Bann Kretyen i reflekte Laglwar Zeova

“Zot, zot ere; zot lizye i war kler e zot zorey i tande!”​—Matye 13:16.

1. Ki kestyon ki nou kapab demande konsernan reaksyon bann Izraelit anver Moiz kot montanny Sinai?

BANN Izraelit ki ti’n ralye kot montanny Sinai ti annan tou rezon pour vin pli pros avek Zeova. Apre tou, i ti’n delivre zot Lezip avek son lanmen for. I ti pran swen avek zot, donn zot manze ek delo dan dezer. Apre i ti fer zot ganny laviktwar lo larme Amalekit ki ti’n atak zot. (Egzod 14:26-31; 16:2–17:13) Letan bann Izraelit ti pe kanpe devan montanny Sinai, zot ti tranble avek lafreyer kan zot ti tann loraz ek zekler. Plitar, zot ti vwar Moiz desann lo montanny Sinai, e son figir ti pe reflekte laglwar Zeova. Me sa pa ti ni enpresyonn zot ni ogmant zot lapresyasyon. Okontrer zot ti evit Moiz, “zot ti per pour avans pli pre avek li.” (Egzod 19:10-19; 34:30) Akoz zot ti per pour vwar refleksyon laglwar Zeova, sa enn ki ti’n fer sitan en kantite pour zot?

2. Kwa ki ti’n kapab fer bann Izraelit per ler zot ti vwar laglwar Bondye ki Moiz ti reflekte?

² Petet rezon prensipal akoz bann Izraelit ti per i annan pour fer avek sa ki ti’n arive avan sa. Kan zot ti volonterman dezobei  Zeova par fer en pti bef annor, i ti disiplin zot. (Egzod 32:4, 35) Eski zot ti aprann zot leson e apresye disiplin Zeova? Laplipar non. Ver lafen son lavi, Moiz ti rapel bann Izraelit sa lensidan avek sa pti bef annor ek lezot fwa ki zot ti dezobei Zeova. I ti dir zot: “Zot ti revolte kont lord Zeova zot Bondye, e zot pa ti demontre lafwa dan li e zot pa ti obeir son lavwa. Depi zour mon konn zot, zot in montre zot rebel dan zot fason azir anver Zeova.”—Deterononm 9:15-24.

3. Kan ki Moiz ti met e tir sa vwal lo son figir?

³ Annou vwar ki Moiz ti fer ler i ti vwar ki mannyer bann Izraelit ti per. Labib i rakonte: “Kan Moiz ti fini koz avek zot, i ti met en vwal lo son figir. Me kan Moiz ti al devan Zeova [kot tabernak] pour koz avek li, i ti tir sa vwal ziska i sorti. I ti sorti e dir bann garson Izrael sa ki i’n ganny lord pour dir. Bann garson Izrael ti vwar figir Moiz, bann reyon lalimyer ti sorti avek son figir; e Moiz ti remet sa vwal lo son figir ziska i ti antre pour koz avek [Zeova].” (Egzod 34:33-35) Akoz parfwa Moiz ti met en vwal lo son figir? Ki nou kapab aprann atraver sa? Larepons sa de kestyon i kapab ed nou egzamin nou prop relasyon avek Zeova.

Zot pa ti sezi Loportinite

4. Ki leksplikasyon zapot Pol ti donnen konsernan akoz Moiz ti met sa vwal?

⁴ Zapot Pol ti eksplike ki Moiz ti met sa vwal akoz fason panse ek kondisyon leker bann Izraelit zot menm. Pol ti ekrir: “Bann Izraelit pa ti kapab get figir Moiz akoz sa laglwar lo son figir . . . Zot lentelizans ti fermen.” (2 Korentyen 3:7, 14) Sa ti vreman tris! Bann Izraelit ti pep swazir Zeova, e i ti anvi zot vin pros avek li. (Egzod 19:4-6) Me zot ti ezite port latansyon lo refleksyon laglwar Bondye. Olye montre zot devosyon pour Zeova par ouver zot leker ek lespri anver li, dan en sans zot ti vir kont li.

5, 6. (a) Ki sitiasyon parey avek bann Izraelit dan letan Moiz ki ti egziste dan premye syek? (b) Ki diferans ti annan ant bann ki ti ekout Zezi ek bann ki pa ti ekout li?

⁵ Nou vwar en keksoz parey dan premye syek N.L. Ler Pol ti konverti pour vin Kretyen, lalyans Lalwa ti’n fini ganny ranplase par nouvo lalyans, ki son medyater i Zezi Kri, pli gran Moiz. Zezi ti reflekte laglwar Zeova an parol e osi an aksyon. Pol ti ekrir sa lo Zezi ki ti’n resisite: “Sa Garson i reflekte laglwar Bondye, e reprezant egzakteman resanblans son natir.” (Ebre 1:3) Pa bann Zwif ti annan en zoli loportinite! Zot ti kapab tann parol lavi eternel sorti dan labous Garson Bondye li menm! Malerezman, laplipar dimoun ki Zezi ti pres avek pa ti ekoute. Zezi ti sit sa ki Zeova ti dir lo zot atraver Izai: “Lespri sa pep in fermen e zot in bous zot zorey, zot in ferm zot lizye, pour ki zot pa war avek zot lizye, pour zot pa tande avek zot zorey, e pour zot pa konpran avek zot lespri, pour ki zot pa tourn ver mwan pour mwan geri zot.”—Matye 13:15; Izai 6:9, 10.

⁶ Ti annan en gran diferans ant bann Zwif ek bann disip Zezi, ki Zezi ti dir sa lo zot: “Zot, zot ere; zot lizye i war kler e zot zorey i tande!” (Matye 13:16) Bann vre Kretyen i vreman anvi konn Zeova e servi li. Zot kontan pour fer son lavolonte, parey zot in aprann dan Labib. Sanmenm ki bann Kretyen swazir i reflekte laglwar Zeova dan zot predikasyon lo sa nouvo lalyans e lezot mouton osi parey.—2 Korentyen 3:6, 18.

Akoz i annan en Vwal lo sa bon Nouvel

7. Akoz i pa sirprann nou ki laplipar dimoun i rezet sa bon nouvel?

⁷ Parey nou’n vwar, dan letan Zezi e osi dan letan Moiz, laplipar Izraelit pa ti sezi sa loportinite spesyal ki zot ti annan. I parey dan nou letan. Laplipar dimoun i rezet sa  bon nouvel ki nou prese. Sa pa sirprann nou. Pol ti ekrir: “Si nou Levanzil i ankor annan en vwal lo la, i annan en vwal lo la pour bann ki pe perdi. Pour bann enkredil, ki bondye . . . sa syek i’n avegle zot lentelizans.” (2 Korentyen 4:3, 4) Apard ki bann zefor ki Satan i fer pour kasyet sa bon nouvel, bokou dimoun i met en vwal lo zot figir zot menm akoz zot pa anvi vwar kler.

8. Dan ki fason linyorans i fer bokou dimoun pa vwar kler e ki mannyer nou kapab evite tonm dan menm sitiasyon?

⁸ Bokou dimoun pa vwar kler akoz linyorans. Labib i dir ki bann nasyon i “dan fernwanr. Zot napa okenn par dan sa nouvo lavi ki Bondye i donnen, akoz zot konpletman inyoran.” (Efezyen 4:18) Avan i ti vin Kretyen, Pol ki ti konn byen Lalwa, ti sitan avegle par linyorans ki i ti persekit kongregasyon Bondye. (1 Korentyen 15:9) Me Zeova ti fer li konn laverite. Pol i eksplike: “I’n fer mwan gras pour ki par mwan, pli gran peser, Zezi-Kri i montre tou son pasyans pour servi en legzanp pour tou bann ki pou krwar pli tar e resevwar lavi eternel.” (1 Timote 1:16) Zis parey Pol, bokou ki ti opoz laverite sorti kot Bondye avan sa, pe aprezan servi Li. Sa i en bon rezon pour nou kontinyen rann temwannyaz menm avek bann dimoun ki opoz nou. Antretan, si nou etidye Parol Bondye regilyerman e konpran li, nou pa pou fer keksoz ki depler Zeova dan linyorans.

9, 10. (a) Dan ki fason bann Zwif dan premye syek pa ti pare pour aprann e sanz zot pwennvi? (b) Eski nou vwar okenn similarite ant sa bann Zwif ek bann larelizyon ozordi ki dir zot Kretyen? Eksplike.

⁹ Bokou dimoun pa konpran keksoz spirityel byen akoz zot pa pare pour aprann e sanz zot pwennvi. Bokou Zwif ti rezet Zezi ek son lansennyman akoz zot ti oule atoupri reste atase avek Lalwa Moiz. Me byensir ti annan ennde leksepsyon. Par egzanp, apre ki Zezi ti resisite, “en gran kantite pret ti aksepte lafwa.” (Akt 6:7) Me konsernan lamazorite bann Zwif, Pol ti ekrir: “Ziska ozordi, sak fwa ki zot lir liv Moiz, en vwal i kouver zot leker.” (2 Korentyen 3:15) Petet Pol ti konnen ki Zezi ti’n deza dir bann sef relizye Zwif: “Zot etidye Lekritir akoz zot mazinen ki ladan zot a trouv lavi eternel, e se zisteman limenm ki servi temwen an mon faver.” (Zan 5:39) Sa Lekritir ki zot ti egzamin avek sitan bokou latansyon ti’n devret ed zot konpran ki Zezi ti Mesi. Me sa ki zot lespri ti’n dir zot sanmenm. Ni menm Garson Bondye ki ti fer mirak pa ti kapab fer zot sanz zot pwennvi.

¹⁰ Nou vwar menm zafer dan bann larelizyon ki dir zot Kretyen ozordi. Zis parey bann Zwif dan premye syek, zot “ranpli avek motivasyon pour Bondye, me zot  motivasyon pa baze lo en vre konnesans.” (Romen 10:2) Kantmenm serten i etidye Labib, zot pa oule krwar sa ki i dir. Zot pa oule aksepte ki Zeova i ansenny son pep atraver sa group lesklav fidel e pridan. (Matye 24:45) Me nou nou konnen ki Zeova pe ansenny son pep e ki nou’n arive konpran laverite sorti kot li ptit-a-pti. (Proverb 4:18) Ler nou les Zeova ansenny nou, nou ganny beni par konn son lavolonte ek son plan.

11. Akoz bann ki krwar zis sa ki zot oule krwar pa arive konn laverite?

¹¹ Lezot pa vwar kler akoz zot krwar zis sa ki zot oule krwar. Labib ti predir ki serten ti pou monk pep Bondye ek sa mesaz ki zot prese konsernan prezans Zezi. Zapot Pyer ti ekrir: “Zot oubliye par ekspre” ki Bondye ti anmenn en deliz lo later dan letan Noe. (2 Pyer 3:3-6) Pareyman, bokou ki dir zot Kretyen i rekonnet ki Zeova i pran pitye, i bon, e i pardonnen. Pourtan zot inyor oubyen pa oule aksepte ki kan i ariv ler pour pini, i pini. (Egzod 34:6, 7) Bann vre Kretyen i senserman fer zefor pour konpran sa ki Labib i vreman dir.

12. Ki mannyer tradisyon i fer dimoun pa vwar kler?

¹² Bokou dimoun ki al legliz pa vwar kler akoz tradisyon. Zezi ti dir avek bann sef relizye dan son letan: “Zot detri valer parol Bondye par zot tradisyon.” (Mark 7:13) Bann Zwif ti reetablir vre ladorasyon avek devouman ler zot ti retournen sorti an egzil Babilonn. Me bann Pret zot, zot ti vin arogan e krwar zot parfe. Bann lafet relizye ti’n vin zis en routin koumsa menm, san okenn vre respe pour Bondye. (Malaki 1:6-8) Ler Zezi ti lo later, bann profeser Lalwa ek bann Farizyen ti’n azout en bann tradisyon avek Lalwa Moiz. Zezi ti dir zot ipokrit akoz zot ti nepli konpran bann prensip drwat ki Lalwa ti baze lo la. (Matye 23:23, 24) Bann vre Kretyen i bezwen veye ki bann tradisyon relizye ki’n fer par zonm pa anpes zot donn tou zot devouman dan sa vre ladorasyon.

“War sa enn ki envizib”

13. Ki sa de fason ki Moiz ti vwar en pe laglwar Bondye?

¹³ Moiz ti demande pour vwar laglwar Bondye lo montanny, e i ti vwar en pe laglwar Zeova. Ler i ti al dan tabernak, i pa ti met sa vwal lo son figir. Moiz ti en dimoun ki ti annan en gran lafwa ek en dezir pour fer lavolonte Bondye. I ti ganny loportinite pour vwar en pe laglwar Zeova dan en vizyon, me dan en sans i ti’n fini vwar Bondye avek son lizye lafwa. Labib i dir ki Moiz ti “reste ferm konmsi i ti pe war sa enn ki envizib.” (Ebre 11:27; Egzod 34:5-7) Deplis, i ti reflekte laglwar Bondye pa zis par bann reyon lalimyer lo son figir, me osi atraver zefor ki i ti fer pour ed bann Izraelit arive konn e servi Zeova.

14. Ki mannyer Zezi ti vwar laglwar Bondye, e ki i ti kontan fer?

¹⁴ Dan lesyel, Zezi ti vwar laglwar Bondye pour bokou bokou letan, menm avan ki liniver ti ganny kree. (Proverb 8:22, 30) Pandan tou sa letan, zot ti devlop en gran lanmour ek lafeksyon pour kanmarad. Zeova ti eksprim son lanmour ek lafeksyon pli profon pour son premye garson parmi tou kreasyon. Zezi osi an retour ti eksprim son lanmour  ek lafeksyon profon pour sa enn ki’n donn li lavi. (Zan 14:31; 17:24) Zot lanmour ti en lanmour parfe ant en Papa ek son Garson. Parey Moiz, Zezi ti kontan reflekte laglwar Zeova dan bann keksoz ki i ti ansennyen.

15. Dan ki fason bann Kretyen i vwar laglwar Bondye?

¹⁵ Parey Moiz ek Zezi, bann Temwen Bondye dan nou letan i vreman kontan pour vwar laglwar Zeova. Zot pa’n rezet sa bon nouvel glorye. Zapot Pol ti ekrir: “Sa vwal i tonbe zis kan en dimoun i konverti dan Senyer [pour fer son lavolonte].” (2 Korentyen 3:16) Nou etidye Labib akoz nou anvi fer lavolonte Bondye. Nou admir sa laglwar reflekte lo figir Zezi Kri, Garson Zeova ki’n osi ganny apwente konman Lerwa. Nou osi imit son legzanp. Parey Moiz ek Zezi, nou’n ganny sa privilez pour prese, ansenny lezot konsernan sa Bondye glorye ki nou adore.

16. Ki byenfe nou gannyen ler nou konn laverite?

¹⁶ Zezi ti priye: “Mon remersi ou Papa, . . . akoz ou’n kasyet avek bann dimoun malen e entelizan tou sa bann keksoz, me ou’n revel li avek bann zanfan.” (Matye 11:25) Zeova i fer bann ki senser e annan limilite konpran son plan ek son personnalite. (1 Korentyen 1:26-28) I pran swen avek nou, protez nou, e ansenny nou pour nou prop byenfe—pour nou viv en pli bon lavi. Annou profit tou loportinite ki nou gannyen pour apros avek Zeova, e apresye tou sa provizyon ki i fer pour nou konn li pli byen.

17. Ki mannyer nou arive konn bann kalite Zeova pli byen?

¹⁷ Pol ti ekrir bann Kretyen swazir: “Nou tou ki vwal i’n ganny tire lo nou figir, nou reflet laglwar Senyer. Ensi, nou’n ganny transformen, pour viv parey Senyer, sortan dan en laglwar pour al dan en laglwar.” (2 Korentyen 3:18) Ki swa nou annan lespwar pour viv lo later oubyen dan lesyel, pli nou arive konn Zeova, son bann kalite ek personnalite dan Labib, pli nou vin parey li. Si nou reflesir avek lapresyasyon lo lavi, minister, ek lansennyman Zezi Kri, nou pou reflekte bann kalite Zeova pli byen. I vreman en gran lazwa pour nou loue nou Bondye, menm reflekte son laglwar!

Eski ou rapel?

• Akoz bann Izraelit ti per pour get laglwar Bondye ki Moiz ti reflekte?

• Dan ki fason ti annan en vwal lo sa bon nouvel dan premye syek? dan nou letan?

• Ki mannyer nou reflekte laglwar Bondye?

[Kestyon]

[Portre lo paz 13]

Bann Izraelit pa ti kapab get figir Moiz

[Portre lo paz 15]

Zis parey Pol, bokou ki ti opoz laverite avan pe aprezan servi Zeova

[Portre lo paz 17]

Bann serviter Zeova i kontan pour reflekte Son laglwar