour lavenir. Apre, anmezir ki nou ti kontinyen koze, toudenkou Christopher ti dir: ‘En byenfe konn laverite konman en Temwen Zeova i ki menm si lanmor i anmenn latristes, nou konnen ki nou pou vwar kanmarad ankor lo later en zour.’ Personn sa zour pa ti mazinen ki mannyer sa parol ti pou reste inoubliyab” *

³ Bokou lannen avan, an 1940, en Temwen Otrisyen apele Franz, ti pe al ganny egzekite akoz i ti’n refize kas son fidelite avek Zeova. Dan en sant detansyon Berlin, Franz ti ekrir son manman: “Avek sa ki mon konnen, si mon ti’n fer sa ve [militer], mon ti pou’n fer en pese ki merit lanmor. Sa ti pou en move keksoz pour mwan. Mon pa ti pou ganny en rezireksyon. . . . Aprezan, mon ser Manman ek tou mon frer ek ser, ozordi zot in pas santans lo mwan, pa fodre ki zot per, i en santans lanmor, e mon pou ganny egzekite demen bomaten. Mon lafors i sorti kot Bondye, zis parey in toultan leka avek tou sa bann vre Kretyen dan lepase. . . . Si zot reste ferm ziska lanmor, nou pou zwenn ankor dan rezireksyon. . . . Ziska nou zwenn ankor.” *

4. Ki lefe sa bann leksperyans mansyonnen la i annan lo ou, e ki nou pou egzaminen?

⁴ Lespwar rezireksyon ti annan bokou valer pour Christopher ek Franz. I ti reel pour zot. Sirman sa bann resi i tous nou leker! Pour ogmant nou lapresyasyon pour Zeova e pour fortifye nou lespwar dan rezireksyon, annou egzaminen akoz rezireksyon pou arive e ki lefe sa i devret fer lo nou personnelman.

Vizyon Rezireksyon pour viv lo Later

5, 6. Ki sa vizyon ki zapot Zan ti ekrir dan Revelasyon 20:12, 13 i revele?

⁵ Dan en vizyon ki zapot Zan ti gannyen lo bann levennman pandan Renny Milener Kris, i ti vwar rezireksyon lo later pe arive. I ti dir: “Mon ti war bann mor gran konman pti.” Apre i ti kontinyen: “Lanmer ti rann son bann mor ki ti ladan. Lanmor ek lemonn  lanmor [oubyen Lades] ti rann son bann mor.” (Revelasyon 20:12, 13) Nenport zot pozisyon, “gran konman pti” tou sa bann ki Lades (Seol), oubyen latonm in pran zot, pou ganny large. Sa bann ki’n perdi zot lavi dan lanmer pou osi retourn vivan sa letan. Sa levennman merveye i form parti plan Zeova.

⁶ Ler Kris i konmans son renny mil an, i pou anmar Satan e zet li dan labim. Pandan renny Kris, tou dimoun ki resisite oubyen ki sirviv gran ladetres pa pou ganny anbete par Satan. Sa i akoz i pa pou kapab fer nanryen sa letan. (Revelasyon 20:1-3) Mil an i kapab paret bokou letan pour ou, me annefe Zeova i vwar li “konman en zour.”—2 Pyer 3:8.

7. Pandan Renny Milener Kris, lo ki baz ki en dimoun pou ganny zize?

⁷ Dapre sa vizyon, Renny Milener Kris pou en letan zizman. Zapot Zan ti ekrir: “Mon ti war bann mor gran konman pti, pe debout devan tronn, e bann liv ti’n ouver. Ti annan osi en lot liv ti’n ouver: liv lavi. Bann mor ti ganny zize dapre sa ki zot ti’n fer, e ki ti’n ganny ekri dan sa bann liv.” (Revelasyon 20:12, 13) Remarke ki sa zizman pa baze lo sa ki en dimoun in fer oubyen pa’n fer avan i ti mor. (Romen 6:7) Okontrer, i relye avek “bann liv” ki pou ganny ouver. Sa ki en dimoun i fer apre ki i aprann sa ki annan dan sa bann liv pou ganny servi pour determinen si son non pou ganny ekrir dan “liv lavi.”

“Resisite pour resevwar Lavi” oubyen “resisite pou ganny kondannen”

8. Ki sa de keksoz ki kapab arive pour bann dimoun ki resisite?

⁸ Pli boner dan vizyon Zan, Zezi i ganny dekrir konman sa enn ki posed “lakle lanmor ek lakle lemonn lanmor [oubyen Lades, NW ].” (Revelasyon 1:18) I servi konman “sa enn ki donn lavi,” ki’n ganny pouvwar pour ziz “bann vivan ek bann mor.” (Akt 3:15; 2 Timote 4:1) Ki mannyer i pou fer sa? Par resisit sa bann ki pe dormi dan lanmor. Zezi ti dir avek lafoul ki i ti pres avek: “Pa bezwen etonnen ler mon dir sa, akoz sa ler pe arive kan tou bann mor ki dan tonbo pou tann son lavwa e zot pou sorti dan zot tonbo.” Apre sa i ti azoute: “Bann ki’n fer sa ki byen, pou resisite pour resevwar lavi, me bann ki’n fer sa ki mal, pou resisite pou ganny kondannen.” (Zan 5:28-30) Alor, ki lavenir i rezerve pour bann zonm ek fanm fidel dan letan lontan?

9. (a) Ler zot retourn vivan, ki bokou pou sirman aprann? (b) Ki sa gran travay edikasyonnel ki pou ganny fer?

⁹ Ler bann fidel dan letan pase i retournen dan rezireksyon, zot pou dekouver ki bann promes ki zot in met konfyans ladan i aprezan en realite. Zot pou vreman enterese pour konn lidantite Desandans fanm Bondye, mansyonnen dan Zenez 3:15, ki premye profesi Labib! Zot pou sirman kontan pour tande ki Mesi promiz, Zezi, in reste fidel ziska lanmor, kot i ti donn son lavi konman en sakrifis! (Matye 20:28) Sa bann vivan ki pou akeyir zot pou trouv bokou lazwa pour ed zot konpran ki sa laranzman sakrifis Zezi i demontre labonte leker ek mizerikord Zeova. Ler bann ki resisite i dekouver ki Rwayonm Bondye pe fer dan lakonplisman plan Zeova pour later, zot leker pou sirman deborde avek louanz pour Zeova. Zot pou annan ase loportinite pour demontre zot devosyon anver zot bon Papa dan lesyel ek son Garson. Tou dimoun ki vivan sa letan pou partisip avek lazwa dan sa gran travay edikasyonnel pour ansenny sa plizyer bilyon dimoun resisite, ki zot osi zot bezwen aksepte laranzman ranson Bondye.

10, 11. (a) Ki bann loportinite sa Milener pou ofer tou dimoun lo later? (b) Ki lefe sa i devret fer lo nou?

¹⁰ Ler Abraam i resisite i pou trouv bokou rekonfor ler i eksperyans realite lavi anba dominasyon sa “lavil” ki i ti pe espere pour  vwar. (Ebre 11:10) Zob en zonm fidel, pou sirman kontan ler i aprann ki son fason viv in fortifye lezot serviter Zeova, ki’n fer fas avek bann leprev ki’n teste zot fidelite! Danyel pou vreman anvi konn konsernan lakonplisman bann profesi ki i ti ganny enspire pour ekrir!

¹¹ Wi, vreman tou dimoun ki ganny lavi dan nouvo lemonn ladrwatir, ki swa par rezireksyon oubyen par sirviv gran ladetres, pou aprann bokou keksoz lo plan Zeova pour later ek son zabitan. Sa posibilite pour viv pour touzour e pour glorifye Zeova pour leternite pou sirman fer sa progranm ledikasyon pandan sa Mil an vin en vre plezir. Me sa ki nou pou fer personnelman ler nou aprann konteni sa bann liv ki pou pli enportan. Eski nou pou aplik sa ki nou aprann? Eski nou pou reflesir e pran aker sa lenformasyon esansyel ki pou fortifye nou pour reziste lesey final Satan pour detourn nou avek laverite?

12. Kwa ki pou ed sak dimoun partisip plennman dan sa travay edikasyonnel e osi pour transform later dan en paradi?

¹² Nou pa devret oubliy bann benediksyon merveye ki pou arive atraver bann byenfe sakrifis Kris. Sa bann ki pou reganny lavi dan rezireksyon pa pou annan sa bann maladi ek dezabilite ki nou eksperyanse ozordi. (Izai 33:24) En lekor an bonn sante ek posibilite en lasante parfe pou permet tou zabitan sa nouvo lemonn partisip plennman dan sa travay edikasyonnel pour enstri semen lavi sa plizyer bilyon dimoun ki pou resisite. Sa bann zabitan pou osi partisip dan sa pli gran travay ki pa’n zanmen ganny fer lo later, kot zot pou transform later an antye dan en paradi pour laglwar Zeova.

13, 14. Pour ki rezon Satan pou ganny large dan tes final, e ki kapab arive avek nou personnelman?

¹³ Ler Satan i ganny large dan labim pour tes final, i pou esey anbet imen ankor enn fwa. Dapre Revelasyon 20:7-9, tou ‘bann nasyon ki ganny tronpe’ oubyen bann group dimoun ki soumet anba move lenfliyans Satan pou ganny zot zizman destriksyon: ‘Dife pou desann sorti dan lesyel e detri zot tou.’ Pour bann parmi zot ki’n ganny resisite pandan sa Milener, zot destriksyon i vedir ki zot in ganny en rezireksyon pou ganny kondannen. Tandis ki bann ki resisite e reste fidel pou ganny kado lavi eternel. Zot rezireksyon i fer zot ganny “resisite pour resevwar lavi.”—Zan 5:29.

¹⁴ Ki mannyer lespwar rezireksyon i kapab rekonfort nou konmela menm? Ki nou bezwen fer pour fer sir ki nou pou ganny son bann byenfe dan lavenir?

Leson nou kapab aprann ozordi

15. Ki mannyer krwayans dan rezireksyon i kapab ed nou ozordi?

¹⁵ Petet resanman ou’n perdi en dimoun ki ou kontan dan lanmor e ou pe esey fer fas avek sa gran sanzman ki sa in anmennen. Lespwar rezireksyon i ed ou ganny en trankilite enteryer ek lafors ki sa bann ki pa konn laverite napa. Pol ti konsol bann Tesalonisyen: “Nou pa oule ki zot reste dan linyorans konsernan bann ki’n mor, pour ki zot pa sagren parey bann ki napa lesperans.” (1 Tesalonisyen 4:13) Eski ou trouv ou dan sa nouvo lemonn, pe vwar dimoun ganny resisite? Si i leka, alor trouv rekonfor konmela menm par  reflesir lo sa posibilite pour revwar sa bann ki ou kontan ankor.

16. Ki mannyer ou kapab santi ler rezireksyon i arive?

¹⁶ Kekfwa ou pe soufer konsekans rebelyon Adan atraver en move lasante. Pa les sa soufrans ki sa i anmennen fer ou oubliy sa lespwar merveye pour ou ganny resisite e retourn vivan ankor avek en nouvo lasante ek viger dan nouvo lemonn. La, ler ou lizye i ouver e ou vwar bann figir zwaye ki pare pour partaz avek ou zot lazwa ki ou’n resisite, sirman ou pou remersi Bondye pour son labonte leker.

17, 18. Ki de leson enportan nou devret pran aker?

¹⁷ Antretan, annou vwar de leson ki nou devret pran aker. Enn i lenportans pour servi Zeova konmela menm avek tou nou leker. Par imit Zezi Kri, nou Met, ler nou fer sakrifis dan nou lavi sa i demontre lanmour pour Zeova e pour nou prosen. Si lopozisyon oubyen persekisyon i afekte nou lavi oubyen nou liberte, nou determinen pour reste ferm dan lafwa dan nenport ki leprev nou kapab rankontre. Si serten i menas pour touy nou, dan sa ka lespwar rezireksyon i konsol e donn nou lafors pour reste fidel avek Zeova ek son Rwayonm. Wi, nou devouman pour travay predikasyon Rwayonm e fer disip i donn nou sa posibilite pour ganny bann benediksyon eternel ki Zeova in anmase pour bann dimoun drwat.

¹⁸ En dezyenm leson i annan pour fer avek fason ki nou fer fas avek tantasyon koze par nou lenperfeksyon. Nou konnesans lo lespwar rezireksyon ek nou lapresyasyon pour labonte leker Zeova i fortifye nou determinasyon pour reste ferm dan lafwa. Zapot Zan ti dir: “Pa bezwen kontan lemonn ni sa bann keksoz ki dan lemonn. Si en dimoun i kontan lemonn, i napa lanmour pour nou Papa dan li. Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn. Lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:15-17)  Bann keksoz materyel ki atiran dan sa lemonn pou napa gran lenportans pour nou ler nou konpar li avek “vre lavi.” (1 Timote 6:17-19) Si nou ganny tante pour fer en keksoz mal, nou pou atoupri reziste. Nou realize ki si nou kontinyen viv en lavi ki depler Zeova e nou mor avan Armagedon, sa i kapab met nou dan menm pozisyon avek sa bann ki napa lespwar pour ganny resisite.

19. Ki sa gran loner nou pa devret oubliye?

¹⁹ Parlao tousala, nou pa devret oubliy sa gran loner pour fer leker Zeova zwaye konmela e pour touzour. (Proverb 27:11) Nou fidelite ziska lanmor oubyen nou fidelite ziska lafen sa move sistenm i montre Zeova ki Li ki annan drwa pour dirize. Apre pa i pou en lazwa pour viv dan Paradi lo later swa par sirviv gran ladetres oubyen par eksperyans en rezireksyon mirakile!

Satisfer nou Dezir

20, 21. Kwa ki pou ed nou reste fidel menm si nou annan kestyon lo rezireksyon ki napa larepons? Eksplike.

²⁰ Nou diskisyon pa’n reponn tou nou kestyon lo rezireksyon. Ki mannyer Zeova pou aranz keksoz pour sa bann ki ti marye avan zot ti mor? (Lik 20:34, 35) Eski rezireksyon pou ariv dan landrwa kot sa dimoun ti mor? Eski bann ki pou resisite pou retournen pour viv pros avek zot fanmiy? I annan ankor lezot kestyon lo laranzman rezireksyon ki nou pa konn larepons. Kantmenm sa, nou bezwen kit antet parol Zeremi: “Zeova i bon anver sa enn ki pe met lespwar dan li, anver sa enn ki kontinyen rod li. I bon ki en dimoun i devret esper delivrans Zeova, menm an silans.” (Lamantasyon 3:25, 26) Dan letan ki Zeova in swazir, nou pou ganny bann larepons satisfezan pour tou nou kestyon. Akoz nou kapab asire?

²¹ Reflesir lo parol enspire sa psalmis ler i ti sant sa lo Zeova: “Ou pe ouver ou lanmen e satisfer dezir tou kreatir vivan.” (Psonm 145:16) Anmezir nou vin vye, nou dezir i sanze. Sa ki nou anvi ler nou ti zanfan i nepli nou dezir ozordi. Nou pwennvi lo lavi i ganny afekte par sa ki nou eksperyanse osi byen par nou lespwar. Me nenport dezir apropriye ki nou pou annan dan sa nouvo lemonn, Zeova pou sirman satisfer zot.

22. Akoz nou annan bon rezon pour loue Zeova?

²² Keksoz pli enportan ozordi i ki nou reste fidel. ‘Bann administrater, zot devre ganny trouve fidel.’ (1 Korentyen 4:2) Nou administrater sa bon nouvel merveye lo Rwayonm Bondye. Nou zefor pour anons sa bon nouvel avek tou dimoun ki nou rankontre i ed nou reste lo semen lavi. Toultan mazinen ki “letan ek levennman san ekspekte” i ariv lo nou tou. (Eklezyast 9:11) Si ou gard ou lafwa dan lespwar rezireksyon, sa pou anpes ou pran tro bokou traka konsernan lensertitid dan lavi toulezour. Annan konviksyon ki si i paret ki ou pou mor avan konmansman Renny Milener Kris, ou kapab trouv konsolasyon dan lasirans ki soulazman pou arive. Dan letan ki Zeova in fikse, ou pou kapab repet parol ki Zob ti dir avek Kreater: “Ou pou apel mwan, e mon pou reponn ou.” Tou laglwar i al pour Zeova, ki anvi redonn lavi tou sa bann ki dan son memwar!—Zob 14:15.

[Not anba lo paz]

Eski ou rapel?

• Lo ki baz dimoun pou ganny zize pandan sa Milener?

• Akoz serten pou “resisite pour resevwar lavi” e lezot “resisite pou ganny kondannen”?

• Ki mannyer lespwar rezireksyon i konsol nou ozordi?

• Ki mannyer parol dan Psonm 145:6 i ed nou fer fas avek bann kestyon lo rezireksyon ki nou napa larepons?

[Kestyon]

[Portre lo paz 27]

Ki mannyer krwayans dan rezireksyon i ed nou ozordi?