Bann Pwen enteresan dan Premye Liv Samyel
Parol Bondye i vivan
Bann Pwen enteresan dan Premye Liv Samyel
NOU dan lannen 1117 A.N.L. Apepre trwa san zan in pase depi ki Zozye in fini pran Later Promiz. Bann ansyen dan nasyon Izrael i vin devan profet Zeova avek en demann ekstraordiner. Sa profet i adres Zeova dan lapriyer lo sa size e Zeova i akord zot zot demann. Sa i klerman endik lafen letan bann Ziz e konmansman letan bann lerwa imen dan nasyon Izrael. Premye liv Samyel i rakont sa bann moman enportan e eksitan dan listwar nasyon Izrael.
Premye Samyel i kouver en peryod letan 102 lannen ki ti konmans depi 1180 ziska 1078 A.N.L., e Samyel, Natann, ek Gad i sa trwa dimoun ki’n ekrir sa liv. (1 Kronik 29:29) I en resi ki koz lo kat dirizan Izrael. De ladan ti servi konman ziz, de konman lerwa; de ti obeir Zeova, e de ti dezobei. Nou osi aprann konsernan de madanm egzanpler ek en gerye brav me zantiy. Sa bann legzanp i ansenny nou bann leson enportan konsernan bann latitid ek aksyon ki nou devret imite e bann ki nou devret evite osi. Sa lenformasyon dan Premye Samyel i kapab fer en lefe lo nou panse ek aksyon.—Ebre 4:12.
SAMYEL I SIKSED ELI KONMAN ZIZ
Lafet bann Payot ti’n arive, e Ana ki ti reste Rama ti dan lazwa. * Zeova ti’n reponn son lapriyer e Ana ti’n donn nesans en garson. Ana ti donn son garson Samyel, pour servi kot “lakaz Zeova.” I ti fer sa pour akonpli son ve ki i ti’n fer. Laba sa garson ti vin “en minis Zeova devan pret Eli.” (1 Samyel 1:24; 2:11) Zeova ti koz avek Samyel ler i ti ankor byen zenn, e anons li son zizman kont fanmiy Eli. Anmezir ki Samyel ti grandi, tou dimoun Izrael ti rekonnet li konman en profet Zeova.
En pe letan plitar bann Filisten ti fer lager avek Izrael. Zot ti pran Lars lalyans e touy sa de garson Eli. Omoman ki i ti antann sa nouvel, Eli ki ti byen aze ti mor, apre ki i ti’n “ziz Izrael pour karant tan.” (1 Samyel 4:18) Bann Filisten ti sibir bokou maler lefe ki zot ti annan Lars lalyans avek zot. Sa ti fer zot retourn sa Lars lalyans avek bann Izraelit. Apre sa, Samyel ti vin ziz Izrael e lape ti rennyen dan pei.
Larepons pour bann Kestyon lo Labib:
2:10—Akoz Ana ti priye ki Zeova i “donn lafors son lerwa” kan sa ler ti napa en dimoun ki ti pe dirize konman lerwa Izrael? Lalwa Moiz ti predir e montre ki en imen ti pou dirize konman lerwa lo bann Izraelit. (Deterononm 17:14-18) Dan son profesi avan i ti mor, Zakob ti dir: “Baton lerwa [en senbol lotorite rwayal] pa pou ekarte avek Zida.” (Zenez 49:10) Deplis, konsernan Sara ki zanset bann Izraelit, Zeova ti dir ki “bann lerwa bann pep pou sorti dan son desandans.” (Zenez 17:16) Alor, Ana ti pe priy konsernan en fitir lerwa.
3:3—Eski Samyel ti vreman dormi dan Tre Sen? Non, i pa ti dormi dan Tre Sen. Samyel ti en Levit sorti dan fanmiy bann Keatit ki pa ti kapab servi konman pret. (1 Kronik 6:33-38) Alors, i ti napa drwa “antre pour vwar bann keksoz sen.” (Nonm 4:17-20) Lakour tabernak ti sa sel landrwa dan tabernak ki Samyel ti annan drwa servi. Sa ti sa landrwa kot i ti’n bezwen dormi. I paret ki Eli ti osi dormi kekpar dan sa lakour. Sa lekspresyon “kot lars Bondye ti ete” evidaman ti pe refer avek tabernak an antye.
7:7-9, 17—Lefe ki bann sakrifis ti bezwen ganny ofer lo en baz regilye selman dan landrwa ki Zeova ti swazir, akoz Samyel ti ofer en lofrann brile Mizpa e etablir en lotel Rama? (Deterononm 12:4-7, 13, 14; Zozye 22:19) Apre ki lars sakre ti ganny tire kot tabernak Silo, prezans Zeova ti nepli evidan dan sa landrwa. Alor konman reprezantan Bondye, Samyel ti ofer en lofrann brile Mizpa e osi etablir en lotel Rama. I paret ki Zeova ti aprouve sa ki i ti fer.
Leson pour nou:
1:11, 12, 21-23; 2:19. Sa bon latitid ki Ana ti annan pour priye, son limilite, son lapresyasyon pour labonte Zeova, ek son lafeksyon konman en manman i en legzanp pour tou madanm ki pe servi Bondye.
1:8. Elkana i donn en zoli legzanp ki mannyer pour fortifye lezot avek nou parol! (Zob 16:5) Premye kou Elkana ti demann Ana ki ti byen tris en kestyon ki ti fer li santi ki i pa pe ganny zize: “Akoz ou leker i dan lapenn?” Sa kestyon ti ankouraz li pour koz lo son santiman. Apre parol Elkana ti reasir son madanm ki i annan lafeksyon pour li. I ti dir: “Eski mon pa vo plis ki dis garson pour ou?”
2:26; 3:5-8, 15, 19. Par akonpli byen nou travay ki Bondye in donn nou, profit byen formasyon spirityel, e par demontre respe ek lapolites, Bondye osi byen ki lezot dimoun pou “kontan” nou plis.
4:3, 4, 10. Menm en lobze sen parey “lars lalyans Zeova” pa ti servi konman en lobze proteksyon. Nou devret ‘prezerv nou kont bann zidol.’—1 Zan 5:21.
PREMYE LERWA IZRAEL—EN SIKSE OUBYEN NON?
Toudilon son lavi Samyel ti reste fidel, me son bann garson pa ti mars avek Bondye. Ler bann ansyen dan Izrael ti demande ki en zonm i ganny apwente konman lerwa, Zeova ti permet zot annan enn. Samyel ti swiv gidans Zeova e apwent Sail, en zonm avek en zoli laparans sorti dan tribi Benzamen konman lerwa. Sail ti ranforsi son pozisyon konman lerwa par defet bann Amonit.
Yonatann, garson Sail, ki ti en zonm brav ti defet en kan larme Filisten. Bann Filisten ti vin lager kont Izrael avek en gran kantite zonm. Sail ti per e i ti ofer en sakrifis brile li menm, e ler i ti fer sa i ti dezobei Bondye. Avek zis son asistan, Yonatann ti atak en lot kan Filisten. Me vi ki Sail ti’n fer en ve tro vitman, zot pa ti ganny en laviktwar konplet. Sail ti al “fer lager partou kote” kont tou son bann lennmi. (1 Samyel 14:47) Me ler i ti defet bann Amalekit, i ti dezobei Zeova par eparny serten keksoz ki Zeova ti’n dir i merit ganny detrir. (Levitik 27:28, 29) Finalman, Zeova ti rezet Sail konman lerwa.
Larepons pour bann Kestyon lo Labib:
9:9—Kwa ki enteresan avek sa lekspresyon “avan profet ti ganny apele vizyoner”? Petet sa parol i endike ki anmezir bann profet ti vin pli enportan dan letan Samyel e pandan letan bann lerwa Izrael, sa mo “vizyoner” ti ganny ranplase par sa mo “profet.” Samyel i ganny konsidere konman premye profet.—Akt 3:24.
14:24-32, 44, 45—Eski Yonatann ti perdi faver Bondye ler i ti kas ve Sail par manz dimyel? I paret ki sa aksyon pa ti fer Yonatann perdi faver Bondye. Premyerman, Yonatann pa ti konn nanryen konsernan ve ki son papa ti’n fer. Deplis, Sail ti ganny motive pour fer sa ve akoz i ti annan en devouman ki pa ti apropriye ouswa akoz i ti annan en move pwennvi lo son pouvwar konman lerwa, ki ti anmenn problenm pour sa pep. Ki mannyer Bondye ti kapab aksepte sa kalite ve? Menm si Yonatann ti pare pour aksepte konsekans pour kas sa ve, pa ti ariv li nanryen.
15:6—Akoz Sail ti demontre en konsiderasyon spesyal anver bann Kenit? Bann Kenit ti bann garson boper Moiz. Zot ti ed bann Izraelit apre ki zot ti kit montanny Sinai. (Nonm 10:29-32) Dan pei Kanaan, bann Kenit ti osi reste pour en pe letan avek bann garson Zida. (Ziz 1:16) Menm si plitar, zot ti reste avek bann Amalekit e avek diferan lezot nasyon, bann Kenit ti reste zanmi avek Izrael. Alor, pour sa rezon Sail pa ti detrir bann Kenit.
Leson pour nou:
9:21; 10:22, 27. Sa limilite ki Sail ti annan ler i ti vin lerwa okonmansman ti protez li pour pa fer keksoz bet ler detrwa “zonm bonnaryen” pa ti aksepte son lotorite konman lerwa. En tel latitid i vreman ed en dimoun pour pa azir tro vitman!
12:20, 21. Pa les bann keksoz ki pa nanryen an realite, par egzanp met konfyans dan zonm, dan lafors militer bann nasyon pwisan, oubyen ador zidol, fer ou aret servi Zeova.
12:24. “Vwar bann gran keksoz ki i’n fer” pour son pep dan letan ansyen osi byen dan letan modern i en fakter enportan pour ed nou kontinyen annan lakrent pour Zeova e servi li avek tou nou leker.
13:10-14; 15:22-25, 30. Veye pour pa vin en dimoun arogan ki pa konn son limit. Sa i ganny demontre swa par bann aksyon dezobeisans oubyen par en latitid orgeye.—Proverb 11:2.
EN ZENN BERZE I GANNY SWAZIR POUR VIN LERWA
Samyel ti apwent David sorti dan tribi Zida pour vin lerwa. En pti pe letan apre, David ti touy Golyat avek en sel pti ros. En lanmitye solid ti devlope ant David ek Yonatann. Sail ti met David ansarz son bann gerye. Apre ki David ti’n ranport bokou laviktwar, bann madanm Izrael ti sante: “Sail in touy son bann milye, e David son bann dizenn milye.” (1 Samyel 18:7) Ranpli avek zalouzi, Sail ti rod fason pour touy David. Apre ki i ti’n atak David trwa fwa, David ti sove e viv son lavi an tayan.
Pandan sa letan ki i ti viv son lavi koumsa, David ti ganny sans pour touy Sail de fwa me i pa ti fer li. I ti osi zwenn zoli Abigail ki apre i ti marye avek li. Ler bann Filisten ti vin lager kont Izrael, Sail ti rod gidans Zeova. Me Zeova ti’n kit li. Samyel ti’n mor. Dan son dezespwar Sail ti al vwar en tantin ki annan kontakt avek bann mor, e i ti dir li ki i pou ganny touye dan lager avek bann Filisten. Dan sa batay, Sail ti ganny blese severman e son garson ti ganny touye. Sa resi i fini avek lanmor Sail konman en move lerwa. David li i ti ankor pe kasyet.
Larepons pour bann Kestyon lo Labib:
16:14—Ki sa move lespri ki ti fatig Sail? Sa move tandans dan son lespri ek leker, sa dezir dan li pour fer sa ki mal i sanmenm sa move lespri ki ti fer Sail perdi son lape lespri. Ler Zeova ti tir son lespri sen lo Sail, i ti perdi proteksyon lespri sen e son prop move lespri ti domin li. Lefe ki Bondye ti permet sa move lespri ranplas son lespri sen, sa move lespri i ganny apele “en move lespri sorti kot Zeova.”
17:55-58—An rapor avek 1 Samyel 16:17-23, akoz Sail ti demande lekel papa David? Sail pa ti zis oule konnen ki mannyer papa David i apele. I tre probab ki i ti anvi konnen ki kalite papa ki’n elve en garson ki’n fek fer en keksoz remarkab pour touy en zean.
Leson pour nou:
16:6, 7. Olye les laparans en dimoun enpresyonn nou oubyen ziz zot vitman, nou devret esey vwar zot parey Zeova i vwar zot.
17:47-50. Avek kouraz nou kapab fer fas avek lopozisyon oubyen persekisyon sorti kot nou bann lennmi ki tre for, akoz “batay i pour Zeova.”
18:1, 3; 20:41, 42. Nou kapab trouv vre zanmi parmi bann dimoun ki kontan Zeova.
21:12, 13. Zeova i ekspekte nou servi nou lespri ek nou abilite pour kapab fer fas avek bann sitiasyon difisil dan lavi. I’n donn nou son Parol enspire, ki fer nou devlop bon zizman, konnesans, ek abilite pour reflesir. (Proverb 1:4) Nou osi ganny led bann ansyen.
24:6; 26:11. David i donn nou en tre bon legzanp konsernan demontre vre respe pour sa enn ki Zeova in swazir!
25:23-33. Bon zizman ki Abigail ti demontre i egzanpler.
28:8-19. Dan zot zefor pour anbet oubyen fer ditor dimoun, bann move lespri i kapab fer krwar ki zot en serten dimoun. Nou devret rezet tou kalite pratik grigri.—Deterononm 18:10-12.
30:23, 24. Sa desizyon ki baze lo Nonm 31:27, i montre ki Zeova i apresye sa bann ki ede dan kongregasyon. Nenport keksoz ki nou pe fer, annou ‘fer li avek tou nou leker pour Zeova e non pa pour zonm.’—Kolosyen 3:23.
Kwa ki “pli meyer ki en Sakrifis”?
Ki laverite enportan ki leksperyans Eli, Samyel ek David i fer resorti? Larepons i sa: “Obeir i pli meyer ki en sakrifis, port atansyon olye ki lagres mouton; akoz lespri rebelyon i parey avek pese devinen, e azir avek larogans i parey avek servi pouvwar mazik ek terafim.”—1 Samyel 15:22, 23.
Nou annan en gran privilez pour partisip dan sa travay predikasyon Rwayonm e fer disip dan lemonn antye! Ler nou ofer Zeova bann sakrifis avek nou labous, nou devret fer nou mye pour obeir gidans ki i donn nou atraver son Parol ek son lorganizasyon isi lo later.—Osea 14:2; Ebre 13:15.
[Not anba lo paz]
^ par. 3 Pour konnen kote sa bann landrwa mansyonnen dan liv Premye Samyel i ete, vwar paz 18-19 dan brosir “Voyez le bon pays,” pibliye par Temwen Zeova.
[Portre lo paz 31]
Premye lerwa Izrael ti sanze pour sorti en dirizan modes pour vin en lerwa orgeye e vantar
[Portre lo paz 32]
Ki konfyans nou kapab annan ler nou fer fas avek bann lennmi ki tre for?