Eski en Dimoun i vreman kapab sanz sa Lemonn?

“Bann dimoun pov i dir nou ki premyerman zot anvi lape ek sekirite, e dezyenmman zot anvi bann loportinite pour zot kapab viv en meyer lavi. Zot anvi bann polisi nasyonal e enternasyonal ki zis, pour ki bann gran pei ek lakonpannyen ki annan pouvwar pa met retar dan zot bann zefor.”

SA I fason ki direkter en lorganizasyon enternasyonal ki aport led ti dekrir lespwar ek aspirasyon bann dimoun pov. Anfet, son parol i byen dekrir santiman bann dimoun ki’n vin viktim lenzistis ek soufrans dan sa lemonn. Zot tou zot ti a kontan en lemonn kot i annan vre lape ek sekirite. Eski sa i posib? Eski i annan en dimoun ki annan sa pouvwar ek abilite pour sanz sa lemonn enzis?

 Zefor pour anmenn Sanzman

En kantite dimoun in seye. Par egzanp, en madanm Angle dan diznevyenm syek ki ti apel Florence Nightingale, ti dedye son lavi konman en ners pour pran swen avek bann malad avek konpasyon e kit zot prop. Dan son letan, avan laparisyon antiseptik ek antibyotik, nou pa ti ekspekte ki ti pou annan lopital ki pran swen avek dimoun, parey i annan ozordi. En liv i dir ki “bann ners pa ti edike, zot pa ti prop e zot ti renonmen konman bann soular e konman dimoun imoral.” Eski Florence Nightingale ti trouv okenn sikse dan son zefor pour sanz sistenm lasante? Wi. Pareyman, plizyer dimoun konsernen ki pare pour ede in trouv sikse dan led ki zot in anmennen dan diferan laspe lavi. Par egzanp, dan lalfabetizasyon, ledikasyon, lamedsin, proze lakaz, e dan sa laranzman pour anvoy manze dan bann pei pov. An rezilta, i’n annan gran amelyorasyon dan kalite lavi ki plizyer milyon dimoun mwen fortinen i viv.

Kantmenm sa, nou pa kapab ferm lizye lo sa realite ki kriyel. Se ki plizyer milyon dimoun i ankor pe soufer akoz lager, krim, maladi, lafamin ek bann lezot problenm ankor. En lorganizasyon Irlande ki aport led i dir ki “toulezour lapovrete i pran lavi 30,000 dimoun.” Menm lesklavaz, en problenm ki en kantite dimoun dan lepase ti anvi rezourd, ozordi i ankor egziste dan lemonn. Dapre en liv, Disposable People—New Slavery in the Global Economy, “ozordi dan lemonn i annan plis lesklav ki sa kantite dimoun ki ti ganny pran Lafrik dan letan ki bann lesklav ti travers losean Atlantik.”

Akoz zefor sa bann dimoun pour anmenn sanzman dirab pa’n marse? Eski i zis akoz bann ki annan pouvwar ek larises in mal servi zot pouvwar, oubyen i annan lezot rezon ankor?

Baryer ki anpes annan Sanzman

Dapre Parol Bondye, Satan i sa pli gran baryer anver zefor ki imen i fer pour batir en lemonn kot i annan lazistis. Zapot Zan i dir nou ki “lemonn antye i dan pouvwar dyab.” (1 Zan 5:19) Aktyelman Satan pe “tronp lemonn antye.” (Revelasyon 12:9) Toultan ki son lenfliyans pa ganny eliminen, i pou toultan annan viktim lemal ek lenzistis. Kwa ki’n fer annan en tel sitiasyon tris koumsa?

Bondye ti met nou premye paran, Adan ek Ev, lo en later ki i ti’n kree avek bi pour fer li vin en paradi kot tou fanmiy imen ti pou viv lo la. I ti en lemonn ki ti “tre bon.” (Zenez 1:31) Me akoz keksoz ti sanze? Satan ki ti responsab. I ti kestyonn sa drwa ki Bondye i annan pour fer bann lareg ki imen i devret obeir. I ti dir ki Bondye i diriz dan en fason enzis. I ti enfliyans Adan ek Ev pour swazir en fason viv kot zot lib pour deside pour zot menm kwa ki byen e mal. (Zenez 3:1-6) An rezilta, sa ti kree en lot baryer anver zefor ki zonm in fer pour etabli en lemonn zis. Sa i pese ek lenperfeksyon.—Romen 5:12.

 Akoz permet sa arive?

Serten i kapab demande: ‘Akoz Bondye in permet pese ek lenperfeksyon devlope? Akoz i pa ti servi son gran pouvwar pour detri sa bann rebel e fer en nouvo konmansman?’ Sa i paret en solisyon senp. Me si i ti servi son pouvwar dan sa fason, sa ti pou soulev lezot kestyon ankor? Eski pa labi pouvwar i enn bann rezon prensipal akoz bann ki pov e demoralize pe soufer? Eski pa i senm dout dan lespri bann dimoun senser ler en diktater i servi son pouvwar pour detri nenport ki ki pa dakor avek son bann polisi?

Pour montre bann ki annan leker senser ki I pa en diktater ki abiz son pouvwar, Bondye in les Satan ansanm avek bann ki’n rebele lib, san gidans son bann lalwa ek prensip, pour en serten peryod letan. Anmezir ki letan i pase sa ti pou prouve ki lafason Bondye i dirize i sa sel bon fason. Sa ti pou montre nou ki okenn restriksyon Bondye i mete lo nou, i pour nou prop dibyen. Anfet, sa kantite katastrof ki’n arive akoz rebelyon kont dominasyon Bondye, in deza montre nou ki sa i vre. Tousala i montre ki Bondye i annan rezon ler i deside servi son pwisans pour retir tou mesanste lo sa later. Sa i tre pros pour arive.—Zenez 18:23-32; Deterononm 32:4; Psonm 37:9, 10, 38.

Ziska ki Bondye i azir, antretan nou’n pri dan en lemonn enzis, en lemonn ki pe “soupire e soufer.” (Romen 8:22) Nenport kwa ki nou fer pour anmenn sanzman, nou pa kapab retir Satan, oubyen retir lenperfeksyon ki lakoz tou sa soufrans ki nou pas atraver. Nou zis napa sa pouvwar pour retir lefe ki pese Adan in anmennen.—Psonm 49:7-9.

Zezi Kri pou anmenn Sanzman pour touzour

Eski sa i vedir ki nou napa okenn fason pour sorti dan sa sitiasyon? Non, i annan en fason. I annan enn ki pli pwisan ki imen, ki’n ganny sa responsabilite pour anmenn sanzman pour touzour. Lekel li? I apel Zezi Kri. Labib i dekrir li konman sa mwayen prensipal ki Bondye pou servi pour delivre imen.—Akt 5:31.

Aktyelman i pe esper ‘ler ki Bondye in fikse’ pour azir. (Revelasyon 11:18) Ki Zezi pou vreman fer? I pou “renouvle tou keksoz parey Bondye in anonse par son bann sen profet depi lontan.” (Akt 3:21) Zezi pou “delivre sa enn pov ki pe kriy osekour, osi sa enn ki pe soufer e nenport ki, ki napa personn pour vin ed li. . . . I pou liber zot dan lopresyon e dan vyolans.” (Psonm 72:12-16) Bondye in promet ki i pou “fer arete lager ziska dan bann landrwa pli lwen lo later,” e i pou servi Zezi pour akonpli sa. (Psonm 46:9) I’n promet ki “okenn zabitan [lo son later ki’n ganny netwaye] pa pou dir: ‘Mon malad.’ ” Bann aveg, sourd, bwate, tou sa bann ki’n ganny afekte par maladi, pou ganny en lasante parfe. (Izai 33:24; 35:5, 6; Revelasyon 21:3, 4) Menm bann ki’n mor pou benefisye. Bondye in promet pour donn lavi bann ki’n vin viktim lenzistis ek soufrans.—Zan 5:28, 29.

Sa sanzman ki Zezi pou anmennen pa pou enn tanporer. I pou konpletman retir tou bann baryer ki anpes annan en lemonn zis. I pou retir pese ek lenperfeksyon, detrir Satan ek tou bann ki swiv li. (Revelasyon 19:19, 20; 20:1-3, 10) Sa bann soufrans ki Bondye in permet pour en serten letan ‘pa pou ariv ankor.’ (Naoum 1:9) Sanmenm sa ki Zezi ti pe mazinen ler i ti montre nou pour priye ki Rwayonm Bondye i vini e ki lavolonte Bondye i ganny akonpli “lo later parey dan lesyel.”—Nou ki’n met an italik; Matye 6:10.

Petet ou kapab dir: ‘Me pa Zezi li menm ti dir ki bann pov pou touzour avek nou? Pa sa i vedir ki pou toultan annan lenzistis ek lapovrete?’ (Matye 26:11) I vre, Zezi ti dir ki pou toultan annan dimoun pov. Me dapre konteks ek bann promes dan Parol Bondye, i montre ki Zezi ti oule dir ki osi lontan ki sa lemonn  Satan i kontinyen, i pou toultan annan dimoun pov. I ti konnen ki okenn imen pa ti pou kapab tir lapovrete ek lenzistis dan sa lemonn. I ti osi konnen ki i pou sanz tousala. Tre byento i pou etabli en nouvo lemonn, “en nouvo lesyel ek en nouvo later” kot pou napa douler, maladi, lapovrete ek lanmor.—2 Pyer 3:13; Revelasyon 21:1.

“Pa manke fer Dibyen”

Eski sa i vedir ki i pa vo lapenn fer tou sa ki nou kapab pour ed lezot? Non. Labib i ankouraz nou pour ed lezot kan zot pe pas atraver bann tes ek bann sitiasyon difisil. Lerwa Salomon ti ekrir: “Pa refiz sa ki byen bann ki merite, ler i dan pouvwar ou lanmen pour fer li.” (Proverb 3:27) Zapot Pol i ankouraz nou pour “pa manke fer dibyen e ed kanmarad.”—Ebre 13:16.

Zezi li menm ti ankouraz nou pour fer tou sa ki nou kapab pour ed lezot. I ti rakont en parabol konsernan en Samariten ki ti zwenn en zonm ki ti’n ganny bate e vole. Zezi ti dir ki sa Samariten ti “ganny pitye,” i ti bann blesir sa zonm e ed li rekipere. I ti fer tousala par servi son prop resours. (Lik 10:29-37) Sa Samariten ki ti annan konpasyon, pa ti sanz lemonn, me i ti anmenn en gran sanzman dan lavi en zonm. Nou osi nou kapab fer parey.

Me Zezi i kapab fer plis ki zis ed en dimoun. I vreman kapab fer sanzman, e i pou fer li tre byento. Kan i pou anmenn sanzman, bann dimoun ki’n vin viktim sa lemonn enzis pou kapab viv en meyer lavi e rezwir vre lape ek sekirite.—Psonm 4:8; 37:10, 11.

Anmezir ki nou pe esper sa letan, annou pa zanmen ezite pour fer nenport kwa ki nou kapab, ki swa lo plan spirityel oubyen materyel, pour “fer dibyen” tou sa bann ki’n vin viktim sa lemonn enzis.—Galat 6:10.

[Portre lo paz 5]

Florence Nightingale ti fer vre sanzman dan sistenm lasante

[Portre lo paz 5]

Courtesy National Library of Medicine

[Portre lo paz 7]

Bann disip Zezi i fer dibyen lezot

[Portre lo paz 4]

The Star, Johannesburg, S.A.