Les Parol Bondye ekler ou Semen
Les Parol Bondye ekler ou Semen
“Ou parol i . . . en lalimyer pour mon semen.”—PSONM 119:105.
1, 2. Ki sa sel fason parol Zeova pou ekler nou semen?
PAROL Zeova pou ekler nou semen si selman nou dakor pour les sa arive. Pour nou kapab benefisye avek sa lalimyer spirityel, nou bezwen etidye seryezman Parol Bondye e aplik bann konsey ki i donnen. Sa i sel fason ki nou pou kapab partaz sa menm santiman avek sa psalmis ki ti dir: “Ou parol i en lalanp pour mon lipye, e en lalimyer pour mon semen.”—Psonm 119:105.
2 Annou egzamin Psonm 119:89-176. I vreman annan en kantite lenformasyon dan sa bann verse ki’n ganny ekrir dan 11 kouple! Sa bann lenformasyon i kapab ed nou reste lo sa semen ki anmenn ver lavi eternel.—Matye 7:13, 14.
Akoz nou devret apresye Parol Bondye?
3. Ki mannyer Psonm 119:89, 90 i montre ki nou kapab annan konfyans dan parol Bondye?
3 Ler nou apresye parol Zeova, sa pou ed nou vin for spirityelman. (Psonm 119:89-96) Sa psalmis ti sante: “Ou parol in ganny mete dan lesyel pour en letan endefini, O Zeova. . . . Ou’n solidman etablir later pour ki i reste stab.” (Psonm 119:89, 90) Parey Bondye in dir, tou sa ki dan lesyel i bouz parfetman dan zot mouvman dapre bann “lalwa lesyel,” e later in ganny solidman etablir pour touzour. (Zob 38:31-33; Psonm 104:5) Nou kapab annan konfyans dan tou parol ki sorti dan labous Zeova; sa ki Bondye i dir pou “sirman annan sikse” kan i akonpli son plan.—Izai 55:8-11.
4. Ki rezilta bann ki apresye parol Bondye i gannyen menm si zot soufer?
4 Sa psalmis ti’n kapab trouv lanmor dan tou son bann soufrans si i pa ti’n apresye lalwa Bondye. (Psonm 119:92) Sa psalmis pa ti pe ganny persekite par bann etranze, me par bann Izraelit enfidel ki pa ti kontan li. (Levitik 19:17) Me sa pa ti fer li bes lebra akoz i ti kontan lalwa Bondye e sanmenm sa ki ti soutenir li. Kan i ti Korent, lavi zapot Pol ti an danze akoz “bann fo frer,” petet sa bann ki ti swadizan zapot, ti pe “pas zot pour siperyer” e ti pe esey akiz li. (2 Korentyen 11:5, 12-14, 26) Me kantmenm sa, Pol ti reste for spirityelman akoz i ti apresye parol Bondye. Vi ki nou apresye Labib e aplik sa ki i dir, nou annan lanmour pour nou bann frer ek ser. (1 Zan 3:15) Menm si lemonn pa kontan nou, sa pa fer nou oubliy okenn lenstriksyon ki Bondye in donnen. Nou kontinyen fer son lavolonte dan linite ansanm avek nou bann frer ek ser, anmezir ki nou pe esper avek enpasyans pour servi Zeova dan lazwa pour leternite.—Psonm 119:93.
5. Ki mannyer lerwa Aza ti rod Zeova?
5 Pour eksprim nou devosyon anver Bondye, nou kapab priye: “Mon pour ou. Sov mwan, parski mon’n rod ou bann lord.” (Psonm 119:94) Lerwa Aza ti rod Bondye e i ti retir tou fo ladorasyon ki ti egziste Zida. Dan kenzyenm lannen ki Aza ti ankor lerwa (963 A.N.L.), zot ti fer en gran lasanble kot bann zabitan Zida “ti fer en lalyans pour rod Zeova.” Bondye “ti les zot trouv li” e “i ti kontinyen donn zot repo partou.” (2 Kronik 15:10-15) Sa legzanp i devret ankouraz bann ki’n elwannyen avek kongregasyon Kretyen pour rod Bondye ankor enn fwa. I pou beni e protez bann ki rekonmans asosye avek son pep.
6. Kwa ki pou protez nou kont bann danze spirityel?
6 Parol Zeova i donn nou lasazes ki kapab protez nou kont danze spirityel. (Psonm 119:97-104) Bann komannman Bondye i fer nou vin pli saz ki nou bann lennmi. Kan nou pran aker son bann rapel sa i donn nou bon zizman, e kan nou obeir son bann lord sa i fer li posib pour nou azir avek plis konprenezon ki bann dimoun aze. (Psonm 119:98-100) Si bann parol Zeova i pli dou ki dimyel dan nou labous, nou pou deteste e rezet bann move semen. (Psonm 119:103, 104) Sa pou protez nou kont bann danze spirityel, anmezir ki nou rankontre bann dimoun vantar, arogan e ki elwannyen avek Bondye dan sa bann dernyen zour.—2 Timote 3:1-5.
En Lalanp pour nou Lipye
7, 8. Ki nou bezwen fer pour viv an akor avek Psonm 119:105?
7 Parol Bondye i en sours lalimyer spirityel ki pa zanmen aret klere. (Psonm 119:105-112) Ki swa nou en Kretyen swazir oubyen nou zot konpanyon, ‘lezot mouton,’ nou kapab dir: “Ou parol i en lalanp pour mon lipye, e en lalimyer pour mon semen.” (Zan 10:16; Psonm 119:105) Parol Bondye i parey en lalanp ki pe ekler nou semen pour nou pa tonbe spirityelman. (Proverb 6:23) Me nou menm nou bezwen les parol Zeova vin en lalimyer pour nou lipye.
8 Nou bezwen determinen parey sa psalmis ki ti ekrir Psonm 119. I ti determinen pour pa rezet bann lord Bondye. I ti dir: “Mon’n fer en serman, e mon pou gard mon parol, pour obeir ou bann zizman ki drwat.” (Psonm 119:106) Annou pa zanmen sou estim sa lenportans pour lir Labib regilyerman e partisipe dan renyon.
9, 10. Ki mannyer nou konnen i posib pour bann ki’n dedye zot lavi avek Zeova elwannyen avek son bann lord, e ki mannyer sa i kapab ganny evite?
9 Sa psalmis li i pa ti elwannyen avek bann lord Bondye, me i kapab arive ki en serviter Zeova i elwannyen avek bann lord Bondye. (Psonm 119:110) Menm si i ti sorti dan en nasyon ki ti dedye avek Zeova, e okonmansman i ti azir avek lasazes ki sorti kot Bondye, Lerwa Salomon pa ti reste fidel avek Zeova. Menm li son bann madanm etranze ti fer li fer pese, zot ti ankouraz li pour ador bann fo Bondye.—Neemya 13:26; 1 Lerwa 11:1-6.
10 Satan i en saser e i met bokou latrap partou. (Psonm 91:3) Par egzanp, en dimoun ki ti deza en Temwen Zeova i kapab esey enfliyans nou pour sorti dan sa semen ki donn laklerte spirityel pour vin dan sa fernwanr ki bann aposta i ladan. Parmi bann Kretyen Tyatir, ti annan en madanm ki ti apel Zezabel. I probab ki Zezabel ti pe reprezant en group madanm ki ti ansenny lezot pour ador zidol e fer limoralite seksyel. Zezi pa ti toler sa bann move aksyon, e nou osi nou pa devret aksepte sa bann tel aksyon. (Revelasyon 2:18-22; Zid 3, 4) Annou priye pour demann Zeova son led pour nou pa elwannyen avek son bann lord, me pour reste dan lalimyer ki son parol i fourni.—Psonm 119:111, 112.
Soutenir par Parol Bondye
11. Dapre Psonm 119:119, ki mannyer Bondye i konsider bann dimoun mesan?
11 Bondye pou soutenir nou si nou pa zanmen rezet son bann lareg. (Psonm 119:113-120) Nou pa toler bann ki annan de leker, zis parey Zezi pa toler bann ki dir zot Kretyen me ki dan en sans zot tyed. (Psonm 119:113; Revelasyon 3:16) Vi ki nou pe servi Zeova avek tou nou leker, i nou landrwa kasyet e i pou soutenir nou. I pou rezet tou sa bann ki kas son bann lareg par bann trik ek mansonz. (Psonm 119:114, 117, 118; Proverb 3:32) I vwar sa bann dimoun mesan konman bann restan. Sa mo restan pe refer avek bann bout ki napa okenn valer ki’n ganny tire avek bann metal presye, tel parey larzan ek lor. (Psonm 119:119; Proverb 17:3) San okenn dout nou pa ti pou anvi ganny detrir ansanm avek bann mesan ki ganny konsidere konman bann restan ki initil! Alors, annou kontinyen kontan bann rapel ki sorti kot Bondye.
12. Akoz i enportan annan lakrent pour Zeova?
12 Sa psalmis ti dir: “Akoz sa gran lafreyer ki mon annan pour ou [Zeova], mon ti ganny frison.” (Psonm 119:120) Si nou anvi ki Zeova i soutenir nou konman son bann serviter, nou bezwen annan en gran lafreyer pour li. Nou demontre sa, par rezet bann keksoz ki i pa kontan. Sa lakrent ki Zob ti annan pour Zeova ti pous li pour viv en lavi ki drwat. (Zob 1:1; 23:15) Nenport ki leprev nou bezwen andire, si nou annan lakrent pour Bondye, sa i kapab fer nou kontinyen lalit pour viv en lavi ki fer li plezir. Pour kapab andire nou bezwen senserman priye avek lafwa.—Zak 5:15.
Priy avek Lafwa
13-15. (a) Akoz nou kapab asire ki nou lapriyer pou ganny egzose? (b) Ki kapab arive si nou pa konnen ki pou dir dan lapriyer? (c) Eksplike konman Psonm 119:121-128 i kapab al byen avek “bann soupir ki nou pa kapab eksprimen” dan lapriyer.
13 Kan nou priye, nou kapab asire ki Bondye pou azir dan nou faver. (Psonm 119:121-128) Parey sa psalmis, nou asire ki nou lapriyer pou ganny egzose. Akoz? Parski nou kontan bann komannman Bondye “plis ki lor, menm plis ki lor rafinen.” Deplis, nou vwar bann lord Bondye byen lo tou keksoz.—Psonm 119:127, 128.
14 Zeova i ekout nou bann siplikasyon akoz nou priy avek lafwa e toultan obeir son bann lord. (Psonm 65:2) Me si parfwa nou problenm i telman lour ki nou pa konnen ki nou pou dir dan lapriyer? Dan sa ka “Lespri i pled pour nou avek bann soupir ki nou pa kapab eksprimen par parol.” (Romen 8:26, 27) Dan bann sitiasyon koumsa, Bondye i aksepte bann parol ki ganny trouve dan Labib konman bann lapriyer pour reprezant sa ki nou bezwen.
15 Labib i ranpli avek bann lapriyer ek panse ki pou byen ranplas “bann soupir ki nou pa kapab eksprimen.” Par egzanp, annou egzamin Psonm 119:121-128. Lafason ki bann keksoz in ganny eksprimen dan sa bann verse, i kapab al byen avek nou sitiasyon. Par egzanp, si nou per pangar nou ganny vole, nou kapab demann Bondye son led dan lafason ki sa psalmis ti demande. (Verse 121-123) Meton nou bezwen pran en desizyon ki tre difisil. Alor, nou kapab demann Zeova son lespri sen pour ki i ed nou rapel e aplik son bann rapel. (Verse 124, 125) Menm si nou pa kontan bann move semen, i kapab ki nou bezwen demann Bondye pour ed nou pour ki nou pa les tantasyon fer nou kas son lalwa. (Verse 126-128) Si nou lir Labib toulezour, alor kan nou priy Zeova, sa bann verse i kapab revin dan nou lespri.
Led ki bann Rapel Zeova i fourni
16, 17. (a) Akoz nou bezwen bann rapel sorti kot Bondye, e ki mannyer nou devret vwar zot? (b) Ki mannyer lezot i kapab tret nou, me kwa ki enportan?
16 Si nou anvi Bondye ekout nou lapriyer e ganny son faver, nou bezwen obeir son bann rapel. (Psonm 119:129-136) Vi ki nou oubliy vitman, nou bezwen sa bann rapel ki sorti kot Zeova, parski i fer nou mazin son bann lenstriksyon ek komannman. Byensir, nou apresye sa lalimyer spirityel ki ganny revele par bann nouvo konprenezon lo parol Bondye. (Psonm 119:129, 130) Nou vreman apresye ki nou annan laprouvasyon Zeova menm si nou larm in koul en kantite akoz lezot in kas son lalwa.—Psonm 119:135, 136; Nonm 6:25.
17 Nou kapab asire ki nou pou kontinyen ganny faver Bondye si nou obeir son bann rapel ki drwat. (Psonm 119:137-144) Konman bann serviter Zeova nou rekonnet ki Bondye i annan sa drwa pour fer nou port latansyon lo son bann rapel ki drwat e ekspekte nou obeir sa bann komannman. (Psonm 119:138) Lefe ki sa psalmis ti obeir bann komannman Bondye, akoz i ti dir: “Mon pa vo nanryen e mon’n ganny meprize”? (Psonm 119:141) Aparaman i ti pe refer avek lafason ki son bann lennmi ti vwar li. Si nou pare pour debout pour ladrwatir, lezot i kapab mepriz nou. Me sa ki enportan se ki nou annan laprouvasyon Zeova akoz nou pe viv an armoni avek son bann rapel ki drwat.
An Sekirite e anpe
18, 19. Ki i arive kan nou obeir bann rapel Bondye?
18 Kan nou obeir bann rapel Bondye, sa i fer nou reste pros avek li. (Psonm 119:145-152) Vi ki nou port latansyon lo bann rapel ki sorti kot Zeova, nou santi nou alez pour priy li avek tou nou leker e nou kapab asire ki i pou ekoute. Nou kapab leve granmaten e demann li son led. Pa sa i en bon letan pour priye! (Psonm 119:145-147) Bondye i pros avek nou osi akoz nou rezet bann move kondwit, e parey Zezi nou konsider son parol konman laverite. (Psonm 119:150, 151; Zan 17:17) Nou relasyon avek Zeova pou soutenir nou dan sa lemonn ki’n vir anba lao e menm pandan son gran lager, Armagedon.—Revelasyon 7:9, 14; 16:13-16.
19 Nou annan vre sekirite akoz nou annan gran respe pour Parol Bondye. (Psonm 119:153-160) Nou pa’n rezet bann rapel Zeova parey bann dimoun mesan. Nou kontan bann lord Zeova, e an rezilta nou an sekirite akoz son labonte leker. (Psonm 119:157-159) Bann rapel Zeova i ed nou lespri pour mazin sa ki Bondye i oule nou fer dan nenport ki sitiasyon. De lot kote, bann lord ki sorti kot Bondye i bann gid, e nou rekonnet ki Bondye i annan drwa pour diriz nou. Vi ki nou konnen parol Bondye i laverite e ki nou pa kapab diriz nou prop lepa, alor avek lazwa nou aksepte pour ganny dirize par Bondye.—Psonm 119:160; Zeremi 10:23.
20. Akoz nou annan “labondans lape”?
20 Ler nou annan lanmour pour lalwa Zeova, sa i anmenn lape pour nou. (Psonm 119:161-168) Persekisyon pa anpes nou ganny “lape Bondye,” ki pa kapab ganny konpare. (Filipyen 4:6, 7) Nou telman apresye bann zizman Zeova ki souvannfwa nou loue li pour sa, nou fer sa “set fwa pandan lazournen.” (Psonm 119:161-164) Sa psalmis ti sante: “Bann ki kontan ou lalwa i annan labondans lape, e napa okenn lobstak ki fer zot tonbe.” (Psonm 119:165) Si nou kontan e obeir lalwa Zeova, nou pa pou les sa ki lezot i fer oubyen okenn lezot keksoz fer nou tonbe spirityelman.
21. Ki bann legzanp dan Labib ki montre ki nou pa devret les nou tonbe spirityelman si i annan difikilte dan kongregasyon?
21 En kantite serviter Bondye dan Labib pa ti les okenn keksoz fer zot tonbe. Par egzanp, en Kretyen ki ti apel Gayis pa ti les li tonbe spirityelman menm si Dyotref ti pe mal kondwir li devan Bondye. Plito i ti mars dan laverite. (3 Zan 1-3, 9, 10) Pol ti ankouraz de madanm Kretyen, Evodi ek Sentis “pour viv an-akor dan Senyer.” I ti dir zot sa petet akoz ti annan en problenm antre zot. Aparaman zot ti ganny led pour rezourd zot problenm e zot ti kontinyen servi Zeova fidelman. (Filipyen 4:2, 3) Alors, nou pa devret les nou tonbe spirityelman si i annan serten difikilte dan kongregasyon. Annou les lobeisans anver bann lord Zeova preokip nou panse, touzour mazinen ki Zeova i vwar tou sa ki nou fer. (Psonm 119:168; Proverb 15:3) Si nou fer sa, pou napa nanryen ki pou anpes nou annan “labondans lape.”
22. (a) Ki privilez nou kapab gannyen si nou obeir Bondye? (b) Ki mannyer nou devret vwar serten ki’n elwannyen avek kongregasyon Kretyen?
22 Si nou toultan obeir Zeova, nou pou ganny sa privilez pour kontinyen loue li. (Psonm 119:169-176) Kan nou viv an akor avek bann lareg Bondye, nou pa zis an sekirite spirityelman, me nou kontinyen loue Zeova avek nou labous. (Psonm 119:169-171, 174) Sa i pli gran privilez ki nou kapab gannyen dan sa bann dernyen zour. Sa psalmis ti anvi kontinyen viv e loue Zeova, me dan serten fason ki nou pa konnen, i ti elwannyen parey en mouton perdi. (Psonm 119:175, 176) Serten ki’n elwannyen avek kongregasyon Kretyen i kapab ki zot ankor kontan Bondye e anvi loue li. Alors, annou fer tou sa ki nou kapab pour ed zot, pour ki ankor enn fwa zot ganny sa sekirite spirityel e eksperyans sa lazwa ki nou gannyen kan nou loue Zeova ansanm avek son pep.—Ebre 13:15; 1 Pyer 5:6, 7.
Lalimyer dirab pour nou Semen
23, 24. Ki byenfe ou’n gannyen ler ou’n lir Psonm 119?
23 I annan plizyer fason ki nou kapab benefisye avek Psonm 119. Par egzanp, i kapab fer nou depan plis lo Bondye, parski i montre nou ki vre lazwa i vin ler nou “mars dapre lalwa Zeova.” (Psonm 119:1) Sa psalmis i rapel nou ki parol Bondye i laverite. (Psonm 119:160) Sa i devret fer nou pli apresye Labib. Ler nou reflesir lo Psonm 119, i devret pous nou pour etidye Labib seryezman. Sa psalmis ti kontinyelman sipliy Bondye: “Ansenny mwan ou bann lareg.” (Psonm 119:12, 68, 135) I ti osi sipliye: “Ansenny mwan pour annan labonte, bon sans ek konnesans, akoz mon’n demontre lafwa dan ou komannman.” (Psonm 119:66) Nou osi nou devret demann Bondye menm keksoz.
24 Lansennyman ki sorti kot Zeova i fer li posib pour nou annan en relasyon pros avek li. Sa psalmis ti toultan apel son lekor serviter Bondye. Anfet, dan en fason tousan i ti dir Zeova: “Mon pour ou.” (Psonm 119:17, 65, 94, 122, 125; Romen 14:8) Pa i en privilez ki nou annan pour kapab servi e loue Zeova konman enn son Temwen! (Psonm 119:7) Eski ou pe servi Bondye dan lazwa konman en proklanmater Rwayonm? Si wi, ou kapab asire ki Zeova pou kontinyen soutenir e beni ou dan sa travay, si ou toultan annan konfyans dan son parol e les son parol ekler ou semen.
Ki ou pou reponn?
• Akoz nou devret apresye parol Bondye?
• Ki mannyer parol Bondye i soutenir nou?
• Dan ki fason bann rapel Zeova i ed nou?
• Akoz pep Zeova i an sekirite e anpe?
[Kestyon]
[Portre lo paz 9]
Parol Bondye i en sours lalimyer spirityel
[Portre lo paz 10]
Si nou kontan bann rapel Zeova, i pa pou zanmen konsider nou konman bann restan
[Portre lo paz 11]
Si nou lir Labib toulezour, kan nou pe priye sa bann verse i kapab revin dan nou lespri