Fer atansyon ki nou pa devlop en Leker orgeye
Fer atansyon ki nou pa devlop en Leker orgeye
“Bondye i opoz bann ki annan lorgey.”—ZAK 4:6.
1. Donn en legzanp bann santiman lafyerte ki apropriye.
ESKI i’n deza ariv en levennman dan ou lavi ki’n fer ou santi ou fyer? Laplipar nou in deza ganny sa santiman. I pa en move keksoz ki parler nou kapab santi en serten lafyerte. Par egzanp, ler en koup Kretyen i lir en rapor lekol konsernan bon konportman ek travay dir zot fiy, i tre probab ki zot pou byen satisfe avek son lakonplisman. En nouvo kongregasyon ki zapot Pol ek son bann konpanyon ti’n ede etablir, ti fer zot fyer akoz sa bann frer ek ser ti’n andire fidelman dan persekisyon.—1 Tesalonisyen 1:1, 6; 2:19, 20; 2 Tesalonisyen 1:1, 4.
2. Akoz laplipar-di-tan bann santiman lafyerte i pa bon?
2 Atraver sa bann legzanp, nou kapab vwar ki lafyerte i kapab endik en santiman lazwa ki vin atraver en keksoz ki nou fer oubyen annan. Me laplipar-di-tan, lafyerte i montre ki en dimoun i kapab pe pans tro bokou lo son lekor san realize. I kapab santi ki i pli siperyer ki lezot akoz son abilite, laparans, larises, oubyen pozisyon. Souvannfwa, sa i evidan atraver en latitid ek konportman arogan. Sa kalite lafyerte i en keksoz ki nou konman Kretyen nou definitivman bezwen veye. Akoz? Parski nou’n ne avek en tandans egois ki nou’n erite avek nou zanset Adan. (Zenez 8:21) Alor, nou leker i kapab fasilman anbet nou pour fer nou santi nou fyer pour bann move rezon. Par egzanp, bann Kretyen pa devret konpar zot avek lezot e santi zot fyer akoz zot ras, larises, ledikasyon, talan oubyen performans dan travay. Sa kalite lafyerte ki sa bann keksoz i kapab fer devlope dan en dimoun i pa apropriye e i pa fer plezir Zeova.—Zeremi 9:23; Akt 10:34, 35; 1 Korentyen 4:7; Galat 5:26; 6:3, 4.
3. Kisisa lorgey, e ki Zezi ti dir lo sa move tre?
3 I annan en lot rezon akoz nou bezwen rezet lafyerte ki pa apropriye. Si nou les sa move kalite lafyerte grandi dan nou leker, sa i kapab fer nou devlop lorgey. Kisisa lorgey? Apard ki fer en dimoun santi li siperyer, en dimoun orgeye i mepriz bann dimoun ki li i konsider enferyer. (Lik 18:9; Zan 7:47-49) Zezi ti mansyonn “vantardri,” oubyen lorgey, ansanm avek lezot move tre ki “sorti dan leker en zonm” e ki “fer li enpir.” (Mark 7:20-23) Alor sa i fer bann Kretyen realize ki i tre enportan pour evite devlop en leker orgeye.
4. Ki mannyer egzamin legzanp bann dimoun orgeye dan Labib i kapab ed nou?
4 Egzamin serten resi dan Labib ki koz lo bann dimoun orgeye i kapab ed ou pour evite vin orgeye. Dan sa fason ou pou dan en pli bon pozisyon pour detekte bann santiman lafyerte ki pa apropriye ki kapab dan ou oubyen ki kapab devlope avek letan. Sa pou ed ou rezet bann panse oubyen santiman ki kapab fer ou leker vin orgeye. An rezilta, ou pa pou ganny afekte ler Bondye i azir an armoni avek son lavertisman: “Mon pou retir parmi zot bann ki dan lazwa akoz zot lorgey; e ou pa pou zanmen vin orgeye ankor dan mon montanny sen.”—Tsefanya 3:11.
Bondye i pran Aksyon kont bann ki orgeye
5, 6. Ki mannyer Faraon ti montre lorgey, e ki ti son rezilta?
5 Ou osi kapab vwar pwennvi Zeova lo lorgey par lafason ki i ti azir avek bann gran dirizan parey Faraon. I tre evidan ki Faraon ti annan en leker orgeye. Faraon ki ti konsider son lekor konman en bondye, ti deteste son bann lesklav, bann Izraelit. Annou vwar ki mannyer i ti azir ler Moiz ti demann li pour les nasyon Izrael al dan dezer pour “selebre en lafet” pour Zeova. Faraon ti reponn avek lorgey: “Lekel li Zeova, ki mon devret obeir li pour les Izrael ale?”—Egzod 5:1, 2.
6 Apre ki Faraon ti’n eksperyans sis fleo, Zeova ti dir Moiz demann dirizan Lezip: “Eski ou ankor pe tret mon pep avek lorgey pour pa les zot ale?” (Egzod 9:17) Apre Moiz ti anons sa setyenm fleo—lagrel ki ti devaste sa pei. Dek ki bann Izraelit ti lib pour ale apre sa dizyenm fleo, Faraon ti sanz son lide e i ti tay deryer zot. Finalman, Faraon ek son larme ti pri dan Lanmer Rouz. Esey mazin sa ki ti’n pas dan zot lespri ler sa delo ti konmans kouver zot! Ki ti rezilta lorgey Faraon? Son bann pli bon solda ti dir: “Annou evit okenn kontakt avek Izrael, akoz Zeova i sirman lager pour zot kont bann Ezipsyen.”—Egzod 14:25.
7. Ki mannyer bann dirizan Babilonn ti montre lorgey?
7 Ti annan lezot dirizan orgeye ki Zeova ti imilye. Enn parmi ti lerwa Lasiri, Senakerib. (Izai 36:1-4, 20; 37:36-38) Avek letan, bann Babilonnyen ti kaptir Lasiri, me de lerwa Babilonn ki ti orgeye ti osi ganny imilye. En zour Lerwa Belsatsar ti fer en festen, kot li ek son bann envite rwayal ti bwar diven dan bann lakoup ki zot ti pran dan tanp Zeova, e zot ti pe loue bann bondye Babilonn. En sel kou, lanmen en zonm ti aparet e ti ekrir en mesaz lo miray. Zot ti demann profet Danyel pour eksplik sa mesaz misterye e i ti rapel Belsatsar: “Tandis ki ou, O lerwa, Bondye Tre O li menm ti donn Neboukadnetsar ou papa rwayonm . . . Me ler son leker ti vin orgeye . . . , i ti ganny tire lo tronn son rwayonm, e son dinite ti ganny arase avek li. . . . Tandis ki ou, son garson Belsatsar, ou pa’n abes ou leker, menm si ou ti konn tousala.” (Danyel 5:3, 18, 20, 22) Sa menm zour swar, larme Med ek Pers ti kaptir Babilonn, e zot ti touy Belsatsar.—Danyel 5:30, 31.
8. Ki mannyer Zeova ti azir avek diferan dimoun orgeye?
8 Mazin osi lezot zonm orgeye ki ti mepriz pep Zeova: Golyat sa zean Filisten, Amann ki ti Premye Minis Pers, ek Lerwa Erod Agripa ki ti diriz provens Zide. Akoz zot lorgey, Bondye ti fer sa trwa zonm mor avek laont. (1 Samyel 17:42-51; Ester 3:5, 6; 7:10; Akt 12:1-3, 21-23) Fason ki Zeova ti azir avek sa bann zonm orgeye i aksantye sa laverite: “Avan maler i annan lorgey, e avan fo pa en lespri arogan.” (Proverb 16:18) Wi, napa okenn dout ki “Bondye i opoz bann ki annan lorgey.”—Zak 4:6.
9. Konman bann lerwa Tir ti vin bann tret?
9 Kontrerman avek dirizan orgeye Lezip, Lasiri, ek Babilonn, en serten letan lerwa Tir ti ed pep Bondye. Pandan renny Lerwa David ek Salomon, i ti fourni bann travayer kalifye ek materyo pour konstriksyon lakour Lerwa ek tanp Bondye. (2 Samyel 5:11; 2 Kronik 2:11-16) Malerezman, avek letan, bann lerwa Tir ti tourn kont pep Zeova. Akoz zot ti azir koumsa?—Psonm 83:3-7; Yoel 3:4-6; Amos 1:9, 10.
“Ou Leker ti vin orgeye”
10, 11. (a) Lekel ki nou kapab konpar avek bann Lerwa Tir? (b) Kwa ki ti sanz latitid bann dimoun Tir anver Izrael?
10 Zeova ti enspir son profet, Ezekyel, pour denons e kondann bann lerwa Tir. Sa mesaz ki ti ganny adrese avek “lerwa Tir” i kontyen lekspresyon ki byen dekrir bann lerwa Tir ek sa premye tret, Satan, ki pa’n reste dan laverite. (Ezekyel 28:12; Zan 8:44) En serten letan, Satan ti en kreatir spirityel fidel dan lorganizasyon Zeova dan lesyel. Zeova ti endike atraver Ezekyel akoz bann Lerwa Tir ek Satan ti sanze e rebele:
11 “Dan Edenn, zarden Bondye, ou ti ete. Ou ti kouver avek tou bann pyer presye . . . Ou ti sa seriben swazir ki pe kouver . . . Depi ou ti ganny kree ou ti azir dan en fason san defo ziska ki lemal ti ganny trouve dan ou. Akoz labondans ou lavant zot ti ranpli ou avek vyolans, e ou ti konmans fer pese. Mon pou . . . detrir ou, O seriben ki pe kouver . . . Ou leker ti vin orgeye akoz ou labote. Ou ti gat ou lasazes akoz ou labote ki ti pe reyonnen.” (Ezekyel 28:13-17) Wi, lorgey ti pous bann lerwa Tir pour azir avek vyolans kont pep Zeova. Lavil Tir ti vin en sant komers tre ris e renonmen pour son bann zoli prodwi. (Izai 23:8, 9) Bann lerwa Tir ti devlop en tro gran lopinyon lo zot lekor e zot ti konmans opoz pep Bondye.
12. Kwa ki ti fer Satan vin en tret, e ki i pe kontinyen fer?
12 Pareyman, en serten moman sa kreatir spirityel ki ti vin Satan ti annan sa lasazes neseser pour akonpli nenport travay ki Bondye ti donn li. Olye rekonesan, i ti “gonfle avek lorgey” e i ti konmans pa kontan fason dirize Bondye. (1 Timote 3:6) I ti mazin sitan en kantite lo son lekor ki i ti konmans anvi Adan ek Ev ador li. Sa move dezir ti konmans pran rasin dan li e i ti donn nesans pese. (Zak 1:14, 15) Satan ti anbet Ev pour manz fri sa sel pye dibwa ki Bondye ti’n defann. Apre, Satan ti servi Ev pour fer Adan manz sa fri ki zot ti napa drwa manze. (Zenez 3:1-6) Alor sa premye koup imen ti rezet drwa Bondye pour diriz zot, e an realite zot ti vin adorater Satan. Lorgey Satan napa okenn limit. I’n esey anbet tou kreatir entelizan ki swa dan lesyel oubyen lo later, enkli Zezi Kri, pour ador li e alor rezet lotorite Zeova.—Matye 4:8-10; Revelasyon 12:3, 4, 9.
13. Ki rezilta lorgey?
13 Ou kapab vwar alor ki Satan ki lorizin lorgey. Lorgey i lakoz prensipal par deryer pese, soufrans ek koripsyon dan sa lemonn ozordi. Konman bondye sa lemonn mesan, Satan i kontinyen ankouraz bann santiman lafyerte ki pa apropriye ek lorgey. (2 Korentyen 4:4) I konnen ki son letan i kourt, alor i fer lager kont bann vre Kretyen. Son bi se pour detourn zot avek Bondye, fer zot vin egois, vantar e arogan. Labib ti predir ki sa bann tre egois ti pou komen dan sa “bann dernyen zour.”—2 Timote 3:1, 2, Revelasyon 12:12, 17.
14. Dapre ki lareg Zeova i azir avek son bann kreatir entelizan?
14 Zezi Kri li i ti devwal avek fransiz bann move rezilta ki lorgey Satan in anmennen. Dan omwen trwa lokazyon e dan prezans bann lennmi ki ti krwar zot tro zis, Zezi ti fer resorti sa lareg ki Zeova i servi pour azir avek limanite: “Sa enn ki rod grander pou ganny abese, e sa enn ki abes son lekor pou vin enportan.”—Lik 14:11; 18:14; Matye 23:12.
Fer atansyon ki ou Leker pa vin orgeye
15, 16. Kwa ki ti fer Agar vin orgeye?
15 Petet ou’n remarke ki sa bann legzanp lorgey ki nou’n mansyonnen i enplik bann zonm enportan. Eski sa i vedir ki bann dimoun ordiner pa kapab vin orgeye? Sa i pa ditou leka. Annou vwar en lensidan ki ti ariv dan lakour Abraam. Sa letan sa patrias ti napa okenn garson pour vin son zeritye, e son madanm Sara, ti’n sot laz fer zanfan. Sa letan i ti normal pour en zonm ki ti trouv li dan sitiasyon Abraam pran en dezyenm madanm e fer zanfan. Bondye ti permet sa kalite maryaz akoz i pa ti ankor son ler pour reetablir son standar orizinal lo maryaz parmi bann vre adorater.—Matye 19:3-9.
16 Avek lankourazman son madanm, Abraam ti dakor pour fer en zanfan avek Agar ki ti servant Sara e i ti en Ezipsyen. Agar ti vin son dezyenm madanm e tonm ansent, Abraam ti kapab ganny en zeritye. Agar ti’n devret annan en profon lapresyasyon pour sa gran privilez ki i ti’n gannyen. Okontrer, i ti les son leker vin orgeye. Labib i rakonte: “Ler i ti konnen ki i ti ansent, i ti konmans mepriz son met Sara.” Sa latitid ti telman kree dezakor dan lakour Abraam ki Sara ti fer Agar ale. Me ti annan en solisyon pour sa problenm. Lanz Bondye ti konsey Agar: “Retourn kot ou met Sara e abes ou devan li.” (Zenez 16:4, 9) Aparaman, Agar ti swiv sa konsey, i ti sanz son latitid anver Sara, e i ti vin zanset en gran kantite dimoun.
17, 18. Akoz nou tou nou bezwen fer atansyon lorgey?
17 Legzanp Agar i montre ki ler sitiasyon en dimoun i sanz pour le meyer, sa i kapab fer li vin orgeye. Leson i ki menm en Kretyen ki’n annan en bon leker pour servi Bondye i kapab vin orgeye apre ki i’n ganny larises oubyen lotorite. Sa latitid i kapab osi devlope si lezot i felisit li pour son reisit, lasazes, oubyen abilite. Wi, en Kretyen i bezwen veye pour pa les lorgey devlope dan son leker. Sa i sirtou neseser si i reisi dan sa ki i pe fer oubyen si i pe ganny plis responsabilite.
18 Fason ki Bondye i konsider sa move tre i rezon pli enportan pour nou evit lorgey. Son Parol i dir: “Lizye orgeye ek en leker arogan, ki lalanp bann mesan, i pese.” (Proverb 21:4) I enteresan fer resorti ki Labib i averti sirtou bann Kretyen “ki posed larises dan sa monn” pour “pa annan lorgey.” (1 Timote 6:17, Deterononm 8:11-17) Bann Kretyen ki pa ris i devret evite devlop en ‘lanvi pour keksoz dimoun’ e zot devret mazinen ki lorgey i kapab devlope dan nenport ki dimoun ki swa i ris oubyen pov.—Mark 7:21-23; Zak 4:5.
19. Dan ki fason Ouziya ti gat son bon repitasyon?
19 Lorgey ansanm avek lezot move tre i kapab gat nou bon relasyon avek Zeova. Par egzanp, reflesir ler Lerwa Ouziya ti fek konmans dirize. Labib i dir: “I ti kontinyen fer sa ki byen dan lizye Zeova . . . I pa ti arete fer zefor pour rod Bondye . . . e, dan letan ki i ti pe rod Zeova, sa vre Bondye ti fer li prospere.” (2 Kronik 26:4, 5) Me malerezman, Lerwa Ouziya ti gat son bon repitasyon akoz “lorgey ti devlope dan son leker ziska en pwen ki ti fer son maler.” I ti’n telman devlop en gran lopinyon lo son lekor ki i ti antre dan tanp pour ofer lansan. Ler bann pret ti averti li pour pa fer sa, “Ouziya ti ankoler.” Pour fini kont, Zeova ti frap li avek lalep e zour ki i ti mor i ti nepli annan faver Bondye.—2 Kronik 26:16-21.
20. (a) Ki mannyer Lerwa Izkiya ti met an danze son bon repitasyon? (b) Ki nou pou egzaminen dan nou lot lartik?
20 Lerwa Izkiya li ti vreman diferan. En serten moman, sa lerwa ti pros pour gat son bon repitasyon akoz “son leker ti vin orgeye.” Erezman, Izkiya ti “abes son leker orgeye” e i ti reganny faver Bondye. (2 Kronik 32:25, 26) Remarke ki limilite ti remed pour lorgey Izkiya. Wi, limilite i tou lekontrer avek lorgey. Alor, dan nou lot lartik, nou pou egzaminen ki mannyer nou kapab devlop e mentenir limilite Kretyen.
21. Ki bann Kretyen ki annan limilite i kapab ekspekte pou arive byento?
21 Me annou pa zanmen oubliy tou sa bann move konsekans ki lorgey in anmennen. Lefe ki “Bondye i opoz bann ki annan lorgey,” annou determinen pour rezet tou santiman lafyerte ki pa apropriye. Ler nou fer zefor pour vin bann Kretyen ki annan limilite, nou kapab annan lespwar pour sirviv gran zour Bondye, kot bann ki orgeye pou ganny retire lo later. ‘Sa moman bann zonm orgeye pou ganny imilye, bann ki met zot lo en oter pou ganny abese; e Zeova tousel pou ganny met anler sa zour.’—Izai 2:17.
Pwen Refleksyon
• Ki mannyer ou pou dekrir en dimoun orgeye?
• Ki lorizin lorgey?
• Kwa ki kapab fer en dimoun vin orgeye?
• Akoz nou bezwen fer atansyon lorgey?
[Kestyon]
[Portre lo paz 15]
Lorgey Faraon ti fer li ganny imilye
[Portre lo paz 16]
Izkiya ti abes li e i ti ganny ankor faver Bondye