Rekonpanse pour fer en gran Vwayaz

DE SER dan menm fanmiy ki sorti dan pei Repiblik Demokratik Kongo, ti deside fer en gran vwayaz atraver en rezyon ravaze par lager pour al asiste Lasanble Distrik “Donn Bondye Laglwar,” dan lavil Lisala. Zot pa ti pe zis swete pour benefisye avek sa lenstriksyon spirityel ek lasosyasyon bann frer ek ser dan sa lasanble, zot ti osi eksite pour zwenn bann reprezantan Temwen Zeova sorti dan biro brans Kinshasa. Pour plizyer lannen zot pa’n vwar personn sorti kot biro brans Kinshasa, akoz lager sivil dan sa pei. Alor, zot ti anvi sezi sa loportinite pour vwar zot.

Sa de ser ti fer zot vwayaz dan en pirog, depi kot zot lavil Basankusu ziska Lingala, ki en vwayaz apepre 300 kilomet atraver lafore e toudilon de larivyer. I ti pran zot trwa semenn pour fer sa vwayaz. Vi ki zot tou le de zot fer pionye, enn i dan sa servis pour 3 zan e lot 19 an, zot ti profite pandan zot vwayaz pour propaz sa bon nouvel lo Rwayonm Bondye. An tou zot ti pas 110 er-d-tan pour pres avek dimoun ki zot ti zwenn pandan zot vwayaz, e zot ti distribye 200 trak ek 30 magazin.

Ler zot ti pe desann lo larivyer, zot ti bezwen pagay parmi bann ipopotanm ek krokodil ki kontan vin dan sa rezyon. Zot pa ti kapab vwayaz lo larivyer aswar, akoz i ti danzere. Dan zot traze, zot ti osi pas atraver en kantite gard pos militer.

Menm si sa ti en gran vwayaz ki ti osi fatigan, sa de ser ti kontan pour fer sa zefor. Zot tou le de ti vreman apresye e kontan ki zot ti la prezan pour asiste sa lasanble, Lisala. Zot leker ti deborde avek lantouzyasm pour laverite, e zot ti ganny ankouraze par sa 7,000 frer ek ser ki ti la prezan. Apre lasanble zot ti fer fas avek sa menm difikilte pour retourn kot zot, e zot ti nobou retrouv zot fanmiy sen e sof.