Devlop vre Limilite
Devlop vre Limilite
“Sa pep ki annan limilite ou pou sove.”—2 SAMYEL 22:28.
1, 2. Dan ki fason bokou dirizan lemonn ti parey?
BANN piramid Lezip i fer nou rapel sa bann zonm ki ti domin sa pei byen lontan. Lezot zonm remarkab dan listwar ti Senakerib sorti Lasiri, Aleksann Legran sorti Lagres, ek Zil Sezar sorti Ronm. Tou sa bann dirizan i annan en keksoz an komen. Zot pa’n kit deryer en repitasyon konman bann dimoun ki ti annan vre limilite.—Matye 20:25, 26.
2 Eski ou krwar ki sa bann dirizan ti abitye al anver bann dernyen sitwayen ki ti bezwen konsolasyon dan zot rwayonm? Be sa zanmen! Nou pa ni kapab krwar ki zot ti vizit bann dernyen dimoun kot zot pour ankouraz zot. Zot latitid anver bann ki zot ti konsider konman dernyen dimoun i vreman diferan avek Zeova, Sef Siprenm dan liniver!
Pli gran Legzanp Limilite
3. Ki mannyer Sef Siprenm i tret son bann serviter isi lo later?
3 Nou pa pou zanmen arive konpran ki degre gran Zeova i ete. Kantmenm sa, “son lizye pe ale vini partou lo later pour li montre son lafors an faver bann ki zot leker i tou pour li.” (2 Kronik 16:9) Ki Zeova i fer ler i vwar son bann senp adorater ki fatige e dekouraze akoz diferan leprev ki zot sibir? Dan en sans, par son lespri sen i “pe reste” avek zot pour relev moral bann ki annan limilite e soulaz leker bann ki pe ganny kraze. (Izai 57:15) Alors, apre ki Zeova in soulaz e relev moral son bann adorater, zot pli byen ekipe pour kontinyen servi li avek lazwa. Pa Bondye i vreman demontre limilite!
4, 5. (a) Ki mannyer sa psalmis ti santi lo fason ki Bondye i dirize? (b) Ki sa i vedir kan Labib i dir ki Bondye i “abes” li pour ed bann senp imen?
4 Napa personn dan liniver ki’n abes li parey Souvren Senyer in fer pour kapab ed bann imen peser. Sa psalmis ti kapab ekrir: “Zeova i bokou pli o ki tou bann nasyon; son laglwar i pli o ki lesyel. Lekel ki parey Zeova nou Bondye, li ki pe reste anler? I pe abes li pour get lesyel ek later, i pe lev sa dernyen dimoun dan lapousyer; i elev sa enn pov dan trou lasann.”—Psonm 113:4-7.
5 Remark sa lekspresyon “i pe abes li.” Ler Zeova i abes li, i pa fer nou santi nou enferyer e li i siperyer parey bann dirizan imen i kapab fer. Zeova i pir e sen e alor napa okenn “vantardri” oubyen lorgey dan li. (Mark 7:22, 23) I “abes li” dan le sans ki i met li menm nivo avek en dimoun ki pli ba ki li. I konmsi i kit son ran oubyen dinite pour annan relasyon avek enn ki anba son lotorite. Pour sa rezon, serten Labib i tradwir Psonm 113:6 konman Bondye pe “imilye li.” Sa i dekrir byen nou Bondye ki avek limilite pe pran swen avek son bann adorater imen enparfe!—2 Samyel 22:36.
Akoz Zezi ti annan Limilite
6. Ki mannyer Zeova ti demontre pli gran limilite?
6 Bondye ti demontre pli gran limilite ek lanmour ler i ti anvoy son Garson byenneme pour ne lo later e grandi konman en imen pour sov limanite. (Zan 3:16) Zezi ti ansenny nou laverite lo son Papa e apre i ti donn son lavi parfe pour efas “pese lemonn.” (Zan 1:29; 18:37) Zezi ti reflekte parfetman son Papa, enkli son limilite, e i ti pare pour fer sa ki Bondye ti demann li. Sa ti pli gran legzanp limilite ek lanmour ki okenn kreatir Bondye in deza demontre. Pa tou dimoun ki ti apresye limilite Zezi, son bann lennmi ti menm konsider li konman “pli dernyen dimoun.” (Danyel 4:17) Kantmenm sa, zapot Pol ti realize ki son bann konpanyon Kretyen i devret imit Zezi. Alor zot ti devret demontre limilite dan fason ki zot azir avek kanmarad.—1 Korentyen 11:1; Filipyen 2:3, 4.
7, 8. (a) Ki mannyer Zezi ti aprann annan limilite? (b) Ki lenvitasyon Zezi ti fer avek bann ki ti kapab vin son disip?
7 Pol ti fer resorti legzanp remarkab Zezi, ler i ti ekrir: ‘Posed sa menm santiman ki ti dan Kris-Zezi. Menm ki i ti posed natir Bondye i pa ti anvi ran egal avek Bondye. Me, okontrer, par son prop volonte, i ti renons tou sa ki i posede pour pran kondisyon lesklav. I ti pran natir imen, konman en zonm, i ti aksepte viv dan limilite e montre li obeisan ziska lanmor, menm lanmor lo poto.’—Filipyen 2:5-8.
8 Serten dimoun i kapab demande, ‘Ki mannyer Zezi ti aprann annan limilite?’ Sa ti en byenfe merveye ki i ti gannyen atraver son lasosyasyon pros avek son Papa dan lesyel pour bokou bokou letan, kot i ti servi konman “zouvriye abil” dan kreasyon tou keksoz. (Proverb 8:30) Apre rebelyon dan zarden Edenn, garson premye ne Bondye ti dan en pozisyon pour vwar son Papa azir avek limilite anver bann imen peser. Pareyman, ler i ti lo later, Zezi ti reflekte limilite son Papa e i ti fer sa lenvitasyon: “Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.”—Matye 11:29; Zan 14:9.
9. (a) Ki Zezi ti trouv atiran dan bann zanfan? (b) Ki leson Zezi ti ansennyen par servi en zanfan?
9 Lefe ki Zezi ti annan vre limilite, bann pti zanfan pa ti per li. Okontrer zot ti santi zot atire avek li. Lo son kote, Zezi ti annan lafeksyon pour bann zanfan e i ti enterese avek zot. (Mark 10:13-16) Kwa ki Zezi ti trouv atiran dan bann zanfan? Sirman, zot ti annan bann kalite atiran ki serten son bann disip adilt pa ti toultan demontre. Nou konn tre byen ki bann pti zanfan i konsider bann adilt konman siperyer. Sa i evidan par sa kantite kestyon ki zot demande. Wi, konpare avek bokou adilt, laplipar zanfan i anvi aprann e zot napa sa tandans pour vin fyer parey en adilt. En zour, Zezi ti diriz latansyon lo en zanfan e i ti dir son bann disip: “Si zot pa sanze e vin parey bann zanfan, zot pa pou zanmen antre dan Rwayonm lesyel. Sa ki pli gran dan Rwayonm lesyel i sa enn ki abes li e vin parey sa zanfan.” (Matye 18:3, 4) Zezi ti fer resorti sa lareg: “Sa enn ki rod grander pou ganny abese, e sa enn ki abes son lekor pou vin enportan.”—Matye 23:12; Lik 14:11; 18:14.
10. Ki kestyon nou pou egzaminen?
10 Sa laverite i fer lev serten kestyon enportan. Nou lespwar pour ganny lavi eternel i depan en serten degre lo si nou devlop vre limilite. Me akoz parler bann Kretyen i trouv li difisil pour abes zot? Akoz nou vwar li difisil pour met dekote nou lorgey e azir avek limilite devan leprev? Deplis kwa ki pou ed nou reisi devlop vre limilite?—Zak 4:6, 10.
Akoz i difisil pour abes nou
11. Akoz i pa sirprenan ki nou lite pour annan limilite?
11 Si ou pe lite pour annan limilite, ou pa tousel. An 1920, sa magazin ti diskit lo sa konsey Labib konsernan nesesite pour annan limilite. I ti fer resorti: “Lefe ki nou realize ki kantite valer Senyer i atase avek limilite, sa i devret ankouraz tou vre disip pour devlop sa kalite toulezour.” Answit sa magazin ti admet fransman: “Malgre tou sa bann konsey Labib, lenperfeksyon natir imen i paret sitan for, ki sa bann ki vin pep Senyer e ki deside swiv fason Senyer i rankontre plis difikilte, zot bezwen fer plis zefor dan sa domenn ki dan okenn lezot kalite.” Sa i fer resorti en rezon akoz bann vre Kretyen i bezwen lite pour annan limilite. Wi nou natir imen enparfe i oule ganny laglwar ki pa apropriye. Sa i akoz nou desandans en koup imen peser, Adan ek Ev, ki ti les zot dezir egois domin zot.—Romen 5:12.
12, 13. (a) Ki mannyer sa lemonn i fer li difisil pour bann Kretyen demontre limilite? (b) Lekel ki fer nou lalit pour devlop limilite vin pli difisil ankor?
12 En lot rezon ki kapab fer li difisil pour nou demontre limilite i akoz nou antoure par en lemonn ki ankouraz dimoun pour vin pli siperyer ki lezot. Parmi bann lobzektif ki dimoun dan sa lemonn i annan i sa lanvi pour satisfer “dezir atraver nou lizye ek lorgey dan lavi toulezour.” (1 Zan 2:16) Olye les sa bann dezir lemonn domin zot, bann disip Zezi i devret gard zot lavi senp e konsantre lo fer lavolonte Bondye.—Matye 6:22-24, 31-33; 1 Zan 2:17.
13 En trwazyenm rezon akoz i difisil pour devlop e demontre limilite i annan pour fer avek sours lorgey, Satan Dyab, ki domin sa lemonn. (2 Korentyen 4:4; 1 Timote 3:6) Satan i promouvwar son bann move tre. Par egzanp, i ti esey fer Zezi ador li e an retour i ti pou donn Zezi “tou bann rwayonm partou lo later [ek zot laglwar.]” Zezi ki ti toultan annan limilite ti rezet konpletman sa ki Satan ti ofer li. (Matye 4:8, 10) Pareyman, Satan i tant bann Kretyen pour rod laglwar pour zot lekor. Okontrer, bann Kretyen ki annan limilite i fer zefor pour swiv legzanp Zezi e zot fer Bondye ganny louanz ek loner.—Mark 10:17, 18.
Devlop e demontre vre Limilite
14. Kisisa “fo limilite”?
14 Dan son let pour bann Kolosyen, zapot Pol ti averti konsernan sa ki en dimoun i kapab fer pour pretann i annan limilite zis pour enpresyonn lezot. Pol ti apel sa en “fo limilite.” Sa bann ki zis fer krwar zot annan limilite i pa bann dimoun spirityel. Okontrer sa i montre ki zot vreman “ranpli avek lorgey.” (Kolosyen 2:18, 23) Zezi ti fer resorti serten legzanp sa kalite fo limilite. I ti kondann bann Farizyen pour zot lapriyer an piblik e pour fason ki zot ti zennen avek en figir tris pour tou dimoun vwar ki zot pe zennen. Okontrer, si nou oule fer nou lapriyer personnel annan valer devan Bondye, nou devret fer li avek limilite.—Matye 6:5, 6, 16.
15. (a) Ki nou kapab fer pour gard nou limilite? (b) Nonm serten bon legzanp limilite.
15 Sa pli bon legzanp limilite ki Zeova ek Zezi Kri in kite i ed bann Kretyen pour kontinyen gard sa vre limilite. Sa i enplik fer en letid regilye lo Labib ek bann piblikasyon baze lo Labib fourni par ‘lesklav fidel e pridan.’ (Matye 24:45) En tel letid i tre tre enportan pour bann ansyen, pour ki zot pa lev zot lekor parlao zot bann frer. (Deterononm 17:19, 20; 1 Pyer 5:1-3) Reflesir lo sa plizyer legzanp bann dimoun ki Zeova ti beni pour zot limilite. Par egzanp Rit, Ana, Elizabet, e bokou lezot. (Rit 1:16, 17; 1 Samyel 1:11, 20; Lik 1:41-43) Mazin osi, legzanp sa bann zonm enportan ki ti gard zot limilite dan servis Zeova, parey David, Yosiya, Zan Batis, ek zapot Pol. (2 Kronik 34:1, 2, 19, 26-28; Psonm 131:1; Zan 1:26, 27; 3:26-30; Akt 21:20-26; 1 Korentyen 15:9) Ki nou pou dir lo sa kantite legzanp limilite ki nou trouve dan kongregasyon Kretyen ozordi? Par reflesir lo sa bann legzanp, sa pou ed bann vre Kretyen demontre “bokou limilite dan zot relasyon avek kanmarad.”—1 Pyer 5:5.
16. Ki mannyer predikasyon i ed nou annan limilite?
16 Partisip regilyerman dan predikasyon i osi kapab ed nou annan limilite. Ler nou abes nou, sa i fer nou pli efikas ler nou rankontre bann dimoun ki nou pa konnen kot zot e dan lezot landrwa. Sa i pli neseser ler bann dimoun pa tro montre lentere oubyen zot azir brit. Souvannfwa, dimoun i kestyonn nou krwayans, e limilite i kapab ed nou pour kontinyen reponn bann kestyon “avek labonte ek respe.” (1 Pyer 3:16) Bokou serviter Bondye ki annan limilite in al reste dan bann nouvo teritwar e zot in ed dimoun sorti dan diferan kiltir ek nivo lavi. Petet sa bann frer ek ser i bezwen avek limilite fer fas avek sa latas difisil pour aprann en nouvo langaz pour kapab pli byen ed sa bann avek ki zot anvi partaz sa bon nouvel. Sa bann frer ek ser i vreman merit ganny felisite!—Matye 28:19, 20.
17. Ki bann responsabilite Kretyen ki demann limilite pour fer?
17 Avek limilite, bokou in akonpli zot responsabilite Kretyen, par met lentere lezot avan sa ki pour zot. Par egzanp, i demann limilite pour en papa Kretyen pran letan lo son bann aktivite personnel pour prepar e kondwir en bon letid Labib avek son zanfan. Limilite i osi ed zanfan pour onor e obeir zot paran ki enparfe. (Efezyen 6:1-4) Souvannfwa bann madanm ki zot mari pa Temwen i fer fas avek bann sitiasyon ki demann limilite anmezir ki ‘zot kondwir zot dan en fason drwat e avek respe’ pour kapab fer zot mari aksepte laverite. (1 Pyer 3:1, 2) Limilite ek en lanmour senser i osi tre itil ler nou pe pran swen avek bann paran ki malad e aze.—1 Timote 5:4.
Limilite i rezourd Problenm
18. Ki mannyer limilite i kapab ed nou rezourd bann problenm?
18 Tou imen ki servi Bondye i enparfe. (Zak 3:2) Parler, i kapab annan bann diferans oubyen malantandi ant de Kretyen. Petet enn i annan en bon rezon pour fer en konplent kont en lot. Normalman, sa bann sitiasyon i kapab ganny rezourd par aplik sa konsey: “Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad.” (Kolosyen 3:13) I vre ki i pa fasil pour swiv sa konsey, me limilite pou ed en dimoun met li an pratik.
19. Ki nou bezwen rapel ler nou koz avek en dimoun ki’n ofans nou?
19 Parler en Kretyen i kapab santi ki en fot i tro grav pour li les pase. Dan sa ka, limilite pou ed li apros sa dimoun ki sipoze i’n ofans li avek en lentansyon pour fer lape. (Matye 18:15) En rezon akoz problenm ant Kretyen i parler persiste i akoz enn oubyen petet tou le de dimoun i tro fyer pour admet ki sa problenm i zot lafot. Oubyen sa enn ki pran linisyativ pour apros sa lot i kapab fer li dan en fason ki li i byen e i kritik sa lot. Tandis ki vre limilite i fer en dimoun annan sa bon latitid pour rezourd bokou diferans.
20, 21. Lekel sa pli gran led pour ed nou annan limilite?
20 Priy Bondye pour son led ek son lespri sen i en pa esansyel pour devlop limilite. Me pa oubliye, “Bondye . . . i donn son lagras bann ki annan limilite.” (Zak 4:6) Si ou ganny en dezakor avek en konpanyon Kretyen, priy Zeova pour ed ou avek limilite admet okenn fot ki swa pti oubyen gro ki ou’n fer pour kree sa problenm. Si en dimoun in ofans ou e i dir ou ki “i regrete,” alor avek limilite pardonn li. Si i difisil pour ou fer sa, atraver lapriyer rod led Zeova pour ed ou retir okenn santiman lorgey ki ankor la dan ou leker.
21 Ler nou konpran sa kantite byenfe ki limilite i anmennen, sa i devret pous nou pour devlop e pa perdi sa zoli kalite. Pour nou kapab fer sa, nou annan legzanp merveye Zeova ek Zezi Kri! Pa zanmen oubliy sa lasirans sorti kot Bondye: “Limilite ek lakrent pour Zeova i anmenn larises ek laglwar e lavi.”—Proverb 22:4.
Pwen Refleksyon
• Lekel sa de pli bon legzanp limilite?
• Akoz i difisil pour devlop limilite?
• Kwa ki kapab ed nou annan limilite?
• Akoz i sitan enportan pour pa perdi nou limilite?
[Kestyon]
[Portre lo paz 17]
Zezi ti annan vre limilite
[Portre lo paz 19]
Lemonn i ankouraz dimoun pour vin pli siperyer ki lezot
[Portre lo paz 19]
Portre WHO par L. Almasi/K. Hemzǒ
[Portre lo paz 20]
Limilite i ed nou apros dimoun ki nou pa konnen dan predikasyon
[Portre lo paz 21]
Souvan nou kapab les pase diferans avek lanmour ek limilite